ଭାରତ ୨୦୨୦-୨୧ ଆର୍ଥିକ ବର୍ଷରେ ୮୧୭୨ କୋଟି ଡଲାରର ରେକର୍ଡ ପରିମାଣର ପ୍ରତ୍ୟକ୍ଷ ବିଦେଶୀ ନିବେଶ ବା ଫରେନ ଡାଇରେକ୍ଟ ଇନଭେଷ୍ଟମେଣ୍ଟ (ଏଫଡିଆଇ) ଆକୃଷ୍ଟ କରି ପାରିଛି, ଯାହା ପୂର୍ବ ବର୍ଷର ଏଫଡିଆଇ ପ୍ରବାହ ୭୪୩୯ କୋଟି ଡଲାର ତୁଳନାରେ ପ୍ରାୟ ୧୦ ପ୍ରତିଶତ ଅଧିକ । ତନ୍ମଧ୍ୟରୁ ଅଂଶଧନ (ଇକ୍ୱିଟି) ଆକାରରେ ଆସିଥିବା ଏଫଡିଆଇର ପରିମାଣ ୫୯୬୪ କୋଟି ଡଲାର, ଯାହା ପୂର୍ବ ବର୍ଷର ୪୯୯୮ କୋଟି ଡଲାର ତୁଳନାରେ ପ୍ରାୟ ୧୯ ପ୍ରତିଶତ ଅଧିକ ହୋଇ ପ୍ରଫୁଲ୍ଲତାର କାରଣ ପାଲଟିଛି । ଯେ କୌଣସି ବିକାଶଶୀଳ ଦେଶର ନୀତି ନିର୍ଦ୍ଧାରକଙ୍କ ପାଇଁ ଏଫଡିଆଇ ଅଧିକ ଆକର୍ଷକ ହୋଇଥାଏ, କାରଣ ତାହା ବିଦେଶୀ ଋଣ ହୋଇ ନ ଥିବାରୁ ଏଫଡିଆଇ ପ୍ରବାହ ଅଧିକ ହେଲେ ଅର୍ଥନୀତି ପ୍ରାଣବନ୍ତ ହେବା ଆଶା କରାଯାଏ । ତେବେ ଭାରତକୁ ଆସୁଥିବା ଏଫଡିଆଇର ଚରିତ୍ରକୁ ଅନୁଶୀଳନ କଲେ ସେଥିରେ ଉଭୟ ପ୍ରଫୁଲ୍ଲିତ ଓ ଆଶଙ୍କିତ ହେବାର ଲକ୍ଷଣ ଦେଖା ଦେଇପାରେ । ସଂଯୁକ୍ତ ରାଷ୍ଟ୍ର ବ୍ୟାପାର ଓ ବିକାଶ ସମ୍ମିଳନୀ (ଅଙ୍କଟାଡ) ଦ୍ୱାରା ଜାରି ହୋଇଥିବା ରିପୋର୍ଟ ଅନୁଯାୟୀ ଏହି କୋଭିଡ କାଳରେ ଆମେରିକା, ସିଙ୍ଗାପୁର, ବ୍ରାଜିଲ, କାନାଡା, ୟୁଏଇ ଭଳି ଉନ୍ନତ ଦେଶଙ୍କର ଏଫଡିଆଇ ପ୍ରବାହ ହ୍ରାସ ପାଇଥିବା ବେଳେ ଭାରତର ଏଫଡିଆଇ ପୂର୍ବ ବର୍ଷ ତୁଳନାରେ ୧୦ ପ୍ରତିଶତ ଅଧିକ ହେବା ବାସ୍ତବିକ ଉତ୍ସାହପ୍ରଦ । ଏ ବର୍ଷ ଭାରତକୁ ଆସିଥିବା ଏଫଡିଆଇ ମଧ୍ୟରୁ ଏଫଆଇପିବି, ଆରବିଆଇ ଓ ଅଧିଗ୍ରହଣ ମାଧ...