ଘରେ ନ ପଶୁଣୁ ଓଡ଼ିଶାର ଦୁଇ କେନ୍ଦ୍ର ମନ୍ତ୍ରୀଙ୍କ ମୁଣ୍ଡରେ ଚାଳ ବାଜିଲାଣି ବୋଲି ଏବେ ଚର୍ଚ୍ଚା ହେଉଛି । ପଶ୍ଚିମବଙ୍ଗରେ ରେଳ ଦୁର୍ଘଟଣାରେ ଅନେକ ଲୋକଙ୍କ ପ୍ରାଣହାନି ପରେ ଦେଶବ୍ୟାପୀ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଜନସାଧାରଣଙ୍କ କ୍ରୋଧର ଶରବ୍ୟ ହୋଇଛନ୍ତି । ଠିକ୍ ଏତିକିବେଳେ ନିଟ୍ ପରୀକ୍ଷାରେ ହୋଇଥିବା ବ୍ୟାପକ ଦୁର୍ନୀତିର ଖବର ପ୍ରଘଟ ହୋଇ ଦେଶ ତମାମ୍ ଲକ୍ଷ ଲକ୍ଷ ପ୍ରଭାବିତ ପରୀକ୍ଷାର୍ଥୀ ଓ ସେମାନଙ୍କ ଅଭିଭାବକଙ୍କ ରୋଷ-ଉତ୍ତାପ ବଳୟରେ ପଡ଼ିଲେ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ପ୍ରଥମେ ପ୍ରଶ୍ନପତ୍ର ପ୍ରଘଟ ହୋଇନାହିଁ କହି ପରୀକ୍ଷା ପରିଚାଳନା କରୁଥିବା ‘ଏନଟିଏ’ ସଂସ୍ଥାକୁ ଏକପ୍ରକାର କ୍ଲିନ୍ ଚିଟ୍ ଦେବା, ତା’ପରେ କାଁ ଭାଁ ଅନିୟମିତତା ହୋଇଛି ବୋଲି ସ୍ୱୀକାର ଓ ଶେଷରେ ଅନିୟମିତତା ପାଇଁ ସେ ନିଜେ ନୈତିକ ଭାବେ ଦାୟୀ ବୋଲି ମନ୍ତ୍ରୀ କହିବା ପରେ ତାଙ୍କର ଇସ୍ତଫା ଦାବି ଜୋର ଧରିଲା । ଏହା କେବଳ ଏକ ପ୍ରଶ୍ନପତ୍ର ଲିକ୍ ମାମଲା ନୁହେଁ, ବରଂ ଏଥିରେ ପାଦେ ପାଦେ ବ୍ୟାପକ ଅନିୟମିତତା ହୋଇଥିବାର ସୂଚନା ମିଳୁଛି ଯହିଁରେ ଲକ୍ଷ ଲକ୍ଷ ପରୀକ୍ଷାର୍ଥୀଙ୍କ ଭବିଷ୍ୟତ ବିପନ୍ନ ହୋଇ ସେମାନଙ୍କ ସ୍ୱପ୍ନଚୋରି ଓ ମେଧାହତ୍ୟା ଲାଗି ସୁପରିକଳ୍ପିତ ଷଡ଼ଯନ୍ତ୍ର ହୋଇଥିବା ବିଷୟ ଜଣାପଡ଼ୁଛି । କହିବା ବାହୁଲ୍ୟ ଯେ ଏ ପ୍ରକାର ଦୁଃସ୍ଥିତିର ଦୀର୍ଘମିଆଦି ପ୍ରଭାବ ପଡ଼ିବାକୁ ଯାଉଛି, ଯାହା ଚିନ୍ତାଜନକ ।
ଡାକ୍ତରୀ ପାଠ ପଢ଼ିବା ପାଇଁ ମେଡିକାଲ କଲେଜଗୁଡ଼ିକରେ ନାମ ଲେଖାଇବାକୁ ହେଲେ ଛାତ୍ରଛାତ୍ରୀଙ୍କୁ ପ୍ରଥମେ ନିଟ୍ (ନ୍ୟାସନାଲ ଏଲିଜିବିଲିଟି କମ୍ ଏଣ୍ଟ୍ରାନ୍ସ ଟେଷ୍ଟ – ଅଣ୍ଡର ଗ୍ରାଜୁଏଟ) ପ୍ରବେଶିକା ପରୀକ୍ଷାରେ ଅତି ଉଚ୍ଚ ରାଙ୍କିଙ୍ଗରେ ଉତ୍ତୀର୍ଣ୍ଣ ହେବାକୁ ହୋଇଥାଏ । ଗଲା ପାଞ୍ଚ ବର୍ଷ ଧରି ଏହି ପରୀକ୍ଷା କେନ୍ଦ୍ର ସରକାରଙ୍କ ଶିକ୍ଷା ବିଭାଗ ଦ୍ୱାରା ନିଯୁକ୍ତ ନେସନାଲ ଟେଷ୍ଟିଂ ଏଜେନ୍ସି (ଏନଟିଏ) ଦ୍ୱାରା ପରିଚାଳିତ ହୋଇଆସୁଛି । ଏ ବର୍ଷ ସେହି ପରୀକ୍ଷାଟି ମେ ୫ରେ ଅନୁଷ୍ଠିତ ହୋଇଥିଲା । ଏହାର ଫଳ ଜୁନ ୧୪ରେ ପ୍ରକାଶ ପାଇବାର ଥିଲେ ବି ତାକୁ ତରବରିଆ ଭାବେ ଜୁନ ୪ ତାରିଖରେ ପ୍ରକାଶ କରିଦିଆଗଲା, ଯେଉଁଦିନ ସାଧାରଣ ନିର୍ବାଚନ ଫଳାଫଳ ମଧ୍ୟ ପ୍ରକାଶ ପାଇଥିଲା । ଏଣୁ ସେହି କୋଳାହଳ ଭିତରେ ଏଥିରେ ହୋଇଥିବା ଦୁର୍ନୀତି ପ୍ରତି ଗଣମାଧ୍ୟମର ବି ଦୃଷ୍ଟି ଯାଇନଥିଲା। ତେଣୁ ସନ୍ଦେହ ହୋଇଥାଏ ଯେ ଦୁର୍ନୀତିକୁ ଲୁଚାଇବା ପାଇଁ ଜାଣିଶୁଣି ଏଭଳି କରାଯାଇ ନ ଥିଲା ତ ?
ଏହି ପରୀକ୍ଷାରେ ତିନି ପ୍ରକାରେ ଅନିୟମିତତା ଓ ଦୁର୍ନୀତି ହୋଇଥିବାର ସନ୍ଦେହ ହୁଏ । ପ୍ରଥମ ପ୍ରକାର ହେଲା ଏହି ପରୀକ୍ଷାରେ ଗ୍ରେସ ମାର୍କ ଦେବାର କୌଣସି ପ୍ରାବଧାନ ନଥିବା ସତ୍ତ୍ୱେ ‘ଏନଟିଏ’ ଦ୍ୱାରା କିଛି ଛାତ୍ରଙ୍କୁ ଗ୍ରେସ ମାର୍କ ଦିଆଯିବା । ପରୀକ୍ଷାରେ ୭୨୦ରୁ ୭୨୦ ନମ୍ୱର ରଖି ୬୭ ଜଣ ପରୀକ୍ଷାର୍ଥୀ ପ୍ରଥମ ସ୍ଥାନରେ ରହିବା, ହରିଆଣାର ଝାଝରସ୍ଥିତ ଏକ ପରୀକ୍ଷାକେନ୍ଦ୍ରରୁ ଛଅ ଜଣ ପ୍ରଥମ ସ୍ଥାନ ଦଖଲ କରିବା, କେତେକ ଛାତ୍ର ୭୧୮, ୭୧୯ ଭଳି ଅସମ୍ଭବ ନମ୍ୱର ରଖିବା ଭଳି ଘଟଣା ଯୋଗୁ ପରୀକ୍ଷାର୍ଥୀଙ୍କ ମନରେ ସନ୍ଦେହ ସୃଷ୍ଟି ହେବାରୁ ସେମାନଙ୍କ ମଧ୍ୟରୁ କେତେକ ସର୍ବୋଚ୍ଚ ଅଦାଲତଙ୍କ ଦ୍ୱାରସ୍ଥ ହୋଇଥିଲେ । ତଥ୍ୟ ଲୁଚାଇଥିବା ‘ଏନଟିଏ’ ସ୍ୱୀକାର କଲା ଯେ କେତେକ କେନ୍ଦ୍ରରେ ପରୀକ୍ଷାର୍ଥୀଙ୍କୁ ସ୍ୱଳ୍ପ ସମୟ ମିଳିଥିବାରୁ ଓ ଗୋଟିଏ ପ୍ରଶ୍ନର ଦୁଇଟି ଠିକ୍ ଉତ୍ତର ଥିବାରୁ ୧୫୬୩ ଜଣ ପରୀକ୍ଷାର୍ଥୀଙ୍କୁ ଗ୍ରେସ ମାର୍କ ଦିଆଯାଇଛି । ଦେଖିବାର କଥା ହେଲା, ୬୧ ଜଣ ତ ଏହି ଗ୍ରେସ ମାର୍କ ଆଧାରରେ ପ୍ରଥମ ସ୍ଥାନ ଅଧିକାର କରିଥିଲେ । ସୁପ୍ରିମକୋର୍ଟଙ୍କ ଟିପ୍ପଣୀ ପରେ ‘ଏନଟିଏ’ ଗ୍ରେସ ମାର୍କ ପାଇଥିବା ସମସ୍ତଙ୍କଠାରୁ ତାହା ପ୍ରତ୍ୟାହାର କରି ସେମାନଙ୍କ ପାଇଁ ଆଉ ଥରେ ପରୀକ୍ଷା କରିବାକୁ ବାଧ୍ୟ ହୋଇଛି ।
ଦ୍ୱିତୀୟ ପ୍ରକାର ଦୁର୍ନୀତି ହେଲା ନକଲ କରିବା ବା ଅସାଧୁ ଉପାୟର ଅବଲମ୍ୱନ କରି ପରୀକ୍ଷା ଦେବା । ଦିଲ୍ଲୀ ଓ ରାଜସ୍ଥାନରେ କିଛି ଅଣପରୀକ୍ଷାର୍ଥୀ ଛଦ୍ମ ଭାବେ ପରୀକ୍ଷା ଦେଇ ଗିରଫ ହୋଇଥିବା କଥା ବି ସାମନାକୁ ଆସିଛି । ତେବେ ଗୁଜରାଟର ଗୋଧ୍ରାସ୍ଥିତ ଜୟ ଜଲାରାମ ସ୍କୁଲ ପରୀକ୍ଷାକେନ୍ଦ୍ରରେ ଯେଉଁଭଳି ବିପୁଳ ଅର୍ଥ ବିନିମୟରେ ପରୀକ୍ଷାର୍ଥୀମାନଙ୍କୁ ଅସାଧୁ ଉପାୟ ଅବଲମ୍ୱନ କରିବାର ସୁଯୋଗ ଦିଆଗଲା, ତାହା ଚକିତ କଲା ଭଳି । ଓଡିଶା ସମେତ ଦେଶର ବିଭିନ୍ନ ରାଜ୍ୟରୁ ଆସି ସେହି କେନ୍ଦ୍ରରେ ପରୀକ୍ଷା ଦେଇଥିବା ଛାତ୍ରମାନଙ୍କଠାରୁ ଜଣକା ୧୦ ଲକ୍ଷ ବା ଅଧିକ ଟଙ୍କା ନିଆଯାଇଥିଲା । ପରକ୍ଷାର୍ଥୀଙ୍କୁ ଉତ୍ତରପତ୍ର ଖାଲି ଛାଡ଼ିବାକୁ କୁହାଯାଇଥିଲା, ଯାହା ଶିକ୍ଷକ ଓ ଅନ୍ୟମାନଙ୍କ ସହାୟତାରେ ପରେ ପୂରଣ କରାଯାଇଥିବାର ଅଭିଯୋଗ ହୁଏ । ଏଥିରେ ବଡୋଦରାସ୍ଥିତ ରୟ ଓଭରସିଜ୍ ନାମକ ଏକ କୋଚିଂ ସେଣ୍ଟରର ସମ୍ପୃକ୍ତି ବିଷୟ ଜଣାପଡ଼ିଛି । ଏହି ମାମଲାରେ ସ୍କୁଲର ପ୍ରିନସିପାଲଙ୍କ ସମେତ ୫ ଜଣ ଗିରଫ ହୋଇସାରିଛନ୍ତି ।
ତୃତୀୟ ପ୍ରକାର ଦୁର୍ନୀତି ହେଲା ପ୍ରଶ୍ନପତ୍ର ଲିକ୍, ଯାହା ବିହାରର ପାଟନାଠାରେ ପରୀକ୍ଷା ହେବାର ଦିନକ ଆଗରୁ ଅର୍ଥାତ୍ ମେ ୪ରେ ହୋଇଥିଲା । କିଛି ପରୀକ୍ଷାର୍ଥୀଙ୍କଠାରୁ ୩୦ ଲକ୍ଷ ଟଙ୍କା ଲେଖାଏଁ ନେଇ ସେମାନଙ୍କୁ ପ୍ରଶ୍ନ ଓ ତହିଁର ଉତ୍ତର ମୁଖସ୍ଥ କରାଇ ଦିଆଯାଇଥିଲା । ଏ ସମ୍ପର୍କରେ ପରୀକ୍ଷା ପୂର୍ବରୁ ବିହାରର ଅର୍ଥନୈତିକ ଅପରାଧ ଏକକ (ଇଓୟୁ) ‘ଏନଟିଏ’ର ଦୃଷ୍ଟି ଆକର୍ଷଣ କରିଥିଲେ ମଧ୍ୟ ‘ଏନଟିଏ’ ତରଫରୁ ତାକୁ ଅଣଦେଖା କରାଯିବା ଦୁର୍ଭାଗ୍ୟଜନକ । ପ୍ରଶ୍ନପତ୍ର ଲିକ୍ ମାମଲା ଆଉ ବିହାର ଭିତରେ ସୀମିତ ନରହି ଏହା ଝାଡଖଣ୍ଡ ଓ ଅନ୍ୟ ରାଜ୍ୟକୁ ମଧ୍ୟ ବ୍ୟାପି ଥିବାର ଜଣାପଡ଼ୁଛି ।
ନିୟମାନୁସାରେ ପ୍ରତ୍ୟେକ ପରୀକ୍ଷା କେନ୍ଦ୍ରର ପ୍ରତିଟି କୋଠରୀରେ ଅନ୍ତତଃ ପକ୍ଷେ ୨ଟି କାର୍ୟ୍ୟକାରୀ ସିସିଟିଭି ଲାଗିଥିବା କଥା । ‘ଏନଟିଏ’ ଦ୍ୱାରା ନିଯୁକ୍ତ ଏକ ତୃତୀୟ ପକ୍ଷର ସମୀକ୍ଷା ରିପୋର୍ଟରୁ ଜଣାପଡ଼େ ଯେ ସେମାନେ ପରିଦର୍ଶନ କରିଥିବା ୩୯୯ଟି କେନ୍ଦ୍ର ମଧ୍ୟରୁ ୧୮୬ଟିରେ ଏହି ବ୍ୟବସ୍ଥା ନଥିଲା । ଫଳରେ ଦିଲ୍ଲୀସ୍ଥିତ ‘ଏନଟିଏ’ କଣ୍ଟ୍ରୋଲ ରୁମରୁ ସେହି କେନ୍ଦ୍ରଗୁଡ଼ିକରେ ପରୀକ୍ଷା କିପରି ପରିଚାଳିତ ହେଉଛି, ତାହା ଜାଣିବା ସମ୍ଭବ ନଥିଲା । ତନ୍ମଧ୍ୟରୁ ୬୮ଟି କେନ୍ଦ୍ରରେ ପ୍ରଶ୍ନପତ୍ର ଥିବା ଷ୍ଟ୍ରଙ୍ଗ ରୁମରେ ଜଗୁଆଳି ନଥିଲେ । ତେଣୁ ସେହି କେନ୍ଦ୍ରଗୁଡ଼ିକରେ ପ୍ରଶ୍ନପତ୍ର ଲିକ୍, ନକଲ ଆଦିର ଆଶଙ୍କାକୁ ଏଡ଼ାଇ ଦେଇ ହେବନାହିଁ ।
ଏଣିକି ନିଟ୍ ପରୀକ୍ଷାର୍ଥୀଙ୍କ ସଂଖ୍ୟା ପ୍ରତିବର୍ଷ ୨.୫ରୁ ୩ ଲକ୍ଷ ବୃଦ୍ଧି ପାଉଛି । ସଂଖ୍ୟା ବଢ଼ିବାର ବିଭିନ୍ନ କାରଣ ମଧ୍ୟରୁ ଗୋଟିଏ ବଡ଼ କାରଣ ହେଉଛି ପରୀକ୍ଷାରେ ଅକୃତକାର୍ୟ୍ୟ ହେଉଥିବା ଛାତ୍ରଙ୍କ ମଧ୍ୟରୁ ଅଧିକାଂଶ ପୁଣି ପରୀକ୍ଷାରେ ବସିଥାନ୍ତି । ସେହିପରି ନିଜ ପସନ୍ଦର କଲେଜରେ ଆଡମିସନ ପାଇ ନଥିବା କିଛି ପରୀକ୍ଷାର୍ଥୀ ମଧ୍ୟ ପୁଣି ପରୀକ୍ଷା ଦେଇଥାନ୍ତି । ତେବେ ଏଥରର ସଂଖ୍ୟାବୃଦ୍ଧି ବିଭିନ୍ନ ରାଜ୍ୟରେ ସମାନୁପାତିକ ଭାବେ ନ ହୋଇ ନିର୍ଦ୍ଦିଷ୍ଟ କେତେକ ରାଜ୍ୟରେ ଆଶାତୀତ ହୋଇଛି । ଉତ୍ତର ପ୍ରଦେଶ ଓ ରାଜସ୍ଥାନରେ ଏହି ସଂଖ୍ୟା ଯଥାକ୍ରମେ ୬୫ ହଜାର ଓ ୪୮ ହଜାର ବୃଦ୍ଧି ପାଇଥିବା ବେଳେ ପାରମ୍ପରିକ ଭାବେ ଅଧିକ ପରୀକ୍ଷାର୍ଥୀ ବସୁଥିବା ମହାରାଷ୍ଟ୍ର, ତାମିଲନାଡୁ, କର୍ଣ୍ଣାଟକ ଆଦି ରାଜ୍ୟଗୁଡ଼ିକରୁ ପରୀକ୍ଷାର୍ଥୀଙ୍କ ସଂଖ୍ୟାରେ ସେଭଳି ବୃଦ୍ଧି ହୋଇନାହିଁ। ଏହାର ରହସ୍ୟ ମଧ୍ୟ ଉନ୍ମୋଚିତ ହେବା ଆବଶ୍ୟକ ।
ପରୀକ୍ଷା ପାଇଁ ଆବେଦନ କରିବା ଲାଗି ଧାର୍ୟ୍ୟ ଦିବସ ପ୍ରଥମେ ପେବୃଆରୀ ୯ରୁ ମାର୍ଚ୍ଚ ୯, ୨୦୨୪ ଯାଏ ଥିଲା, ଯାହାକୁ ମାର୍ଚ୍ଚ ୧୬ ଯାଏ ବଢ଼ାଯାଇଥିଲା । ଏହି ତିଥି ଅତିକ୍ରାନ୍ତ ହେବାର ପ୍ରାୟ ୨୩ ଦିନ ପରେ ହଠାତ୍ ଏପ୍ରିଲ ୮, ୨୦୨୪ରେ ଏକ ପ୍ରେସ ବିଜ୍ଞପ୍ତି ମାଧ୍ୟମରେ ସୂଚିତ କରାଗଲା ଯେ ଆବେଦନ କରିପାରି ନଥିବା ପରୀକ୍ଷାର୍ଥୀମାନେ ୯ ଓ ୧୦ ଏପ୍ରିଲ ଦୁଇଦିନ ଲାଗି ଅନଲାଇନରେ ଆବେଦନ କରିପାରିବେ। ଏହି ଦୁଇଦିନ ମଧ୍ୟରେ ଆବେଦନ କରିଥିବା ପରୀକ୍ଷାର୍ଥୀଙ୍କ ମଧ୍ୟରୁ ଅନେକ ପରୀକ୍ଷାର୍ଥୀ ସଫଳ ହୋଇଥିବାର ଅଭିଯୋଗ ହୁଏ । ଏହା ଆଦୌ କାକତାଳୀୟ ହୋଇନପାରେ । ସେହିପରି ଫର୍ମ ସଂଶୋଧନ କରିବାର ଶେଷ ତାରିଖ ଥିଲା ମାର୍ଚ୍ଚ ୨୦, ଯାହାକୁ ଏପ୍ରିଲ ୧୧ ଓ ୧୨ ଦୁଇଦିନ ଲାଗି ବଢ଼ାଇ ଦିଆଗଲା । ଏହାରି ମାଧ୍ୟମରେ କିଛି ଛାତ୍ର ସେମାନଙ୍କ ପସନ୍ଦର ପରୀକ୍ଷା କେନ୍ଦ୍ର ପାଇବାକୁ ସମର୍ଥ ହେଲେ, ଯାହା ଗୁଜରାଟର ଗୋଧ୍ରା ପରୀକ୍ଷା କେନ୍ଦ୍ର ଭଳି ବିଭିନ୍ନ କେନ୍ଦ୍ରରେ ଦୁର୍ନୀତିକୁ ପ୍ରଶ୍ରୟ ଦେଇଥାଇପାରେ । ଅବେଦନ ଓ ସଂଶୋଧନ ତିଥି ବଢ଼ାଇବା ଭଳି ବଡ଼ ନିଷ୍ପତ୍ତି କେବଳ ‘ଏନଟିଏ’ ଦ୍ୱାରା ନିଆଯାଇଥିବା କଥା ବିଶ୍ୱାସଯୋଗ୍ୟ ହେଉ ନଥିବାରୁ ଏଥିରେ ଉଚ୍ଚସ୍ତରୀୟ ସମ୍ପୃକ୍ତି ଥିବାର ଆଶଙ୍କାକୁ ଏଡ଼ାଇ ଦେଇ ହେବନାହିଁ ।
ଏଭଳି ଏକ ଗୁରୁତ୍ୱପୂର୍ଣ୍ଣ ପରୀକ୍ଷାରେ ପରୀକ୍ଷା-ମାଫିଆଙ୍କ ରାକେଟ ସକ୍ରିୟ ହୋଇ ଲକ୍ଷ ଲକ୍ଷ ଟଙ୍କାର ଦୁର୍ନୀତି ହେବା ପଛର ଅର୍ଥନୀତିକୁ ବୁଝିବାର ଆବଶ୍ୟକତା ରହିଛି । ଭାରତରେ ଡାକ୍ତରୀ ପାଠ ପଢ଼ିବା ଲାଗି ଛାତ୍ରଛାତ୍ରୀଙ୍କ ମଧ୍ୟରେ ପ୍ରବଳ ଆଗ୍ରହ ରହିଛି। ସାରା ଦେଶରେ ମେଡ଼ିକାଲ କଲେଜଗୁଡ଼ିକରେ ସିଟ୍ ସଂଖ୍ୟା ପ୍ରାୟ ୧.୧୦ ଲକ୍ଷ ହୋଇଥିବା ବେଳେ ଏ ବର୍ଷ ପରୀକ୍ଷାର୍ଥୀଙ୍କ ସଂଖ୍ୟା ଥିଲା ୨୩.୨୪ ଲକ୍ଷ, ଅର୍ଥାତ୍ ପ୍ରତି ୨୨ ଜଣ ଆଶାୟୀଙ୍କ ଲାଗି ମାତ୍ର ଗୋଟିଏ ସିଟ୍ । ଏଥିରୁ ପୁଣି ସରକାରୀ କଲେଜଗୁଡ଼ିକରେ ସିଟ୍ ସଂଖ୍ୟା ମାତ୍ର ୫୦ ହଜାର । ସରକାରୀ କଲେଜରେ ସିଟଟିଏ ପାଇଲେ ୧୫-୨୦ ଲକ୍ଷ ଟଙ୍କା ଖର୍ଚ୍ଚ କରିବାକୁ ହେଉଥିଲା ବେଳେ ଘରୋଇ କଲେଜରେ ପ୍ରାୟ କୋଟିଏ ଟଙ୍କାରୁ ଅଧିକ ଲାଗିଥାଏ । ଏଥିଯୋଗୁ ସରକାରୀ କଲେଜରେ କୌଣସି ପ୍ରକାରେ ସିଟଟିଏ ହାତେଇବା ଲାଗି ମାତ୍ରାଧିକ ପ୍ରତିଦ୍ୱନ୍ଦ୍ୱିତା ହୋଇଥାଏ, ଯାହା ଏହି ପରୀକ୍ଷାରେ ହେଉଥିବା ଦୁର୍ନୀତିର ଏକ ବଡ଼ କାରଣ ।
ଡାକ୍ତରୀ ପାଠ ପଢ଼ିବାର ସ୍ୱପ୍ନକୁ ସାକାର କରିବା ପାଇଁ ମେଧାବୀ ଛାତ୍ରଟିଏ ବର୍ଷାଧିକ କାଳ ଦିନରାତି ପରିଶ୍ରମ କରିଥାଏ । ପ୍ରବେଶିକା ପରୀକ୍ଷାରେ ଭଲ କରି ନିଶ୍ଚିତ ରୂପେ ଭଲ ରାଙ୍କ୍ ହାସଲ କରିବାର ସ୍ୱପ୍ନ ପୋଷଣ କରିଥିବା ପରୀକ୍ଷାର୍ଥୀ ସକାଶେ ଏଭଳି ଅନିୟମିତତା ଓ ଦୁର୍ନୀତି ହାହୁତାଶନମୟ ପରିସ୍ଥିତି ସୃଷ୍ଟି କରିଥାଏ । ତା’ ସ୍ୱପ୍ନ ଚୋରି ହୋଇଥିବା ଓ ତା’ ମେଧାକୁ ହତ୍ୟା କରାଯାଇଥିବା କଥା ଜାଣିଲା ପରେ ସେ ଭାଙ୍ଗିପଡ଼େ, ନତୁବା ତା’ ମନ ବିଦ୍ରୋହୀ ହୋଇଉଠେ । ତେଣୁ ଏ ବର୍ଷ ନିଟ୍ ପରୀକ୍ଷାରେ ଲକ୍ଷାଧିକ ପରୀକ୍ଷାର୍ଥୀଙ୍କ ସ୍ୱପ୍ନଚୋରି ଓ ମେଧାହତ୍ୟା ହୋଇଛି ବୋଲି କହିଲେ ଅତ୍ୟୁକ୍ତି ହେବ ନାହିଁ । ଏଥିରୁ ବାର୍ତ୍ତାଟିଏ ଗଲା ଯେ ପରୀକ୍ଷାରେ ସଫଳ ହେବା ପାଇଁ ମେଧା ଓ ପରିଶ୍ରମ ଯଥେଷ୍ଟ ନୁହେଁ; ବାପାମାଆଙ୍କ ପହଞ୍ଚ ଓ ଅର୍ଥବଳ ଥିଲେ ଜଣେ ଅଯୋଗ୍ୟ ଓ ନିକୃଷ୍ଟ ପ୍ରାର୍ଥୀ ମେଧାବୀ ପ୍ରାର୍ଥୀମାନଙ୍କୁ ବିସ୍ଥାପିତ କରି ଦେଇପାରେ । ତେବେ ଇତିମଧ୍ୟରେ କେବଳ 'ନିଟ୍-ୟୁଜି' ପରୀକ୍ଷା ନୁହେଁ, 'ୟୁଜିସି-ନେଟ୍', 'ସିଏସଆଇଆର-ୟୁଜିସି-ନେଟ୍', 'ନିଟ୍-ପିଜି' ପରୀକ୍ଷା ଭଳି ଅତି ଗୁରୁତ୍ୱପୂର୍ଣ୍ଣ ଓ ତୀବ୍ର ପ୍ରତିଦ୍ୱନ୍ଦ୍ୱିତାମୂଳକ ପରୀକ୍ଷା ପ୍ରଶ୍ନପତ୍ର ଲିକ୍ ତଥା ଅନ୍ୟ ଦୁର୍ନୀତି କାରଣରୁ ଯଥାକ୍ରମେ ବାତିଲ ଓ ସ୍ଥଗିତ ହୋଇଯାଇଛି । ସୁତରାଂ, ଦୃଶ୍ୟପଟ ଯେ ଅତ୍ୟନ୍ତ ହତାଶାଜନକ ତାହା କହିବାରେ ଦ୍ୱିଧା ନାହିଁ । ପରୀକ୍ଷା ବ୍ୟବସ୍ଥା ଉପରୁ ବିଶ୍ୱାସ ତୁଟିଲେ ପରୀକ୍ଷାର୍ଥୀମାନେ ଆଉ ଉତ୍କର୍ଷ ହାସଲ ପ୍ରତି ଗୁରୁତ୍ୱ ଦେବେ ନାହିଁ । ଏହି ଉଦବେଗଜନକ ସ୍ଥିତିର ତୁରନ୍ତ ଆମୂଳଚୂଳ ପରିବର୍ତ୍ତନ ଆବଶ୍ୟକ ।
ପ୍ରତିବର୍ଷ ବୋର୍ଡ ପରୀକ୍ଷା ପୂର୍ବରୁ ପରୀକ୍ଷାର୍ଥୀଙ୍କୁ ଚାପମୁକ୍ତ କରିବା ଉଦ୍ଦେଶ୍ୟରେ ପ୍ରଧାନମନ୍ତ୍ରୀ ‘ପରୀକ୍ଷା ପେ ଚର୍ଚ୍ଚା’ ଓ ‘ମନ କୀ ବାତ୍’ ଆଦି ମାଧ୍ୟମରେ ଉପଦେଶ ଦେଇଥାନ୍ତି। ନିଟ ପରୀକ୍ଷାରେ ଅନିୟମିତତା ଓ ନେଟ ପରୀକ୍ଷା ବାତିଲ ହେବା ଯୋଗୁଁ ଦେଶରେ ଏବେ ପ୍ରାୟ ୩୩ ଲକ୍ଷ ପରୀକ୍ଷାର୍ଥୀ ଚାପଗ୍ରସ୍ତ ହୋଇ ଦିନ କାଟୁଥିବା ବେଳେ ସେମାନଙ୍କ ମଧ୍ୟରୁ କେହି କେହି ଅତ୍ୟନ୍ତ ଗର୍ହିତ ଚରମ ପଦକ୍ଷେପ ନେବାକୁ ମଧ୍ୟ ପଛାଉନାହାନ୍ତି। ଏପରି ସ୍ଥଳେ ପ୍ରଧାନମନ୍ତ୍ରୀଙ୍କ ନିରବତା ସମୀଚୀନ ନୁହେଁ । ବରଂ ପ୍ରଧାନମନ୍ତ୍ରୀ ଚାପଗ୍ରସ୍ତ ପରୀକ୍ଷାର୍ଥୀମାନଙ୍କୁ ପ୍ରବୋଧନା ଦେବା ସହ ଏଣିକି ପରୀକ୍ଷା କିଭଳି କଳୁଷମୁକ୍ତ ହେବ, ତାହା ନିଧାର୍ଯ୍ୟ କରିବା ଦିଗରେ ପ୍ରତିଶ୍ରୁତି ପ୍ରଦାନ କରିବା ଉଚିତ । ନିଟ୍ ପରୀକ୍ଷାଟି ବିଭିନ୍ନ ଅନିୟମିତତା କାରଣରୁ ସମ୍ପୂର୍ଣ୍ଣ ସନ୍ଦେହ ଘେରରେ ଥିବାରୁ ତୁରନ୍ତ ଏହାକୁ ବାତିଲ କରି ପରୀକ୍ଷାର ସାନି ତାରିଖ ଘୋଷଣା ହେବା ଆବଶ୍ୟକ । ନିଟରେ ହୋଇଥିବା ଦୁର୍ନୀତି ଆପରାଧିକ ଶ୍ରେଣୀର ହୋଇଥିବାରୁ ତୁରନ୍ତ ସୁପ୍ରିମକୋର୍ଟଙ୍କ ଅବଲୋକନରେ ସିବିଆଇ ଦ୍ୱାରା ଏହାର ତଦନ୍ତ କରାଗଲେ ଉଚ୍ଚ ସ୍ଥାନରେ ଅଧିଷ୍ଠିତ ଅପରାଧୀଙ୍କ ପ୍ରତି ଦୃଷ୍ଟାନ୍ତମୂଳକ ଦଣ୍ଡବିଧାନ ହୋଇପାରିବ ଓ ବ୍ୟବସ୍ଥା ପ୍ରତି ସୃଷ୍ଟ ବିଶ୍ୱାସ-ସଙ୍କଟ ଦୂର ହୋଇପାରିବ । ନହେଲେ ଦେଶ ନିତିପ୍ରତି ସ୍ୱପ୍ନଚୋରି ଓ ମେଧାହତ୍ୟାର ଘଟଣାମାନ ପ୍ରତ୍ୟକ୍ଷ କରି ଅବସାଦଗ୍ରସ୍ତ ହେବା ଅବଶ୍ୟମ୍ଭାବୀ ।
Published in Sambad on June 25, 2024
Unless accountability is fixed at the highest political level, this type of centralised loot cannot be prevented. Moreover, political masters hardly understand the woes of really talented students and their helplessness. Only God can save the common man.
ReplyDeleteThanks
Delete