Skip to main content

କମିଛି ରାଜ୍ୟର କୃଷି ବଜେଟ, କେନ୍ଦ୍ରୀୟ କାର୍ଯ୍ୟକ୍ରମ ସହ ତାଳମେଳ ନାହିଁ

ଓଡିଶା ସରକାରଙ୍କ ଦ୍ୱାରା ୨୦୨୧-୨୨ ଆର୍ଥିକ ବର୍ଷ ପାଇଁ ଉପସ୍ଥାପିତ ହୋଇଥିବା ସ୍ୱତନ୍ତ୍ର କୃଷି ବଜେଟର ଆକାର ୧୭୨୪୮ କୋଟି ଟଙ୍କା ଧାର୍ଯ୍ୟ ହୋଇଛି, ଯାହା ସମଗ୍ର ବଜେଟ ରାଶି ୧.୭୦ ଲକ୍ଷ କୋଟି ଟଙ୍କାର ୧୦.୧୫ ପ୍ରତିଶତ । ୨୦୧୩ରେ ରାଜ୍ୟରେ ସ୍ୱତନ୍ତ୍ର କୃଷି ବଜେଟ ଉପସ୍ଥାପିତ ହେବାଠାରୁ କେବେ ହେଲେ କୃଷି ପାଇଁ ସମଗ୍ର ବଜେଟର ଏତେ କମ ପ୍ରତିଶତ ରାଶି ଆବଣ୍ଟିତ ହୋଇ ନ ଥିଲା । ଉଲ୍ଲେଖଯୋଗ୍ୟ, ୨୦୨୦-୨୧ ପାଇଁ ପ୍ରସ୍ତୁତ ବଜେଟରେ କୃଷି ବଜେଟର ଆକାର ୧୯୪୦୮ କୋଟି ଟଙ୍କା ଥିବା ବେଳେ ପରିମାଣ ଦୃଷ୍ଟିରୁ ଗତ ବର୍ଷ ତୁଳନାରେ ଏ ବର୍ଷ କୃଷି ପାଇଁ ପ୍ରାୟ ୨୧୬୦ କୋଟି ଟଙ୍କା କମ ପ୍ରାବଧାନ କରାଯାଇଛି । କେବଳ ଏ ବର୍ଷ ନୁହେଁ, ବରଂ ଗତ ଦୁଇ ବର୍ଷ ଧରି କୃଷି ବଜେଟର ଆକାର କ୍ରମାଗତ ଭାବେ ହ୍ରାସ ପାଇ ୨୦୧୯-୨୦ ବର୍ଷ ତୁଳନାରେ ୩୭୬୮ କୋଟି ଟଙ୍କା କମ ହୋଇ ସାରିଛି । ୨୦୧୯-୨୦ରେ ଏହା ସମଗ୍ର ବଜେଟର ୧୫.୧୧ ପ୍ରତିଶତ ଥିବା ବେଳେ ୨୦୨୧-୨୨ରେ ତାହା ୧୦.୧୫ ପ୍ରତିଶତ ହୋଇ ଦୁଇ ବର୍ଷ ମଧ୍ୟରେ ତାହା ପ୍ରାୟ ୫ ପ୍ରତିଶତ ହ୍ରାସ ପାଇବା ବାସ୍ତବିକ ଉଦବେଗର ବିଷୟ । 

କୃଷି ଓ କୃଷକ ସଶକ୍ତିକରଣ, ସମବାୟ, ଜଳ ସମ୍ପଦ ଏବଂ ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗ, ଏହିପରି ଚାରିଟି ବିଭାଗ ପାଇଁ ହେଉଥିବା ଆବଣ୍ଟନକୁ ମିଶାଇ ପ୍ରତି ବର୍ଷ କୃଷି ବଜେଟ ପ୍ରସ୍ତୁତ ହୋଇଆସୁଛି । ଏ ବର୍ଷ କୃଷି ଓ କୃଷକ ସଶକ୍ତିକରଣ ବିଭାଗ ପାଇଁ ୫୯୧୯ କୋଟି ଟଙ୍କାର ଆବଣ୍ଟନ ହୋଇଛି, ଯାହା ସମଗ୍ର କୃଷି ବଜେଟର ପ୍ରାୟ ୩୪ ପ୍ରତିଶତ । ୨୦୧୯-୨୦ ବଜେଟରେ ଏହି ବିଭାଗ ପାଇଁ ୮୮୭୪ କୋଟି ଟଙ୍କା ଆବଣ୍ଟିତ ହୋଇଥିଲା ବେଳେ ଦୁଇ ବର୍ଷ ମଧ୍ୟରେ ତାହା ୩୧୫୫ କୋଟି ବା ପ୍ରାୟ ୩୫ ପ୍ରତିଶତ ହ୍ରାସ ପାଇବା ଚିନ୍ତାଜନକ । ତେବେ ଏହି ସମୟ ମଧ୍ୟରେ କାଳିଆ ଯୋଜନାରେ ଆବଣ୍ଟନ ପରିମାଣ ୩୮୧୧ କୋଟି ଟଙ୍କା କମ ହେବା ଏହାର ମୁଖ୍ୟ କାରଣ । ଏ ବର୍ଷ କାଳିଆ ଯୋଜନା ପାଇଁ ମାତ୍ର ୧୮୦୦ କୋଟି ଟଙ୍କା ଆବଣ୍ଟିତ ହୋଇଛି । ରାଜ୍ୟ ସରକାରଙ୍କ କାଳିଆ ଯୋଜନା କେନ୍ଦ୍ର ସରକାରଙ୍କ ପିଏମ-କିସାନ ସମ୍ମାନ ନିଧି ଯୋଜନାରେ ମିଶିଯିବା ପରେ ସରକାର ଚାଷୀଙ୍କୁ ଘୋଷିତ ବାର୍ଷିକ ୧୦ ହଜାର ଟଙ୍କା ପରିବର୍ତ୍ତେ ସେଥିରୁ ପିଏମ-କିସାନ ସମ୍ମାନ ନିଧିରେ ମିଳୁଥିବା ୬ ହଜାର ଟଙ୍କାକୁ ବାଦ ଦେଇ ୪ ହଜାର ଟଙ୍କା ଦେଉଥିବାରୁ ଏ ବାବଦରେ ବଜେଟୀୟ ଆବଣ୍ଟନ କମ ହୋଇଛି । ୨୦୧୮ରୁ ଆରମ୍ଭ ହୋଇଥିବା ‘କୃଷି ଉଦ୍ୟମୀ ପ୍ରୋତ୍ସାହନ ଯୋଜନା’ରେ ରାଜ୍ୟରେ ୧୦୦୦ ନୂତନ କୃଷି ଉଦ୍ୟମୀ ସୃଷ୍ଟି କରିବାକୁ ଥିବା ଲକ୍ଷ୍ୟ ହାସଲ କରିବାକୁ ଏ ବର୍ଷ ବଜେଟରେ ନୂଆ କରି ପ୍ରାୟ ୧୦ କୋଟି ଟଙ୍କାର ପାଣ୍ଠି ବରାଦ କରା ଯାଇଛି । ଗତ ବର୍ଷ କୃଷି ଯାନ୍ତ୍ରିକୀକରଣ ପାଇଁ ବଜେଟରେ ୧୬୫ କୋଟି ଟଙ୍କାର ପ୍ରାବଧାନ ଥିଲା ବେଳେ ଏ ବର୍ଷ ତାହା ସାମାନ୍ୟ ବୃଦ୍ଧି ପାଇ ସେଥିପାଇଁ ୧୮୦ କୋଟି ଟଙ୍କା ଆବଣ୍ଟିତ ହୋଇଛି । ଯାନ୍ତ୍ରିକୀକରଣକୁ ଗତି ପ୍ରଦାନ କରିବା ପାଇଁ ଅଧିକ ସହାୟତାର ଆବଶ୍ୟକତା ଅନୁଭୂତ ହେଉଛି । ଆଗାମୀ ଦିନରେ କୃଷକମାନଙ୍କୁ ଏଫପିଓ ମାଧ୍ୟମରେ ସଂଗଠିତ କରାଇବା ଓ ସେଗୁଡିକୁ କ୍ରିୟାଶୀଳ କରିବା ପାଇଁ ରାଜ୍ୟ ସରକାର ଆଗ୍ରହୀ ଥିଲେ ବି ଗତ ବର୍ଷ ପରି ଏ ବର୍ଷ ବଜେଟରେ ଏଥି ନେଇ ୬୦ କୋଟି ଟଙ୍କାର ଆବଣ୍ଟନ ଅପରିବର୍ତ୍ତିତ ରହିବାକୁ ଗ୍ରହଣ କରି ହେଉ ନାହିଁ । ରାଜ୍ୟର ଆଦିବାସୀ ଅଧ୍ୟୁଷିତ ଜିଲ୍ଲାଗୁଡିକରେ ମିଲେଟ ମିଶନ ସଫଳତାର ସହିତ କାମ କରୁଥିବାରୁ ଏହାକୁ ଅଧିକ ପ୍ରୋତ୍ସାହନ ପ୍ରଦାନ କରି ସମ୍ପ୍ରସାରିତ କରିବାର ଆବଶ୍ୟକତା ଅନୁଭୂତ ହେଉଥିଲା । ହେଲେ ଏଥିପାଇଁ  ଆବଣ୍ଟନକୁ ଗତ ବର୍ଷର ୧୦୬ କୋଟି ଟଙ୍କାରୁ ସାମାନ୍ୟ ବଢାଇ ୧୧୦ କୋଟି ଟଙ୍କା କରାଯାଇଛି । କୃଷି ନୀତି ଅନ୍ତର୍ଗତ ପୁଞ୍ଜି ସବସିଡି ବାବଦ ବ୍ୟୟ ବରାଦ ଗତ ବର୍ଷ ପରି ଏ ବର୍ଷ ବଜେଟରେ ମଧ୍ୟ ୧୦୦ କୋଟି ଟଙ୍କାରେ ଅପରିବର୍ତ୍ତିତ ରହିଛି, ଯାହା ଆଦୌ ପର୍ଯ୍ୟାପ୍ତ ନୁହେଁ । କୃଷି କ୍ଷେତ୍ରରେ ଘରୋଇ ପୁଞ୍ଜି ନିର୍ମାଣରେ ଆଶାନୁରୂପ ବୃଦ୍ଧି ନ ହେଲେ ଉତ୍ପାଦନ ଓ ଉତ୍ପାଦିକା ବୃଦ୍ଧି ପାଇବା ସମ୍ଭବ ହେବନାହିଁ । ତେଣୁ ସବସିଡି ରାଶିର ପରିମାଣ ଅଧିକ ହେଲେ ତାହା ବ୍ୟାଙ୍କମାନଙ୍କ ଦ୍ୱାରା ଋଣ ପ୍ରଦାନକୁ ମଧ୍ୟ ପ୍ରୋତ୍ସାହିତ କରୁଥିବାରୁ ସେଥିପାଇଁ ଅଧିକ ରାଶି ଆବଣ୍ଟିତ ହେବା ସମୀଚୀନ । ରାଜ୍ୟରେ ସଂଖ୍ୟାଧିକ ଜିଲ୍ଲା ବୃଷ୍ଟି ନିର୍ଭର ହୋଇଥିଲେ ବି ‘ବୃଷ୍ଟି ନିର୍ଭର ଅଞ୍ଚଳର ଉନ୍ନତିକରଣ ଓ ଜଳବାୟୁ ପରିବର୍ତ୍ତନ’ ପାଇଁ ଗତ ବର୍ଷ ଆବଣ୍ଟିତ ହୋଇଥିବା ମାତ୍ର ୫୦ କୋଟି ଟଙ୍କାକୁ ହ୍ରାସ କରି ଏ ଥର ୩୦ କୋଟି ଟଙ୍କା କରି ଦିଆ ଯାଇଛି ।

ଏ ବର୍ଷ ସମବାୟ ବିଭାଗ ପାଇଁ ୧୬୪୧ କୋଟି ଟଙ୍କାର ବରାଦ ହୋଇଛି ଯାହା ସମଗ୍ର କୃଷି ବଜେଟର ପ୍ରାୟ ୧୦ ପ୍ରତିଶତ । ଗତ ବର୍ଷ ତୁଳନାରେ ବିଭାଗ ପାଇଁ ବଜେଟ ଆବଣ୍ଟନ ୧୫୯ କୋଟି ଟଙ୍କା ହ୍ରାସ ପାଇଛି । ଏଥି ମଧ୍ୟରୁ ୫୦୦ କୋଟି ଟଙ୍କା କେବଳ ଫସଲ ବୀମାର ପ୍ରିମିୟମ ବାବଦକୁ ବରାଦ କରାଯାଇଛି । ଫସଲ ଋଣରେ ସୁଧ ରିହାତି ବାବଦକୁ ଏଥର ୬୭୫ କୋଟି ଟଙ୍କାର ପ୍ରାବଧାନ ହୋଇଛି, ଯାହା ଗତ ବର୍ଷ ତୁଳନାରେ ପ୍ରାୟ ୩୦ କୋଟି ଟଙ୍କା କମ । ରାଜ୍ୟରେ ଫସଲ ଋଣ ବୃଦ୍ଧି ପାଇଁ ବାର୍ଷିକ ଋଣ ଯୋଜନାରେ ବ୍ୟାଙ୍କଗୁଡିକ ଅଧିକ ଲକ୍ଷ୍ୟ ଧାର୍ଯ୍ୟ କରୁଥିଲା ବେଳେ ଫସଲ ଋଣରେ ସୁଧ ରିହାତି ପାଇଁ ବଜେଟୀୟ ଆବଣ୍ଟନ ହ୍ରାସ ପାଇବା, ବ୍ୟାଙ୍କ ଋଣ ପ୍ରଦାନକୁ ଉତ୍ସାହିତ କରିବାରେ ପ୍ରତିବନ୍ଧକ ସାଜିପାରେ । ରାଜ୍ୟ ସମବାୟ ବାଣିଜ୍ୟିକ ଫେଡରେସନର କର୍ପସ ପାଣ୍ଠିରେ ୧୦୦ କୋଟି ଟଙ୍କାର ପୁଞ୍ଜି ଲଗାଣ ବ୍ୟତୀତ ସମବାୟ କ୍ଷେତ୍ରକୁ ଗତି ପ୍ରଦାନ କରିବା ପାଇଁ ବଜେଟରେ ଦୂରଦୃଷ୍ଟି ଥାଇ କୌଣସି କାର୍ଯ୍ୟକ୍ରମ ପାଇଁ ସେ ଭଳି ଆବଣ୍ଟନ ହୋଇନାହିଁ ।

ଗତ ବର୍ଷ ତୁଳନାରେ ଏ ବର୍ଷ ଜଳ ସମ୍ପଦ ବିଭାଗ ପାଇଁ ମଧ୍ୟ ବଜେଟ ପ୍ରାୟ ୧୧୦୦କୋଟି ଟଙ୍କା ହ୍ରାସ ହୋଇ ୮୨୭୨ କୋଟି ଟଙ୍କା ଧାର୍ଯ୍ୟ କରାଯାଇଛି । ତେବେ ଗତ ବର୍ଷ ଭଳି ଏ ବର୍ଷ ବି ସମଗ୍ର କୃଷି ବଜେଟର ପ୍ରତିଶତ ହିସାବରେ ଏହା ୪୮ ପ୍ରତିଶତରେ ଅପରିବର୍ତ୍ତିତ ରହିଛି । ଆଗାମୀ ବର୍ଷ ଅତିରିକ୍ତ ୨.୭୪ ଲକ୍ଷ ହେକ୍ଟର ଚାଷ ଜମିକୁ ଜଳସେଚନର ସୁବିଧା ଯୋଗାଇ ଦେବାର ଲକ୍ଷ୍ୟ ଧାର୍ଯ୍ୟ ହୋଇଥିଲେ ବି ସେଥିପାଇଁ ବଜେଟୀୟ ଆବଣ୍ଟନ ଯଥେଷ୍ଟ ହୋଇଥିଲା ପରି ମନେ ହେଉନାହିଁ । କଳାହାଣ୍ଡି ଜିଲ୍ଲାରେ ସାନ୍ଦୁଲ ଓ ନବରଙ୍ଗପୁର ଜିଲ୍ଲାରେ ତୁରୀ-ଗୁଣ୍ଟାତରେ ଦୁଇଟି ନୂଆ ମଧ୍ୟମ ଜଳସେଚନ ପ୍ରକଳ୍ପର ପରିକଳ୍ପନା ସ୍ୱାଗତଯୋଗ୍ୟ । ତେବେ ରାଜ୍ୟର ମୁଖ୍ୟ ନଦୀଗୁଡିକ ଉପରେ ଆଗାମୀ ୫ ବର୍ଷ ମଧ୍ୟରେ ୧୨୦୦୦ କୋଟି ଟଙ୍କା ବ୍ୟୟରେ ଇନ-ଷ୍ଟ୍ରିମ ଷ୍ଟୋରେଜ ଷ୍ଟ୍ରକଚର ନିର୍ମାଣ ପାଇଁ ଏକ ଦୀର୍ଘ ମିଆଦି କାର୍ଯ୍ୟକ୍ରମ ପ୍ରସ୍ତୁତ ହେବା ବିଷୟ ଗତ ବଜେଟରେ ଘୋଷଣା ହୋଇଥିଲେ ବି ସେଥିରେ ଉଲ୍ଲେଖନୀୟ ଅଗ୍ରଗତି ହୋଇ ନ ପାରିବା ଓ ସେଥିପାଇଁ ଚଳିତ ବର୍ଷ ବଜେଟରେ ମାତ୍ର ୭୯୫ କୋଟି ଟଙ୍କା ବରାଦ ହେବା ଚିନ୍ତାଜନକ । ଗତ ବର୍ଷ ବଜେଟରେ ୧୦୯୮ କୋଟି ଟଙ୍କା ବ୍ୟୟ ଅଟକଳରେ ୧୫ଟି ଜିଲ୍ଲାର ୧୦୦୦୦ ପୋଖରୀର ନବୀକରଣର ବିଶେଷ ଉଲ୍ଲେଖ ଥିବା ବେଳେ ଏ ବର୍ଷ ସେ ସମ୍ପର୍କରେ ଉଲ୍ଲେଖ ନ ଥିବାରୁ ସେହି କାର୍ଯ୍ୟକ୍ରମର ଅଗ୍ରଗତି ନେଇ ପ୍ରଶ୍ନ ଉଠିବା ସ୍ୱାଭାବିକ । ପାର୍ବତୀ ଗିରି ମେଗା ଲିଫ୍ଟ ପ୍ରକଳ୍ପରେ ଗତ ବର୍ଷ ୫୪୦ କୋଟି ଟଙ୍କା ଆବଣ୍ଟିତ ହୋଇଥିଲା ବେଳେ ଏ ବର୍ଷ ତାହା ପ୍ରାୟ ୩୨୦ କୋଟି ଟଙ୍କା ବୃଦ୍ଧି ପାଇ ୮୬୦ କୋଟି ଟଙ୍କାରେ ପହଞ୍ଚିଛି । ତେବେ ‘ତ୍ୱରିତ ଜଳସେଚନ ସୁବିଧା ଯୋଜନା’ (ଏଆଇବିପି) ପାଇଁ ଆବଣ୍ଟନ ପ୍ରାୟ ୧୫୩ କୋଟି ଟଙ୍କା କମି ୧୬୫୮ କୋଟି ଟଙ୍କା ହେବା ଓ ରାଜ୍ୟ ପାଣ୍ଠିରେ ପରିଚାଳିତ ‘ଜଳକ୍ଷେତ୍ର ଭିତ୍ତିଭୂମି ଉନ୍ନୟନ କାର୍ଯ୍ୟକ୍ରମ’ ପାଇଁ ଆବଣ୍ଟନ ପ୍ରାୟ ୫୦ ପ୍ରତିଶତ ହ୍ରାସ ପାଇ ୪୫୪ କୋଟି ଟଙ୍କା ଧାର୍ଯ୍ୟ ହେବା ଉଦବେଗର ବିଷୟ ।     

ଏ ବର୍ଷ ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗ ପାଇଁ ୧୪୧୫ କୋଟି ଟଙ୍କାର ବ୍ୟୟ ବରାଦ ହୋଇଛି, ଯାହା କୃଷି ବଜେଟର ୮ ପ୍ରତିଶତ । ଗତ ବର୍ଷ ତୁଳନାରେ ଏହି ବିଭାଗ ପାଇଁ ପ୍ରାୟ ୨୦୦ କୋଟି ଟଙ୍କା ଅଧିକ ରାଶି ଆବଣ୍ଟିତ ହୋଇଛି । ଗତ ଦୁଇ ବର୍ଷ ଧରି ଏହି ବିଭାଗ ପାଇଁ ବରାଦ ହେଉଥିବା ରାଶିରେ ପରିମାଣ ଓ ପ୍ରତିଶତ ଦୃଷ୍ଟିରୁ ବୃଦ୍ଧି ପାଇବା ସ୍ୱାଗତଯୋଗ୍ୟ । ଅଧିକ ମାଛ ଚାଷ ପାଇଁ ନୂଆ ପୋଖରୀ ଖୋଳା ଯୋଜନାରେ ୭୦ କୋଟି ଟଙ୍କାର ରାଶି ବରାଦ କରାଯାଇଛି, ଯାହା ଗତ ବର୍ଷ ତୁଳନାରେ ମାତ୍ର ୨ କୋଟି ଟଙ୍କା ଅଧିକ । ତେବେ ରାଜ୍ୟରେ ଏହି କାର୍ଯ୍ୟକ୍ରମ ଆଶାନୁରୂପ ଅଗ୍ରଗତି କରି ପାରୁ ନଥିବା ଆଦୌ ଉତ୍ସାହପ୍ରଦ ନୁହେଁ । ସେହିପରି ‘ଶ୍ୱେତ ବିପ୍ଳବ’ ପାଇଁ ଆବଣ୍ଟନ ୯୦ କୋଟି ଟଙ୍କାରୁ ୯୨ କୋଟି ଟଙ୍କା ହେବା ପ୍ରାୟ ସ୍ଥିତାବସ୍ଥା ବଜାୟ ରହିବା ସହ ସମାନ । ଏ ଦୁଇଟି କାର୍ଯ୍ୟକ୍ରମ ଗ୍ରାମାଞ୍ଚଳରେ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବାରେ ସହାୟକ ହେଉଥିବାରୁ ସେଥିପାଇଁ ଅଧିକ ଆବଣ୍ଟନ ହେବା ଉଚିତ ଥିଲା । ଏ ଥର ବିଭାଗର ବିଭିନ୍ନ ପ୍ରକାର ଭିତ୍ତିଭୂମିର ବିକାଶ ପାଇଁ ଧ୍ୟାନ ଦିଆ ଯାଇ ଅଧିକ ବ୍ୟୟ ବରାଦ ହେବା ସ୍ୱାଗତଯୋଗ୍ୟ ।     

କେନ୍ଦ୍ର ସରକାରଙ୍କ ଘୋଷିତ ବିଭିନ୍ନ କାର୍ଯ୍ୟକ୍ରମ ସହ ସମନ୍ୱୟ ରକ୍ଷା କରି ରାଜ୍ୟ ସରକାର  କୃଷି ବଜେଟ ପ୍ରସ୍ତୁତ କରିବା ଆଶା କରାଯାଏ । ତେବେ ଚଳିତ ବର୍ଷର କୃଷି ବଜେଟରେ ଅନ୍ତତଃ କେତୋଟି କ୍ଷେତ୍ରରେ ସେହି ତାଳମେଳ ପରିଲକ୍ଷିତ ହୋଇନାହିଁ । ଉଦାହରଣ ସ୍ୱରୂପ, କୃଷି କ୍ଷେତ୍ରରେ ଆବଶ୍ୟକ ଭିତ୍ତିଭୂମି ଓ ସମ୍ପତ୍ତି ନିର୍ମାଣ ପାଇଁ କେନ୍ଦ୍ର ସରକାରଙ୍କ ଦ୍ୱାରା ଏକ କୃଷି ଭିତ୍ତିଭୂମି ପାଣ୍ଠି ଘୋଷିତ ହୋଇଛି ଯେଉଁଥିରେ ଚାରି ବର୍ଷ ମଧ୍ୟରେ ୧ ଲକ୍ଷ ଟଙ୍କାର ବ୍ୟାଙ୍କ ଋଣ ଉପଲବ୍ଧ କରାଯିବ । ଏଥିରେ ୨ କୋଟି ଟଙ୍କା ପର୍ଯ୍ୟନ୍ତ ଋଣ ଉପରେ ୩ ପ୍ରତିଶତ ସୁଧ ରିହାତି ସହ ପ୍ରତିଟି ଋଣ ଲାଗି ସିଜିଟିଏମଏସଇ ଦ୍ୱାରା ବ୍ୟାଙ୍କ ଗ୍ୟାରେଣ୍ଟି ପ୍ରଦାନ କରାଯିବ ଯେଉଁଥିପାଇଁ ଗ୍ୟାରେଣ୍ଟି ଫି କେନ୍ଦ୍ର ସରକାର ବହନ କରିବେ । ଓଡିଶାରେ ଘରୋଇ ସ୍ତରରେ କୃଷି ଭିତ୍ତିଭୂମିର ବିକାଶକୁ ତ୍ୱରାନ୍ୱିତ କରିବା ପାଇଁ ସରକାର ଏହାକୁ ଏକ ସୁଯୋଗ ଭାବେ ଗ୍ରହଣ କରି ପାରିଥାଆନ୍ତେ । ତଦନୁଯାୟୀ କେନ୍ଦ୍ରୀୟ କୃଷି ଭିତ୍ତିଭୂମି ପାଣ୍ଠିକୁ ଧ୍ୟାନରେ ରଖି କୃଷି ଭିତ୍ତିଭୂମିର ବିକାଶ ଉପରେ ଗୁରୁତ୍ୱ ଦେଇ କୃଷି ବଜେଟରେ ସ୍ୱତନ୍ତ୍ର ଭାବେ ବିଶେଷ ଋଣ ସଂଯୁକ୍ତ ସବସିଡି ଯୋଜନା ଘୋଷଣା କରା ଯାଇ ପାରିଥାଆନ୍ତା, ଯାହା ହୋଇନାହିଁ । କେନ୍ଦ୍ର ସରକାରଙ୍କ ଦ୍ୱାରା କୃଷିର ସୌରକରଣ (ସୋଲାରାଇଜେସନ) ଉପରେ ଗୁରୁତ୍ୱ ଦିଆଯାଇ ପିଏମ-କୁସୁମ କାର୍ଯ୍ୟକ୍ରମରେ ଚାଷୀମାନଙ୍କୁ ସୋଲାର ପମ୍ପସେଟ ଯୋଗାଇ ଦେବା ପାଇଁ ବ୍ୟବସ୍ଥା ଥିଲେ ବି ରାଜ୍ୟ କୃଷି ବଜେଟରେ ଏଥିପାଇଁ ପୂର୍ବ ବର୍ଷ ଭଳି ଏ ବର୍ଷ ବି ମାତ୍ର ୫ କୋଟି ଟଙ୍କା ଆବଣ୍ଟିତ ହୋଇଛି । ରାଜ୍ୟରେ ଏହି କାର୍ଯ୍ୟକ୍ରମର ଅଗ୍ରଗତି ଆଶାନୁରୂପ ହୋଇ ନ ପାରିବାର ମୁଖ୍ୟ କାରଣ ହେଉଛି ଏ  ସମ୍ପର୍କରେ ଚାଷୀଙ୍କ ମଧ୍ୟରେ ସଚେତନତାର ଅଭାବ । ରାଜ୍ୟର ଖୁବ କମ ସଂଖ୍ୟକ ମଣ୍ଡି ଜାତୀୟ ସ୍ତରରେ “ଇ-ନାମ’ ମଞ୍ଚ ସହ ସଂଯୁକ୍ତ ହୋଇଥିଲେ ବି ଏହାକୁ ବେଗ ପ୍ରଦାନ କରିବା ପାଇଁ ରାଜ୍ୟ କୃଷି ବଜେଟରେ କୌଣସି ବିଶେଷ ଧ୍ୟାନ ଦିଆ ଯାଇ ନାହିଁ । ଉଲ୍ଲେଖଯୋଗ୍ୟ, ଚଳିତ ବର୍ଷ କେନ୍ଦ୍ର ବଜେଟରେ ଦେଶରେ ୧୦୦୦ ମଣ୍ଡିକୁ ‘ଇ-ନାମ’ ସହ ସଂଯୁକ୍ତ କରିବାର ଲକ୍ଷ୍ୟ ଧାର୍ଯ୍ୟ ହୋଇଛି ।

ସବୁବେଳେ ଯେ କେନ୍ଦ୍ର କୃଷି ମନ୍ତ୍ରଣାଳୟ ଦ୍ୱାରା ଘୋଷିତ ନୀତି ଓ ନିଷ୍ପତ୍ତିର ପ୍ରଭାବ ରାଜ୍ୟ କୃଷି  ଉପରେ ପଡିବ, ତାହା ନୁହେଁ । ବେଳେବେଳେ ଅନ୍ୟ ମନ୍ତ୍ରଣାଳୟଙ୍କ ଦ୍ୱାରା ଗୃହୀତ ନୀତି ଓ ନିଷ୍ପତ୍ତି ମଧ୍ୟ ରାଜ୍ୟରେ କୃଷି ପାଇଁ ସୁଯୋଗ ସୃଷ୍ଟି କରିପାରେ, ଯେଉଁଥିପାଇଁ ପ୍ରଶାସନିକ ସ୍ତରରେ ଆଖି କାନ ଖୋଲା ରଖିବାକୁ ହେବ ଓ ତଦନୁସାରେ ଠିକ ସମୟରେ ଉଚିତ ପଦକ୍ଷେପ ଗ୍ରହଣ କରିବାକୁ ହେବ । ଉଦାହରଣ ସ୍ୱରୂପ, ବିଦେଶରୁ ପେଟ୍ରୋ-ଦ୍ରବ୍ୟର ଆମଦାନି କମ କରିବା ଲାଗି କେନ୍ଦ୍ର ପେଟ୍ରୋଲିୟମ ମନ୍ତ୍ରଣାଳୟ ଦ୍ୱାରା ଚିନିକଳ ଓ ଡିଷ୍ଟିଲେରିଗୁଡିକରୁ ଉତ୍ପାଦିତ ଇଥାନଲକୁ ପେଟ୍ରୋଲରେ ମିଶାଇ ବିକିବା ଲାଗି ଦେଶରେ ଏକ ଇଥାନଲ ମିଶ୍ରିତ ପେଟ୍ରୋଲ (ଇବିପି) କାର୍ଯ୍ୟକ୍ରମ କାର୍ଯ୍ୟ କରୁଛି । ଏହି ଯୋଜନା ପାଇଁ କେନ୍ଦ୍ର ସରକାରଙ୍କ ପ୍ରୋତ୍ସାହନ ଫଳରେ ଚିନିକଳ ଓ ଡିଷ୍ଟିଲେରିଗୁଡିକ ତୈଳ ବିପଣନ କମ୍ପାନୀଗୁଡିକୁ ଚଳିତ ବର୍ଷ ପ୍ରାୟ ୩୧୦ କୋଟି ଲିଟର ଇଥାନଲ ଯୋଗାଇବାକୁ ସମର୍ଥ ହୋଇଛନ୍ତି, ଯଦ୍ଦ୍ୱାରା ଆଖୁଚାଷୀମାନେ ମଧ୍ୟ ପରୋକ୍ଷରେ ଲାଭବାନ ହେଉଛନ୍ତି । ତେବେ ଚିନିକଳଗୁଡିକ ମୁଖ୍ୟତଃ ଉତ୍ତରପ୍ରଦେଶ ଓ ମହାରାଷ୍ଟ୍ରରେ ଅବସ୍ଥିତ ଥିବାରୁ ସେଠାରୁ ଦେଶର ବିଭିନ୍ନ ସ୍ଥାନରେ ଥିବା ରିଫାଇନେରି ପର୍ଯ୍ୟନ୍ତ ତାହା ପହଞ୍ଚାଇବା ବ୍ୟୟ ବହୁଳ ହେଉଛି । ଓଡିଶାର ପାରାଦ୍ୱୀପଠାରେ ଏକ ରିଫାଇନେରି ଥିବାରୁ ସେଠାକାର ଇଥାନଲ ଆବଶ୍ୟକତା ଯଦି ଓଡିଶାର ଚିନିକଳ ଓ ଡିଷ୍ଟିଲେରିଗୁଡିକ ଦ୍ୱାରା ପରିପୂରଣ କରିବାକୁ ରାଜ୍ୟ ସରକାରଙ୍କ ତରଫରୁ ପଦକ୍ଷେପ ଗ୍ରହଣ କରାଯାଆନ୍ତା ତେବେ ଜଳସେଚନ ସୁବିଧା ଥିବା କେତେକ ଅଞ୍ଚଳର ଚାଷୀ ଆଖୁଚାଷ କରିବାକୁ ଆଗ୍ରହ ପ୍ରକାଶ କରି ଲାଭବାନ ହୁଅନ୍ତେ । ଭବିଷ୍ୟତରେ କେନ୍ଦ୍ର ଯୋଜନା ଓ କାର୍ଯ୍ୟକ୍ରମଗୁଡିକ ସହ ତାଳମେଳ ରକ୍ଷା କରି ସେଥିରୁ ଓଡିଶାର କୃଷି ଓ କୃଷକମାନେ କିପରି ସର୍ବାଧିକ ଲାଭବାନ ହୋଇପାରିବେ ତାହା ଉପରେ ଗୁରୁତ୍ୱ ଦିଆଯିବା ଉଚିତ ଓ ରାଜ୍ୟ କୃଷି ବଜେଟରେ ତାହା ନିର୍ଦ୍ଦିଷ୍ଟ ଭାବେ ପ୍ରତିଫଳିତ ହେବା ଆବଶ୍ୟକ । ସମଗ୍ର ରାଜ୍ୟ ବଜେଟରେ ଉଭୟ ପରିମାଣ ଓ ପ୍ରତିଶତ ଦୃଷ୍ଟିରୁ ଏ ବର୍ଷ କୃଷି ପାଇଁ ଆବଣ୍ଟନ ହ୍ରାସ ପାଇଥିବାରୁ ମନରେ ପ୍ରଶ୍ନ ଉଠିବା ସ୍ୱାଭାବିକ ରାଜ୍ୟ ସରକାରଙ୍କ ପାଇଁ କୃଷି କ’ଣ ଆଉ ପୂର୍ବ ପରି ଗୁରୁତ୍ୱ ବହନ କରୁ ନାହିଁ ?


Published in Odisha Reporter on March 19, 2021

 

Comments

  1. Samabaya prati adhika jatnasila heba uchit.. budget re adhika prabadhan jaruri thila...dhana mandi prati gurutwa nadeba thik nuhan.

    ReplyDelete

Post a Comment

Popular posts from this blog

‘ଦାଦନ’ ନୁହେଁ କି ‘ପ୍ରବାସୀ’ ନୁହେଁ

“ମୁଁ ଜଣେ ଓଏଏସ ଅଫିସର । ତୋ’ ଭଳି କେଉଁଠିକୁ ଯାଇ ଦାଦନ ଖଟୁ ନାହିଁ ।” କିଛି ବାହାର ରାଜ୍ୟରେ କାମ କରି ଓଡିଶାକୁ ଫେରିଥିବା ଶ୍ରମିକଙ୍କ ପ୍ରତି ଜଣେ ଉତକ୍ଷିପ୍ତ ବିଡିଓଙ୍କର ଏ ଭଳି ଆପ ତ୍ତି ଜନକ କଟୂ ମନ୍ତବ୍ୟ ଭାଇରାଲ ହେବା ପରେ ବିଭିନ୍ନ କାରଣରୁ ତାହା ରାଜ୍ୟବାସୀଙ୍କୁ ବ୍ୟଥିତ ଓ ସ୍ତମ୍ଭୀଭୂତ କଲା । ଏଭଳି ଶ୍ରମିକଙ୍କ ଘରବାହୁଡାର ପ୍ରାରମ୍ଭିକ ପର୍ଯ୍ୟାୟରେ କିଛି ସରକାରୀ ଅଧିକାରୀଙ୍କଠାରୁ ଆରମ୍ଭ କରି ସାଧାରଣ ଲୋକଙ୍କ ପର୍ଯ୍ୟନ୍ତ ସେମାନଙ୍କୁ ଦାଦନ ଶ୍ରମିକ ଭାବେ ସମ୍ବୋ ଧନ  କରି ତା ଚ୍ଛ ଲ୍ୟ କରିବା ସହିତ ‘ଦାଦନ’ ଶବ୍ଦଟିକୁ ଏକ ଗାଳି ରୂପେ ବ୍ୟବହାର କରିଥିବାର ଅନେକ ଘଟଣା ଦେଖିବାକୁ ମିଳିଥିଲା । ଏମାନେ ଫେରିବା ପରେ ଓଡିଶାରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ଯୋଗୁ ସ୍ଥାନୀୟ ଲୋକେ ସଂକ୍ରମିତ ହେବାର ଭୟ ଏହାର ମୁଖ୍ୟ କାରଣ ହୋଇଥିଲା ବେଳେ ସ୍ଥଳ ବିଶେଷରେ ଫେରିଥିବା କେତେକଙ୍କ ଆଚରଣ ମଧ୍ୟ ସେଥିପାଇଁ ଖୋରାକ ଯୋଗାଇଥିଲା । “ଓଡିଶାକୁ ଫେରିବା ପାଇଁ ସରକାରଙ୍କୁ କାକୁତି ମିନତି ହୋଇ ହାତ ଯୋଡି ଭିଡିଓ ପଠାଉଥିଲେ । ଏଠି ପହ ଞ୍ଚି ଲା ପରେ ଉତ୍ପାତ ହେଉଛନ୍ତି । ଦାଦନ ଖଟିବାକୁ ଗଲା ବେଳେ କ’ଣ ସରକାରଙ୍କୁ ଜଣାଇ ଯାଇଥିଲେ? ଏମାନଙ୍କୁ ଓଡିଶା ଭିତରେ ପୂରାଇ ଦେବା କଥା ନୁହେଁ ।”, ବୋଲି କେହି କେହି ଖୋଲାଖୋଲି କହୁଥିବା ବେଳେ ସେମାନଙ୍କ ପ୍ରତି ଥିବା ଘୃଣା ଭାବ ସେଥିରୁ ସ୍ପଷ୍ଟ ରୂପେ ଜଣା ପଡୁଛି । ଏହି ଶ୍

‘ଭିକରେ ମିଳିଥିବା ସ୍ୱାଧୀନତା’ ଓ ‘ପଦ୍ମଶ୍ରୀ’ ପ୍ରତ୍ୟାହାର

ଦେଶକୁ ୧୯୪୭ରେ ମିଳିଥିବା ‘ସ୍ୱାଧୀନତା’, ସ୍ୱାଧୀନତା ନୁହେଁ ବରଂ ‘ଭିକ’ ଥିଲା ଓ ୨୦୧୪ରେ ମୋଦୀ କ୍ଷମତା ହାସଲ କରିବା ପରେ ହିଁ ଭାରତକୁ ପ୍ରକୃତ ଅର୍ଥରେ ସ୍ୱାଧୀନତା ମିଳିଥିଲା ବୋଲି କହି ବଲିଉଡ ଅଭିନେତ୍ରୀ ତଥା ‘ପଦ୍ମଶ୍ରୀ’ ପ୍ରାପ୍ତ କଙ୍ଗନା ରଣାୱତ ଏବେ ବିବାଦରେ । ଦେଶବ୍ୟାପୀ ତାଙ୍କ ଏହି ଉକ୍ତିର ବିରୋଧ ହୋଇ ତାଙ୍କଠାରୁ ‘ପଦ୍ମଶ୍ରୀ’ ପ୍ରତ୍ୟାହାର ଦାବି ହେଉଛି । କେହି କେହି ଏହା ତାଙ୍କ ଅଭିବ୍ୟକ୍ତିର ସ୍ୱାଧୀନତା ବୋଲି ଯୁକ୍ତି ବାଢୁଥିବା ବେଳେ ରାଷ୍ଟ୍ରପ୍ରଦତ୍ତ ସମ୍ମାନର ଅଧିକାରୀମାନଙ୍କ ଉପରେ ଆତ୍ମନିୟନ୍ତ୍ରିତ ଅଙ୍କୁଶ ଲାଗିବା ଉଚିତ କି ନୁହେଁ ସେ ନେଇ ମଧ୍ୟ ବିମର୍ଶ ହେବାକୁ ଲାଗିଲାଣି । ‘ପଦ୍ମଶ୍ରୀ’ ଭଳି ଏକ ସମ୍ମାନରେ ଭୂଷିତ ଜଣେ ବ୍ୟକ୍ତି ଦେଶର ସ୍ୱାଧୀନତା ଉପରେ ପ୍ରଶ୍ନ ଉଠାଇବା ଦ୍ୱାରା ଅନେକେ ‘ପଦ୍ମଶ୍ରୀ’ ସମ୍ମାନର ମର୍ଯ୍ୟାଦାକୁ ଅକ୍ଷୁଣ୍ଣ ରଖିବାରେ ସେ ଅସମର୍ଥ ବୋଲି ମଣୁଛନ୍ତି । ତେବେ ଏ ଭଳି ଭାବେ ସମ୍ମାନିତ ବ୍ୟକ୍ତିଙ୍କ ଆପତ୍ତିଜନକ ଓ ବିବାଦିତ ଉଚ୍ଚାରଣ ଓ ଆଚରଣ ପାଇଁ ସେମାନଙ୍କ ନିକଟରୁ ସମ୍ମାନ ପ୍ରତ୍ୟାହାର କରାଯାଇପାରିବ କି ଓ ସେଥିପାଇଁ ବିଧି ବ୍ୟବସ୍ଥା କ’ଣ, ତାହା ଆଲୋଚନାଯୋଗ୍ୟ । ଅତୀତରେ ପଦ୍ମ ସମ୍ମାନ ଘୋଷଣା ହେଲା ପରେ ମୌଲାନା ଅବୁଲ କଲାମ ଆଜାଦ, ସୁନ୍ଦରଲାଲ ବହୁଗୁଣା, ବାବା ଆମତେ, ବିଲାୟତ ଖାଁ, ବାଦଲ ସରକାର, କାଳୀଚରଣ ପଟ୍ଟନାୟକଙ୍କ ପରି କିଛି ସମ୍ମାନିତ ବ୍ୟକ୍ତି ବିଭିନ୍ନ କା

ଭଲଗପ - 2021

2021ରେ  ପ୍ରକାଶିତ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ 2021ରେ ପ୍ରକାଶ ପାଇଥିବା 1600ରୁ ବେଶି ଲେଖକଙ୍କର 6100ରୁ ଊର୍ଦ୍ଧ୍ୱ ଓଡିଆ ଗପ ମଧ୍ୟରୁ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ ବାଛିବାର ଏକ ପ୍ରୟାସ ଚାଲିଛି । ତଦନୁଯାୟୀ ପାଠକ ଓ ଲେଖକଙ୍କ ଦ୍ୱାରା  ପ୍ରସ୍ତାବ ଦାଖଲର ଶେଷ ତାରିଖ ମେ 31, 2022 ସୁଦ୍ଧା 260 ଜଣ ଲେଖକଙ୍କର 368ଟି ଭଲ ଗପର ସୂଚନା ଉପଲବ୍ଧ ହୋଇଛି ଯାହା ନିମ୍ନ ପ୍ରଦତ୍ତ ତାଲିକାରେ ସ୍ଥାନିତ । ଏହି ଗପଗୁଡିକ ମଧ୍ୟରୁ 42ଟି ଗପର ପିଡିଏଫ ମିଳି ନାହିଁ । ପିଡିଏଫ ବା ସ୍ପ୍କାନ କପି ଉପଲବ୍ଦାଧ କରାଇବା ପାଇଁ ଆଉ 7 ଦିନ ସମୟ ଦିଆଯାଉଛି । ପ୍ରତିଟି ଗପ ପଢା ହେବାକୁ ଥିବାରୁ ତାପରେ ପିଡିଏଫ ଉପଲବ୍ଧ ହୋଇ ପାରି ନଥିବା ଗପଗୁଡିକୁ ଚୟନ ପ୍ରକ୍ରିୟାରୁ ବାଦ ଦିଆଯିବ । (ସରଳ କୁମାର ଦାସ) 9437038015 saral_das@yahoo.co.in ତାଲିକାରେ ସ୍ଥାନିତ କୌଣସି ଗପ 2021 ପୂର୍ବରୁ ପ୍ରକାଶ ପାଇଥିଲେ ଲେଖକ ଓ ପାଠକମାନେ ତାହା ଜଣାଇବାକୁ ଅନୁରୋଧ । ଜଣାପଡିଲେ ସେଇଟିକୁ ତାଲିକାରୁ ବାଦ ଦିଆଯିବ । ପ୍ରତିଟି ମନୋନୀତ ଗପ ପଢା ହେବାକୁ ଥିବାରୁ ସେଗୁଡିକର ପିଡିଏଫ ପଠାଇବାକୁ ସମ୍ପୃକ୍ତ ଲେଖକମାନଙ୍କୁ ଅନୁରୋଧ । ଏକାଧିକ ଗପ ଥିବା ଲେଖକଙ୍କ ଶ୍ରେଷ୍ଠ ଗପଟିକୁ ଚୟନ କରିବା ପ୍ରକ୍ରିୟା ଆରମ୍ଭ ହୋଇଯାଇଛି । କ୍ରମିକ ସଂଖ୍ୟା ଲେଖକ ଗଳ୍ପର ନାମ କେଉଁଠି(ପତ୍ରିକା ଇତ୍ୟାଦି) ପ୍ରକାଶନ ସଂଖ୍ୟା/ ତାରିଖ 1 ଅଜୟ ମହାପାତ୍ର

ପେଗାସସ୍ ମାମଲା ସରକାରଙ୍କ ତଣ୍ଟିରେ କଣ୍ଟା ହେବ ?

ପେଗାସସ୍ ମାମଲାରେ ଏକାଧିକ ପିଟିସନର ବିଚାର କରି ସୁପ୍ରିମକୋର୍ଟର ପ୍ରଧାନ ବିଚାରପତି ଏନ ଭି ରମଣାଙ୍କ ସମେତ ଏକ ତିନି ଜଣିଆ ଖଣ୍ଡପୀଠ ଅକ୍ଟୋବର ୨୭, ୨୦୨୧ରେ ଦେଇଥିବା ଆଦେଶକୁ ଅନେକେ ‘ଐତିହାସିକ’ କହୁଥିବା ବେଳେ ଏହା ମାଧ୍ୟମରେ କେନ୍ଦ୍ର ସରକାର ଭର୍ତ୍ସିତ ହୋଇଛନ୍ତି ବୋଲି ମଧ୍ୟ କୁହାଯାଉଛି । ନାଗରିକଙ୍କ ମୌଳିକ ଅଧିକାରକୁ ଅକ୍ଷୁଣ୍ଣ ରଖିବା ପାଇଁ ଏହି ୪୬ ପୃଷ୍ଠା ବିଶିଷ୍ଟ ଆଦେଶଟି ଆଗାମୀ ଦିନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ଯାଉଥିବାରୁ ଏ ସମ୍ପର୍କରେ ବିମର୍ଶର ଆବଶ୍ୟକତା ରହିଛି । କାନାଡାର ଟରୋଣ୍ଟୋ ବିଶ୍ୱବିଦ୍ୟାଳୟ ଅଧୀନସ୍ଥ ‘ସିଟିଜେନ ଲ୍ୟାବ’ ସେପ୍ଟେମ୍ୱର ୨୦୧୮ରେ ଇସ୍ରାଏଲି ଟେକ୍ନୋଲୋଜି କମ୍ପାନୀ ଏନଏସଓ ଦ୍ୱାରା ପ୍ରସ୍ତୁତ ପେଗାସସ୍ ନାମକ ସ୍ପାଏୱେୟାର ସମ୍ପର୍କରେ ଏକ ବିସ୍ତୃତ ରିପୋର୍ଟ ପ୍ରକାଶ କରିଥିଲେ । ଏହି ସ୍ପାଏୱେୟାରକୁ ବ୍ୟବହାର କରି ଯେ କୌଣସି ବ୍ୟକ୍ତିର ଫୋନ, କମ୍ପ୍ୟୁଟର ଭଳି ଡିଜିଟାଲ ଉପକରଣଗୁଡିକୁ ସ୍ପର୍ଶ ନ କରି ମଧ୍ୟ ସେଗୁଡିକୁ ନିୟନ୍ତ୍ରଣ କରି ହେବ । ଥରେ ଏହି ସ୍ପାଏୱେୟାର ଲକ୍ଷ୍ୟରେ ଥିବା ଉପକରଣରେ ଅବସ୍ଥାପିତ ହୋଇଗଲେ ସେଥିରେ ଥିବା ସମସ୍ତ ତଥ୍ୟ (ଡାଟା) ସହ ଉପକରଣର ଇ-ମେଲ, ଟେକ୍ସଟ, ଫୋନ, କ୍ୟାମେରା, ରେକର୍ଡିଙ୍ଗ କରିବା କ୍ଷମତାଗୁଡିକ ମଧ୍ୟ ସ୍ପାଏୱେୟାର ବ୍ୟବହାରୀଙ୍କ ନିୟନ୍ତ୍ରଣକୁ ଚାଲିଯାଇଥାଏ ଓ ସମ୍ପୃକ୍ତ ବ୍ୟକ୍ତିଙ୍କ ଅଜାଣତରେ ଅନ୍ୟ ତଥ୍ୟ ମଧ୍ୟ ଉପକରଣର

ଓଡିଆ କ୍ଷୁଦ୍ରଗଳ୍ପ 2021 - ପ୍ରଥମ ପର୍ଯ୍ୟାୟରେ 252ଟି ଗପ

ଓଡିଆ କ୍ଷୁଦ୍ରଗଳ୍ପ 2021 – ପ୍ରଥମ ପ୍ରର୍ଯ୍ୟାୟରେ 252ଟି ଗପ  ପାଠକ, ଲେଖକଙ୍କ ସହଯୋଗରେ 2021ରେ ପ୍ରକାଶିତ କିଛି ଭଲ ଗପ ବାଛିବାର ପ୍ରୟାସ ଆରମ୍ଭ ହୋଇ 260 ଜଣ ଲେଖକଙ୍କର 368ଟି ଭଲ ଗପର ସୂଚନା ହସ୍ତଗତ ହୋଇଥିଲା । ଇତିମଧ୍ୟରେ ତନ୍ମଧ୍ୟରୁ ଏକାଧିକ ଗପ ଆସିଥିବା ଲେଖକମାନଙ୍କର ଗପଗୁଡିକୁ ପଢାଯାଇ ସେଥିରୁ ସମ୍ପୃକ୍ତ ଲେଖକଙ୍କ ଗୋଟିଏ ଲେଖାଏଁ ଗପକୁ ଗ୍ରହଣ କରାଯାଇଛି । କିଛି ଲେଖକଙ୍କର ଗପ ପୂର୍ବରୁ ପ୍ରକାଶିତ ହୋଇଥିବା ଓ / ବା ଧାର୍ଯ୍ୟ ଶେଷ ତାରିଖ ସୁଦ୍ଧା ପଢିବା ଲାଗି ପିଡିଏଫ ଉପଲବ୍ଧ ହୋଇ ନ ପାରିବା କାରଣରୁ ପ୍ରକ୍ରିୟା ଅନ୍ତର୍ଗତ କରାଯାଇ ପାରିଲାନାହିଁ । ଅର୍ଥାତ୍ ପ୍ରଥମ ପର୍ଯ୍ୟାୟକୁ ନିମ୍ନଲିଖିତ 252 ଜଣ ଲେଖକଙ୍କର 252ଟି ଗପ ଯାଇଛି । ଏହି ପର୍ଯ୍ୟାୟରେ ଗପଗୁଡିକୁ ପାଠକଙ୍କ ନିକଟକୁ ପଠାଇଲା ବେଳେ ଗପର ନାମ ଓ ଲେଖକଙ୍କ ନାମକୁ ଲିଭାଯାଇ ତା ସ୍ଥାନରେ କେବଳ ଗୋଟିଏ କୋଡ ନମ୍ୱର ପ୍ରଦାନ କରାଯାଉଛି । ଏହି ସମସ୍ତ ଗପକୁ 25ଟି ସେଟରେ ଭାଗ କରାଯାଇ ପ୍ରତି ସେଟରେ ହାରାହାରି 10ଟି ଲେଖାଏଁ ଗପ ରଖାଯାଇଛି । ପ୍ରତିଟି ସେଟ ଗପ ଦୁଇ ଜଣ ଲେଖାଏଁ ପାଠକଙ୍କ ନିକଟକୁ ପୃଥକ୍ ଭାବେ ପଠାଯାଉଛି । ସେମାନଙ୍କ ନିକଟରୁ ମତାମତ ମିଳିଲା ପରେ ସେଥିମଧ୍ୟରୁ ପ୍ରାୟ 50 ପ୍ରତିଶତ ଗପ ଦ୍ୱିତୀୟ ପର୍ଯ୍ୟାୟକୁ ଉନ୍ନୀତ ହେବ । ଗପଗୁଡିକ ଲେଖକମାନଙ୍କର ମୌଳିକ ରଚନା ଓ 2021ରେ ପ୍ରଥମ କରି ପ୍ରକାଶ ପାଇଛି ବୋଲି ଆଶା କରାଯାଏ । ଯଦି ଅନ୍