ନିର୍ବାଚନର ଅଳ୍ପ କେଇ ଦିନ ପୂର୍ବରୁ କଂଗ୍ରେସ ସଭାପତି ରାହୁଳ ଗାନ୍ଧୀଙ୍କ ଦ୍ୱାରା ‘ନ୍ୟୂନତମ ଆୟ ଯୋଜନା’ (ନ୍ୟାୟ) ସମ୍ପର୍କରେ ଘୋଷଣା ହେବା ପରେ ବିଧିବଦ୍ଧ ଭାବେ ତାହା ଦଳର ନିର୍ବାଚନୀ ଇସ୍ତାହାରରେ ସ୍ଥାନ ପାଇଛି । ସେ ଯୋଜନାଟିକୁ ‘ଦାରିଦ୍ର୍ୟ ବିରୁଦ୍ଧରେ ସର୍ଜିକାଲ ଷ୍ଟ୍ରାଇକ’ ବୋଲି ଅଭିହିତ କରିଛନ୍ତି । ଯୋଜନା ପାଇଁ ଏତେ ଟଙ୍କା କେଉଁଠୁ ଆସିବ ବୋଲି ଅନେକେ ପ୍ରଶ୍ନ ଉଠାଉଥିବା ବେଳେ, କଂଗ୍ରେସ ଦ୍ୱାରା ଅତୀତରେ ମନରେଗା କାର୍ଯ୍ୟକ୍ରମ ଓ ଋଣଛାଡ ଘୋଷଣା ବେଳେ ବିରୋଧୀମାନେ ଠିକ ଏଭଳି ପଚାରୁଥିଲେ ବୋଲି ଦଳ କହିଛି । ଯୋଜନା ପାଇଁ କେଉଁ ଉତ୍ସରୁ ଅର୍ଥ ଆସିବ, ତାହା ସ୍ପଷ୍ଟ ହୋଇ ନଥିବାରୁ ଅର୍ଥନୀତିଜ୍ଞଙ୍କ ମଧ୍ୟରେ ଏହାର କ୍ରିୟାନ୍ୱୟନକୁ ନେଇ ସନ୍ଦେହ ଉପୁଜିବା ସ୍ୱାଭାବିକ । ଗରିବ ଲୋକଙ୍କର ମଧ୍ୟ ସମ୍ମାନର ସହ ଜୀବନ ନିର୍ବାହ କରିବାର ଅଧିକାର ଅଛି ଓ ସେମାନଙ୍କ ସର୍ବନିମ୍ନ ଆବଶ୍ୟକତାକୁ ପୂରଣ କରିବା ପାଇଁ ସେମାନଙ୍କୁ ଏକ ସର୍ବନିମ୍ନ ଆୟର ଗ୍ୟାରେଣ୍ଟି ପ୍ରଦାନ କରିବାକୁ ହେବ ବୋଲି କ୍ରମଶଃ ବିଶ୍ୱବ୍ୟାପୀ ଏକ ଜନମତ ସୃଷ୍ଟି ହେଲାଣି । ‘ନ୍ୟାୟ’ ଏହି ଭଳି ଏକ ଯୋଜନା ଯେଉଁଥିରେ ଦେଶର ସର୍ବନିମ୍ନ ଆୟବର୍ଗର ୫ କୋଟି ଗରିବ ପରିବାରଙ୍କ ବ୍ୟାଙ୍କ ଖାତାରେ ମାସିକ ହାରାହାରି ୬୦୦୦ ଟଙ୍କା ଲେଖାଏଁ ଏହିପରି ବର୍ଷକୁ ୭୨୦୦୦ ଟଙ୍କା ଜମା କରାଯିବାର ପ୍ରତିଶ୍ରୁତି ଦିଆଯାଇ ସେମାନଙ୍କ ମାସିକ ଆୟକୁ ୧୨ ହଜାର...