ଟ୍ରମ୍ପଙ୍କ ବିଜୟରେ ଭାରତର ଚିନ୍ତା

ଆମେରିକାର ୪୭ତମ ରାଷ୍ଟ୍ରପତି ଭାବେ ଡୋନାଲଡ ଟ୍ରମ୍ପ ନିର୍ବାଚିତ ହେଲା ପରେ ବିଶ୍ୱର ଅନେକ ରାଷ୍ଟ୍ରମୁଖ୍ୟଙ୍କ ନିକଟରୁ ତାଙ୍କ ପାଖକୁ ସୌଜନ୍ୟମୂଳକ ଅଭିନନ୍ଦନର ସୁଅ ଛୁଟିଲା । ହେଲେ ତାଙ୍କ ବିଜୟ ପରେ କେବଳ ଇସ୍ରାଏଲକୁ ବାଦ୍ ଦେଲେ ଚୀନଠାରୁ ଆରମ୍ଭ କରି ୟୁରୋପୀୟ ଦେଶସମୂହଙ୍କ ପର୍ଯ୍ୟନ୍ତ ଅଧିକାଂଶ ରାଷ୍ଟ୍ରଙ୍କର ଚିନ୍ତା ଊଣା ଅଧିକେ ବୃଦ୍ଧି ପାଇଛି । ସେହି ଚିନ୍ତାର କାରଣ ଭିନ୍ନ ଭିନ୍ନ ହୋଇପାରେ । ପ୍ରଧାନମନ୍ତ୍ରୀ ମୋଦୀଙ୍କ ସହ ଟ୍ରମ୍ପଙ୍କର ସମ୍ପର୍କ ବେଶ ଭଲ ଥିବା ସତ୍ତ୍ୱେ, କେତେକ ନିର୍ଦ୍ଦିଷ୍ଟ ପ୍ରସଙ୍ଗରେ ଭାରତର ମଧ୍ୟ ଚିନ୍ତା ବୃଦ୍ଧି ପାଇଛି ।

ରାଷ୍ଟ୍ରପତି ଭାବେ ପ୍ରଥମ ଦଫାର ଶାସନ କାଳରୁ ଏପର‌୍ୟ୍ୟନ୍ତ ଟ୍ରମ୍ପ ‘ଆମେରିକା ଫାଷ୍ଟ’ ବା ‘ପ୍ରଥମେ ଆମେରିକା’ ନୀତି ଉପରେ ଗୁରୁତ୍ୱ ଦେଇ ଆସିଛନ୍ତି । ଅର୍ଥାତ୍, ସ୍ୱାର୍ଥଦ୍ୱନ୍ଦ୍ୱ ଉପୁଜିଲେ ଆମେରିକାର ସ୍ୱାର୍ଥ ରକ୍ଷା ପାଇଁ ସେ ଯେ କୌଣସି ପଦକ୍ଷେପ ନେବାକୁ ପଛାଇବେ ନାହିଁ । ତାହାର ସଫଳ ରୂପାୟନ ପାଇଁ ସେ ଆମେରିକାର ମାନୁଫାକଚରିଙ୍ଗ (ଉତ୍ପାଦନ) ଶିଳ୍ପର ବିକାଶ ଉପରେ ସର୍ବାଧିକ ଗୁରୁତ୍ୱ ଦେଉଛନ୍ତି । ମାନୁଫାକଚରିଙ୍ଗ ଶିଳ୍ପକୁ ଆବଶ୍ୟକ ସଂରକ୍ଷଣ ପ୍ରଦାନ କରିବା ଲାଗି ସେ ଶ୍ରମବଳର ବିକାଶ, ଅନ୍ୟ ଦେଶରୁ ଆମଦାନୀ ହେଉଥିବା ସାମଗ୍ରୀ ଉପରେ ସୀମା ଶୁଳ୍କ ବୃଦ୍ଧି କରିବା ଓ କେତେକ ଆବଶ୍ୟକ ଆଇନ ପ୍ରଣୟନ ଉପରେ ମଧ୍ୟ ଗୁରୁତ୍ୱ ପ୍ରଦାନ କରିଛନ୍ତି । ବିଦେଶୀମାନଙ୍କ ଅବାଞ୍ଛିତ ଓ ଅବୈଧ ଆମେରିକ ପ୍ରବେଶ (ଇମିଗ୍ରେସନ) ଭଳି ସମସ୍ୟାର ମୂଳୋତ୍ପାଟନ କରିବାର ପ୍ରତିଶ୍ରୁତି ସେ ନିର୍ବାଚନ ପ୍ରଚାର କାଳରେ ଦେଇ ଆସିଛନ୍ତି । ତେଣୁ ଯେତେ ବନ୍ଧୁତା ବା ନିକଟତା ଥିଲେ ବି ତାଙ୍କ ଉପରୋକ୍ତ ମୂଳ ନୀତି ଓ ଲକ୍ଷ୍ୟ ପରିପ୍ରେକ୍ଷୀରେ ସେ ବନ୍ଧୁତାକୁ ପ୍ରାଥମିକତା ଦେବା କସ୍ମିନ କାଳେ ସମ୍ଭବ ନୁହେଁ ।

୨୦୨୨ର ଜନଗଣନା ଅନୁସାରେ ବିଭିନ୍ନ ଦେଶରୁ ଆସି ଆମେରିକାରେ ବସବାସ କରୁଥିବା ବହିରାଗତ (ଇମିଗ୍ରାଣ୍ଟସ)ଙ୍କ ସଂଖ୍ୟା ସମୁଦାୟ ଜନସଂଖ୍ୟାର ୧୪.୩ ପ୍ରତିଶତ । ଆମେରିକାରେ ବୈଧ ଭାବେ ବସବାସ କରୁଥିବା ବହିରାଗତଙ୍କ ସଂଖ୍ୟା ଗତ ୨୦ ବର୍ଷ ଭିତରେ ୨.୪୨ କୋଟିରୁ ବଢ଼ି ୩.୬୯ କୋଟିରେ ପହଞ୍ଚିଲାଣି । ଆଇନଗତ ପ୍ରକ୍ରିୟାର ଅନୁସରଣ କରି ସେମାନଙ୍କ ମଧ୍ୟରୁ ପ୍ରାୟ ୪୯ ପ୍ରତିଶତ ଆମେରିକାର ‘ସ୍ୱାଭାବିକ ନାଗରିକତ୍ୱ’ (ନେଚୁରାଲ ସିଟିଜେନସିପ) ହାସଲ କରିସାରିଛନ୍ତି । ଏମାନଙ୍କ ମଧ୍ୟରେ ଅଛନ୍ତି ଅନେକ ଭାରତୀୟ ମୂଳର ବାସିନ୍ଦା । ୨୦୨୩ ମସିହାର ରିପୋର୍ଟ ଅନୁଯାୟୀ ସେଠାରେ ବାସ କରୁଥିବା ଭାରତୀୟଙ୍କ ସଂଖ୍ୟା ଥିଲା ପ୍ରାୟ ୫୨ ଲକ୍ଷ, ଯାହା ଆମେରିକା ଜନସଂଖ୍ୟାର ପ୍ରାୟ ୧.୪୭ ପ୍ରତିଶତ । ତନ୍ମଧ୍ୟରୁ ପ୍ରାୟ ୩୩ ଲକ୍ଷ ହେଉଛନ୍ତି ଭାରତୀୟ ମୂଳର ଅଧିବାସୀ । ଆର୍ଥିକ ଦୃଷ୍ଟିରୁ ଭାରତୀୟଙ୍କ ଅବସ୍ଥା ଅପେକ୍ଷାକୃତ ସ୍ୱଚ୍ଛଳ । ବୈଧ ଭାବେ ରହୁଥିବା ଭାରତୀୟମାନଙ୍କର ଅବଦାନ ଆମେରିକାର ବିକାଶରେ ଯଥେଷ୍ଟ ମହତ୍ତ୍ୱପୂର୍ଣ୍ଣ । କିନ୍ତୁ ଆମେରିକାର ମୁଣ୍ଡ ବ୍ୟଥାର କାରଣ ହେଉଛନ୍ତି ସେଠାରେ ଅବୈଧ ଭାବେ ରହୁଥିବା ବିଦେଶୀ । ବିଭିନ୍ନ ଦେଶରୁ ଆସି ଆମେରିକାରେ ଅବୈଧ ଭାବେ ବସବାସ କରୁଥିବା ପ୍ରାୟ ୧.୧୨ କୋଟି ଅନୁପ୍ରବେଶକାରୀ ଏବେ ଟ୍ରମ୍ପଙ୍କ କୋପ ଦୃଷ୍ଟିରେ । ଏପରି ଅବୈଧ ଇମିଗ୍ରାଣ୍ଟସଙ୍କ ମଧ୍ୟରୁ ସର୍ବାଧିକ ପ୍ରାୟ ୪୧ ଲକ୍ଷ ମେକ୍ସିକୋର ହୋଇଥିବା ବେଳେ, ଦ୍ୱିତୀୟ ସ୍ଥାନରେ  ଏଲ ସାଲଭାଡୋରର ଅଧିବାସୀ ଓ ତୃତୀୟ ସ୍ଥାନରେ ଅଛନ୍ତି ଭାରତୀୟ, ଯେଉଁମାନଙ୍କ ସଂଖ୍ୟା ପ୍ରାୟ ୭.୨୫ ଲକ୍ଷ । ପ୍ରତି ବର୍ଷ ଉଜ୍ଜ୍ୱଳ ଭବିଷ୍ୟତ ପାଇଁ ସବୁଜ ଚାରଣ ଭୂମିର ସନ୍ଧାନରେ ହଜାର ହଜାର ଭାରତୀୟ ଆମେରିକାମୁହାଁ ହୋଇ ଅବୈଧ ଭାବେ ଅନୁପ୍ରବେଶ କରିବାର ପ୍ରୟାସ କରୁଛନ୍ତି । ସେମାନଙ୍କ ମଧ୍ୟରୁ କିଛି ଫେଡେରାଲ ପୋଲିସ ହାତରେ ଧରା ମଧ୍ୟ ପଡ଼ୁଛନ୍ତି । ଆମେରିକାର ଶୁଳ୍କ ଓ ସୀମା ସୁରକ୍ଷା ଦାୟିତ୍ୱରେ ଥିବା ‘ୟୁଏସ-ସିବିପି’ର ରିପୋର୍ଟ ଅନୁଯାୟୀ ଅକ୍ଟୋବର ୨୦୨୩ରୁ ସେପ୍ଟେମ୍ୱର ୨୦୨୪ କେବଳ ଗୋଟିଏ ବର୍ଷ ମଧ୍ୟରେ ମେକ୍ସିକୋ ଓ କାନାଡ଼ା ସୀମା ଦେଇ ଅବୈଧ ଭାବେ ଅନୁପ୍ରବେଶ କରିବାକୁ ପ୍ରୟାସ କରୁଥିବା ୯୦୪୧୫ ଜଣ ଭାରତୀୟଙ୍କୁ ଗିରଫ କରାଯାଇଛି । ଏହା ବେଶ୍ ଉଦବେଗଜନକ । ଉଲ୍ଲେଖଯୋଗ୍ୟ ଯେ ଏମାନଙ୍କ ମଧ୍ୟରୁ ପ୍ରାୟ ୫୦ ପ୍ରତିଶତ ହେଉଛନ୍ତି ଗୁଜୁରାଟୀ । ପୂର୍ବେ ଭାରତୀୟମାନେ ଦୁବାଇ, ତୁର୍କୀ ହୋଇ ମେକ୍ସିକୋ ଯାଇ ସେଠାରୁ ନିଜ ଜୀବନକୁ ବାଜି ଲଗାଇ ଆମେରିକା ସୀମା ଭିତରେ ପ୍ରବେଶ କରିବାକୁ ପସନ୍ଦ କରୁଥିଲେ, ଯାହାକୁ ‘ଡଙ୍କି ରୁଟ’ ବୋଲି କୁହାଯାଏ । ଏବେ କିନ୍ତୁ ପର୍ଯ୍ୟଟକ ଭିସାରେ କାନାଡ଼ା ଯାଇ ସେଠାରୁ ଆମେରିକାକୁ ଅନୁପ୍ରବେଶ କରିବା ଅପେକ୍ଷାକୃତ ସହଜ ମାର୍ଗ ହୋଇଛି । ତେବେ ଆମେରିକାରେ ଥିବା ଅନୁପ୍ରବେଶକାରୀମାନଙ୍କୁ ତଡ଼ିବା ଟ୍ରମ୍ପଙ୍କ ପ୍ରାଥମିକତା ବୋଲି ସ୍ପଷ୍ଟ ହୋଇସାରିଥିବାରୁ ଏଭଳି ପ୍ରାୟ ୭.୨୫ ଲକ୍ଷ ଭାରତୀୟଙ୍କ ଭବିଷ୍ୟତ ଏବେ ଅନ୍ଧକାର ମଧ୍ୟରେ । ଭାରତ ସରକାରଙ୍କ ବିଦେଶ ମନ୍ତ୍ରାଳୟ ତରଫରୁ ମଧ୍ୟ କୌଣସି ପ୍ରକାର ଅବୈଧ ଅନୁପ୍ରବେଶକୁ ସମର୍ଥନ କରାଯାଏ ନାହିଁ ବୋଲି ସ୍ପଷ୍ଟ କରାଯାଇ ସାରିଥିବାରୁ ଆଗାମୀ ଦିନରେ ଏଭଳି ଅନୁପ୍ରବେଶକାରୀଙ୍କ ସମସ୍ୟା ବୃଦ୍ଧି ପାଇ ସେମାନଙ୍କର ଆମେରିକାରେ ରହିବା ଏକପ୍ରକାର ଅସମ୍ଭବ ହୋଇପଡ଼ିବ । ତେଣୁ ଏତେ ସଂଖ୍ୟକ ଭାରତୀୟଙ୍କୁ ଆମେରିକାରୁ ଫେରାଇ ଆଣି ସେମାନଙ୍କୁ ଉଚିତ ଭାବେ ଥଇଥାନ କରିବା ଭାରତ ସରକାରଙ୍କ ପାଇଁଏକ ବଡ଼ ଆହ୍ୱାନ ହୋଇପାରେ । ଆମେରିକାରେ ନିଯୁକ୍ତି ପାଇଥିବା କୁଶଳୀ ଇମିଗ୍ରାଣ୍ଟସମାନଙ୍କୁ 'ଏଚ-୧ବି' ଭିସା ପ୍ରଦାନ କରାଯାଇଥାଏ । ଏହି ଭିସା ଲାଭ କରି ଆଇଟି କ୍ଷେତ୍ରରେ ଅନେକ ଭାରତୀୟ ଏବେ ଆମେରିକାରେ କାର୍ଯ୍ୟରତ । ତେବେ ଟ୍ରମ୍ପଙ୍କ ବିଜୟ ପରେ ଏହି ଭିସା ମିଳିବା କଷ୍ଟକର ହେବ ବୋଲି ଉଦବେଗ ପ୍ରକାଶ ପାଉଛି । କାରଣ ଟ୍ରମ୍ପଙ୍କ ପ୍ରଥମ ଦଫା ରାଷ୍ଟ୍ରପତି ଶାସନ କାଳରେ ୧୭ ପ୍ରତିଶତ ‘ଏଚ-୧ବି’ ଭିସା ଆବେଦନକାରୀଙ୍କୁ ଭିସା ମିଳୁ ନ ଥିଲା, ଯାହା ବାଇଡେନ ପ୍ରଶାସନ ସମୟରେ ୪ ପ୍ରତିଶତକୁ ହ୍ରାସ ପାଇଥିଲା । ‘ଏଚ-୧ ବି’ ଭିସା ମିଳିବାରେ କଟକଣା ଲାଗିଲେ କମ ସଂଖ୍ୟକ ଭାରତୀୟ ଆମେରିକାରେ ଚାକିରି କରିପାରିବେ ଏବଂ ଭିସାର ନବୀକରଣ ହୋଇ ନପାରିଲେ କିଛି ଭାରତୀୟଙ୍କୁ ସ୍ୱଦେଶକୁ ଫେରିବାକୁ ପଡ଼ିପାରେ । ଉଲ୍ଲେଖଯୋଗ୍ୟ ଯେ ଆମେରିକା ଦ୍ୱାରା ୨୦୨୨ରେ ପ୍ରଦାନ କରାଯାଇଥିବା ୪.୪୧ ଲକ୍ଷ ‘ଏଚ-୧ବି’ ଭିସା ମଧ୍ୟରୁ ୭୨ ପ୍ରତିଶତରୁ ଅଧିକ ଭିସା ଭାରତୀୟମାନଙ୍କୁ ମିଳିଥିଲା । ସେହିପରି ‘ଏଚ-୧ବି’ ଭିସାରେ ଯାଇଥିବା ବ୍ୟକ୍ତିମାନଙ୍କ ଉପରେ ନିର୍ଭରଶୀଳ ଜୀବନସାଥୀ (ପତ୍ନୀ ବା ପତି)ମାନେ ଏବେ ‘ଏଚ-୪’ ଭିସା ଜରିଆରେ ସେଠାରେ କାର‌୍ୟ୍ୟ କରିବା ଅନୁମତି ପାଇଛନ୍ତି । ଏବେ ସେହି ଭିସା ପ୍ରତ୍ୟାହୃତ ହେବାର ଆଶଙ୍କା ଦେଖାଦେଇଛି । ଫଳରେ ଅନେକ ଭାରତୀୟ ଇମିଗ୍ରାଣ୍ଟ ପରିବାର ଆର୍ଥିକ ଦୁଃସ୍ଥିତିର ସାମ୍ନା କରିବାକୁ ବାଧ୍ୟ ହେବେ । ଏବର ନିୟମାନୁସାରେ ଇମିଗ୍ରାଣ୍ଟ ପିତାମାତାଙ୍କର ଆମେରିକାରେ ଜନ୍ମଲାଭ କରୁଥିବା ଶିଶୁମାନଙ୍କୁ ‘ଜନ୍ମସୂତ୍ରେ ନାଗରିକତ୍ୱ’ ମିଳିପାରୁଛି, ଯାହା ବାତିଲ ହେବାର ଆଶଙ୍କା ଦେଖାଦେଇଛି । ତେଣୁ ଭାରତୀୟ ଇମିଗ୍ରାଣ୍ଟମାନେ ଘୋର ଚିନ୍ତିତ ।          

ଆମେରିକାର ଘରୋଇ ମାନୁଫାକଚରିଙ୍ଗ (ଉତ୍ପାଦନ) ଶିଳ୍ପକୁ ସଂରକ୍ଷଣ ଦେବା ପାଇଁ ବିଭିନ୍ନ ଦେଶରୁ ଆମଦାନି ହେଉଥିବା ସାମଗ୍ରୀ ଉପରେ ସୀମା ଶୁଳ୍କ ବୃଦ୍ଧି କରାଯିବ ବୋଲି ଟ୍ରମ୍ପ କହିସାରିଛନ୍ତି । ଚୀନରୁ ଆମଦାନି ହେଉଥିବା ସାମଗ୍ରୀ ଉପରେ ସର୍ବାଧିକ ୬୦ ପ୍ରତିଶତ ଶୁଳ୍କ ଲଗାଯିବ ବୋଲି ସେ ଘୋଷଣା କରିସାରିଛନ୍ତି । ଚୀନ ଦ୍ୱାରା ଆମେରିକାକୁ ହେଉଥିବା ରପ୍ତାନି ଉପରେ ଏହାର ପ୍ରତିକୂଳ ପ୍ରଭାବ ପଡ଼ିବ । ଅଧିକ ଆମଦାନି ଶୁଳ୍କ ଲଗାଉଥିବାର ଅଭିଯୋଗ କରି ତାଙ୍କ ଭାଷଣରେ ସେ ଭାରତକୁ ‘ଅପବ୍ୟବହାରକାରୀ’ (ଆବ୍ୟୁଜର) ରୂପେ ଚିତ୍ରିତ କରିସାରିଛନ୍ତି ଓ ଭାରତୀୟ ସାମଗ୍ରୀ ଉପରେ ୨୦ ପ୍ରତିଶତ ସୀମାଶୁଳ୍କ ଲଗାଇବାକୁ ମନସ୍ଥ କରିଛନ୍ତି । ତେବେ ଭାରତୀୟ ରପ୍ତାନି ଉପରେ ଏହାର ଖୁବ୍ ବେଶି ପ୍ରତିକୂଳ ପ୍ରଭାବ ପଡ଼ି ନପାରେ, କାରଣ ଚୀନ ସାମଗ୍ରୀ ଉପରେ ପ୍ରସ୍ତାବିତ ଅଧିକ ଶୁଳ୍କ କାରଣରୁ ଭାରତ ପରୋକ୍ଷରେ ଲାଭବାନ ହୋଇପାରେ । ଏକ ବିକାଶଶୀଳ ରାଷ୍ଟ୍ର ହୋଇଥିବାରୁ ପୂର୍ବେ ଭାରତରୁ ଆମେରିକାକୁ ରପ୍ତାନି ହେଉଥିବା ଅନେକ ସାମଗ୍ରୀ ଉପରେ କୌଣସି ଶୁଳ୍କ ଦେବାକୁ ପଡ଼ୁନଥିଲା । ୨୦୧୯ ମସିହାରେ ଟ୍ରମ୍ପଙ୍କର ପ୍ରଥମ ରାଷ୍ଟ୍ରପତିତ୍ୱ କାଳରେ ଏହି ସୁବିଧା ପ୍ରତ୍ୟାହୃତ ହୋଇଥିଲା । ପ୍ରତିକ୍ରିୟା ସ୍ୱରୂପ ଭାରତ ମଧ୍ୟ ଆମେରିକାରୁ ଆମଦାନୀ ହେଉଥିବା ଅନେକ ସାମଗ୍ରୀ ଉପରେ ଶୁଳ୍କ ବଢ଼ାଇଥିଲା, ଯାହା ଉଭୟ ଦେଶ ମଧ୍ୟରେ ବାଣିଜ୍ୟିକ ସମ୍ପର୍କରେ ଉଦବେଳନ ସୃଷ୍ଟି କରିଥିଲା । ଇତିମଧ୍ୟରେ ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ଯଥେଷ୍ଟ ବୃଦ୍ଧି ପାଇ ୨୦୨୩ ଆର୍ଥିକ ବର୍ଷରେ ତାହା ୧୨୮୭୮ କୋଟି ଡଲାରରେ ପହଞ୍ଚିସାରିଛି । ଆମେରିକା ଭାରତର ସବୁଠାରୁ ବଡ଼ ବାଣିଜ୍ୟ ଅଂଶୀଦାର ହୋଇଥିଲା ବେଳେ  ପ୍ରସ୍ତାବିତ ଶୁଳ୍କ ବୃଦ୍ଧି ଯୋଗୁଁ ସେହି ସ୍ଥିତିରେ ପରିବର୍ତ୍ତନ ହୋଇପାରେ । 

ଟ୍ରମ୍ପଙ୍କ ପ୍ରସ୍ତାବିତ ନୀତିଗୁଡ଼ିକର ପରିଣାମ ସ୍ୱରୂପ ଆମେରିକୀୟ ଡଲାର ଅନ୍ୟ ଅନ୍ତର୍ଜାତୀୟ ମୁଦ୍ରାଗୁଡ଼ିକ ତୁଳନାରେ ଅଧିକ ଶକ୍ତିଶାଳୀ ହେବ ବୋଲି ବିଶେଷଜ୍ଞମାନେ ପୂର୍ବାନୁମାନ କରିସାରିଲେଣି, ଯାହା ଭାରତୀୟ ଟଙ୍କା ପାଇଁ ଶୁଭ ସୂଚନା ହୋଇ ନ ପାରେ । କାରଣ ସେ କ୍ଷେତ୍ରରେ ଡଲାର ତୁଳନାରେ ଟଙ୍କାର ମୂଲ୍ୟ ଆହୁରି ହ୍ରାସ ପାଇବ । ନିର୍ବାଚନ ଫଳ ପ୍ରକାଶ ପାଇବାର ଚାରି ଦିନ ଭିତରେ ଡଲାର ତୁଳନାରେ ଟଙ୍କାର ମୂଲ୍ୟ ୨୫ ପଇସା ଅଧିକ ହ୍ରାସ ପାଇ ପ୍ରତି ଡଲାର ମୂଲ୍ୟ ୮୪.୩୮ ଟଙ୍କା ହୋଇସାରିଲାଣି । ଆଗାମୀ ବର୍ଷକ ମଧ୍ୟରେ ଡଲାର ତୁଳନାରେ ଟଙ୍କାର ମୂଲ୍ୟ ଆହୁରି ହ୍ରାସ ପାଇ ପ୍ରତି ଡଲାର ମୂଲ୍ୟ ୮୫ ଟଙ୍କାରୁ ଅଧିକ ହେବ ବୋଲି ପୂର୍ବାନୁମାନ କରାଗଲାଣି । ଉଲ୍ଲେଖଯୋଗ୍ୟ ଯେ ଏବେ ବି ଭାରତୀୟ ବାଣିଜ୍ୟର ୮୫ ପ୍ରତିଶତ ଡଲାର ଉପରେ ନିର୍ଭରଶୀଳ । ତେଣୁ ଟଙ୍କାର ମୂଲ୍ୟହ୍ରାସରେ ଆମ ଗଚ୍ଛିତ ବିଦେଶୀ ମୁଦ୍ରା ଭଣ୍ଡାର ଚାପଗ୍ରସ୍ତ ହେବ । ଏହାର ପ୍ରତିକୂଳ ପ୍ରଭାବ ଜିଡିପି ଓ ସାମଗ୍ରିକ ଭାବେ ଦେଶର ଅର୍ଥନୀତି ଉପରେ ପଡ଼ିବା ଅବଶ୍ୟମ୍ଭାବୀ ।  ଏହା ଅଧିକ ଦରବୃଦ୍ଧିର କାରଣ ହେବ । 

ଆମେରିକାର ବ୍ୟାବସାୟିକ ଅଭିବୃଦ୍ଧିକୁ ଦୃଷ୍ଟିରେ ରଖି ଟ୍ରମ୍ପଙ୍କ ଦ୍ୱାରା ଗ୍ରହଣ କରାଯିବାକୁ ଥିବା ବିଭିନ୍ନ ଅଭିବୃଦ୍ଧିକାରୀ ଅର୍ଥନୈତିକ ନୀତି ଯୋଗୁଁ ସେଠାରେ ବଣ୍ଡ ନିବେଶରୁ ହେଉଥିବା ଆୟ (ୟିଲଡ) ଅଧିକ ହୋଇ ଆମେରିକାରେ ପୁଞ୍ଜି ନିବେଶ ଆକର୍ଷଣୀୟ ହେବ । ଫଳରେ ଭାରତ ଭଳି ଦେଶଗୁଡ଼ିକରୁ ଆନୁଷ୍ଠାନିକ ବିଦେଶୀ ପୁଞ୍ଜି (ଏଫଆଇଆଇ) ପ୍ରତ୍ୟାହୃତ ହୋଇ ଆମେରିକାମୁହାଁ ହେବାର ଆଶଙ୍କା ଦେଖା ଦେବ । ସାମୟିକ ଭାବେ ହେଲେ ବି ଏହା ଭାରତୀୟ ଅଂଶଧନ ବଜାରକୁ ଅସ୍ଥିର କରିପାରେ । 

ଅନିଶ୍ଚିତତା ହିଁ ଟ୍ରମ୍ପଙ୍କ ବ୍ୟକ୍ତିତ୍ୱର ଅନ୍ୟତମ ବିଶେଷତ୍ୱ । ସେ କେଉଁ ପରିସ୍ଥିତିରେ କିପରି ଆଚରଣ କରିବେ ତାହା ତାଙ୍କର ନିକଟତମ ଲୋକମାନେ ମଧ୍ୟ ଜାଣି ପାରିନଥାନ୍ତି । ବେଳେବେଳେ ତାଙ୍କ ଉଚ୍ଚାରଣରେ ମାତ୍ରାଧିକ କଠୋରତା ପ୍ରକାଶ ପାଉଥିବା ବେଳେ କାର୍ଯ୍ୟ କ୍ଷେତ୍ରରେ ସେହି କଠୋରତା ପରିଲକ୍ଷିତ ହୋଇ ନଥାଏ । ସେଥିପାଇଁ ରାଷ୍ଟ୍ରପତି ଭାବେ ତାଙ୍କ ପ୍ରଥମ ଦଫା ଶାସନ କାଳରେ ଗୁରୁତ୍ୱପୂର୍ଣ୍ଣ ଦାୟିତ୍ୱରେ ଥିବା ସହଯୋଗୀଙ୍କ ମଧ୍ୟରୁ ଅଧିକାଂଶ ଏବେ ତାଙ୍କ ସହ ନାହାନ୍ତି । ନିର୍ବାଚନୀ ପ୍ରଚାର ବେଳେ ଭାରତୀୟ ହିନ୍ଦୁଙ୍କ ଭୋଟ ହାତେଇବା ପାଇଁ ସେ ଦେଇଥିବା ଭାଷଣ ଯୋଗୁଁ ସେ ଭାରତ ସପକ୍ଷରେ ବୋଲି ଭ୍ରମଟିଏ ସୃଷ୍ଟି ହେଉଥାଇପାରେ । ମନେ ରଖିବାକୁ ହେବ ଯେ ଏ ଧରଣର ଆଚରଣ ଓ ଉଚ୍ଚାରଣ ଦେଣ-ନେଣ ଆଧାରିତ (ଟ୍ରାନଜେକସନାଲ) ହୋଇଥିବାରୁ ଏଗୁଡ଼ିକର ସ୍ଥାୟିତ୍ୱ କେବଳ ସ୍ୱାର୍ଥସିଦ୍ଧି ପର୍ଯ୍ୟନ୍ତ । ମୋଦୀଙ୍କ ସହ ତାଙ୍କ ବନ୍ଧୁତା ଅତି ଘନିଷ୍ଠ ଓ ଉଭୟଙ୍କ ମଧ୍ୟରେ ଥିବା ରସାୟନ (କେମିଷ୍ଟ୍ରି) କାଳେ ଭାରତ ହିତରେ ହେବ ବୋଲି ମନେ କରି କେହି କେହି ଉତ୍ସାହିତ । ତେବେ କୂଟନୀତି କ୍ଷେତ୍ରରେ ରସାୟନ ଯେତେ ଫଳପ୍ରଦ ହୋଇଥାଏ, ଅର୍ଥନୀତି କ୍ଷେତ୍ରରେ ସେପରି ହେବ ବୋଲି କହିବା କଷ୍ଟକର । ଏ କ୍ଷେତ୍ରରେ ‘ଆମେରିକା ଫାଷ୍ଟ’ ନୀତିର ପରିପନ୍ଥୀ ଯେ କୌଣସି ବିଷୟ ବିବାଦ ସୃଷ୍ଟି କରିପାରେ । ତେଣୁ ଟ୍ରମ୍ପଙ୍କ ଶାସନ କାଳରେ ଉଭୟ ଦେଶ ମଧ୍ୟରେ ସମ୍ପର୍କ ଉତ୍କଣ୍ଠାରହିତ ହେବା ନେଇ ଆଶଙ୍କା ଜନ୍ମିବା ସ୍ୱାଭାବିକ ।

Published in Sambad on Novemeber 13, 2024