Skip to main content

ପୁଣି ଆହତ ବନ୍ଦେ ଉତ୍କଳ ଜନନୀ

ସେତେବେଳେ ଓଡିଶା ଆହୁରି ସ୍ଵତନ୍ତ୍ର ପ୍ରଦେଶ ହୋଇ ନଥାଏ, ଉତ୍କଳ ସମ୍ମିଳନୀ ମାଧ୍ୟମରେ ସେଥିପାଇଁ ଲଢେଇ ଜାରି ରହିଥାଏ l ୧୯୧୨ ମସିହାରେ ବାଲେଶ୍ଵରଠାରେ ଆୟୋଜିତ ଉତ୍କଳ ସମ୍ମିଳନୀର ଏକ ସ୍ଵତନ୍ତ୍ର ଅଧିବେଶନର ଉଦଘାଟନୀ ଉତ୍ସବରେ ଦେଶାତ୍ମବୋଧକ ସଙ୍ଗୀତ ‘ବନ୍ଦେ ଉତ୍କଳ ଜନନୀ’ ପରିବେଷଣ ହେଲା ମାତ୍ରେ ସମଗ୍ର ପରିବେଶ ଗୁରୁଗମ୍ଭୀର ହୋଇଗଲା l ଗୀତଟି ସରିଲା ମାତ୍ରେ ଖୋଜା ପଡିଲେ ସେହି ହୃଦୟସ୍ପର୍ଶୀ ଗୀତର ଲେଖକ, ଆଉ ସଭାରେ ଉପସ୍ଥିତ ଉତ୍କଳମଣି ଗୋପବନ୍ଧୁଙ୍କ ସମ୍ମୁଖରେ ଉଭା ହେଲେ ୨୪ ବର୍ଷର ଯୁବକ ନଖି ଓରଫ କାନ୍ତକବି ଲକ୍ଷ୍ମୀକାନ୍ତ ମହାପାତ୍ର l ଗୀତଟି ଶୁଣି ସ୍ତବ୍ଧ ହୋଇ ଯାଇଥିବା ଗୋପବନ୍ଧୁ ତାଙ୍କୁ କୁଣ୍ଢାଇ ପକାଇଲେ ଓ ତାଙ୍କ ଆଖିରୁ ଝରଝର ହୋଇ ଝରି ପଡିଲା ଆନନ୍ଦାଶ୍ରୁ l ଉତ୍କଳଗୌରବ ମଧୁସୂଦନ ମଧ୍ୟ ତାଙ୍କୁ ଭୂୟସୀ ପ୍ରଶଂସା କଲେ I ସେ ସମୟର ଅନ୍ୟାନ୍ୟ ଅନେକ ଦେଶାତ୍ମବୋଧକ ଗୀତ ମଧ୍ୟରୁ ଏହାର ସାବଲୀଳତା ପାଇଁ ସର୍ବସମ୍ମତିକ୍ରମେ ଏହା ପ୍ରାଦେଶିକ ଗୀତ ଭାବେ ଗୃହୀତ ହେଲା I କେତେକଙ୍କ ମତରେ ଏହା ୧୯୦୮ ମସିହାରେ ଉତ୍କଳ ସମ୍ମିଳନୀର ପୁରୀ ଅଧିବେଶନରେ ପ୍ରଥମ ଥର ପାଇଁ ଗାନ ହୋଇଥିଲା l ଓଡିଆ ଲୋକଙ୍କୁ ଏକଜୁଟ କରିବା ପାଇଁ ଓ ସେମାନଙ୍କଠାରେ ଜାତିପ୍ରୀତି ଉଦ୍ରେକ କରିବା ଦିଗରେ ‘ବନ୍ଦେ ଉତ୍କଳ ଜନନୀ’ ଏକ ଅସ୍ତ୍ର ଭଳି ବ୍ୟବହୃତ ହେଲା l ଉତ୍କଳ ସମ୍ମିଳନୀର ପ୍ରତିଟି ଅଧିବେଶନ ଆରମ୍ଭରେ ଗୀତଟି ପରିବେଷଣ ହେବାକୁ ଲାଗିଲା I ଜାତୀୟ କବି ବାଞ୍ଛାନିଧି ମହାନ୍ତି ହାରମୋନିୟମ ଖଣ୍ଡିଏ ଧରି ରାଜ୍ୟର ପୁରପଲ୍ଲୀରେ ଏହି ଗୀତଟିକୁ ଗାଇଗାଇ ଜାତିପ୍ରେମ ସଞ୍ଚାରିତ କରିଥିଲେ l ସ୍ଵତନ୍ତ୍ର ଓଡିଶା ପ୍ରଦେଶ ଗଠନରେ ଏହି ଗୀତଟି ଏକ ଗୁରୁତ୍ଵପୂର୍ଣ୍ଣ ଭୂମିକା ନିର୍ବାହ କରିଥିଲା l ଦୀର୍ଘ ବର୍ଷର ବ୍ୟବଧାନ ପରେ ସେଭଳି ମହାନ ଗୀତକୁ ନେଇ ବିବାଦ ଉପୁଜିବା ବାସ୍ତବିକ କ୍ଷୋଭର ବିଷୟ l

ସମ୍ଵିଧାନର ଧାରା ୫୧(କ) ଅନୁଯାୟୀ ଜାତୀୟ ସଙ୍ଗୀତ ‘ଜନ ଗଣ ମନ ଅଧିନାୟକ’କୁ ସମ୍ମାନ ଜଣାଇବା ପ୍ରତ୍ୟେକ ନାଗରିକଙ୍କ ମୌଳିକ କର୍ତ୍ତବ୍ୟ l ପ୍ରାଦେଶିକ ଗୀତର କୌଣସି ସାମ୍ଵିଧାନିକ ବୈଧତା ନଥିଲେ ମଧ୍ୟ କିଛି ରାଜ୍ୟ ଆଇନ ପ୍ରଣୟନ କରି ନିଜ ନିଜ ପ୍ରାଦେଶିକ ସଂଗୀତକୁ ମାନ୍ୟତା ଦେଇଥିବା ବେଳେ ଅନ୍ୟ କିଛି ରାଜ୍ୟରେ କିଛି ଲୋକପ୍ରିୟ ଗୀତ ପ୍ରାଦେଶିକ ଗୀତ ହୋଇଯାଇଛି l ୧୯୦୯ରେ ଲକ୍ଷ୍ମୀକାନ୍ତ ବେଜବରୁଆଙ୍କ ରଚିତ ‘ଓ ମୋର ଆପନାର ଦେଶ’ ଗୀତଟିକୁ ଆସାମର ପ୍ରାଦେଶିକ ଗୀତ ଭାବେ ୧୯୨୭ରେ ମାନ୍ୟତା ମିଳିଥିଲା l ତେବେ ୨୦୧୩ ମସିହାରେ ଏକ ସୂଚନା ଅଧିକାର ଆବେଦନ ଜରିଆରେ ଗୀତଟିକୁ ପ୍ରାଦେଶିକ ସଂଗୀତ ଭାବେ କୌଣସି ଆଇନଗତ ମାନ୍ୟତା ମିଳିନାହିଁ ବୋଲି ଜଣା ପଡିବା ପରେ ଜନମତ ଚାପରେ ବାଧ୍ୟ ହୋଇ ସରକାର ସେହି ବର୍ଷ ଡିସେମ୍ଵର ମାସରେ ଗୀତଟିକୁ ଆସାମ ରାଜ୍ୟିକ ଜାତୀୟ ସଙ୍ଗୀତ ବୋଲି ଘୋଷଣା କଲେ l ଅବିଭାଜିତ ଆନ୍ଧ୍ର ପ୍ରଦେଶରେ ‘ମା ତେଲୁଗୁ ତଲ୍ଲୀକୀ’ ଗୀତଟି ପ୍ରାଦେଶିକ ଗୀତର ମାନ୍ୟତା ପାଇଥିବା ବେଳେ ବିଭାଜନ ପରେ ଏହା ଆନ୍ଧ୍ର ପ୍ରଦେଶର ପ୍ରାଦେଶିକ ଗୀତ ଭାବେ ଅବ୍ୟାହତ ରହିଲା ଓ ‘ଜୟ ଜୟ ହେ ତେଲେଙ୍ଗାନା ଜନନୀ’ ଗୀତଟିକୁ ତେଲେଙ୍ଗାନା ରାଜ୍ୟର ପ୍ରାଦେଶିକ ଗୀତର ମାନ୍ୟତା ମିଳିଲା l ସେହିପରି ଭାବେ କର୍ଣ୍ଣାଟକ (ଜୟ ଭାରତ ଜନନୀୟ ତନୁଜାତେ), ତାମିଲନାଡୁ (ତାମିଲ ତୟ ଭଲତୁ), ଗୁଜରାଟ (ଜୟ ଜୟ ଗରଭୀ ଗୁଜରାଟ). ମହାରାଷ୍ଟ୍ର (ଜୟ ମହାରାଷ୍ଟ୍ର ମାଝା), କେରଳ (ଭଞ୍ଜି ଭୂମି),  ମଧ୍ୟ ପ୍ରଦେଶ (ସୁଖକା ଦାତା ସବକା ସାଥୀ) ରାଜ୍ୟଗୁଡିକର ମଧ୍ୟ ନିଜ ନିଜର ରାଜ୍ୟ ସଙ୍ଗୀତ ରହିଛି l ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଉଦ୍ୟମ କ୍ରମେ ‘ମେରେ ଭାରତ କେ କଣ୍ଠହାର’ ଗୀତଟି ବିହାରର ରାଜ୍ୟ ଗୀତ ଭାବେ ସରକାରଙ୍କ ସ୍ଵୀକୃତି ପାଇ ୨୦୧୨ ମସିହାରେ ଲୋକାର୍ପିତ ହୋଇଥିଲା l

ଦୀର୍ଘ ଦିନ ଧରି ‘ବନ୍ଦେ ଉତ୍କଳ ଜନନୀ’ ଓଡିଶାର ପ୍ରାଦେଶିକ ସଂଗୀତ ଭାବେ ଗ୍ରହଣୀୟ ହୋଇଥିଲେ ମଧ୍ୟ ଏହାକୁ ସରକାରୀ ସ୍ଵୀକୃତି ଦେବାର ପ୍ରଥମ ଉଦ୍ୟମ ହୋଇଥିଲା ୧୯୯୪ ମସିହା ନଭେମ୍ଵର ମାସ, ଯେତେବେଳେ ତତ୍କାଳୀନ ବାଚସ୍ପତି ଯୁଧିଷ୍ଠିର ଦାସ ଏ ସଂକ୍ରାନ୍ତରେ ଗଠିତ ଏକ ସର୍ବଦଳୀୟ କମିଟିର ସୁପାରିଶକୁ ଗ୍ରହଣ କରି ବିଧାନ ସଭାର ଅଧିବେଶନ ଶେଷରେ ଏହି ଗୀତ ଗାନର ପରମ୍ପରାକୁ ଆରମ୍ଭ କଲେ l ସେହି କ୍ରମରେ ବିଧାନ ସଭାରେ ଏହା ପ୍ରଥମ ଥର ପାଇଁ ଡିସେମ୍ଵର ୨୨, ୧୯୯୪ରେ ଗାନ କରାଯାଇଥିଲା l ପରବର୍ତ୍ତୀ ସମୟରେ ବିଧାୟକମାନଙ୍କ ଦାବି କ୍ରମେ ୨୦୦୨ ମସିହାରେ ବାଚସ୍ପତି ଶରତ କର ଏକ କମିଟି ଗଠନ କରି ଏହି ସଂଗୀତ ପରିବେଷଣର ଅବସର, ସ୍ଥାନ, ଢଙ୍ଗ ଓ ଅନ୍ୟାନ୍ୟ ଆନୁସଙ୍ଗିକ ବିଷୟ ସୁନିର୍ଦ୍ଦିଷ୍ଟ କରିବା ପାଇଁ ତତ୍ପରତା ଦେଖାଇଲେ l ଏକ ରୁଲିଂ ମାଧ୍ୟମରେ ଗୀତଟିକୁ ପ୍ରାଦେଶିକ ସଂଗୀତର ଆଇନଗତ ମାନ୍ୟତା ଦେବା ପାଇଁ ବିହିତ ପଦକ୍ଷେପ ନେବାକୁ ସରକାରଙ୍କୁ ପରାମର୍ଶ ଦେଇଥିଲେ ମଧ୍ୟ ତାହା କାର୍ଯ୍ୟକାରୀ ହେଲାନାହିଁ l ପୁନଶ୍ଚ ୨୦୦୬ ମସିହାରେ ବାଚସ୍ପତି ମହେଶ୍ଵର ମହାନ୍ତିଙ୍କ ଅଧ୍ୟକ୍ଷତାରେ ଗଠିତ କମିଟି ପୂର୍ବ କମିଟି ଦେଇଥିବା ପରାମର୍ଶକୁ କାର୍ଯ୍ୟକାରୀ କରିବାକୁ ଦୋହରାଇ ଥିଲେ l ଏହି ଗୀତଟିକୁ ଛୋଟ କରିବା ପାଇଁ ସଂସ୍କୃତି ବିଭାଗ ତରଫରୁ ଉତ୍କଳ ସଂସ୍କୃତି ବିଶ୍ଵବିଦ୍ୟାଳୟର ବିଶେଷଜ୍ଞଙ୍କୁ ଦାୟିତ୍ଵ ଦିଆଯାଇଥିଲା l ବିଶ୍ଵବିଦ୍ୟାଳୟ ଦ୍ଵାରା ଏହି ଗୀତର ଛଅଟି ପଦ ମଧ୍ୟରୁ ତିନୋଟି, ପ୍ରଥମ, ଚତୁର୍ଥ ଓ ଶେଷ ପଦକୁ ନେଇ ସଙ୍ଗୀତ ସୁଧାକର ବାଳକୃଷ୍ଣ ଦାଶ ଗାଇଥିବା ଗୀତର ଗାୟନ ଶୈଳୀ ଓ ସ୍ଵର ଅନୁସରଣରେ ଏକ ୮୫ ସେକେଣ୍ଡ ବିଶିଷ୍ଟ ସଂସ୍କରଣକୁ ରାଜ୍ୟ ସଂଗୀତର ମର୍ଯ୍ୟାଦା ଦେବାକୁ ଦିଆଯାଇଥିବା ପରାମର୍ଶଟିକୁ ସଂସ୍କୃତି ବିଭାଗ ଡିସେମ୍ଵର ୧୭, ୨୦୧୩ରେ ଗ୍ରହଣ କଲେ l ପରବର୍ତ୍ତୀ ସମୟରେ ତାହା ଗୃହ ବିଭାଗର ଅନୁମୋଦନ ପାଇଲା ପରେ ସୂଚନା ଓ ଲୋକ ସମ୍ପର୍କ ବିଭାଗ ଦ୍ଵାରା ରାଜ୍ୟ ସଂଗୀତ ଭାବେ ଘୋଷିତ ହେବା କଥା l ଏଭଳି ଭାବାବେଗର ପ୍ରଶ୍ନ ବିଜଡିତ ପ୍ରସଙ୍ଗରେ କେତେ ଶୀଘ୍ର ଆଇନ ପ୍ରଣୟନ ହୋଇପାରେ ତାହାର ଉଦାହରଣ ଆସାମ, ତେଲେଙ୍ଗାନା ଭଳି ରାଜ୍ୟମାନଙ୍କଠାରୁ ଦେଖିବାକୁ ମିଳୁଥିଲେ ମଧ୍ୟ ଆମ ସରକାର ସେଥିରୁ କିଛି ଶିଖିଲା ପରି ମନେହୁଏ ନାହିଁ l ଫଳରେ ଏବେ ବି ‘ବନ୍ଦେ ଉତ୍କଳ ଜନନୀ’ ଆଇନଗତ ସ୍ଵୀକୃତି ପାଇବା ଅପେକ୍ଷାରେ l
କବିଗୁରୁ ରବୀନ୍ଦ୍ରନାଥ ଠାକୁରଙ୍କ ଦ୍ଵାରା ରଚିତ ଓ ୧୯୧୧ରେ କଂଗ୍ରେସ ଅଧିବେଶନରେ ପ୍ରଥମ ଥର ପାଇଁ ଗାନ ହୋଇଥିବା ଆମ ଜାତୀୟ ସଙ୍ଗୀତରେ ଉଲ୍ଲିଖିତ ଦ୍ରାବିଡ ଶବ୍ଦଟି ସମଗ୍ର ଦକ୍ଷିଣ ଭାରତର ରାଜ୍ୟଗୁଡିକୁ ବୁଝାଉଥିବା ବେଳେ ବର୍ଣ୍ଣିତ ସମୁଦାୟ ଛଅଟି ରାଜ୍ୟ ମଧ୍ୟରେ ‘ଉତ୍କଳ’ ସ୍ଥାନିତ l ଗର୍ବ କରିବାର କଥା ଅନେକ ବଡବଡ ରାଜ୍ୟର ନାମ ଜାତୀୟ ସଂଗୀତରେ ସ୍ଥାନ ପାଇ ନଥିବା ସ୍ଥଳେ, ସେତେବେଳେ ଓଡିଶା ଏକ ସ୍ଵତନ୍ତ୍ର ପ୍ରଦେଶ ନହୋଇ ମଧ୍ୟ, ଓଡିଶାକୁ ଉତ୍କଳ ଭାବେ ସ୍ଥାନ ମିଳିଛି, ସମ୍ଭବତଃ ଏହାର ଉତ୍କୃଷ୍ଟ କଳା ଓ ସଂସ୍କୃତିର ଐତିହ୍ୟ ପାଇଁ l ବର୍ତ୍ତମାନ ଯେଉଁମାନେ ବନ୍ଦେ ଉତ୍କଳ ଜନନୀରେ ‘ଉତ୍କଳ’ ପରିବର୍ତ୍ତେ ‘ଓଡିଶା’ ଶବ୍ଦର ବ୍ୟବହାର ସପକ୍ଷରେ ଯୁକ୍ତି ଉପସ୍ଥାପନ କରୁଛନ୍ତି ସେମାନେ ଆମ ଜାତୀୟ ସଂଗୀତରେ ମଧ୍ୟ ‘ଉତ୍କଳ’ ଶବ୍ଦକୁ ବଦଳାଇ ‘ଓଡିଶା’ କରିବାକୁ ଦାବି କରିପାରିବେ କି ? କୋଶଳ ରାଜ୍ୟ ଗଠନ ସପକ୍ଷରେ ଥିବା କିଛି ଲୋକ ‘ବନ୍ଦେ ଉତ୍କଳ ଜନନୀ’କୁ ପ୍ରାଦେଶିକ ସଂଗୀତର ମାନ୍ୟତା ଦିଆଯିବାକୁ ବିରୋଧ କରୁଛନ୍ତି l ସେମାନଙ୍କ ମତରେ ଉତ୍କଳ, କଳିଙ୍ଗ ଓ କୋଶଳ ଭଳି ତିନୋଟି ଅଞ୍ଚଳକୁ ନେଇ ଓଡିଶା ଗଠିତ ହୋଇଥିବାରୁ କେବଳ ‘ଉତ୍କଳ’ ଶବ୍ଦ ବ୍ୟବହାର ହୋଇଥିବା ଗୀତଟି ପ୍ରାଦେଶିକ ସଂଗୀତ ଭାବେ ସେମାନଙ୍କ ଦ୍ଵାରା ଗ୍ରହଣୀୟ ହେବନାହିଁ l ଓଡିଶା କେବଳ କେତୋଟି ଅଞ୍ଚଳର ସମାହାର ନୁହେଁ, ବରଂ ଭାବଗତ ଭାବେ ଏକୀକୃତ ଏକ ଭୂଖଣ୍ଡର ଅନ୍ୟନାମ ଓ ବିଭିନ୍ନ ସମୟରେ ଏହି ଶବ୍ଦଗୁଡିକ ଓଡିଶାର ପ୍ରତିଶବ୍ଦ ଭଳି ବ୍ୟବହାର ହୋଇ ଆସିଛି l ଉତ୍କଳ କହିଲେ କେବଳ ଏକ ଭୌଗୋଳିକ ଭୂଖଣ୍ଡକୁ ନବୁଝାଇ ବରଂ ଏକ ସଂସ୍କୃତି, ଏକ ଚଳଣି, ଏକ ପରମ୍ପରାକୁ ବୁଝାଇଥାଏ, ଯେଉଁଥିରେ କୋଶଳ ମଧ୍ୟ ସନ୍ନିବେଶିତ l ତେଣୁ କାନ୍ତକବିଙ୍କ ‘ବନ୍ଦେ ଉତ୍କଳ ଜନନୀ’ରେ କଳିଙ୍ଗ ଓ କୋଶଳକୁ ବାଦ ଦେଇ ଉତ୍କଳ ଅକଳ୍ପନୀୟ l

ଆସାମ ପ୍ରାଦେଶିକ ସଂଗୀତର ରଚୟିତା ଲକ୍ଷ୍ମୀକାନ୍ତ ବେଜବରୁଆ ଓ ଲକ୍ଷ୍ମୀକାନ୍ତ ମହାପାତ୍ରଙ୍କ ମଧ୍ୟରେ ନାମଗତ ସମାନତା ଏକ ସଂଯୋଗ ହୋଇପାରେ l ତେବେ କବି ଲକ୍ଷ୍ମୀକାନ୍ତ ବେଜବରୁଆଙ୍କ ସମ୍ଵଲପୁରସ୍ଥିତ ବାସଭବନକୁ ପୁନରୁଦ୍ଧାର କରି ଏକ ସ୍ମୃତିପୀଠରେ ପରିଣତ କରିବା ପାଇଁ ଆସାମ ସରକାରଙ୍କ ଆନ୍ତରିକ ଉଦ୍ୟମ ସେମାନଙ୍କ କବିଙ୍କ ପ୍ରତି ଥିବା ଗଭୀର ଶ୍ରଦ୍ଧା ଓ ଭଲ ପାଇବାକୁ ଦର୍ଶାଉଛି l ସମଦୃଷ୍ଟିରେ କାନ୍ତକବିଙ୍କ ଭଦ୍ରକ ଜିଲ୍ଲା ତାଳପଦାସ୍ଥିତ ବାସସ୍ଥାନକୁ ଏକ ସ୍ମୃତିପୀଠର ମାନ୍ୟତା ପ୍ରଦାନ ପାଇଁ ଓଡିଶା ସରକାର ପଦକ୍ଷେପ ନେବା କଣ ଉଚିତ ନୁହେଁ କି ? ଯେଉଁ ଗୀତ ଦିନେ ଲକ୍ଷ ଲକ୍ଷ ଓଡିଆଙ୍କୁ ଉଦବୁଦ୍ଧ କରି ସେମାନଙ୍କ କାନରେ ଜାତିପ୍ରେମର ମନ୍ତ୍ର ଫୁଙ୍କିଥିଲା, ତାକୁ ନେଇ ବିବାଦ ଉପୁଜିବା ବାସ୍ତବିକ ସେହି କାଳଜୟୀ ଗୀତ ଓ ତାର ସ୍ରଷ୍ଟାଙ୍କ ପ୍ରତି ଅସମ୍ମାନ ହୋଇଥିବାରୁ ତୁରନ୍ତ ସେଥିରେ ପୂର୍ଣ୍ଣଚ୍ଛେଦ ପଡିବା ଉଚିତ l ରାଜ୍ୟ ସରକାର ଏହାକୁ ଏ ପର୍ଯ୍ୟନ୍ତ ଆଇନଗତ ମାନ୍ୟତା ଦେଇ ନଥିଲେ ମଧ୍ୟ ବିଗତ ଏକ ଶତାବ୍ଦୀରୁ ଅଧିକ ସମୟ ଧରି ଏହା କୋଟିକୋଟି ଓଡିଶାବାସୀଙ୍କ ହୃଦୟକୁ ସ୍ପନ୍ଦିତ କରି ଆସିଛି l ତେଣୁ କାଳ ବିଳମ୍ଵ ନକରି ଗୀତଟିକୁ ପ୍ରାଦେଶିକ ସଙ୍ଗୀତର ମାନ୍ୟତା ଦେବା ପାଇଁ ସରକାର ଆଇନ ପ୍ରଣୟନ କରି ନିଜ ନୈତିକ ଦାୟିତ୍ଵକୁ ନିର୍ବାହ କରିବା ବାଞ୍ଛନୀୟ l

Published in Matrubhasha (04.07.18), Sanchar (05.07.18), Swadhikar (05.07.18), Odisha Express (08.07.18), Prajatantra (09.07.18)  

Comments

  1. ଉପସ୍ଥାପିତ ବିଷୟଟିକୁ ରାଜ୍ୟ ସରକାର ଗମ୍ଭୀରତା ସହ ବିଚାର କରିବାର ସମୟ । ସାଢେ଼ ଚାରିକୋଟି ଓଡ଼ିଆ ପ୍ରାଣରେ ଯେଉଁ ଉନ୍ମାଦନା ଭରି ରହିଛି ତାକୁ ଫଳପ୍ରସୂ କରିବାକୁ ହେଲେ ସର୍ବସମ୍ମତି ଭିତ୍ତିରେ ତୁରନ୍ତ ପଦକ୍ଷେପ ନେବାର ସଠିକ୍ ସମୟ ଉପନୀତ ବୋଲି ମୋର ବିଶ୍ବାସ ।

    ReplyDelete
    Replies
    1. ଧନ୍ୟବାଦ ସଞ୍ଜିବ l ଠିକ କଥା l ଓଷ୍ଠ ସେବା (ଲିପ୍ ସର୍ଭିସ) ଦେବାର ସମୟ ଅନେକ ଆଗରୁ ଗଲାଣି l ଏବେ ଠୋସ କାମ କରିବାର ବେଳ l

      Delete
  2. We need to do mass tweet to HCM for the legal status.

    ReplyDelete

Post a Comment

Popular posts from this blog

‘ଦାଦନ’ ନୁହେଁ କି ‘ପ୍ରବାସୀ’ ନୁହେଁ

“ମୁଁ ଜଣେ ଓଏଏସ ଅଫିସର । ତୋ’ ଭଳି କେଉଁଠିକୁ ଯାଇ ଦାଦନ ଖଟୁ ନାହିଁ ।” କିଛି ବାହାର ରାଜ୍ୟରେ କାମ କରି ଓଡିଶାକୁ ଫେରିଥିବା ଶ୍ରମିକଙ୍କ ପ୍ରତି ଜଣେ ଉତକ୍ଷିପ୍ତ ବିଡିଓଙ୍କର ଏ ଭଳି ଆପ ତ୍ତି ଜନକ କଟୂ ମନ୍ତବ୍ୟ ଭାଇରାଲ ହେବା ପରେ ବିଭିନ୍ନ କାରଣରୁ ତାହା ରାଜ୍ୟବାସୀଙ୍କୁ ବ୍ୟଥିତ ଓ ସ୍ତମ୍ଭୀଭୂତ କଲା । ଏଭଳି ଶ୍ରମିକଙ୍କ ଘରବାହୁଡାର ପ୍ରାରମ୍ଭିକ ପର୍ଯ୍ୟାୟରେ କିଛି ସରକାରୀ ଅଧିକାରୀଙ୍କଠାରୁ ଆରମ୍ଭ କରି ସାଧାରଣ ଲୋକଙ୍କ ପର୍ଯ୍ୟନ୍ତ ସେମାନଙ୍କୁ ଦାଦନ ଶ୍ରମିକ ଭାବେ ସମ୍ବୋ ଧନ  କରି ତା ଚ୍ଛ ଲ୍ୟ କରିବା ସହିତ ‘ଦାଦନ’ ଶବ୍ଦଟିକୁ ଏକ ଗାଳି ରୂପେ ବ୍ୟବହାର କରିଥିବାର ଅନେକ ଘଟଣା ଦେଖିବାକୁ ମିଳିଥିଲା । ଏମାନେ ଫେରିବା ପରେ ଓଡିଶାରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ଯୋଗୁ ସ୍ଥାନୀୟ ଲୋକେ ସଂକ୍ରମିତ ହେବାର ଭୟ ଏହାର ମୁଖ୍ୟ କାରଣ ହୋଇଥିଲା ବେଳେ ସ୍ଥଳ ବିଶେଷରେ ଫେରିଥିବା କେତେକଙ୍କ ଆଚରଣ ମଧ୍ୟ ସେଥିପାଇଁ ଖୋରାକ ଯୋଗାଇଥିଲା । “ଓଡିଶାକୁ ଫେରିବା ପାଇଁ ସରକାରଙ୍କୁ କାକୁତି ମିନତି ହୋଇ ହାତ ଯୋଡି ଭିଡିଓ ପଠାଉଥିଲେ । ଏଠି ପହ ଞ୍ଚି ଲା ପରେ ଉତ୍ପାତ ହେଉଛନ୍ତି । ଦାଦନ ଖଟିବାକୁ ଗଲା ବେଳେ କ’ଣ ସରକାରଙ୍କୁ ଜଣାଇ ଯାଇଥିଲେ? ଏମାନଙ୍କୁ ଓଡିଶା ଭିତରେ ପୂରାଇ ଦେବା କଥା ନୁହେଁ ।”, ବୋଲି କେହି କେହି ଖୋଲାଖୋଲି କହୁଥିବା ବେଳେ ସେମାନଙ୍କ ପ୍ରତି ଥିବା ଘୃଣା ଭାବ ସେଥିରୁ ସ୍ପଷ୍ଟ ରୂପେ ଜଣା ପଡୁଛି । ଏହି ଶ୍

‘ଭିକରେ ମିଳିଥିବା ସ୍ୱାଧୀନତା’ ଓ ‘ପଦ୍ମଶ୍ରୀ’ ପ୍ରତ୍ୟାହାର

ଦେଶକୁ ୧୯୪୭ରେ ମିଳିଥିବା ‘ସ୍ୱାଧୀନତା’, ସ୍ୱାଧୀନତା ନୁହେଁ ବରଂ ‘ଭିକ’ ଥିଲା ଓ ୨୦୧୪ରେ ମୋଦୀ କ୍ଷମତା ହାସଲ କରିବା ପରେ ହିଁ ଭାରତକୁ ପ୍ରକୃତ ଅର୍ଥରେ ସ୍ୱାଧୀନତା ମିଳିଥିଲା ବୋଲି କହି ବଲିଉଡ ଅଭିନେତ୍ରୀ ତଥା ‘ପଦ୍ମଶ୍ରୀ’ ପ୍ରାପ୍ତ କଙ୍ଗନା ରଣାୱତ ଏବେ ବିବାଦରେ । ଦେଶବ୍ୟାପୀ ତାଙ୍କ ଏହି ଉକ୍ତିର ବିରୋଧ ହୋଇ ତାଙ୍କଠାରୁ ‘ପଦ୍ମଶ୍ରୀ’ ପ୍ରତ୍ୟାହାର ଦାବି ହେଉଛି । କେହି କେହି ଏହା ତାଙ୍କ ଅଭିବ୍ୟକ୍ତିର ସ୍ୱାଧୀନତା ବୋଲି ଯୁକ୍ତି ବାଢୁଥିବା ବେଳେ ରାଷ୍ଟ୍ରପ୍ରଦତ୍ତ ସମ୍ମାନର ଅଧିକାରୀମାନଙ୍କ ଉପରେ ଆତ୍ମନିୟନ୍ତ୍ରିତ ଅଙ୍କୁଶ ଲାଗିବା ଉଚିତ କି ନୁହେଁ ସେ ନେଇ ମଧ୍ୟ ବିମର୍ଶ ହେବାକୁ ଲାଗିଲାଣି । ‘ପଦ୍ମଶ୍ରୀ’ ଭଳି ଏକ ସମ୍ମାନରେ ଭୂଷିତ ଜଣେ ବ୍ୟକ୍ତି ଦେଶର ସ୍ୱାଧୀନତା ଉପରେ ପ୍ରଶ୍ନ ଉଠାଇବା ଦ୍ୱାରା ଅନେକେ ‘ପଦ୍ମଶ୍ରୀ’ ସମ୍ମାନର ମର୍ଯ୍ୟାଦାକୁ ଅକ୍ଷୁଣ୍ଣ ରଖିବାରେ ସେ ଅସମର୍ଥ ବୋଲି ମଣୁଛନ୍ତି । ତେବେ ଏ ଭଳି ଭାବେ ସମ୍ମାନିତ ବ୍ୟକ୍ତିଙ୍କ ଆପତ୍ତିଜନକ ଓ ବିବାଦିତ ଉଚ୍ଚାରଣ ଓ ଆଚରଣ ପାଇଁ ସେମାନଙ୍କ ନିକଟରୁ ସମ୍ମାନ ପ୍ରତ୍ୟାହାର କରାଯାଇପାରିବ କି ଓ ସେଥିପାଇଁ ବିଧି ବ୍ୟବସ୍ଥା କ’ଣ, ତାହା ଆଲୋଚନାଯୋଗ୍ୟ । ଅତୀତରେ ପଦ୍ମ ସମ୍ମାନ ଘୋଷଣା ହେଲା ପରେ ମୌଲାନା ଅବୁଲ କଲାମ ଆଜାଦ, ସୁନ୍ଦରଲାଲ ବହୁଗୁଣା, ବାବା ଆମତେ, ବିଲାୟତ ଖାଁ, ବାଦଲ ସରକାର, କାଳୀଚରଣ ପଟ୍ଟନାୟକଙ୍କ ପରି କିଛି ସମ୍ମାନିତ ବ୍ୟକ୍ତି ବିଭିନ୍ନ କା

ଭଲଗପ - 2021

2021ରେ  ପ୍ରକାଶିତ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ 2021ରେ ପ୍ରକାଶ ପାଇଥିବା 1600ରୁ ବେଶି ଲେଖକଙ୍କର 6100ରୁ ଊର୍ଦ୍ଧ୍ୱ ଓଡିଆ ଗପ ମଧ୍ୟରୁ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ ବାଛିବାର ଏକ ପ୍ରୟାସ ଚାଲିଛି । ତଦନୁଯାୟୀ ପାଠକ ଓ ଲେଖକଙ୍କ ଦ୍ୱାରା  ପ୍ରସ୍ତାବ ଦାଖଲର ଶେଷ ତାରିଖ ମେ 31, 2022 ସୁଦ୍ଧା 260 ଜଣ ଲେଖକଙ୍କର 368ଟି ଭଲ ଗପର ସୂଚନା ଉପଲବ୍ଧ ହୋଇଛି ଯାହା ନିମ୍ନ ପ୍ରଦତ୍ତ ତାଲିକାରେ ସ୍ଥାନିତ । ଏହି ଗପଗୁଡିକ ମଧ୍ୟରୁ 42ଟି ଗପର ପିଡିଏଫ ମିଳି ନାହିଁ । ପିଡିଏଫ ବା ସ୍ପ୍କାନ କପି ଉପଲବ୍ଦାଧ କରାଇବା ପାଇଁ ଆଉ 7 ଦିନ ସମୟ ଦିଆଯାଉଛି । ପ୍ରତିଟି ଗପ ପଢା ହେବାକୁ ଥିବାରୁ ତାପରେ ପିଡିଏଫ ଉପଲବ୍ଧ ହୋଇ ପାରି ନଥିବା ଗପଗୁଡିକୁ ଚୟନ ପ୍ରକ୍ରିୟାରୁ ବାଦ ଦିଆଯିବ । (ସରଳ କୁମାର ଦାସ) 9437038015 saral_das@yahoo.co.in ତାଲିକାରେ ସ୍ଥାନିତ କୌଣସି ଗପ 2021 ପୂର୍ବରୁ ପ୍ରକାଶ ପାଇଥିଲେ ଲେଖକ ଓ ପାଠକମାନେ ତାହା ଜଣାଇବାକୁ ଅନୁରୋଧ । ଜଣାପଡିଲେ ସେଇଟିକୁ ତାଲିକାରୁ ବାଦ ଦିଆଯିବ । ପ୍ରତିଟି ମନୋନୀତ ଗପ ପଢା ହେବାକୁ ଥିବାରୁ ସେଗୁଡିକର ପିଡିଏଫ ପଠାଇବାକୁ ସମ୍ପୃକ୍ତ ଲେଖକମାନଙ୍କୁ ଅନୁରୋଧ । ଏକାଧିକ ଗପ ଥିବା ଲେଖକଙ୍କ ଶ୍ରେଷ୍ଠ ଗପଟିକୁ ଚୟନ କରିବା ପ୍ରକ୍ରିୟା ଆରମ୍ଭ ହୋଇଯାଇଛି । କ୍ରମିକ ସଂଖ୍ୟା ଲେଖକ ଗଳ୍ପର ନାମ କେଉଁଠି(ପତ୍ରିକା ଇତ୍ୟାଦି) ପ୍ରକାଶନ ସଂଖ୍ୟା/ ତାରିଖ 1 ଅଜୟ ମହାପାତ୍ର

ପେଗାସସ୍ ମାମଲା ସରକାରଙ୍କ ତଣ୍ଟିରେ କଣ୍ଟା ହେବ ?

ପେଗାସସ୍ ମାମଲାରେ ଏକାଧିକ ପିଟିସନର ବିଚାର କରି ସୁପ୍ରିମକୋର୍ଟର ପ୍ରଧାନ ବିଚାରପତି ଏନ ଭି ରମଣାଙ୍କ ସମେତ ଏକ ତିନି ଜଣିଆ ଖଣ୍ଡପୀଠ ଅକ୍ଟୋବର ୨୭, ୨୦୨୧ରେ ଦେଇଥିବା ଆଦେଶକୁ ଅନେକେ ‘ଐତିହାସିକ’ କହୁଥିବା ବେଳେ ଏହା ମାଧ୍ୟମରେ କେନ୍ଦ୍ର ସରକାର ଭର୍ତ୍ସିତ ହୋଇଛନ୍ତି ବୋଲି ମଧ୍ୟ କୁହାଯାଉଛି । ନାଗରିକଙ୍କ ମୌଳିକ ଅଧିକାରକୁ ଅକ୍ଷୁଣ୍ଣ ରଖିବା ପାଇଁ ଏହି ୪୬ ପୃଷ୍ଠା ବିଶିଷ୍ଟ ଆଦେଶଟି ଆଗାମୀ ଦିନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ଯାଉଥିବାରୁ ଏ ସମ୍ପର୍କରେ ବିମର୍ଶର ଆବଶ୍ୟକତା ରହିଛି । କାନାଡାର ଟରୋଣ୍ଟୋ ବିଶ୍ୱବିଦ୍ୟାଳୟ ଅଧୀନସ୍ଥ ‘ସିଟିଜେନ ଲ୍ୟାବ’ ସେପ୍ଟେମ୍ୱର ୨୦୧୮ରେ ଇସ୍ରାଏଲି ଟେକ୍ନୋଲୋଜି କମ୍ପାନୀ ଏନଏସଓ ଦ୍ୱାରା ପ୍ରସ୍ତୁତ ପେଗାସସ୍ ନାମକ ସ୍ପାଏୱେୟାର ସମ୍ପର୍କରେ ଏକ ବିସ୍ତୃତ ରିପୋର୍ଟ ପ୍ରକାଶ କରିଥିଲେ । ଏହି ସ୍ପାଏୱେୟାରକୁ ବ୍ୟବହାର କରି ଯେ କୌଣସି ବ୍ୟକ୍ତିର ଫୋନ, କମ୍ପ୍ୟୁଟର ଭଳି ଡିଜିଟାଲ ଉପକରଣଗୁଡିକୁ ସ୍ପର୍ଶ ନ କରି ମଧ୍ୟ ସେଗୁଡିକୁ ନିୟନ୍ତ୍ରଣ କରି ହେବ । ଥରେ ଏହି ସ୍ପାଏୱେୟାର ଲକ୍ଷ୍ୟରେ ଥିବା ଉପକରଣରେ ଅବସ୍ଥାପିତ ହୋଇଗଲେ ସେଥିରେ ଥିବା ସମସ୍ତ ତଥ୍ୟ (ଡାଟା) ସହ ଉପକରଣର ଇ-ମେଲ, ଟେକ୍ସଟ, ଫୋନ, କ୍ୟାମେରା, ରେକର୍ଡିଙ୍ଗ କରିବା କ୍ଷମତାଗୁଡିକ ମଧ୍ୟ ସ୍ପାଏୱେୟାର ବ୍ୟବହାରୀଙ୍କ ନିୟନ୍ତ୍ରଣକୁ ଚାଲିଯାଇଥାଏ ଓ ସମ୍ପୃକ୍ତ ବ୍ୟକ୍ତିଙ୍କ ଅଜାଣତରେ ଅନ୍ୟ ତଥ୍ୟ ମଧ୍ୟ ଉପକରଣର

ଓଡିଆ କ୍ଷୁଦ୍ରଗଳ୍ପ 2021 - ପ୍ରଥମ ପର୍ଯ୍ୟାୟରେ 252ଟି ଗପ

ଓଡିଆ କ୍ଷୁଦ୍ରଗଳ୍ପ 2021 – ପ୍ରଥମ ପ୍ରର୍ଯ୍ୟାୟରେ 252ଟି ଗପ  ପାଠକ, ଲେଖକଙ୍କ ସହଯୋଗରେ 2021ରେ ପ୍ରକାଶିତ କିଛି ଭଲ ଗପ ବାଛିବାର ପ୍ରୟାସ ଆରମ୍ଭ ହୋଇ 260 ଜଣ ଲେଖକଙ୍କର 368ଟି ଭଲ ଗପର ସୂଚନା ହସ୍ତଗତ ହୋଇଥିଲା । ଇତିମଧ୍ୟରେ ତନ୍ମଧ୍ୟରୁ ଏକାଧିକ ଗପ ଆସିଥିବା ଲେଖକମାନଙ୍କର ଗପଗୁଡିକୁ ପଢାଯାଇ ସେଥିରୁ ସମ୍ପୃକ୍ତ ଲେଖକଙ୍କ ଗୋଟିଏ ଲେଖାଏଁ ଗପକୁ ଗ୍ରହଣ କରାଯାଇଛି । କିଛି ଲେଖକଙ୍କର ଗପ ପୂର୍ବରୁ ପ୍ରକାଶିତ ହୋଇଥିବା ଓ / ବା ଧାର୍ଯ୍ୟ ଶେଷ ତାରିଖ ସୁଦ୍ଧା ପଢିବା ଲାଗି ପିଡିଏଫ ଉପଲବ୍ଧ ହୋଇ ନ ପାରିବା କାରଣରୁ ପ୍ରକ୍ରିୟା ଅନ୍ତର୍ଗତ କରାଯାଇ ପାରିଲାନାହିଁ । ଅର୍ଥାତ୍ ପ୍ରଥମ ପର୍ଯ୍ୟାୟକୁ ନିମ୍ନଲିଖିତ 252 ଜଣ ଲେଖକଙ୍କର 252ଟି ଗପ ଯାଇଛି । ଏହି ପର୍ଯ୍ୟାୟରେ ଗପଗୁଡିକୁ ପାଠକଙ୍କ ନିକଟକୁ ପଠାଇଲା ବେଳେ ଗପର ନାମ ଓ ଲେଖକଙ୍କ ନାମକୁ ଲିଭାଯାଇ ତା ସ୍ଥାନରେ କେବଳ ଗୋଟିଏ କୋଡ ନମ୍ୱର ପ୍ରଦାନ କରାଯାଉଛି । ଏହି ସମସ୍ତ ଗପକୁ 25ଟି ସେଟରେ ଭାଗ କରାଯାଇ ପ୍ରତି ସେଟରେ ହାରାହାରି 10ଟି ଲେଖାଏଁ ଗପ ରଖାଯାଇଛି । ପ୍ରତିଟି ସେଟ ଗପ ଦୁଇ ଜଣ ଲେଖାଏଁ ପାଠକଙ୍କ ନିକଟକୁ ପୃଥକ୍ ଭାବେ ପଠାଯାଉଛି । ସେମାନଙ୍କ ନିକଟରୁ ମତାମତ ମିଳିଲା ପରେ ସେଥିମଧ୍ୟରୁ ପ୍ରାୟ 50 ପ୍ରତିଶତ ଗପ ଦ୍ୱିତୀୟ ପର୍ଯ୍ୟାୟକୁ ଉନ୍ନୀତ ହେବ । ଗପଗୁଡିକ ଲେଖକମାନଙ୍କର ମୌଳିକ ରଚନା ଓ 2021ରେ ପ୍ରଥମ କରି ପ୍ରକାଶ ପାଇଛି ବୋଲି ଆଶା କରାଯାଏ । ଯଦି ଅନ୍