୨୦୨୬ ମସିହା ଅକ୍ଟୋବର ୧୪ ତାରିଖ ଦିନ କେନ୍ଦ୍ର ସରକାରଙ୍କ ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ କମିଟିରେ ଆଇଡିବିଆଇ ବ୍ୟାଙ୍କର ୬୦.୭୨ ପ୍ରତିଶତ ଅଂଶଧନକୁ କାନାଡ଼ାର ‘ଫେୟାରଫାକ୍ସ ଫାଇନାନ୍ସିଆଲ ହୋଲଡିଂସ’କୁ ଦିଆଯିବାର ପ୍ରସ୍ତାବ ମଞ୍ଜୁର ହୋଇଛି। ଏଥିରୁ ୩୦.୪୮ ପ୍ରତିଶତ ସରକାରୀ ଅଂଶଧନ ହୋଇଥିବା ବେଳେ ୩୦.୨୪ ପ୍ରତିଶତ ଏଲଆଇସିର ଅଟେ। କମ୍ପାନୀ ପ୍ରତିଟି ଶେୟାର ବା ଅଂଶଧନ ୮୧ ଟଙ୍କାରେ କିଣିବ। ପ୍ରସ୍ତାବିତ ପୁଞ୍ଜି ପ୍ରତ୍ୟାହାର ପରେ ଭାରତ ସରକାରଙ୍କ ନିକଟରେ ବ୍ୟାଙ୍କ ଅଂଶଧନର ଆଉ ୧୫ ପ୍ରତିଶତ ରହୁଥିବା ବେଳେ ଏଲଆଇସି ନିକଟରେ ୧୯.୨୦ ପ୍ରତିଶତ ରହିବ। ବ୍ୟାଙ୍କ ବୋର୍ଡରେ ଏଲଆଇସି ଓ ଭାରତ ସରକାରଙ୍କର ଆଉ ପ୍ରତିନିଧିତ୍ୱ ରହିବ ନାହିଁ। ତେଣୁ ବ୍ୟାଙ୍କର ନିୟନ୍ତ୍ରଣ ସମ୍ପୂର୍ଣ୍ଣ ରୂପେ ଏକ ବିଦେଶୀ ଘରୋଇ କମ୍ପାନୀ ନିକଟକୁ ଚାଲିଯିବ। ରିଜର୍ଭ ବ୍ୟାଙ୍କର ଏକ ସହାୟକ ବ୍ୟାଙ୍କ ଭାବେ ୧୯୬୪ ମସିହାରେ ପ୍ରତିଷ୍ଠିତ ଇଣ୍ଡଷ୍ଟ୍ରିଆଲ ଡେଭଲପମ୍ୟାଣ୍ଟ ବ୍ୟାଙ୍କ (ଆଇ.ଡି.ବି.ଆଇ.) ୧୯୭୬ ମସିହାରେ ଏହାଠାରୁ ଅଲଗା ହୋଇ ଭାରତ ସରକାରଙ୍କ ଅଧୀନସ୍ଥ ହେଲା। ଏହାର ନାମରୁ ସ୍ପଷ୍ଟ ଯେ ଶିଳ୍ପ ଓ ଭିତ୍ତିଭୂମିର ବିକାଶ ଲାଗି ଏହି ପ୍ରମୁଖ ବିକାଶମୂଳକ ଆର୍ଥିକ ଅନୁଷ୍ଠାନଟି ଅଭିପ୍ରେତ ଥିଲା। ସେଥିଲାଗି ବ୍ୟାଙ୍କ ଦୀର୍ଘକାଳୀନ ଋଣ ଓ ପୁନର୍ବିତ୍ତ ସହାୟତା ଯୋଗାଇ ଆସୁଥିଲା। ୧୯୯୪ ମସିହାରେ ଆଇଡିବିଆଇର ଏକ ସହାୟକ ବାଣିଜ୍ୟିକ ବ୍...