ବଜାରରେ ଜୁଲାଇ ମାସ ଚିନି ଦର କେ.ଜି. ପ୍ରତି ୪୬ ଟଙ୍କା ଥିଲା ବେଳେ ଅଗଷ୍ଟ ମାସ ସୁଦ୍ଧା ୭୦ ଟଙ୍କାରେ ପହଞ୍ଚିଗଲା, ଅର୍ଥାତ୍ ମାତ୍ର ଦେଢ଼ ମାସ ମଧ୍ୟରେ ପ୍ରାୟ ଦେଢ଼ ଗୁଣ ବୃଦ୍ଧି। ଏହି ଦରବୃଦ୍ଧି ପାଇଁ ସରକାର ପ୍ରଶ୍ନର ସମ୍ମୁଖୀନ ହେଲେ। ଖାଉଟିମାନେ ମଧ୍ୟ ଆନ୍ଦୋଳିତ ହେଲେ ଯେ ହଠାତ୍ ଚିନିର ଦର ବଢ଼ିଲା କାହିଁକି? ଏହାକୁ ଏଡ଼ାଯାଇପାରିଥାନ୍ତା କି? ପ୍ରତିଟି ଭାରତୀୟ ପରିବାର ଲାଗି ଚିନି ଏକ ଅତ୍ୟାବଶ୍ୟକ ଦ୍ରବ୍ୟ। ଭାରତୀୟଙ୍କ ମୁଣ୍ଡପିଛା ଚିନିର ବ୍ୟବହାର ବାର୍ଷିକ ପ୍ରାୟ ୨୦ କିଲୋଗ୍ରାମ। ଗୁଡ଼, ଖଣ୍ଡସାରି ଆଦିକୁ ହିସାବକୁ ନେଲେ ଚିନିଜାତୀୟ ଦ୍ରବ୍ୟର ବ୍ୟବହାର ପ୍ରାୟ ୨୩ କିଲୋଗ୍ରାମ। ତେଣୁ ଚିନି ଦରରେ ଅସ୍ଥିରତା ଦେଖାଦେଲେ ପରିବାରର ମାସିକ ବଜେଟ ପ୍ରଭାବିତ ହେବା ସ୍ୱାଭାବିକ। ଭାରତରେ ଚିନି ବ୍ୟବହାରର ବାର୍ଷିକ ପରମାଣ ପ୍ରାୟ ୨.୮୫ କୋଟି ଟନ୍, ଯାହା ପୃଥିବୀରେ ସର୍ବାଧିକ। ଏଣେ ଚିନି ଉତ୍ପାଦନକାରୀ ଦେଶଙ୍କ ମଧ୍ୟରେ ଭାରତର ସ୍ଥାନ ସାରା ବିଶ୍ୱରେ ବ୍ରାଜିଲ ପଛକୁ ଦ୍ୱିତୀୟ। ୨୦୨୩-୨୪ ଚିନି ବର୍ଷ (ଅକ୍ଟୋବର, ୨୦୨୩ରୁ ସେପ୍ଟେମ୍ୱର ୨୦୨୪)ରେ ଦେଶରେ ୩.୨୦ କୋଟି ଟନ୍ ଚିନି ଉତ୍ପାଦିତ ହୋଇଥିଲା। ଅର୍ଥାତ୍ ଦେଶର ଚିନି ଚାହିଦାକୁ ମେଣ୍ଟାଇବା ଲାଗି ତାହା ଯଥେଷ୍ଟ ଥିଲା। ୨୦୨୪-୨୫ ଚିନି ବର୍ଷରେ ପ୍ରାୟ ୩୫ ଲକ୍ଷ ଟନ୍ ଚିନି ଇଥାନଲ ଉତ୍ପାଦନ ଲାଗି ବ୍ୟବହୃତ ହୋଇଥିବାରୁ ଖାଉଟିଙ୍କ ଲାଗି ଚିନି ଉପଲବ୍ଧତା ଓ...