Skip to main content

ପରିବେଶ ପାଇଁ ସ୍ୱର ଉତ୍ତୋଳନ

କେନ୍ଦ୍ର ସରକାରଙ୍କ ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରାଳୟ ଦ୍ୱାରା ନିକଟରେ ପରିବେଶଗତ ପ୍ରଭାବ ଆକଳନ ବା ଏନଭାଇରନମେଣ୍ଟାଲ ଇମ୍ପାକ୍ଟ ଆସେସମେଣ୍ଟ (ଇଆଇଏ) ଅଧିସୂଚନାକୁ ସଂଶୋଧନ କରିବା ପାଇଁ ପ୍ରସ୍ତୁତ ଚିଠାଟି ପରିବେଶବିଦ ଓ ଜନ ସାଧାରଣଙ୍କ ବିରୋଧର ସମ୍ମୁଖୀନ ହୋଇଛି । ସରକାର ଶିଳ୍ପାନୁଷ୍ଠାନ ଓ ପୁଞ୍ଜିପତିଙ୍କ ସ୍ୱାର୍ଥକୁ ଅଧିକ ଗୁରୁତ୍ୱ ଦେଇ ପରିବେଶର ସୁରକ୍ଷା ପ୍ରତି ତାଙ୍କ କର୍ତ୍ତବ୍ୟରେ ଅବହେଳା କରୁଛନ୍ତି ବୋଲି କେହି କେହି ଅଭିଯୋଗ କରୁଛନ୍ତି । ତେବେ ଏହି ଚିଠା ଅଧିସୂଚନାରେ କ’ଣ ଏମିତି ରହିଛି ଯାହା ପରିବେଶ ପ୍ରତି ବିପଦ ସୃଷ୍ଟି କରି ପାରେ, ସେ ସମ୍ପର୍କରେ ଜନ ସଚେତନତା ବୃଦ୍ଧିର ଆବଶ୍ୟକତା ରହିଛି ।
  
ପ୍ରସ୍ତାବିତ ଶିଳ୍ପ ଓ ଭିତ୍ତିଭୂମି ପ୍ରକଳ୍ପଗୁଡିକର ସାମାଜିକ, ଅର୍ଥନୈତିକ ତଥା ପରିବେଶ ଉପରେ ପଡିବାକୁ ଯାଉଥିବା ପ୍ରଭାବକୁ ଆକଳନ କରିବା ଇଆଇଏ ପ୍ରକ୍ରିୟାର ମୂଳ ଲକ୍ଷ୍ୟ । ଏ ସମ୍ପର୍କରେ ପ୍ରଥମେ ୧୯୬୯ ମସିହାରେ ଆମେରିକାରେ ଏକ ଜାତୀୟ ପରିବେଶ ନୀତି ପ୍ରଣୀତ ହୋଇଥିଲା । ତେବେ ବିଶ୍ୱ ସ୍ତରରେ ପରିବେଶ ସୁରକ୍ଷା ବିଷୟକୁ ଗୁରୁତ୍ୱ ଦେଇ ନିରନ୍ତର ବିକାଶକୁ ସୁନିଶ୍ଚିତ କରିବାର ଦାୟିତ୍ୱ ଜାତିସଂଘ ପରିବେଶ କାର୍ଯ୍ୟକ୍ରମ (ୟୁଏନଇପି) ଉପରେ ନ୍ୟସ୍ତ । ବର୍ତ୍ତମାନ ଭାରତ ସମେତ ବିଶ୍ୱର ଶହେରୁ ଅଧିକ ଦେଶ ପରିବେଶ ସୁରକ୍ଷାକୁ ଗୁରୁତ୍ୱ ଦେଇ ପ୍ରକଳ୍ପ କାର୍ଯ୍ୟକାରୀ କରିବା ପୂର୍ବରୁ ଇଆଇଏକୁ ବାଧ୍ୟତାମୂଳକ କରିଛନ୍ତି । ଭାରତରେ ଯୋଜନା କମିଶନ ପ୍ରଥମେ ୧୯୭୬-୭୭ରେ ନଦୀ-ଉପତ୍ୟକା ପ୍ରକଳ୍ପଗୁଡିକର ପରିବେଶ ଉପରେ ପ୍ରଭାବକୁ ଆକଳନ କରିବା ପାଇଁ ବିଜ୍ଞାନ ଓ ପ୍ରଯୁକ୍ତି ମନ୍ତ୍ରାଳୟକୁ ପରାମର୍ଶ ଦେଇଥିଲେ । ତେବେ ୧୯୮୪ ରେ ଭୋପାଳରେ ୟୁନିଅନ କାର୍ବାଇଡ କାରଖାନାରେ ଗ୍ୟାସ ଲିକ ଦୁର୍ଘଟଣାର ବିଭୀଷିକାରେ ହଜାର ହଜାର ଲୋକ ପ୍ରତ୍ୟକ୍ଷ ବା ପରୋକ୍ଷ ଭାବେ ପ୍ରଭାବିତ ହେବା ପରେ ଜନାକ୍ରୋଶ ବୃଦ୍ଧି ପାଇ କେନ୍ଦ୍ର ସରକାରଙ୍କ ଉପରେ ଚାପ ପଡିବାରୁ ପରିବେଶ ସୁରକ୍ଷା ଆଇନ, ୧୯୮୬ ପ୍ରଣୀତ ହୋଇଥିଲା । ଏଥିରେ ପ୍ରକଳ୍ପ ପ୍ରତିଷ୍ଠା ପୂର୍ବରୁ ପରିବେଶଗତ ପ୍ରଭାବ ଆକଳନ ବାଧ୍ୟତାମୂଳକ ଓ ବୈଧାନିକ କରାଗଲା । ଏହି ଆଇନ ସହ ସମ୍ପର୍କିତ ଅନ୍ୟ ଆଇନଗୁଡିକ ହେଲା, ବନ୍ୟଜନ୍ତୁ (ସଂରକ୍ଷଣ) ଆଇନ (୧୯୭୨), ଜଳ ଆଇନ (୧୯୭୪), ବାୟୁ (ପ୍ରଦୂଷଣ ନିବାରଣ ଓ ନିୟନ୍ତ୍ରଣ) ଆଇନ (୧୯୮୧) ଓ ଜୈବ ବିବିଧତା ଆଇନ (୨୦୦୨) । ପରିବେଶ ସୁରକ୍ଷା ଆଇନ, ୧୯୮୬ ଆଧାରରେ କେନ୍ଦ୍ର ସରକାର ପ୍ରଥମେ ୧୯୯୪ରେ ଇଆଇଏ ଅଧିସୂଚନା ଜାରି କରିଥିଲେ । ଫଳରେ ଆଇନର ଅନୁଚ୍ଛେଦ ୧ରେ ଥିବା ପ୍ରକଳ୍ପଗୁଡିକର ସମ୍ପ୍ରସାରଣ ଓ ପ୍ରତିଷ୍ଠା ପାଇଁ ପରିବେଶ ମଞ୍ଜୁରୀ ବାଧ୍ୟତାମୂଳକ ହେଲା । ଏହା ପରେ ୨୦୦୬ ମସିହାରେ କେନ୍ଦ୍ର ସରକାରଙ୍କ ଦ୍ୱାରା ଏକ ନୂଆ ଇଆଇଏ ଅଧିସୂଚନା ଜାରି ହେଲା, ଯାହା ଏ ଯାଏଁ ବଳବତ୍ତର ରହିଛି । ତଦନୁସାରେ ଖଣି, ତାପଜ ବିଦ୍ୟୁତ କେନ୍ଦ୍ର, ନଦୀ ଉପତ୍ୟକା, ଭିତ୍ତିଭୂମି ( ରାସ୍ତା, ରାଜପଥ, ପୋତ, ବନ୍ଦର ଓ ବିମାନବନ୍ଦର), ବଡ ଧରଣର ଆବାସ ପ୍ରକଳ୍ପ (ରିଏଲ ଇଷ୍ଟେଟ) ଏବଂ ଶିଳ୍ପ ପ୍ରକଳ୍ପ ପ୍ରତିଷ୍ଠା ପାଇଁ ପରିବେଶ ମଞ୍ଜୁରୀ ଅନିବାର୍ଯ୍ୟ ହେଲା । ଏବେ ଏହା ସ୍ଥାନରେ ପରିବେଶ ମନ୍ତ୍ରାଳୟ ତରଫରୁ ଏକ ନୂଆ ପରିବେଶଗତ ପ୍ରଭାବ ଆକଳନ ଅଧିସୂଚନା, ୨୦୨୦ ଜାରି କରିବାକୁ ସ୍ଥିର ହୋଇ ଜନ ସାଧାରଣଙ୍କ ମତାମତ ପାଇଁ ତା’ର ଚିଠା ମାର୍ଚ୍ଚ ୨୩, ୨୦୨୦ରେ ଜାରି ହୋଇଛି । ମତାମତ ଦାଖଲର ଶେଷ ତାରିଖ ୩୦ ଜୁନ ଥିବା ବେଳେ ଦିଲ୍ଲୀ ହାଇକୋର୍ଟଙ୍କ ହସ୍ତକ୍ଷେପ ପରେ ତାହା ଅଗଷ୍ଟ ୧୧, ୨୦୨୦ ଯାଏଁ ଘୁଞ୍ଚାଇ ଦିଆଯାଇଛି ।

ଏକ ପରିବେଶ ଆକଳନ କମିଟି (ଇଏସି)ଙ୍କ ଦ୍ୱାରା ଏହି ପରିବେଶଗତ ପ୍ରଭାବ ଆକଳନ (ଇଆଇଏ) ପ୍ରକ୍ରିୟାଟି ସମ୍ପାଦିତ ହୋଇଥାଏ । ଏଥିରେ ବୈଜ୍ଞାନିକଙ୍କଠାରୁ ଆରମ୍ଭ କରି ପ୍ରକଳ୍ପ ପରିଚାଳନା ସହ ସମ୍ପୃକ୍ତ ବିଶେଷଜ୍ଞମାନେ ସଭ୍ୟ ଭାବେ କାର୍ଯ୍ୟ କରିଥାଆନ୍ତି । କେଉଁ କେଉଁ ଦିଗ ଓ ବିଷୟ ଇଆଇଏ ଅଧ୍ୟୟନର ଅନ୍ତର୍ଭୁକ୍ତ ହେବ, ତାହା ଇଏସି ନିର୍ଦ୍ଧାରଣ କରି ଏକ ପ୍ରାଥମିକ ରିପୋର୍ଟ ପ୍ରସ୍ତୁତ କରିଥାଆନ୍ତି । ସେହି ରିପୋର୍ଟ ଭିତ୍ତିରେ ଜନ ପରାମର୍ଶ ଓ ଶୁଣାଣି ଆରମ୍ଭ ହୋଇଥାଏ । ଏଥିରେ ପ୍ରକଳ୍ପ ଦ୍ୱାରା ପ୍ରଭାବିତ ହେବାକୁ ଯାଉଥିବା ଲୋକଙ୍କୁ ଗୁରୁତ୍ୱ ଦିଆଯାଇ ସେମାନଙ୍କଠାରୁ ଆପତ୍ତି ଓ ଅଭିଯୋଗମାନ ଶୁଣାଯିବା ସହ ଅନ୍ୟମାନଙ୍କ ମତାମତକୁ ବି ଶୁଣା ଯାଇଥାଏ । ଏଗୁଡିକୁ ଧ୍ୟାନରେ ରଖି କମିଟି ପ୍ରସ୍ତୁତ କରିଥିବା ଚୂଡାନ୍ତ ରିପୋର୍ଟ ସାଧାରଣତଃ ମନ୍ତ୍ରାଳୟ ଦ୍ୱାରା ଗୃହୀତ ହୋଇଥାଏ । ତଦନୁସାରେ ପ୍ରକଳ୍ପକୁ ପରିବେଶ ମଞ୍ଜୁରୀ ମିଳିଥାଏ ବା ପ୍ରକଳ୍ପରେ ସଂଶୋଧନ କରିବାକୁ କୁହା ଯାଇଥାଏ ବା ପ୍ରକଳ୍ପଟି ସମ୍ପୂର୍ଣ୍ଣ ରୂପେ ରଦ୍ଦ ହୋଇଥାଏ । ଅର୍ଥାତ୍, ପ୍ରକଳ୍ପ ଆରମ୍ଭ ହେବା ପୂର୍ବରୁ ଇଆଇଏ ରିପୋର୍ଟ ଆଧାରରେ ପରିବେଶ ମଞ୍ଜୁରୀ ମିଳିଲା ପରେ ଯାଇ ପ୍ରକଳ୍ପର କାମ ଆରମ୍ଭ ହୋଇ ପାରିବ, ତା’ ଆଗରୁ ନୁହେଁ । କାରଣ ଅନେକ ସମୟରେ ପ୍ରକଳ୍ପ ଦ୍ୱାରା ପରିବେଶର ଏପରି କ୍ଷତି ସାଧିତ ହୋଇଥାଏ, ଯାହା ଆଉ ଭରଣା କରି ହୋଇ ନ ଥାଏ ।

ଚିଠା ଅଧିସୂଚନାର ଅନେକ ଦିଗ ସମାଲୋଚିତ ହେଉଥିଲେ ବି ଏଥିରେ ଥିବା କାର୍ଯ୍ୟୋପରାନ୍ତ (ଏକ୍ସ-ପୋଷ୍ଟ ଫ୍ୟାକ୍ଟୋ) ପରିବେଶ ମଞ୍ଜୁରୀ ପ୍ରାବଧାନଟି ସର୍ବାଧିକ ସମାଲୋଚିତ ହେଉଛି । ଏହି ପ୍ରାବଧାନ ଅନୁସାରେ ପରିବେଶ ମଞ୍ଜୁରୀ ନ ଥାଇ ମଧ୍ୟ ପ୍ରକଳ୍ପ ଆରମ୍ଭ କରି ତାକୁ ଚାଲୁ ରଖି ହେବ ଓ ପରେ ଆବଶ୍ୟକୀୟ ଜରିମାନା ଦେଇ ତାକୁ ନିୟମସଙ୍ଗତ କରିହେବ । ଏହି ଚିଠା ଅଧିସୂଚନା ଗୃହୀତ ହେଲେ ଶିଳ୍ପାନୁଷ୍ଠାନମାନେ ପରିବେଶ ଆଇନ ଉଲ୍ଲଂଘନ କରିବାକୁ ପ୍ରୋତ୍ସାହିତ ହେବେ । ପରେ ନିଜ ତରଫରୁ ଘୋଷଣା କରି ଜରିମାନା ଦେବା ବ୍ୟବସ୍ଥାଟି ଆଇନସମ୍ମତ ହୋଇଗଲେ ପରିବେଶ ଆଇନକୁ ହେୟ ଜ୍ଞାନ କରି ତାକୁ ଉଲ୍ଲଂଘନ କରିବାର ମାନସିକତା ବୃଦ୍ଧି ପାଇବ । ଏହା କେବଳ ପରିବେଶ ଆଇନର ନୁହେଁ ବରଂ ‘ଆଇନର ଶାସନ’ (ରୁଲ୍ ଅଫ ଲ’)ର ବିରୁଦ୍ଧାଚରଣ କରୁଛି ବୋଲି ମତ ପ୍ରକାଶ ପାଉଛି । ଉଲ୍ଲେଖଯୋଗ୍ୟ, ଏହି ଧରଣର ଉଲ୍ଲଂଘନଗୁଡିକୁ ନିୟମସଙ୍ଗତ କରିବା ପାଇଁ ୨୦୧୭ ମସିହାରେ ପରିବେଶ ମନ୍ତ୍ରାଳୟ ତରଫରୁ ଏକ ‘ସର୍ବକ୍ଷମା ଯୋଜନା’ ଘୋଷଣା କରାଯିବା ପରେ ଶହ ଶହ ଆଇନ ଉଲ୍ଲଂଘନକାରୀ ତାହାର ଲାଭ ଉଠାଇଥିଲେ । ପରିବେଶଗତ ପ୍ରଭାବକୁ ଅଣଦେଖା କଲେ ତା’ର ଯେ କେତେ ଅଧିକ ମୂଲ୍ୟ ଦେବାକୁ ହୋଇଥାଏ ତାହା ନିକଟରେ ପରିବେଶ ମଞ୍ଜୁରୀ ପାଇ ନ ଥିବା ବିଶାଖାପାଟଣାସ୍ଥିତ ଏକ ଶିଳ୍ପାନୁଷ୍ଠାନ ଏଲ ଜି ପଲିମର୍ସରେ ଗ୍ୟାସ ଲିକ ଦୁର୍ଘଟଣାରେ ୧୨ ଜଣ ଲୋକଙ୍କ ପ୍ରାଣହାନିରୁ ସ୍ପଷ୍ଟ । ସେହିପରି ସର୍ବକ୍ଷମା ଯୋଜନା ଅନ୍ତର୍ଗତ ଏକ ମାମଲା, ‘ଆଲେମ୍ୱିକ ଫାର୍ମାସିଉଟିକାଲ୍ସ ଲିଃ ବନାମ ରୋହିତ ପ୍ରଜାପତି ଓ ଅନ୍ୟମାନେ’, ରେ ସୁପ୍ରିମକୋର୍ଟ ଅପ୍ରେଲ ୧, ୨୦୨୦ରେ ତାଙ୍କ ରାୟ ଶୁଣାଇ କହିଛନ୍ତି ଯେ କାର୍ଯ୍ୟୋପରାନ୍ତ (ଏକ୍ସ-ପୋଷ୍ଟ ଫ୍ୟାକ୍ଟୋ) ପରିବେଶ ମଞ୍ଜୁରୀ ଆଇନ ଦୃଷ୍ଟିରୁ ଅରକ୍ଷଣୀୟ (ଅନସସଟେନେବଲ) ଓ ଏ ଭଳି ଏକ ଧାରଣାକୁ ଅନୁମତି ପ୍ରଦାନ କରିବା ଅର୍ଥ ପରିବେଶର କ୍ଷତି ସାଧନ କରିବା । ସୁପ୍ରିମକୋର୍ଟଙ୍କ ଅନୁସାରେ, “ପରିବେଶ ଆଇନ ଏକ୍ସ-ପୋଷ୍ଚ ଫ୍ୟାକ୍ଟୋ ଧାରଣାର ସମର୍ଥନ କରି ପାରିବ ନାହିଁ । ତଦ୍ଦ୍ୱାରା ଏହା ଉଭୟ ‘ସତର୍କତାମୂଳକ ନୀତି’ (ପ୍ରିକସନାରୀ ପ୍ରିନ୍ସିପଲ) ଓ ‘ନିରନ୍ତର ବିକାଶ’ (ସସଟେନେବଲ ଡେଭଲପମେଣ୍ଟ)ର ବିରୁଦ୍ଧାଚରଣ କରିବ ।” କହିବା ବାହୁଲ୍ୟ, ପରିବେଶଗତ ପ୍ରଭାବ ଆକଳନ ତର୍କର ଆଧାର ‘ସତର୍କତାମୂଳକ ନୀତି’ ଅବଲମ୍ୱନ ଉପରେ ପର୍ଯ୍ୟବସିତ, କାରଣ ଅନେକ କ୍ଷେତ୍ରରେ ପରିବେଶ ପ୍ରତି ହେଉଥିବା କ୍ଷତି ଅପୂରଣୀୟ । ଚିଠା ଅଧିସୂଚନାରେ ଥିବା ଏକ୍ସ-ପୋଷ୍ଚ ଫ୍ୟାକ୍ଟୋ ଧାରଣାଟି ପୂର୍ବୋକ୍ତ ‘ସର୍ବକ୍ଷମା ଯୋଜନା’କୁ ଆଇନସମ୍ମତ ଓ ସ୍ଥାୟୀ କରିବାର ଅପଚେଷ୍ଟା ବୋଲି ବିଚାର କରା ଯାଇପାରେ । ଅବଶ୍ୟ ସୁପ୍ରିମକୋର୍ଟଙ୍କ ଏହି ରାୟ ପରେ ଏକ୍ସ-ପୋଷ୍ଟ ଫ୍ୟାକ୍ଟୋ ମଞ୍ଜୁରୀ ପ୍ରସ୍ତାବରୁ ଓହରି ଆସିବା ଲାଗି ହୁଏତ ସରକାରଙ୍କ ଉପରେ ଅଧିକ ଚାପ ପଡିପାରେ ।

ଚିଠା ଅଧିସୂଚନାରେ ବିଭିନ୍ନ ଭାବେ ପ୍ରତିକ୍ରିୟା ସମୟ (ରେସପନ୍ସ ଟାଇମ)କୁ ହ୍ରାସ କରି ଜନଶୁଣାଣି ଓ ପରାମର୍ଶ ପ୍ରକ୍ରିୟାଟିକୁ ଦୁର୍ବଳ କରି ଦେବାର ପ୍ରୟାସ ହୋଇଛି । ପୂର୍ବରୁ ମଧ୍ୟ ପ୍ରତିରକ୍ଷା ଓ ଦେଶର ସୁରକ୍ଷା ସହ ସମ୍ପର୍କିତ କୌଶଳଗତ (ଷ୍ଟ୍ରାଟେଜିକ) ପ୍ରକଳ୍ପଗୁଡିକ ପାଇଁ ଜନଶୁଣାଣି ହେଉ ନଥିଲା । ଏଣିକି ଏହି ପ୍ରକଳ୍ପଗୁଡିକ ସମେତ ଜଳସେଚନର ଆଧୁନିକୀକରଣ, ଅନ୍ତର୍ଦେଶୀୟ ଜଳପଥ ଭଳି ୪୦ ପ୍ରକାର ପ୍ରକଳ୍ପ ପାଇଁ କୌଣସି ଜନଶୁଣାଣି ହେବନାହିଁ । ଏଥିରେ ନୂଆ କରି ‘ଅନ୍ୟ କୌଶଳଗତ ପ୍ରକଳ୍ପ’ (ଅଦର ଷ୍ଟ୍ରାଟେଜିକ ପ୍ରୋଜେକ୍ଟ)ର ଉଲ୍ଲେଖ ରହିଛି । ଅର୍ଥାତ୍, ସରକାର ଚାହିଁଲେ ଯେ କୌଣସି ପ୍ରକଳ୍ପକୁ ‘ଅନ୍ୟ କୌଶଳଗତ ପ୍ରକଳ୍ପ’ ବୋଲି ଘୋଷଣା କରି ପାରିବେ, ଯଦ୍ଦ୍ୱାରା ସେହି ପ୍ରକଳ୍ପଗୁଡିକୁ ଜନଶୁଣାଣି ବାହାରେ ରଖା ଯାଇପାରିବ । ପ୍ରକଳ୍ପଗୁଡିକର ବର୍ଗୀକରଣ କରାଯାଇ ‘ବି2’ ବର୍ଗରେ ଥିବା ପ୍ରକଳ୍ପଗୁଡିକୁ ଜନଶୁଣାଣିରୁ ବାହାରେ ରଖାଯାଇଛି । ଫଳରେ ଏହି ପ୍ରକଳ୍ପଗୁଡିକରେ କ୍ଷତିଗ୍ରସ୍ତ ହେଉଥିବା ଲୋକମାନଙ୍କର ଆପତ୍ତିକୁ ଶୁଣାଯିବାର ଅବକାଶ ରହିବ ନାହିଁ । ଜନଶୁଣାଣିର ସମୟ ସୀମାକୁ ୪୫ ଦିନରୁ କମାଇ ୪୦ ଦିନ କରି ଦିଆଯାଇଛି । ସେହିପରି ଜନତାଙ୍କଠାରୁ ଆପତ୍ତି ଅଭିଯୋଗ ଗ୍ରହଣ କରିବାର ସମୟ ସୀମାକୁ ୩୦ ଦିନରୁ କମ କରି ୨୦ ଦିନ କରି ଦିଆଯାଇଛି । ସାଧାରଣ ଲୋକଙ୍କ ପକ୍ଷରେ ଶହ ଶହ ପୃଷ୍ଠାର ପ୍ରକଳ୍ପକୁ ପଢି, ବୁଝି, ଆପତ୍ତି କରିବା ପାଇଁ ଯଥେଷ୍ଟ ସମୟର ଆବଶ୍ୟକତା ହୋଇଥାଏ, ଆଉ ସେହି ସମୟ ସୀମାକୁ କମ କରିବା ଅର୍ଥ ଜନ ସାଧାରଣଙ୍କ ସହ ପରାମର୍ଶ ଓ ଶୁଣାଣି ପ୍ରକ୍ରିୟାକୁ ନେଇ ସରକାର ସମ୍ୱେଦନଶୀଳ ନୁହନ୍ତି ଓ କେବଳ ଏକ ଔପଚାରିକତା ପୂରଣ କରୁଛନ୍ତି ବୋଲି ବାର୍ତ୍ତାଟିଏ ଯାଉଛି । ଅନେକ କ୍ଷେତ୍ରରେ ପରିବେଶ ମଞ୍ଜୁରୀ ବୈଧତାର ସମୟ ସୀମାକୁ ବୃଦ୍ଧି କରି ଦିଆଯାଇଛି । ଏଣିକି ମାଇନିଂ ପ୍ରକଳ୍ପର ବୈଧତା ୩୦ ବର୍ଷରୁ ବୃଦ୍ଧି ପାଇ ୫୦ ବର୍ଷ ହୋଇଥିବା ବେଳେ ନଦୀ ଉପତ୍ୟକା ପ୍ରକଳ୍ପର ବୈଧତା ୧୦ ବର୍ଷରୁ ୧୫ ବର୍ଷକୁ ବୃଦ୍ଧି ପାଇଛି । ସେହିପରି ଓ ଅନ୍ୟ ପ୍ରକଳ୍ପଗୁଡିକର ବୈଧତା ୫ ବର୍ଷରୁ ବଢାଇ ୧୦ ବର୍ଷ କରି ଦିଆଯାଇଛି । ଉଲ୍ଲେଖଯୋଗ୍ୟ, ଏନଡିଏ ଶାସନ କାଳରେ ଦୁଲାଇ ୨୦୧୪ରୁ ଅପ୍ରେଲ ୨୦୨୦ ମଧ୍ୟରେ ପରିବେଶ ମଞ୍ଜୁରୀ ପାଇଁ ପ୍ରାପ୍ତ ୨୫୯୨ଟି ପ୍ରକଳ୍ପ ମଧ୍ୟରୁ ୨୨୫୬ଟି, ଅର୍ଥାତ୍ ପ୍ରାୟ ୮୭ ପ୍ରତିଶତକୁ ମଞ୍ଜୁରୀ ପ୍ରଦାନ କରା ଯାଇସାରିଛି, ଯାହା ୟୁପିଏ ସରକାରଙ୍କ ଏ ବାବଦରେ ପ୍ରଦର୍ଶନ ତୁଳନାରେ ଯଥେଷ୍ଟ ଭଲ । ଅବଶ୍ୟ ସେଥିପାଇଁ ପରିବେଶ ସୁରକ୍ଷାକୁ କେତେ ଦୂର ଜଳାଞ୍ଜଳି ଦିଆ ଯାଇଛି କି ନାହିଁ, ତାହା ଭିନ୍ନ ଏକ ଆଲୋଚନାର ପ୍ରସଙ୍ଗ । ପ୍ରଚଳିତ ଆଇନରେ ଯଦି ଏତେ ସଂଖ୍ୟକ ପ୍ରକଳ୍ପକୁ ପରିବେଶ ମଞ୍ଜୁରୀ କରି ହେଉଛି ତେବେ ନୂଆ ଅଧିସୂଚନାର ଆବଶ୍ୟକତା କାହିଁକି ? ଉଦ୍ୟୋଗପତିଙ୍କ ଅଭିଯୋଗ, ମାତ୍ର ୨୦ ପ୍ରତିଶତ ଦରଖାସ୍ତ ଠିକ୍ ସମୟ ମଧ୍ୟରେ ମଞ୍ଜୁରୀ ପାଉଥିବା ବେଳେ ଅଧିକାଂଶ ପ୍ରକଳ୍ପକୁ ମଞ୍ଜୁରୀ ପାଇବା ଲାଗି ୧୮୦ ଦିନରୁ ଅଧିକ ସମୟ ଲାଗୁଛି, ଯାହା ପ୍ରକଳ୍ପର ବ୍ୟବହାର୍ଯ୍ୟତା (ଭାଏବିଲିଟି) ଉପରେ ମନ୍ଦ ପ୍ରଭାବ ପକାଉଛି । ତେଣୁ ନୂଆ ଅଧିସୂଚନାରେ ଏହି ସମୟକୁ କମ କରି ବ୍ୟବସାୟ କରିବାର ସୁଗମତା (ଇଜ ଅଫ ଡୁଇଙ୍ଗ ବିଜନେସ)କୁ ଆହୁରି ଉଦ୍ୟୋଗୀ-ଅନୁକୂଳ କରିବା ପାଇଁ ଚେଷ୍ଟା କରାଯାଇଛି ।
      
ପ୍ରସ୍ତାବିତ ଚିଠା ଅଧିସୂଚନା ଉପରେ ସରକାର eia2020-moefcc@gov.in ଠିକଣାରେ ଲୋକଙ୍କଠାରୁ ଇ-ମେଲ ଯୋଗେ ମତାମତ ଆହ୍ୱାନ କରିବା ପରେ କେତେକ ପରିବେଶ ସଂଗଠନଙ୍କ ଅଭିଯାନ କ୍ରମେ ଶହ ଶହ ସଂଖ୍ୟାରେ ଇ-ମେଲ ଯାଇ ଇ-ମେଲ ଇନବକ୍ସ ଭର୍ତ୍ତି ହୋଇଗଲା, ଯାହା ମନ୍ତ୍ରୀଙ୍କୁ ବିବ୍ରତ ଓ ଉତକ୍ଷିପ୍ତ କଲା । ପ୍ରତିକ୍ରିୟାସ୍ୱରୂପ, ପରିବେଶ ସୁରକ୍ଷା କ୍ଷେତ୍ରରେ ସକ୍ରିୟ ଥିବା ତିନିଟି ପ୍ରମୁଖ ବେସରକାରୀ ସଂଗଠନ, ‘ଫ୍ରାଇଡେଜ ଫର ଫ୍ୟୁଚର’, ‘ଲେଟ୍ ଇଣ୍ଡିଆ ବ୍ରିଦ୍’ ଓ ‘ଦେୟାର ଇଜ ନୋ ଆର୍ଥ ବି’ଙ୍କ ବିରୁଦ୍ଧରେ ଦିଲ୍ଲୀ ପୁଲିସ ଦ୍ୱାରା ଆତଙ୍କ ପ୍ରତିରୋଧ ଆଇନ (ୟୁଏପିଏ)ର ଧାରାକୁ ଲଗାଇ ସେମାନଙ୍କ ଓ୍ୱେବସାଇଟଗୁଡିକୁ ସାମୟିକ ଭାବେ ଅବରୋଧ କରାଗଲା । ଅବଶ୍ୟ ଏହା ଭୁଲ କ୍ରମେ ହୋଇଥିଲା ବୋଲି ପରେ ସ୍ୱୀକାର କରି ଅବରୋଧକୁ ଉଠା ଯାଇଥିଲା । ପୁଲିସର ଏହି କାର୍ଯ୍ୟାନୁଷ୍ଠାନ ବିରୁଦ୍ଧରେ ସାମାଜିକ ଗଣ ମାଧ୍ୟମରେ ଏପରି ଚର୍ଚ୍ଚା ହେବାକୁ ଲାଗିଲା ଯେ ତାହା ଚିଠା ଅଧିସୂଚନା ସମ୍ପର୍କରେ ଜନ ସଚେତନତା ବୃଦ୍ଧି ଲାଗି ପରୋକ୍ଷରେ ସହାୟକ ହେଲା ଓ ଅଧିକ ସଂଖ୍ୟକ ଲୋକ ଏହାକୁ ବିରୋଧ କରି ମନ୍ତ୍ରାଳୟକୁ ଇ-ମେଲମାନ ପଠାଇବାକୁ ଲାଗିଲେ । ଲକ ଡାଉନ ଯୋଗୁ ଏହି ବିରୋଧ ମୁଖ୍ୟତଃ ଇ-ମେଲ ଭଳି ଡିଜିଟାଲ ମଞ୍ଚରେ ହେଉଥିଲେ ବି କିଛି ଗୋଷ୍ଠୀ ଦିଲ୍ଲୀସ୍ଥିତ ପରିବେଶ ମନ୍ତ୍ରାଳୟ ଆଗରେ ବିକ୍ଷୋଭ ପ୍ରଦର୍ଶନ କରିବାକୁ ବି ପଛାଇନାହାନ୍ତି ।
 
ବିକାଶ ଓ ପରିବେଶ ସୁରକ୍ଷା ପରସ୍ପର ବିରୋଧୀ ହୋଇ ନ ଥିଲେ ବି ସମାଜର ଗୋଟିଏ ସ୍ୱଚ୍ଛଳ ବର୍ଗ ସେହିପରି ଏକ ଧାରଣା ସୃଷ୍ଟି କରିବାକୁ ଉଦ୍ୟମ କରୁଛନ୍ତି, କାରଣ ସେମାନଙ୍କ ପାଇଁ କେବଳ ବିକାଶ ହିଁ ସବୁ କିଛି । ସେମାନେ ବିକାଶ କହିଲେ କେବଳ ଅର୍ଥନୈତିକ ବିକାଶ ବା ସମୃଦ୍ଧିକୁ ହିଁ ବୁଝି ଅନ୍ୟ ଦିଗଗୁଡିକୁ, ବିଶେଷ କରି ପରିବେଶକୁ, ଅଣଦେଖା କରି ଥାଆନ୍ତି, ଯାହା ପରୋକ୍ଷରେ ବିନାଶର କାରଣ ପାଲଟିଥାଏ । ହଁ, ଏ କଥା ସତ ଯେ ପରିବେଶ ଆଇନ ଯେତେ କୋହଳ ହୋଇଥାଏ, ଉଦ୍ୟୋଗୀଙ୍କ ବ୍ୟବସାୟ ଲାଗି ବାତାବରଣ ସେତେ ସୁଗମ ହୋଇଥାଏ । ଅଧିକାଂଶ ଉଦ୍ୟୋଗୀ ଏହା ହିଁ ଚାହାନ୍ତି ଓ ଦେଶ ବା ରାଜ୍ୟରେ ପୁଞ୍ଜି ବିନିଯୋଗ ପ୍ରତି ସେମାନଙ୍କୁ ଆକୃଷ୍ଟ କରିବାକୁ ବ୍ୟଗ୍ର ସରକାରମାନେ ସେମାନଙ୍କ ପାଲରେ ପଡିଯାଆନ୍ତି । ପରିବେଶର କ୍ରମାଗତ କ୍ଷତିସାଧନକୁ ନେଇ ସମସ୍ତେ ଊଣା ଅଧିକେ ଚିନ୍ତିତ । ତେବେ ଏଣିକି କେବଳ ଚିନ୍ତିତ ହେଲେ ଚଳିବ ନାହିଁ, କାରଣ ପରିବେଶର ସୁରକ୍ଷା ସହ ଆମର, ଆମ ପରବର୍ତ୍ତୀ ପିଢି ଓ ସମଗ୍ର ଜୀବଜଗତର ଅସ୍ତିତ୍ୱର ପ୍ରଶ୍ନ ଜଡିତ । ତେଣୁ ପରିବେଶକୁ ସୁରକ୍ଷିତ ରଖିବା ପାଇଁ ନିଜ ନିଜ ସ୍ତରରେ କିଛି କରିବାର ବେଳ ଇଏ । ଆଉ ଯଦି କିଛି କରି ହେଉ ନାହିଁ, ଅନ୍ତତଃ ପରିବେଶ ମାନଦଣ୍ଡକୁ କଡାକଡି ଭାବେ ଅନୁପାଳନ କରି ପରିବେଶକୁ ସୁରକ୍ଷିତ ରଖିବା ଲାଗି ସରକାରଙ୍କ କର୍ତ୍ତବ୍ୟ ସମ୍ପର୍କରେ ପରିବେଶ ମନ୍ତ୍ରାଳୟକୁ ସ୍ମରଣ କରାଇ ଦେଇ ନିଜ ମତାମତ ସହ ଉପରୋକ୍ତ ଠିକଣାରେ ଇ-ମେଲଟିଏ ତ ପଠାଇ ହେବ । ହୁଏତ ଜନ ସାଧାରଣଙ୍କ ସାମୂହିକ ଇଚ୍ଛା ଓ ବ୍ୟଗ୍ରତାକୁ ଦୃଷ୍ଟିରେ ରଖି ସରକାର ଚିଠା ଅଧିସୂଚନାରେ ପରିବେଶ ଅନୁକୂଳ ପରିବର୍ତ୍ତନ ଆଣିବାକୁ କୁଣ୍ଠା ପ୍ରକାଶ କରି ନ ପାରନ୍ତି ।

Published in Odisha Reporter on August 03, 2020

Comments

  1. Saral,
    Very good article. Needs to be circulated among the wider public.
    Best wishes.

    ReplyDelete

Post a Comment

Popular posts from this blog

‘ଦାଦନ’ ନୁହେଁ କି ‘ପ୍ରବାସୀ’ ନୁହେଁ

“ମୁଁ ଜଣେ ଓଏଏସ ଅଫିସର । ତୋ’ ଭଳି କେଉଁଠିକୁ ଯାଇ ଦାଦନ ଖଟୁ ନାହିଁ ।” କିଛି ବାହାର ରାଜ୍ୟରେ କାମ କରି ଓଡିଶାକୁ ଫେରିଥିବା ଶ୍ରମିକଙ୍କ ପ୍ରତି ଜଣେ ଉତକ୍ଷିପ୍ତ ବିଡିଓଙ୍କର ଏ ଭଳି ଆପ ତ୍ତି ଜନକ କଟୂ ମନ୍ତବ୍ୟ ଭାଇରାଲ ହେବା ପରେ ବିଭିନ୍ନ କାରଣରୁ ତାହା ରାଜ୍ୟବାସୀଙ୍କୁ ବ୍ୟଥିତ ଓ ସ୍ତମ୍ଭୀଭୂତ କଲା । ଏଭଳି ଶ୍ରମିକଙ୍କ ଘରବାହୁଡାର ପ୍ରାରମ୍ଭିକ ପର୍ଯ୍ୟାୟରେ କିଛି ସରକାରୀ ଅଧିକାରୀଙ୍କଠାରୁ ଆରମ୍ଭ କରି ସାଧାରଣ ଲୋକଙ୍କ ପର୍ଯ୍ୟନ୍ତ ସେମାନଙ୍କୁ ଦାଦନ ଶ୍ରମିକ ଭାବେ ସମ୍ବୋ ଧନ  କରି ତା ଚ୍ଛ ଲ୍ୟ କରିବା ସହିତ ‘ଦାଦନ’ ଶବ୍ଦଟିକୁ ଏକ ଗାଳି ରୂପେ ବ୍ୟବହାର କରିଥିବାର ଅନେକ ଘଟଣା ଦେଖିବାକୁ ମିଳିଥିଲା । ଏମାନେ ଫେରିବା ପରେ ଓଡିଶାରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ଯୋଗୁ ସ୍ଥାନୀୟ ଲୋକେ ସଂକ୍ରମିତ ହେବାର ଭୟ ଏହାର ମୁଖ୍ୟ କାରଣ ହୋଇଥିଲା ବେଳେ ସ୍ଥଳ ବିଶେଷରେ ଫେରିଥିବା କେତେକଙ୍କ ଆଚରଣ ମଧ୍ୟ ସେଥିପାଇଁ ଖୋରାକ ଯୋଗାଇଥିଲା । “ଓଡିଶାକୁ ଫେରିବା ପାଇଁ ସରକାରଙ୍କୁ କାକୁତି ମିନତି ହୋଇ ହାତ ଯୋଡି ଭିଡିଓ ପଠାଉଥିଲେ । ଏଠି ପହ ଞ୍ଚି ଲା ପରେ ଉତ୍ପାତ ହେଉଛନ୍ତି । ଦାଦନ ଖଟିବାକୁ ଗଲା ବେଳେ କ’ଣ ସରକାରଙ୍କୁ ଜଣାଇ ଯାଇଥିଲେ? ଏମାନଙ୍କୁ ଓଡିଶା ଭିତରେ ପୂରାଇ ଦେବା କଥା ନୁହେଁ ।”, ବୋଲି କେହି କେହି ଖୋଲାଖୋଲି କହୁଥିବା ବେଳେ ସେମାନଙ୍କ ପ୍ରତି ଥିବା ଘୃଣା ଭାବ ସେଥିରୁ ସ୍ପଷ୍ଟ ରୂପେ ଜଣା ପଡୁଛି । ଏହି ଶ୍

‘ଭିକରେ ମିଳିଥିବା ସ୍ୱାଧୀନତା’ ଓ ‘ପଦ୍ମଶ୍ରୀ’ ପ୍ରତ୍ୟାହାର

ଦେଶକୁ ୧୯୪୭ରେ ମିଳିଥିବା ‘ସ୍ୱାଧୀନତା’, ସ୍ୱାଧୀନତା ନୁହେଁ ବରଂ ‘ଭିକ’ ଥିଲା ଓ ୨୦୧୪ରେ ମୋଦୀ କ୍ଷମତା ହାସଲ କରିବା ପରେ ହିଁ ଭାରତକୁ ପ୍ରକୃତ ଅର୍ଥରେ ସ୍ୱାଧୀନତା ମିଳିଥିଲା ବୋଲି କହି ବଲିଉଡ ଅଭିନେତ୍ରୀ ତଥା ‘ପଦ୍ମଶ୍ରୀ’ ପ୍ରାପ୍ତ କଙ୍ଗନା ରଣାୱତ ଏବେ ବିବାଦରେ । ଦେଶବ୍ୟାପୀ ତାଙ୍କ ଏହି ଉକ୍ତିର ବିରୋଧ ହୋଇ ତାଙ୍କଠାରୁ ‘ପଦ୍ମଶ୍ରୀ’ ପ୍ରତ୍ୟାହାର ଦାବି ହେଉଛି । କେହି କେହି ଏହା ତାଙ୍କ ଅଭିବ୍ୟକ୍ତିର ସ୍ୱାଧୀନତା ବୋଲି ଯୁକ୍ତି ବାଢୁଥିବା ବେଳେ ରାଷ୍ଟ୍ରପ୍ରଦତ୍ତ ସମ୍ମାନର ଅଧିକାରୀମାନଙ୍କ ଉପରେ ଆତ୍ମନିୟନ୍ତ୍ରିତ ଅଙ୍କୁଶ ଲାଗିବା ଉଚିତ କି ନୁହେଁ ସେ ନେଇ ମଧ୍ୟ ବିମର୍ଶ ହେବାକୁ ଲାଗିଲାଣି । ‘ପଦ୍ମଶ୍ରୀ’ ଭଳି ଏକ ସମ୍ମାନରେ ଭୂଷିତ ଜଣେ ବ୍ୟକ୍ତି ଦେଶର ସ୍ୱାଧୀନତା ଉପରେ ପ୍ରଶ୍ନ ଉଠାଇବା ଦ୍ୱାରା ଅନେକେ ‘ପଦ୍ମଶ୍ରୀ’ ସମ୍ମାନର ମର୍ଯ୍ୟାଦାକୁ ଅକ୍ଷୁଣ୍ଣ ରଖିବାରେ ସେ ଅସମର୍ଥ ବୋଲି ମଣୁଛନ୍ତି । ତେବେ ଏ ଭଳି ଭାବେ ସମ୍ମାନିତ ବ୍ୟକ୍ତିଙ୍କ ଆପତ୍ତିଜନକ ଓ ବିବାଦିତ ଉଚ୍ଚାରଣ ଓ ଆଚରଣ ପାଇଁ ସେମାନଙ୍କ ନିକଟରୁ ସମ୍ମାନ ପ୍ରତ୍ୟାହାର କରାଯାଇପାରିବ କି ଓ ସେଥିପାଇଁ ବିଧି ବ୍ୟବସ୍ଥା କ’ଣ, ତାହା ଆଲୋଚନାଯୋଗ୍ୟ । ଅତୀତରେ ପଦ୍ମ ସମ୍ମାନ ଘୋଷଣା ହେଲା ପରେ ମୌଲାନା ଅବୁଲ କଲାମ ଆଜାଦ, ସୁନ୍ଦରଲାଲ ବହୁଗୁଣା, ବାବା ଆମତେ, ବିଲାୟତ ଖାଁ, ବାଦଲ ସରକାର, କାଳୀଚରଣ ପଟ୍ଟନାୟକଙ୍କ ପରି କିଛି ସମ୍ମାନିତ ବ୍ୟକ୍ତି ବିଭିନ୍ନ କା

ଭଲଗପ - 2021

2021ରେ  ପ୍ରକାଶିତ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ 2021ରେ ପ୍ରକାଶ ପାଇଥିବା 1600ରୁ ବେଶି ଲେଖକଙ୍କର 6100ରୁ ଊର୍ଦ୍ଧ୍ୱ ଓଡିଆ ଗପ ମଧ୍ୟରୁ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ ବାଛିବାର ଏକ ପ୍ରୟାସ ଚାଲିଛି । ତଦନୁଯାୟୀ ପାଠକ ଓ ଲେଖକଙ୍କ ଦ୍ୱାରା  ପ୍ରସ୍ତାବ ଦାଖଲର ଶେଷ ତାରିଖ ମେ 31, 2022 ସୁଦ୍ଧା 260 ଜଣ ଲେଖକଙ୍କର 368ଟି ଭଲ ଗପର ସୂଚନା ଉପଲବ୍ଧ ହୋଇଛି ଯାହା ନିମ୍ନ ପ୍ରଦତ୍ତ ତାଲିକାରେ ସ୍ଥାନିତ । ଏହି ଗପଗୁଡିକ ମଧ୍ୟରୁ 42ଟି ଗପର ପିଡିଏଫ ମିଳି ନାହିଁ । ପିଡିଏଫ ବା ସ୍ପ୍କାନ କପି ଉପଲବ୍ଦାଧ କରାଇବା ପାଇଁ ଆଉ 7 ଦିନ ସମୟ ଦିଆଯାଉଛି । ପ୍ରତିଟି ଗପ ପଢା ହେବାକୁ ଥିବାରୁ ତାପରେ ପିଡିଏଫ ଉପଲବ୍ଧ ହୋଇ ପାରି ନଥିବା ଗପଗୁଡିକୁ ଚୟନ ପ୍ରକ୍ରିୟାରୁ ବାଦ ଦିଆଯିବ । (ସରଳ କୁମାର ଦାସ) 9437038015 saral_das@yahoo.co.in ତାଲିକାରେ ସ୍ଥାନିତ କୌଣସି ଗପ 2021 ପୂର୍ବରୁ ପ୍ରକାଶ ପାଇଥିଲେ ଲେଖକ ଓ ପାଠକମାନେ ତାହା ଜଣାଇବାକୁ ଅନୁରୋଧ । ଜଣାପଡିଲେ ସେଇଟିକୁ ତାଲିକାରୁ ବାଦ ଦିଆଯିବ । ପ୍ରତିଟି ମନୋନୀତ ଗପ ପଢା ହେବାକୁ ଥିବାରୁ ସେଗୁଡିକର ପିଡିଏଫ ପଠାଇବାକୁ ସମ୍ପୃକ୍ତ ଲେଖକମାନଙ୍କୁ ଅନୁରୋଧ । ଏକାଧିକ ଗପ ଥିବା ଲେଖକଙ୍କ ଶ୍ରେଷ୍ଠ ଗପଟିକୁ ଚୟନ କରିବା ପ୍ରକ୍ରିୟା ଆରମ୍ଭ ହୋଇଯାଇଛି । କ୍ରମିକ ସଂଖ୍ୟା ଲେଖକ ଗଳ୍ପର ନାମ କେଉଁଠି(ପତ୍ରିକା ଇତ୍ୟାଦି) ପ୍ରକାଶନ ସଂଖ୍ୟା/ ତାରିଖ 1 ଅଜୟ ମହାପାତ୍ର

ପେଗାସସ୍ ମାମଲା ସରକାରଙ୍କ ତଣ୍ଟିରେ କଣ୍ଟା ହେବ ?

ପେଗାସସ୍ ମାମଲାରେ ଏକାଧିକ ପିଟିସନର ବିଚାର କରି ସୁପ୍ରିମକୋର୍ଟର ପ୍ରଧାନ ବିଚାରପତି ଏନ ଭି ରମଣାଙ୍କ ସମେତ ଏକ ତିନି ଜଣିଆ ଖଣ୍ଡପୀଠ ଅକ୍ଟୋବର ୨୭, ୨୦୨୧ରେ ଦେଇଥିବା ଆଦେଶକୁ ଅନେକେ ‘ଐତିହାସିକ’ କହୁଥିବା ବେଳେ ଏହା ମାଧ୍ୟମରେ କେନ୍ଦ୍ର ସରକାର ଭର୍ତ୍ସିତ ହୋଇଛନ୍ତି ବୋଲି ମଧ୍ୟ କୁହାଯାଉଛି । ନାଗରିକଙ୍କ ମୌଳିକ ଅଧିକାରକୁ ଅକ୍ଷୁଣ୍ଣ ରଖିବା ପାଇଁ ଏହି ୪୬ ପୃଷ୍ଠା ବିଶିଷ୍ଟ ଆଦେଶଟି ଆଗାମୀ ଦିନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ଯାଉଥିବାରୁ ଏ ସମ୍ପର୍କରେ ବିମର୍ଶର ଆବଶ୍ୟକତା ରହିଛି । କାନାଡାର ଟରୋଣ୍ଟୋ ବିଶ୍ୱବିଦ୍ୟାଳୟ ଅଧୀନସ୍ଥ ‘ସିଟିଜେନ ଲ୍ୟାବ’ ସେପ୍ଟେମ୍ୱର ୨୦୧୮ରେ ଇସ୍ରାଏଲି ଟେକ୍ନୋଲୋଜି କମ୍ପାନୀ ଏନଏସଓ ଦ୍ୱାରା ପ୍ରସ୍ତୁତ ପେଗାସସ୍ ନାମକ ସ୍ପାଏୱେୟାର ସମ୍ପର୍କରେ ଏକ ବିସ୍ତୃତ ରିପୋର୍ଟ ପ୍ରକାଶ କରିଥିଲେ । ଏହି ସ୍ପାଏୱେୟାରକୁ ବ୍ୟବହାର କରି ଯେ କୌଣସି ବ୍ୟକ୍ତିର ଫୋନ, କମ୍ପ୍ୟୁଟର ଭଳି ଡିଜିଟାଲ ଉପକରଣଗୁଡିକୁ ସ୍ପର୍ଶ ନ କରି ମଧ୍ୟ ସେଗୁଡିକୁ ନିୟନ୍ତ୍ରଣ କରି ହେବ । ଥରେ ଏହି ସ୍ପାଏୱେୟାର ଲକ୍ଷ୍ୟରେ ଥିବା ଉପକରଣରେ ଅବସ୍ଥାପିତ ହୋଇଗଲେ ସେଥିରେ ଥିବା ସମସ୍ତ ତଥ୍ୟ (ଡାଟା) ସହ ଉପକରଣର ଇ-ମେଲ, ଟେକ୍ସଟ, ଫୋନ, କ୍ୟାମେରା, ରେକର୍ଡିଙ୍ଗ କରିବା କ୍ଷମତାଗୁଡିକ ମଧ୍ୟ ସ୍ପାଏୱେୟାର ବ୍ୟବହାରୀଙ୍କ ନିୟନ୍ତ୍ରଣକୁ ଚାଲିଯାଇଥାଏ ଓ ସମ୍ପୃକ୍ତ ବ୍ୟକ୍ତିଙ୍କ ଅଜାଣତରେ ଅନ୍ୟ ତଥ୍ୟ ମଧ୍ୟ ଉପକରଣର

ଓଡିଆ କ୍ଷୁଦ୍ରଗଳ୍ପ 2021 - ପ୍ରଥମ ପର୍ଯ୍ୟାୟରେ 252ଟି ଗପ

ଓଡିଆ କ୍ଷୁଦ୍ରଗଳ୍ପ 2021 – ପ୍ରଥମ ପ୍ରର୍ଯ୍ୟାୟରେ 252ଟି ଗପ  ପାଠକ, ଲେଖକଙ୍କ ସହଯୋଗରେ 2021ରେ ପ୍ରକାଶିତ କିଛି ଭଲ ଗପ ବାଛିବାର ପ୍ରୟାସ ଆରମ୍ଭ ହୋଇ 260 ଜଣ ଲେଖକଙ୍କର 368ଟି ଭଲ ଗପର ସୂଚନା ହସ୍ତଗତ ହୋଇଥିଲା । ଇତିମଧ୍ୟରେ ତନ୍ମଧ୍ୟରୁ ଏକାଧିକ ଗପ ଆସିଥିବା ଲେଖକମାନଙ୍କର ଗପଗୁଡିକୁ ପଢାଯାଇ ସେଥିରୁ ସମ୍ପୃକ୍ତ ଲେଖକଙ୍କ ଗୋଟିଏ ଲେଖାଏଁ ଗପକୁ ଗ୍ରହଣ କରାଯାଇଛି । କିଛି ଲେଖକଙ୍କର ଗପ ପୂର୍ବରୁ ପ୍ରକାଶିତ ହୋଇଥିବା ଓ / ବା ଧାର୍ଯ୍ୟ ଶେଷ ତାରିଖ ସୁଦ୍ଧା ପଢିବା ଲାଗି ପିଡିଏଫ ଉପଲବ୍ଧ ହୋଇ ନ ପାରିବା କାରଣରୁ ପ୍ରକ୍ରିୟା ଅନ୍ତର୍ଗତ କରାଯାଇ ପାରିଲାନାହିଁ । ଅର୍ଥାତ୍ ପ୍ରଥମ ପର୍ଯ୍ୟାୟକୁ ନିମ୍ନଲିଖିତ 252 ଜଣ ଲେଖକଙ୍କର 252ଟି ଗପ ଯାଇଛି । ଏହି ପର୍ଯ୍ୟାୟରେ ଗପଗୁଡିକୁ ପାଠକଙ୍କ ନିକଟକୁ ପଠାଇଲା ବେଳେ ଗପର ନାମ ଓ ଲେଖକଙ୍କ ନାମକୁ ଲିଭାଯାଇ ତା ସ୍ଥାନରେ କେବଳ ଗୋଟିଏ କୋଡ ନମ୍ୱର ପ୍ରଦାନ କରାଯାଉଛି । ଏହି ସମସ୍ତ ଗପକୁ 25ଟି ସେଟରେ ଭାଗ କରାଯାଇ ପ୍ରତି ସେଟରେ ହାରାହାରି 10ଟି ଲେଖାଏଁ ଗପ ରଖାଯାଇଛି । ପ୍ରତିଟି ସେଟ ଗପ ଦୁଇ ଜଣ ଲେଖାଏଁ ପାଠକଙ୍କ ନିକଟକୁ ପୃଥକ୍ ଭାବେ ପଠାଯାଉଛି । ସେମାନଙ୍କ ନିକଟରୁ ମତାମତ ମିଳିଲା ପରେ ସେଥିମଧ୍ୟରୁ ପ୍ରାୟ 50 ପ୍ରତିଶତ ଗପ ଦ୍ୱିତୀୟ ପର୍ଯ୍ୟାୟକୁ ଉନ୍ନୀତ ହେବ । ଗପଗୁଡିକ ଲେଖକମାନଙ୍କର ମୌଳିକ ରଚନା ଓ 2021ରେ ପ୍ରଥମ କରି ପ୍ରକାଶ ପାଇଛି ବୋଲି ଆଶା କରାଯାଏ । ଯଦି ଅନ୍