ବିଜୟରେ ବି ପରାଜୟର ଗ୍ଳାନି

ନିର୍ବାଚନ ଫଳାଫଳ ଘୋଷଣା ହେବା ପରେ ସାମାଜିକ ଗଣମାଧ୍ୟମରେ ବାର୍ତ୍ତାଟିଏ ଘୂରି ବୁଲୁଥିଲା ‘ଭୋଟରମାନେ ଏନଡ଼ିଏକୁ ୪୦୦ ଆସନ ତ ଦେଇଛନ୍ତି। ହେଲେ ୨୮ ପ୍ରତିଶତ ଜିଏସଟି କାଟିଦେଇଛନ୍ତି।‘ ୪୦୦ରୁ ୨୮ ପ୍ରତିଶତ ବାଦ ହେଲେ ରହୁଛି ୨୮୮, ଏନଡ଼ିଏ ପାଇଛି ୨୯୩ଟି ଆସନ । ବିଜେପିର ଆସନ ସଂଖ୍ୟା ୨୪୦, ଯାହା ଘୋଷିତ ଲକ୍ଷ୍ୟ ୩୭୦ର ମାତ୍ର ୬୫ ପ୍ରତିଶତ। ଏନଡିଏର ସହଯୋଗୀ ଦଳଙ୍କ ସହ ମିଶି ୨୭୨ ଅଙ୍କର ସଂଖ୍ୟା ଗରିଷ୍ଠତା ହାସଲ କରିଥିବାରୁ ମୋଦୀ ଆଉଥରେ ସରକାର ଗଠନ କରିବାକୁ ସମର୍ଥ ହୋଇଛନ୍ତି। ହେଲେ ବିଜେପି ଏକୁଟିଆ ସଂଖ୍ୟାଗରିଷ୍ଠତା ହାସଲ କରିବାକୁ ସମର୍ଥ ନ ହେବା ଓ ଗତ ଥର ତୁଳନାରେ ୬୩ଟି ଆସନ କମ ପାଇବାକୁ ଅନେକେ ଦଳର ପରାଜୟ ବୋଲି ଚିତ୍ରଣ କରୁଛନ୍ତି। ଗତ ଦୁଇ ଦଫା ଧରି ନିରଙ୍କୁଶ ସଂଖ୍ୟାଗରିଷ୍ଠତା ହାସଲ କରି ଅଖଣ୍ଡ କ୍ଷମତା ଉପଭୋଗ କରିଆସିଥିବା ଦଳ ପାଇଁ ସହଯୋଗୀଙ୍କ ଉପରେ ନିର୍ଭର କରି ସରକାର ଚଲାଇବାର ବାଧ୍ୟବାଧକତା କେତେକଙ୍କୁ ଅସହଜ ଲାଗୁଛି। ଦେଶ ପୁଣି ଥରେ ପ୍ରକୃତ ଅର୍ଥରେ ମେଣ୍ଟ ସରକାରର ଯୁଗକୁ ପ୍ରତ୍ୟାବର୍ତ୍ତନ କରିଥିବାରୁ କେହି କେହି ଏଭଳି ବିଜୟକୁ ଗ୍ରହଣ କରି ନ ପାରି ବିଷାଦଗ୍ରସ୍ତ ହେଉଛନ୍ତି। ବିଜୟ ସତ୍ତ୍ୱେ ପରାଜୟର ଗ୍ଳାନିର ଅନୁଭବ ହେବାକୁ ଇଂରେଜୀରେ କହନ୍ତି ‘ପାଇରିକ୍ ଭିକଟ୍ରି’ ।

ଗ୍ରୀକ୍ ସମ୍ରାଟ ଅଲେକଜାଣ୍ଡାରଙ୍କ ନିଧନର ସତର ବର୍ଷ ପରେ ପାଇରସ୍ ଏପିରସ୍ ରାଜ୍ୟର ସିଂହାସନ ଆରୋହଣ କରିଥିଲେ। ସେ ଖ୍ରୀଷ୍ଟ ପୂର୍ବ ୨୮୦ରେ ହେରାକ୍ଲି ଯୁଦ୍ଧରେ ରୋମାନମାନଙ୍କୁ ପରାସ୍ତ କରିଥିଲେ। ଠିକ୍ ବର୍ଷକ ପରେ ତାଙ୍କୁ ପୁନର୍ବାର ଏସ୍କୁଲମ ଯୁଦ୍ଧରେ ରୋମାନମାନଙ୍କ ସହ ଲଢ଼ିବାକୁ ହୋଇଥିଲା। ଏହି ଯୁଦ୍ଧରେ ମଧ୍ୟ ପାଇରସ୍ ବିଜୟୀ ହେଲେ। ବିଜୟ ସତ୍ତ୍ୱେ ଲାଭ ତୁଳନାରେ ତାଙ୍କର ବିପୁଳ କ୍ଷତି ହୋଇଥିଲା। ତାଙ୍କ ସେନାବାହିନୀର ଏତେ ସଂଖ୍ୟକ ସୈନ୍ୟ ଓ ସେନାପତି ପ୍ରାଣ ହରାଇଥିଲେ ଯେ ସେ ବିଷାଦଗ୍ରସ୍ତ ହୋଇପଡ଼ିଥିଲେ। ଐତିହାସିକ ପ୍ଲୁଟାର୍କଙ୍କ ଅନୁଯାୟୀ ଯୁଦ୍ଧରେ ବିଜୟ ଲାଗି ଅଭିନନ୍ଦନ ଜଣାଇଥିବା ଜଣେ ଶୁଭେଚ୍ଛୁଙ୍କୁ ପାଇରସ୍ କହିଥିଲେ, “ଆମେ ରୋମାନଙ୍କ ସହ ଆଉ ଗୋଟିଏ ଯୁଦ୍ଧରେ ବିଜୟୀ ହେଲେ ସମ୍ପୂର୍ଣ୍ଣ ରୂପେ ଛାରଖାର ହୋଇଯିବୁ।“ ବିଜୟ ସତ୍ତ୍ୱେ ବିଜେତା କୌଶଳଗତ ଦୃଷ୍ଟିରୁ ଅପେକ୍ଷାକୃତ ଦୁର୍ବଳ ସ୍ଥିତିରେ ପଡ଼ିଯାଉଥିବାରୁ ଏହି ଧରଣର ପାଇରିକ୍ ବିଜୟକୁ ‘ନୈତିକ’ ବା ‘ପ୍ରତୀକାତ୍ମକ’ ପରାଜୟ ରୂପେ ଗ୍ରହଣ କରାଯାଇଥାଏ । 

୨୦୨୪ ନିର୍ବାଚନ ଫଳାଫଳ ଘୋଷଣା ହେବା ପରେ ଦେଶର ୩୭ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ମଧ୍ୟରୁ ତାମିଲନାଡୁ, ପଞ୍ଜାବ, ମେଘାଳୟ, ମଣିପୁର, ନାଗାଲାଣ୍ଡ, ମିଜୋରାମ, ସିକିମ, ଲଦ୍ଦାଖ, ଚଣ୍ଡିଗଡ଼, ଦାମନ ଦିଉ, ପୁଡୁଚେରି ଓ ଲାକ୍ଷାଦ୍ୱୀପ ଭଳି ୧୨ଟିରେ, ଅର୍ଥାତ୍ ପ୍ରାୟ ଏକ-ତୃତୀୟାଂଶ ରାଜ୍ୟରେ ବିଜେପିର ଆସନ ସଂଖ୍ୟା ‘ଶୂନ୍’। ୨୦୧୯ ଭଳି ଏଥର ବି ଯେଉଁ ୫ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ବିଜେପି ସବୁ ଆସନରେ ବିଜୟ ଲାଭ କରିଛି ସେଗୁଡ଼ିକ ହେଲା ହିମାଚଳ ପ୍ରଦେଶ, ଉତ୍ତରାଖଣ୍ଡ, ଦିଲ୍ଲୀ, ଅରୁଣାଚଳ ପ୍ରଦେଶ ଓ ତ୍ରିପୁରା। ସେହି ତାଲିକାରେ ଏଥର ମଧ୍ୟପ୍ରଦେଶ, ଦାଦ୍ରା ନଗର ହଭେଲି ଓ ଆଣ୍ଡାମାନ ନିକୋବର ଦ୍ୱୀପପୁଞ୍ଜ ଯୋଡ଼ି ହୋଇଥିବା ବେଳେ ଗୁଜରାଟ, ହରିଆଣା ବାଦ୍ ପଡ଼ିଛି। ୨୦୧୯ରେ ଆସନ ଥାଇ ଏଥର ଦଳ ମୂଳପୋଛ ହୋଇଥିବା ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକ ହେଲା ପଞ୍ଜାବ, ମଣିପୁର, ଚଣ୍ଡିଗଡ଼, ଲଦ୍ଦାଖ ଓ ଦାମନ ଦିଉ। ମଧ୍ୟପ୍ରଦେଶ, ଓଡ଼ିଶା, ଆନ୍ଧ୍ରପ୍ରଦେଶ, ତେଲେଙ୍ଗାନା, କେରଳ, ଛତିଶଗଡ଼, ଦାଦ୍ରା ନଗର ହଭେଲି ଓ ଆଣ୍ଡାମାନ ନିକୋବର ଦ୍ୱୀପପୁଞ୍ଜ ପରି ୮ଟି ରାଜ୍ୟରେ ବିଜେପିର ସମୁଦାୟ ୨୪ଟି ଆସନ ବୃଦ୍ଧିପାଇଛି। ଅନ୍ୟପକ୍ଷରେ ଉତ୍ତରପ୍ରଦେଶ, ମହାରାଷ୍ଟ୍ର, ପଶ୍ଚିମବଙ୍ଗ, ବିହାର, କର୍ଣ୍ଣାଟକ, ରାଜସ୍ଥାନ, ଗୁଜରାଟ, ଝାଡ଼ଖଣ୍ଡ, ପଞ୍ଜାବ, ହରିଆଣା, ଚଣ୍ଡିଗଡ଼, ଲଦ୍ଦାଖ, ଦାମନ ଦିଉ, ମଣିପୁର ଭଳି ଅଧିକାଂଶ ବଡ଼ ରାଜ୍ୟ ସମେତ ୧୪ଟି ରାଜ୍ୟରେ ଦଳ ସମୁଦାୟ ୮୭ଟି ଆସନ ହରାଇଛି। ସୁତରାଂ ଓଡ଼ିଶା ଭଳି ରାଜ୍ୟରେ ବିଜେପିର ପ୍ରଦର୍ଶନ ଭଲ ହୋଇ ନ ଥିଲେ ବିଜେପିର ଆସନ ସଂଖ୍ୟା ୨୧୬କୁ ଖସି ଆସିଥାନ୍ତା ଓ ଦଳ ଏନଡିଏ ସହାୟତାରେ ବି ସଂଖ୍ୟାଗରିଷ୍ଠତା ହାସଲ କରିପାରି ନଥାନ୍ତା। ୨୦୧୯ରେ ଦଳ ଜିତିଥିବା ୩୦୩ଟି ଆସନ ମଧ୍ୟରୁ ୨୨୪ଟିରେ ୫୦ ପ୍ରତିଶତରୁ ଅଧିକ ଭୋଟ ହାସଲ କରିଥିବାରୁ ସେହି ଆସନଗୁଡ଼ିକରେ ବିଜୟ ଲାଭ କରିବା ବିରୋଧୀ ଦଳଗୁଡ଼ିକ ପକ୍ଷରେ ଅସମ୍ଭବ ହେବ ବୋଲି କୁହାଯାଉଥିଲା। ଏହି ଆସନଗୁଡ଼ିକରୁ କେତେଗୋଟିରେ ବିଜେପି ପରାଜୟର ସ୍ୱାଦ ଚାଖିଛି ଓ ଏଭଳି ଆସନର ସଂଖ୍ୟା ୧୫୬କୁ ଖସିଆସିଛି। ସ୍ମୃତି ଇରାନୀ, ଅଜୟ ମିଶ୍ର ଟେନି, ଅର୍ଜୁନ ମୁଣ୍ଡା, ରାଜୀବ ଚନ୍ଦ୍ରଶେଖର, ନିଶିଥ ପରମାଣିକଙ୍କ ଭଳି ଶକ୍ତିଶାଳୀ ମନ୍ତ୍ରୀମାନଙ୍କ ସମେତ ୧୪ ଜଣ ମନ୍ତ୍ରୀଙ୍କ ନିର୍ବାଚନରେ ପରାଜୟ ବିଜେପିକୁ ଶକ୍ତ ଆଘାତ ଦେଇଛି। ୨୦୧୯ରେ ସାରାଦେଶରେ ବିଜେପିର ଭୋଟ ହାର ୩୭.୩ ପ୍ରତିଶତ ଥିଲାବେଳେ ଏଥର ତାହା ୩୬.୬ ପ୍ରତିଶତକୁ ଖସିଆସିଛି। ବିଜେପି ସପକ୍ଷରେ ସମୁଦାୟ ମାତ୍ର ୨୩.୫ କୋଟି ମତଦାତା ଭୋଟ୍ ଦେଇଛନ୍ତି। ତେବେ ବିଜେପି ପାଇଁ ଅଧିକ ଚିନ୍ତାଜନକ ହେଉଛି ଦଳକୁ ମିଳିଥିବା ଭୋଟ ହାର ହ୍ରାସ ପାଇ ନିର୍ଦ୍ଦିଷ୍ଟ କେତେକ ରାଜ୍ୟ ଓ ଆସନରେ ଭୋଟ ୫୦ ପ୍ରତିଶତରୁ ଅଧିକ ହୋଇଛି। ଭୋଟ ଏଭଳି କେନ୍ଦ୍ରୀଭୂତ ହୋଇଯାଉଥିବାରୁ ଅନ୍ୟ ଅନେକ ଆସନରେ ତାହା ହ୍ରାସ ପାଇ ଆସନ ଜିତିବାର ସମ୍ଭାବନାକୁ କ୍ଷୀଣ କରିଛି। ଏନଡ଼ିଏର ଅନ୍ୟ ସହଯୋଗୀଙ୍କୁ ମିଳିଥିବା ୫୩ଟି ଆସନ ମଧ୍ୟରୁ ୩୨ଟି ଆସନ ଟିଡିପି, ଜନସେନା, ଜେଡିୟୁ ଓ ଆରଏଲଡ଼ି ପରି ନୂଆ ସହଯୋଗୀଙ୍କୁ ମିଳିଛି। ଅର୍ଥାତ୍ ଅଧିକାଂଶ ପୁରୁଣା ସହଯୋଗୀ ପରାଜିତ ହୋଇଥିବାରୁ ସେମାନଙ୍କ ଆସନ ସଂଖ୍ୟା ହ୍ରାସପାଇଛି ବା କେତେକ ଆଦୌ ଆସନ ପାଇନାହାନ୍ତି। 

ଜାନୁଆରି ୨୦୨୪ରେ ଅଯୋଧ୍ୟାରେ ରାମମନ୍ଦିର ପ୍ରତିଷ୍ଠାକୁ ନେଇ ଦେଶବ୍ୟାପି ଯେଉଁ ଉନ୍ମାଦନା ଦେଖା ଦେଇଥିଲା ସେଥିରୁ ମନେ କରାଯାଉଥିଲା ଯେ ଏଥର ବୋଧହୁଏ ରାମମନ୍ଦିର ପ୍ରସଙ୍ଗ ଜନମାନସକୁ ଆଚ୍ଛାଦିତ କରି ନିର୍ବାଚନରେ ବିଜେପିକୁ ଲାଭ ଦେବ । ସେଥିପାଇଁ ନିର୍ବାଚନ ପ୍ରଚାରରେ ‘ଯିଏ ରାମଙ୍କୁ ଆଣିଛନ୍ତି ଆମେ ତାଙ୍କୁ ଆଣିବୁ’ (ଯୋ ରାମକୋ ଲାଏହୈଁ ହମ ଉନକୋ ଲାଏଙ୍ଗେ) ଭଳି ସ୍ଳୋଗାନମାନ ଦିଆଯାଇ ଜନମତକୁ ପ୍ରଭାବିତ କରିବାର ପ୍ରୟାସ ହୋଇଥିଲା। ନିର୍ବାଚନରେ ରାମମନ୍ଦିର ପ୍ରସଙ୍ଗ ଶାସକ ଦଳକୁ ସେଭଳି ଲାଭ ନ ପହଞ୍ଚାଇବା ପଦ୍ମ ଶିବିରରେ ନିରାଶାର କାରଣ ହୋଇଛି। କାଁ ଭାଁ ଏହାର ପ୍ରଭାବ ପଡ଼ିଥିଲେ ବି ଉତ୍ତର ପ୍ରଦେଶରେ ଦଳ ବିପର୍ଯ୍ୟୟର ସମ୍ମୁଖୀନ ହେବାରୁ ସ୍ପଷ୍ଟ ହୋଇଛି ଯେ ରାମମନ୍ଦିର ପ୍ରସଙ୍ଗ ଦଳ ପାଇଁ ଉପଯୋଗୀ ସାବ୍ୟସ୍ତ ହୋଇନାହିଁ । ଏପରିକି ଅଯୋଧ୍ୟା ମନ୍ଦିର ଥିବା ଫୈଜାବାଦ ଆସନରୁ ବିଜେପିର ଦୁଇ ଥର ସାଂସଦ ଥିବା ଲଲ୍ଲୁ ସିଂହଙ୍କର ପରାଜୟ। ଅଯୋଧ୍ୟାରେ ହଜାର ହଜାର ଘର, ଦୋକାନ, ମନ୍ଦିର, ଧର୍ମଶାଳାକୁ ଭାଙ୍ଗି ନିର୍ମାଣ କରାଯାଇଥିବା ତେର କିଲୋମିଟର ସୁଦୀର୍ଘ ‘ରାମପଥ’ ଲାଗି କ୍ଷତିଗ୍ରସ୍ତମାନଙ୍କୁ ଉଚିତ ରୂପେ ଥଇଥାନ କରା ନ ଯିବା ଓ କ୍ଷତିପୂରଣ ଦିଆ ନ ଯିବା ସେଠାରେ ଜନିତ ଅସନ୍ତୋଷ ହେଉଛି ହାରିବାର ଏକ ବଡ଼ କାରଣ । ଉଲ୍ଲେଖଯୋଗ୍ୟ ଯେ ଏକ ଆରକ୍ଷିତ ଆସନ ହୋଇ ନଥିଲେ ସୁଦ୍ଧା ଜଣେ ଦଳିତଙ୍କୁ ପ୍ରାର୍ଥୀ କରି ସମାଜବାଦୀ ପାର୍ଟି ଭିନ୍ନ ସନ୍ଦେଶଟିଏ ଦେଇଥିଲା, ଯାହାଙ୍କୁ ଜିତାଇ ଭୋଟରମାନେ ମଧ୍ୟ ସନ୍ଦେଶଟିଏ ଦେଲେ ଯେ  ସାଧାରଣ ଜୀବନରେ ଧର୍ମ ନୁହେଁ ମୌଳିକ ସମସ୍ୟାଗୁଡ଼ିକର ସମାଧାନ ଅଧିକ ଗୁରୁତ୍ୱପୂର୍ଣ୍ଣ । ହିନ୍ଦୁତ୍ୱର ଗଡ଼ କୁହାଯାଉଥିବା ଅଯୋଧ୍ୟା ଅଞ୍ଚଳରେ ଥିବା ୯ଟି ଆସନ ମଧ୍ୟରୁ ୨୦୧୯ରେ ବିଜେପି ୭ଟିରେ ବିଜୟୀ ହୋଇଥିଲା । ଏଥର ଫୈଜାବାଦ, ସୁଲତାନପୁର, ବସ୍ତି, ଆମ୍ୱେଦକର ନଗର ଓ ଶ୍ରାବସ୍ତୀ ଭଳି ୫ଟି ଆସନରେରେ ପରାଜିତ ହୋଇଛି। ଏହି ସନ୍ଦର୍ଭରେ ଅଧିକ ଗୁରୁତ୍ୱପୂର୍ଣ୍ଣ ହେଉଛି ଶ୍ରାବସ୍ତୀ ଆସନରୁ ଲଢ଼ିଥିବା ସକେତ ମିଶ୍ରଙ୍କ ପରାଜୟ, ଯିଏ କି ରାମ ମନ୍ଦିର ନିର୍ମାଣ କମିଟିର ଅଧ୍ୟକ୍ଷ ନ୍ରିପେନ୍ଦ୍ର ମିଶ୍ରଙ୍କ ପୁଅ। ସେହିପରି ଦୀର୍ଘ ସମୟ ଧରି ବିଜେପି ଦଖଲରେ ରହି ଆସିଥିବା ରାମଙ୍କର ତପୋଭୂମି ଭାବେ ଖ୍ୟାତ ଚିତ୍ରକୁଟର ବାନ୍ଦା ଲୋକସଭା ଆସନଟି ମଧ୍ୟ ଦଳ ହାରିଯାଇଛି। ତେଣୁ ପ୍ରମାଣିତ ହୋଇଛି ଯେ କେବଳ ମନ୍ଦିର କଥା କହି ବା ହିନ୍ଦୁ ଧର୍ମ ପ୍ରତି ବିପଦ ଅଛି ବୋଲି ବିଭ୍ରାନ୍ତି ସୃଷ୍ଟି କରି ଭୋଟ ହାତେଇବା ସହଜ ନୁହେଁ। ଧର୍ମ ବ୍ୟକ୍ତିର ଆସ୍ଥାର ବିଷୟ । ତାକୁ ନିର୍ବାଚନୀ ଫାଇଦା ହାସଲ ଉଦ୍ଦେଶ୍ୟରେ ବ୍ୟବହାର କରିବାକୁ ଲୋକେ ପସନ୍ଦ କରନ୍ତି ନାହିଁ ଓ ସେଥିପାଇଁ ଭଗବାନ ବି ଦଣ୍ଡିତ କରିବାକୁ ପଛାନ୍ତି ନାହିଁ ବୋଲି ଏବେ ଚର୍ଚ୍ଚା ହେଉଛି। ଓଡ଼ିଶାରେ ବି ଜଗନ୍ନାଥ ମନ୍ଦିରଠାରୁ ଆରମ୍ଭ କରି ବିଭିନ୍ନ ମନ୍ଦିର ଓ ଧର୍ମସ୍ଥଳର ଉନ୍ନତିକରଣରେ ଉଦବୁଦ୍ଧ ବିଜେଡ଼ି ଦଳ ମଧ୍ୟ ନିର୍ବାଚନରେ ପରାଜିତ ହୋଇଛି। 

ଏଇ ନିର୍ବାଚନରେ ମୋଦୀଙ୍କ ଲୋକପ୍ରିୟତା ଯଥେଷ୍ଟ ହ୍ରାସ ପାଇଥିବାର ପରିଲକ୍ଷିତ ହୋଇଛି। ନିର୍ବାଚନ ପୂର୍ବରୁ ଥିବା ‘ଆଏଗା ତୋ ମୋଦି ହି’ର ଆତ୍ମବିଶ୍ୱାସ ଆଉ ଦେଖିବାକୁ ମିଳୁନି। ଅନେକ ଆସନରେ ନିର୍ବାଚନ ସ୍ଥାନୀୟ ଭିତ୍ତିରେ ଲଢ଼ା ଯାଇଥିଲା ଓ ସେଠାରେ ‘ମୋଦୀ ମେଜିକ୍’ କାମ କଲାନାହିଁ। ଅଧିକନ୍ତୁ ଯେଉଁ ୧୬୪ଟି ନିର୍ବାଚନୀ ସଭାରେ ମୋଦୀ ଭାଷଣ ଦେଇଥିଲେ ତନ୍ମଧ୍ୟରୁ ୭୭ଟିରେ ଦଳୀୟ ପ୍ରାର୍ଥୀ ପରାଜିତ ହୋଇଛନ୍ତି। ଅର୍ଥାତ୍ ସଫଳତା ହାର ମାତ୍ର ୫୩ ପ୍ରତିଶତ, ଯାହା ୨୦୧୯ରେ ୮୫ ପ୍ରତିଶତ ଥିଲା। ବାରାଣାସୀ ଆସନରେ ତୃତୀୟ ଥର ପାଇଁ ଲଢ଼ିଥିବା ସ୍ୱୟଂ ମୋଦୀଙ୍କ ବିଜୟ ବ୍ୟବଧାନ ୨୦୧୯ର ୪.୭୯ଲକ୍ଷରୁ ମାତ୍ର ୧.୫୨ ଲକ୍ଷକୁ ଖସିଆସିବା ତାଙ୍କ ନିମ୍ନଗାମୀ ଲୋକପ୍ରିୟତାକୁ ଇଙ୍ଗିତ କରୁଛି। ସୁତରାଂ ଏହା ନିଶ୍ଚିତ ଯେ ‘ବ୍ରାଣ୍ଡ ମୋଦୀ’ର ପୁନରୁତ୍ଥାନ ଅବା ନୂତନ ବ୍ରାଣ୍ଡର ଅଭ୍ୟୁଦୟ ନ ହେଲେ ତାହା ଦଳ ପାଇଁ ଚିନ୍ତାଜନକ ହୋଇପାରେ।               

ନିର୍ବାଚନ ପୂର୍ବରୁ ପ୍ରତିଟି ଭାଷଣରେ ‘ମୁଁ’ ଓ ‘ମୋଦୀ’ ଶବ୍ଦ ଦ୍ୱୟର ମାତ୍ରାଧିକ ପ୍ରୟୋଗ କରି ଆସିଥିବା ମୋଦୀ ଫଳାଫଳ ଘୋଷଣା ପରେ ‘ଆମେ’ ଓ ‘ଏନଡିଏ’ ଶବ୍ଦ ଦ୍ୱୟର ବହୁଳ ବ୍ୟବହାର କରୁଛନ୍ତି। ଏହା ପରିବର୍ତ୍ତିତ ରାଜନୈତିକ ବାସ୍ତବତାକୁ ସୂଚାଉଛି । ଏକକ ନାୟକତ୍ୱରେ ବିଶ୍ୱାସୀ ମୋଦୀଙ୍କୁ ଏଣିକି ଟିଡିପି, ଜେଡିୟୁ ଓ ଆନ୍ୟାନ୍ୟ କ୍ଷୁଦ୍ର ଦଳ ଉପରେ ଅବଲମ୍ୱନ କରି ଚାଲିବାକୁ ହେବ। ସରକାର ଚଳାଇବାର ବାଧ୍ୟବାଧକତାରେ ଧୀରେ ଧୀରେ ହୁଏତ ତାହା ଶିଖି ହେଇଯିବ, ତଥାପି ପ୍ରଭାବ ଦୁର୍ଦମନୀୟ ହେବ ନାହିଁ । ସରକାରର ସ୍ଥାୟୀତ୍ୱ ନେଇ ମନରେ ବାରମ୍ୱାର ‘ଯଦି’ ଓ ‘କିନ୍ତୁ’ ଉଙ୍କି ମାରୁଥିବ । ସରକାର ଶକ୍ତିଶାଳୀ ବିରୋଧୀଙ୍କ ସମ୍ମୁଖୀନ ହେବା ଅବଶ୍ୟମ୍ଭାବୀ । ହୁତୁ ହୁତୁ ହୋଇ ଜଳୁଥିବା ଅଗ୍ନିର ବି ନିର୍ବାପିତ ହେବାର ଭୟ ଥାଏ, ଯଦି ନିକଟରେ ଛଳଛଳ ହେଉଥିବା ଜଳାଶୟଟିଏ ଥାଏ। ସେମିତି ଜଳାଶୟ ସଦୃଶ ଏକ ଶକ୍ତିଶାଳୀ ବିରୋଧୀ ଦଳ ସରକାରଙ୍କୁ ମନୋମୁଖୀ କାର୍ଯ୍ୟ କରିବାରୁ କ୍ଷାନ୍ତ କରି ଲୋକଙ୍କ ସ୍ୱାର୍ଥକୁ ସୁରକ୍ଷିତ ରଖିଥାଏ । ଫଳାଫଳରୁ ସ୍ପଷ୍ଟ ଯେ ଏଥର ମତଦାତାମାନେ ଏକ ଶକ୍ତିଶାଳୀ ବିରୋଧୀ ଓ ଉତ୍ତରଦାୟୀ ସରକାରଙ୍କ ସପକ୍ଷରେ ମତଦାନ କରିଛନ୍ତି। ଗତ ୧୦ ବର୍ଷ ଧରି ଗୋଟିଏ ଦଳ ନିକଟରେ ଥିବା ନିରଙ୍କୁଶ ସଂଖ୍ୟାଗରିଷ୍ଠତା ଯୋଗୁ ନୀତି ନିର୍ଦ୍ଧାରଣ ଓ ନିଷ୍ପତ୍ତି ଗ୍ରହଣ ବେଳେ କେବଳ ‘ଜାତୀୟ ସ୍ୱାର୍ଥ’ ସମ୍ୱଳିତ ପ୍ରସଙ୍ଗ ପ୍ରାଧାନ୍ୟ ପାଉଥିଲା। ଫଳରେ ଆଞ୍ଚଳିକ ଆକାଂକ୍ଷାକୁ ସେତେ ଅଧିକ ଗୁରୁତ୍ୱ ମିଳୁ ନଥିଲା । ଏଥର ଏନଡ଼ିଏର ପ୍ରମୁଖ ଅଂଶୀଦାର ଦ୍ୱୟ ଆଞ୍ଚଳିକ ଦଳ ହୋଇଥିବାରୁ ଏଣିକି ଉଭୟ ଜାତୀୟ ସ୍ୱାର୍ଥ ଓ ଆଞ୍ଚଳିକ ଆକାଂକ୍ଷା ମଧ୍ୟରେ ସନ୍ତୁଳନ ରକ୍ଷା ଦିଗରେ ପ୍ରୟାସ ହେବ । ଜାତୀୟ ସ୍ତରରେ ସରକାର ଗଠନ ପାଇଁ ନିର୍ବାଚନ ହେଉଥିଲେ ବି ରାଜ୍ୟଭିତ୍ତିରେ ଲଢ଼ା ଯାଇଥିବା ଏହି ନିର୍ବାଚନର ଫଳାଫଳ କୌଣସି ଦଳ ବା ମେଣ୍ଟ ସପକ୍ଷରେ ଏକତରଫା ହୋଇନାହିଁ। ଏଥିରୁ ସ୍ପଷ୍ଟ ଯେ ଶକ୍ତିଶାଳୀ କେନ୍ଦ୍ର ଓ ଦୁର୍ବଳ ରାଜ୍ୟର ଅବଧାରଣାକୁ ଲୋକେ ପ୍ରତ୍ୟାଖ୍ୟାନ କରିଛନ୍ତି । ଏହା ସଂଘୀୟ ବ୍ୟବସ୍ଥାକୁ ସୁଦୃଢ଼ କରିବ । ଦେଶର ବିବିଧତାକୁ ଅଣଦେଖା କରି ଦେଶସାରା ସବୁ କିଛି ‘ଏକ’ ବା ‘ଗୋଟିଏ’ ପ୍ରକାରେ ହେଉ ବୋଲି ଯେଉଁ ଉଦ୍ୟମ ହୋଇ ଆସୁଥିଲା, ଏଥର ତହିଁରେ ବିରାମ ଲାଗିବ ।

Published in Sambad on June 11, 2024