‘ଜୁଡ଼େଗା ଭାରତ ଜିତେଗା ଇଣ୍ଡିଆ’ ସ୍ଳୋଗାନ ସହ ସେପ୍ଟେମ୍ୱର ୧, ୨୦୨୩ରେ ମୁମ୍ୱଇଠାରେ ସମାପ୍ତ ହୋଇଥିବା ‘ଇଣ୍ଡିଆ’ (ଇଣ୍ଡିଆନ ନେସନାଲ ଡେଭଲପମେଣ୍ଟାଲ ଇନକ୍ଲୁସିଭ ଆଲାଏନ୍ସ) ମେଣ୍ଟର ତୃତୀୟ ବୈଠକ ସମାପ୍ତ ହୋଇଛି । ଏଥିରୁ ଇଙ୍ଗିତ ମିଳିଛି ଯେ ଏହି ମେଣ୍ଟ ଆସନ୍ତା ସାଧାରଣ ନିର୍ବାଚନକୁ ଅତି ଗମ୍ଭୀରତାର ସହିତ ବିଚାର କରୁଛି । ହଠାତ୍ ସେପ୍ଟେମ୍ୱର ୧୮ରୁ ୨୨ ପର୍ଯ୍ୟନ୍ତ ସଂସଦର ବିଶେଷ ଅଧିବେଶନ ଡକାଇ ଓ ‘ଏକ ଦେଶ ଏକ ନିର୍ବାଚନ’ ପ୍ରସଙ୍ଗକୁ ବିମର୍ଶ ଭିତରକୁ ଆଣିବା ପାଇଁ ଏକ ଉଚ୍ଚ ସ୍ତରୀୟ କମିଟି ଗଠନ କରି ସରକାର ବିରୋଧୀ ଦଳଗୁଡ଼ିକର ନିର୍ବାଚନୀ ପ୍ରସ୍ତୁତିକୁ ଲାଇନଚ୍ୟୁତ କରିବାକୁ ପ୍ରଚେଷ୍ଟା କରିଥିବା ବେଳେ ‘ଇଣ୍ଡିଆ’ ମଧ୍ୟ ଦିଲ୍ଲୀର ରାଜଘାଟଠାରୁ ଅକ୍ଟୋବର ୨ରୁ ନିର୍ବାଚନ ପ୍ରଚାର ଶୁଭାରମ୍ଭ କରିବା ଲାଗି ସଜବାଜ ହେଉଥିବାର ଜଣା ପଡ଼ିବା ପରେ ସେମାନଙ୍କ ସୁପରିକଳ୍ପିତ ନିର୍ବାଚନୀ ପ୍ରସ୍ତୁତିର ଆଭାସ ମିଳିଲାଣି ।
ଏନଡ଼ିଏ ବିରୋଧରେ ବିରୋଧୀ ଦଳଗୁଡିକ ଏକଜୁଟ ହୋଇ ମୁକାବିଲା କରିବା ଲାଗି ଅନେକ ଦିନରୁ ବିଚାର ବିମର୍ଶ କରିଆସୁଥିଲେ, ଯାହାର ଫଳଶ୍ରୁତି ହେଉଛି ‘ଇଣ୍ଡିଆ’ । ବର୍ତ୍ତମାନ ଏହି ମେଣ୍ଟର ସଦସ୍ୟ ଦଳ ସଂଖ୍ୟା ୨୮, ଯହିଁରେ ପ୍ରମୁଖ ହେଲେ କଂଗ୍ରେସ, ଡିଏମକେ, ଟିଏମସି, ଜେଡିୟୁ, ଏନସିପି, ସମାଜବାଦୀ ପାର୍ଟି, ଆରଜେଡି, ଉଦ୍ଧବ ଠାକରେଙ୍କ ଶିବସେନା, ଜେକେଏନଏଫ, ପିଡିପି, ସିପିଆଇ, ସିପିଏମ, ଆପ୍, ଆରଏସପି, ଫରୱାର୍ଡ ବ୍ଲକ, ଜେଏମଏମ, ରାଷ୍ଟ୍ରୀୟ ଲୋକ ଦଳ । ଆଗାମୀ ଦିନରେ ଆସାମ ସମେତ ଅନ୍ୟ କେତେକ ରାଜ୍ୟର କିଛି ଆଞ୍ଚଳିକ ଦଳ ମଧ୍ୟ ଏହି ମେଣ୍ଟରେ ଯୋଗ ଦେବାର ସମ୍ଭାବନା ରହିଛି । ନିର୍ବାଚନ ବେଳେ ପ୍ରତିଟି ଆସନରେ ବିଜେପି ଓ ଏନଡ଼ିଏର ପ୍ରାର୍ଥୀଙ୍କ ବିରୁଦ୍ଧରେ ଜଣେ ମାତ୍ର ପ୍ରାର୍ଥୀ ଠିଆ କରାଇପାରିଲେ ‘ଏନଡିଏ’ ମେଣ୍ଟକୁ ହରାଇବା ସମ୍ଭବ ବୋଲି ‘ଇଣ୍ଡିଆ’ ପକ୍ଷର ଦୃଢ଼ ବିଶ୍ୱାସ । ଏଭଳି ବିଶ୍ୱାସର ମୂଳ କାରଣ ହେଉଛି ୨୦୧୯ ସାଧାରଣ ନିର୍ବାଚନରେ ୪୫ ପ୍ରତିଶତ ଭୋଟ ପାଇ ଏନଡ଼ିଏ ମେଣ୍ଟ ୩୫୩ଟି ଆସନ ଦଖଲ କରିଥିଲା ଏବଂ ମାତ୍ର ୩୭.୩୬ ପ୍ରତିଶତ ଭୋଟ ପାଇ ବିଜେପି ଜିଣିଥିଲା ୩୦୩ଟି ଆସନ । ଏହାର ଅର୍ଥ ବିରୋଧୀ ଦଳଙ୍କ ମିଳିତ ଭୋଟ ଭାଗ ଏନଡିଏଠାରୁ ଅଧିକ ହୋଇଥିବା ସତ୍ତ୍ୱେ ତାହା ବିଭାଜିତ ହୋଇଯାଇଥିବାରୁ ଏନଡ଼ିଏ କ୍ଷମତା ଦଖଲ କରିପାରିଥିଲା । ଏବେ ତ ସେତେବେଳେ ଏନଡ଼ିଏରେ ପ୍ରମୁଖ ଅଂଶୀଦାର ଥିବା ଜେଡିୟୁ, ଶିବସେନାର ଏକ ଅଂଶ ଓ ଶିରୋମଣି ଅକାଳୀ ଦଳ ମେଣ୍ଟ ବାହାରେ ଥିବାରୁ ଏନଡିଏ ଅପେକ୍ଷାକୃତ ଦୁର୍ବଳ ହୋଇଯାଇଛି ବୋଲି ଏକ ଧାରଣା ହୋଇଛି । ତେବେ ‘ଇଣ୍ଡିଆ’ ଆଗରେ ସବୁଠୁ ବଡ଼ ଆହ୍ୱାନ ହେଉଛି ପ୍ରତିଟି ଆସନରେ ସଫଳ ବୁଝାମଣା ସମ୍ଭବ କରାଇ ଜଣେ ଲେଖାଏଁ ପ୍ରାର୍ଥୀଙ୍କୁ ଛିଡ଼ା କରିବା । ନୀତିଗତ ଭାବେ ଏହା ସବୁ ଦଳ ପାଇଁ ଗ୍ରହଣୀୟ ହୋଇଥିଲେ ହେଁ କେତେକ ରାଜ୍ୟରେ ଏହାକୁ କାର୍ୟ୍ୟକାରୀ କଲା ବେଳେ ଦଳୀୟ ସ୍ୱାର୍ଥ ଏକ ସମସ୍ୟା ରୂପେ ଛିଡ଼ା ହୋଇପାରେ । ଲୋକସଭାର ୫୪୩ଟି ଆସନରୁ ୧୮୬ଟି ଆସନ ବା ପ୍ରାୟ ଏକ ତୃତୀୟାଂଶ ଆସନରେ ବିଜେପି ଓ କଂଗ୍ରେସ ମଧ୍ୟରେ ସିଧାସଳଖ ପ୍ରତିଦ୍ୱନ୍ଦ୍ୱିତା ହେଉଥିଲା । ସେଠାରେ ଆସନ ବୁଝାମଣାର ଆବଶ୍ୟକତା ଦେଖା ଦେଇନପାରେ । ଏହି ଆସନଗୁଡ଼ିକ ମୁଖ୍ୟତଃ ଗୁଜରାଟ, ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼, ହିମାଚଳ ପ୍ରଦେଶ, ଉତ୍ତରାଖଣ୍ଡ, ଆସାମ ରାଜ୍ୟର । ତେବେ, ‘ଆପ୍’ ଶାସନାଧୀନ ଦିଲ୍ଲୀ ଓ ପଞ୍ଜାବ ରାଜ୍ୟରେ ଥିବା ସମୁଦାୟ ୨୦ଟି ଲୋକସଭା ଆସନର ଆବଣ୍ଟନ ବେଳେ ‘ଆପ୍’ ଓ କଂଗ୍ରେସ ମଧ୍ୟରେ ବିବାଦ ଉପୁଜିବାର ସମ୍ଭାବନା ଅଛି । ସେହିପରି ତୃଣମୂଳ କଂଗ୍ରେସ, କଂଗ୍ରେସ ଓ ବାମଦଳଗୁଡ଼ିକ ପଶ୍ଚିମବଙ୍ଗରେ ପରସ୍ପରର ପ୍ରତିଦ୍ୱନ୍ଦ୍ୱୀ ହୋଇଥିବାରୁ ସେଠାରେ ବି ଆସନ ବୁଝାମଣା ସହଜ ହୋଇନପାରେ । ତେବେ ମେଣ୍ଟର ସଂଯୋଜକମାନେ ଏହି ସମସ୍ୟାର ସମାଧାନ ଲାଗି ଚତୁରତା ପ୍ରଦର୍ଶନ କରିବେ ବୋଲି ଆଶା କରାଯାଏ ।
ଜୁନ ୨୩ରେ ପାଟଣାଠାରେ ଆୟୋଜିତ ବିରୋଧୀ ଦଳଗୁଡ଼ିକର ପ୍ରଥମ ବୈଠକରେ ମାତ୍ର ୧୫ଟି ଦଳ ଯୋଗ ଦେଇଥିବା ବେଳେ ଜୁଲାଇ ୧୮ରେ ବାଙ୍ଗାଲୋରଠାରେ ଆୟୋଜିତ ଦ୍ୱିତୀୟ ବୈଠକରେ ସେହି ସଂଖ୍ୟା ୨୬ରେ ପହଞ୍ଚିଥିଲା । ବିରୋଧୀ ମେଣ୍ଟର ଏଭଳି ଶକ୍ତିବୃଦ୍ଧି ପ୍ରତିପକ୍ଷକୁ ବିଚଳିତ କରିବା ସ୍ୱାଭାବିକ । ଫଳରେ ମାତ୍ର ଅଳ୍ପ ଦିନ ତଳେ ରାଜ୍ୟସଭାରେ ‘ଏକ ଅକେଲା କିତନୋ ପର ଭାରି’ (ଏକୁଟିଆ କିନ୍ତୁ ଅନେକଙ୍କ ଉପରେ ଓଜନିଆ) ଭଳି ଏକକ ସାମର୍ଥ୍ୟର ଦମ୍ଭୋକ୍ତି କରିଥିବା ପ୍ରଧାନମନ୍ତ୍ରୀ ମୋଦି ଓ ବିଜେପି ଦଳକୁ ଏନଡିଏର ଅନ୍ୟ ଅଂଶୀଦାର ଦଳଗୁଡ଼ିକଙ୍କ କଥା ହଠାତ୍ ସ୍ମରଣ କରିବାକୁ ହେଲା । ଜୁଲାଇ ୧୮ରେ ଦିଲ୍ଲୀଠାରେ ଏନଡିଏ ଅଂଶୀଦାର ଦଳଗୁଡ଼ିକର ଏକ ବୈଠକ ଡକାଯାଇଥିଲା, ଯାହା ଦୀର୍ଘ ଦିନ ଧରି ହୋଇନଥିଲା ।
ବର୍ତ୍ତମାନ ଲୋକସଭାରେ ‘ଏନଡିଏ’ର ୩୩୨ ଜଣ ସାଂସଦଙ୍କ ମଧ୍ୟରୁ ୩୦୧ ଜଣ କେବଳ ବିଜେପିର । ଏହି ମେଣ୍ଟରେ ଆଉ ୩୭ଟି ଦଳ ସାମିଲ ହୋଇଥିଲେ ବି ମହାରାଷ୍ଟ୍ରରେ ସିନ୍ଦେଙ୍କ ଶିବସେନାର ୧୩ ଜଣ ସାଂସଦ ଓ ବିହାରର ଲୋକଜନ ଶକ୍ତି ପାର୍ଟି (ଉଭୟ ଗୋଷ୍ଠୀକୁ ମିଶାଇ)ର ୬ ଜଣ ସାଂସଦଙ୍କୁ ବାଦ ଦେଲେ ଆଉ ୬ଟି ଦଳର ଜଣେ, ଦୁଇଜଣ ଲେଖାଏଁ ସାଂସଦ ଏବଂ ୨୮ଟି ଅଂଶୀଦାର ଦଳର କୌଣସି ସାଂସଦ ନାହାନ୍ତି । ଏହି ମେଣ୍ଟର କେତେକ ଦଳର ନା ରାଜ୍ୟ ସ୍ତରରେ ନା ଦେଶ ସ୍ତରରେ ବିଶେଷ ଉପସ୍ଥିତି ଅଛି । ଦେଖିବାକୁ ମିଳେ ଯେ କେନ୍ଦ୍ରରୁ ଆର୍ଥିକ ସାହାଯ୍ୟ ପାଇବା ପାଇଁ ଉତ୍ତର-ପୂର୍ବୀୟ ଭରତର ଦଳଗୁଡ଼ିକ କେନ୍ଦ୍ରରେ ଶାସନରେ ଥିବା ଦଳସହିତ ଯୋଡ଼ି ହୋଇ ରହିବାକୁ ପସନ୍ଦ କରନ୍ତି । ତେଣୁ କ୍ଷମତା ପରିବର୍ତ୍ତନ ସହ ସେଗୁଡ଼ିକୁ ମେଣ୍ଟ ବଦଳାଇବାକୁ ସମୟ ନିଅନ୍ତି ନାହିଁ । ତାହା ମଧ୍ୟ ଏନଡିଏ ଲାଗି ଏକ ଚିନ୍ତାର ବିଷୟ ହେବା କଥା ।
ଏ ପର୍ୟ୍ୟନ୍ତ ବହୁଜନ ସମାଜ ପାର୍ଟି, ବିଜେଡି, ବିଆରଏସ, ୱାଇଏସଆର କଂଗ୍ରେସ, ତେଲୁଗୁ ଦେଶମ ପାର୍ଟି, ଜେଡିଏସ, ଶିରୋମଣି ଅକାଳୀ ଦଳ, ଆଇଏନଏଲଡି, ଏଆଇଏମଆଇଏମ, ଏଆଇୟୁଡିଏଫ ପ୍ରମୁଖ ଦଳଗୁଡ଼ିକ କୌଣସି ମେଣ୍ଟର ଅଂଶୀଦାର ହୋଇନାହାନ୍ତି । ଏଗୁଡ଼ିକ ମଧ୍ୟରୁ ବିଆରଏସ ପରି କେତେକ ଦଳ ବିଜେପିକୁ ପ୍ରକାଶ୍ୟ ବିରୋଧ କରୁଥିବା ବେଳେ ତେଲୁଗୁ ଦେଶମ, ଜେଡିଏସ ପରି କେତେକ ଦଳ ଏନଡ଼ିଏର ନିକଟବର୍ତ୍ତୀ ହେବାକୁ ଚେଷ୍ଟା କରୁଛନ୍ତି । ଅନ୍ୟ ପକ୍ଷରେ ବିଜେଡି, ୱାଏସଆରସିପି ପରି ପ୍ରଭାବଶାଳୀ ଆଞ୍ଚଳିକ ଦଳଗୁଡ଼ିକ ଉଭୟ ମେଣ୍ଟଠାରୁ ସମ ଦୂରତା ରକ୍ଷାର କଥା କହୁଥିଲେ ବି ଆଚରଣରେ ସେଗୁଡ଼ିକ ବିଜେପିର ନିକଟତର ଥିଲା ଭଳି ଜଣାପଡ଼ୁଛନ୍ତି । ଆଗାମୀ ଦିନରେ ଏହି ଦଳଗୁଡ଼ିକର ଭୂମିକା ବେଶ ଗୁରୁତ୍ୱପୂର୍ଣ୍ଣ ହେବ । ଉପରୋକ୍ତ ଦଳଗୁଡ଼ିକ ମଧ୍ୟରୁ ୨୦୧୯ରେ ଓଡ଼ିଶାର ୨୧ଟି ଆସନ, ମଧ୍ୟରୁ ବିଜେଡି ୧୨ଟିରେ ଜିତିଥିଲା ବେଳେ ଆନ୍ଧ୍ରପ୍ରଦେଶରେ ୱାଇଏସଆରସିପି ୨୫ଟି ଆସନରୁ ୨୨ଟିରେ ବିଜୟୀ ହୋଇଥିଲା । ସେହିପରି ତେଲେଙ୍ଗାନାର ଶାସକ ଦଳ ବିଆରଏସ ୧୭ଟି ଆସନ ମଧ୍ୟରୁ ବିଆରଏସ ୯ଟିରେ ଜୟଯୁକ୍ତ ହୋଇଥିଲା । ଏହି ୩ଟି ରାଜ୍ୟରେ ଥିବା ୬୫ଟି ଆସନ ମଧ୍ୟରୁ ଏନଡିଏ ମେଣ୍ଟ ମାତ୍ର ୧୨ଟିରେ ବିଜୟୀ ହୋଇଥିଲା । ଏଣୁ ଏହି ରାଜ୍ୟ ତିନିଟିର ଶାସକ ଦଳଗୁଡ଼ିକ କୌଣସି ମେଣ୍ଟରେ ସାମିଲ ନହେଲେ ସେଠାକାର ୬୫ଟି ଆସନରେ ତ୍ରିମୁଖୀ ପ୍ରତିଦ୍ୱନ୍ଦ୍ୱିତାକୁ ଏଡ଼ାଇ ହେବନାହିଁ ।
ଉତ୍ତର-ପୂର୍ବ ଭାରତ, ଉତ୍ତର ପ୍ରଦେଶ, ଉତ୍ତରାଖଣ୍ଡ ଓ ଗୁଜରାଟରେ ବିଜେପି ଅପେକ୍ଷାକୃତ ଶକ୍ତିଶାଳୀ ଥିବାବେଳେ ଦକ୍ଷିଣ ଭାରତରେ ‘ଏନଡିଏ’ ମେଣ୍ଟର ସ୍ଥିତି ଦୁର୍ବଳ । ଅନ୍ୟପକ୍ଷରେ ବିହାର, ପଶ୍ଚିମବଙ୍ଗ, ପଞ୍ଜାବ, ଦକ୍ଷିଣ ଭାରତର ରାଜ୍ୟଗୁଡ଼ିକରେ ‘ଇଣ୍ଡିଆ’ ଅପେକ୍ଷାକୃତ ଅଧିକ ଶକ୍ତିଶାଳୀ । ଉତ୍ତର-ପୂର୍ବ ଭାରତରେ ‘ଇଣ୍ଡିଆ’ର ସ୍ଥିତି ଦୁର୍ବଳ । ଅବଶ୍ୟ ଆସାମ ସମେତ ସମଗ୍ର ଉତ୍ତର-ପୂର୍ବ ଭାରତରେ ମାତ୍ର ୨୫ଟି ଲୋକସଭା ଆସନ ଅଛି । ଜେଡିୟୁ ଏନଡିଏ ମେଣ୍ଟରୁ ଓହରିଯିବା ପରେ ବିହାରରେ ଏନଡିଏ ମେଣ୍ଟ ଦୁର୍ବଳ ହୋଇଛି । ସେଠାରେ ୨୦୧୯ରେ ଏନଡିଏ ମେଣ୍ଟକୁ ୪୦ଟିରୁ ୩୯ଟି ଆସନ ମିଳିଥିଲା ବେଳେ ବର୍ତ୍ତମାନର ରାଜନୈତିକ ସମୀକରଣରେ ଏନଡିଏ ମେଣ୍ଟକୁ ଯଥେଷ୍ଟ କମ ସଂଖ୍ୟକ ଆସନ ମିଳିବାର ପୂର୍ବାନୁମାନ କରାଯାଉଛି । ସେହିପରି ୪୮ଟି ଲୋକସଭା ଆସନ ବିଶିଷ୍ଟ ମହାରାଷ୍ଟ୍ରରେ ୨୦୧୯ରେ ଏନଡ଼ିଏ ୪୧ଟି ଆସନରେ ବିଜୟୀ ହୋଇଥିଲା । ଅବଶ୍ୟ ସେତେବେଳେ ଶିବସେନା ବିଜେପି ସହ ଏନଡିଏ ମେଣ୍ଟର ଅଂଶ ଥିଲା । କିନ୍ତୁ ଏବେ ସିନ୍ଦେଙ୍କ ଶିବସେନା ଓ ଅଜିତ ପାୱାରଙ୍କ ଏନସିପିର ଗୋଟିଏ ଗୋଷ୍ଠୀ ବିଜେପି ସହ ଥିଲେ ବି ସେଠାରେ ଏନଡିଏ ପୂର୍ବ ପ୍ରଦର୍ଶନକୁ ଦୋହରାଇବାର ସମ୍ଭାବନା କ୍ଷୀଣ । ବିହାର ଓ ମହାରାଷ୍ଟ୍ର ହିଁ ଏନଡ଼ିଏ ପାଇଁ ଚିନ୍ତାର କାରଣ ପାଲଟିଛି, କାରଣ ଏହି ଦୁଇଟି ରାଜ୍ୟରେ ମେଣ୍ଟ ୪୦ରୁ ଅଧିକ ଆସନ ହରାଇବାର ପୂର୍ବାନୁମାନ କରାଗଲାଣି । ତେବେ ମହାରାଷ୍ଟ୍ରରେ ‘ଇଣ୍ଡିଆ’ର ପ୍ରଦର୍ଶନ ନିର୍ଭର କରିବ ଏନସିପିର ମୁଖ୍ୟ ଶରଦ ପାୱାରଙ୍କ ଭବିଷ୍ୟତ କାର୍ୟ୍ୟପନ୍ଥା ଓ ନିଷ୍ପତ୍ତି ଉପରେ । ୨୦୧୯ରେ ଏନଡିଏ ମେଣ୍ଟ ଗୁଜରାଟର ୨୬ଟିରୁ ୨୬ଟି, ମଧ୍ୟପ୍ରଦେଶର ୩୦ଟିରୁ ୨୮ଟି, ଛତିଶଗଡ଼ର ୧୧ଟିରୁ ୯ଟି, ରାଜସ୍ଥାନର ୨୫ଟିରୁ ୨୫ଟି ଓ କର୍ଣ୍ଣାଟକର ୨୮ଟିରୁ ୨୫ଟି ଆସନ ଜିତି ଏକ ତରଫା ବିଜୟ ହାସଲ କରିଥିଲା । ସେହି ପ୍ରଦର୍ଶନ ଦୋହରାଇବା ଏନଡିଏ ପକ୍ଷରେ ସହଜ ହୋଇ ନପାରେ । ଏ ପରିସ୍ଥିତିରେ ଉନ୍ନତ ନିର୍ବାଚନୀ ରଣନୀତି ଓ ପରିଚାଳନା ମାଧ୍ୟମରେ ଏନଡିଏଠାରୁ ୮୦ରୁ ୧୦୦ଟି ଆସନ ଛଡ଼ାଇ ଆଣି ତାକୁ ସହଜରେ ଗାଦିଚ୍ୟୁତ କରି ହେବ ବୋଲି ‘ଇଣ୍ଡିଆ’ର ରଣନୀତିକାରମାନେ ଆଶା ବାନ୍ଧିଛନ୍ତି । କିନ୍ତୁ ଧ୍ୟାନରେ ରଖିବାକୁ ହେବ ଯେ ସମ୍ୱଳ ଓ ସାଂଗଠନିକ ଦକ୍ଷତା ସମୃଦ୍ଧ ବିଜେପି ବର୍ଷ ସାରା ଦିନରାତି ନିର୍ବାଚନୀ ସାଫଲ୍ୟ ଲାଗି କାର୍ୟ୍ୟରତ, ଯାହାକୁ ମାତ୍ ଦେବା ସହଜ ବ୍ୟାପାର ନୁହେଁ ।
ବିରୋଧୀଙ୍କ ମେଣ୍ଟ ଗଠନ କଥା ଉଠିଲା ଦିନୁ ସେହି ଗୋଟିଏ ପ୍ରଶ୍ୱକୁ ଏକ ରଣନୀତିର ଅଂଶ ଭାବେ ବାରମ୍ୱାର ଦୋହରାଯାଉଛି ଯେ ବିରୋଧୀ ମେଣ୍ଟର ନେତା କିଏ ହେବେ ? ରାହୁଳ ଗାନ୍ଧୀ, ନା ମମତା ବାନାର୍ଜୀ, ନା କେଜରିୱାଲ ନା ନୀତିଶ କୁମାର ନା ଶରଦ ପାୱାର ନା ଅନ୍ୟ କେହି ? ଏହା ସାଧାରଣ ଲୋକଙ୍କୁ ଭ୍ରମିତ କରିବା ଲାଗି ଉଦ୍ଦିଷ୍ଟ । ବାସ୍ତବତା ହେଲା ଏଇ ମୁହୂର୍ତ୍ତରେ ମେଣ୍ଟର ନେତାଙ୍କ ନାମ ଘୋଷଣା କରାଯିବା ସମ୍ଭବ ନୁହେଁ, କାରଣ ତାହା ମେଣ୍ଟକୁ ହୁଏତ ଦୁର୍ବଳ କରିବ । ‘ଇଣ୍ଡିଆ’ର ନେତାମାନେ ମଧ୍ୟ ଏହି ପ୍ରଶ୍ନଟିକୁ ଚତୁରତାର ସହ ଏଡ଼ାଇ ଯାଉଛନ୍ତି । କାରଣ ଥରେ ନାମଟିଏ ଘୋଷିତ ହୋଇଗଲେ ଦରବୃଦ୍ଧି, ବେକାରି ସମସ୍ୟା, ଦୁର୍ନୀତି, ଭ୍ରଷ୍ଟାଚାର ଭଳି ମୁଖ୍ୟ ପ୍ରସଙ୍ଗ ଉପରୁ ଧ୍ୟାନ ହଟାଇ କେତେକ ଗଣମାଧ୍ୟମ ଆଲୋଚନାକୁ ମୋଦି ବନାମ ସେହି ନେତାଙ୍କ ଭିତରେ କେନ୍ଦ୍ରିତ କରିବେ । ଭାରତର ସଂସଦୀୟ ବ୍ୟବସ୍ଥା ଅନୁସାରେ ନିର୍ବାଚିତ ପ୍ରତିନିଧି ସେମାନଙ୍କ ନେତାଙ୍କୁ ପ୍ରଧାନମନ୍ତ୍ରୀ ଭାବେ ବାଛିବେ । ଏଭଳି ଉଦ୍ୟମ ଆମେରିକାର ରାଷ୍ଟ୍ରପତି ନିର୍ବାଚନର ଅନୁସରଣ ମାତ୍ର, ଯାହା ଆମ ସଂସଦୀୟ ବ୍ୟବସ୍ଥା ପ୍ରତି ଲାଗୁ ହେବାର କୌଣସି କାରଣ ନାହିଁ । ଅତୀତରେ ୨୦୦୪ ପର୍ଯ୍ୟନ୍ତ ଶାସନ କ୍ଷମତାରେ ଥିବା ମେଣ୍ଟ ଦଳଗୁଡ଼ିକ ନିର୍ବାଚନ ପୂର୍ବରୁ ନେତାଙ୍କ ନାମ ଘୋଷଣା କରି ନ ଥିଲେ । ନିର୍ବାଚନ ପରେ ନେତା ନିର୍ବାଚିତ ହୋଇଥିଲେ ।
୨୦୧୯ ନିର୍ବାଚନ ପୂର୍ବରୁ ମଧ୍ୟ ବିରୋଧୀ ଦଳଗୁଡ଼ିକ ଏକଜୁଟ ହେବାର ଏକ ଅଧପନ୍ତରିଆ ପ୍ରୟାସ କରି ଅସଫଳ ହୋଇଥିଲେ । ମାତ୍ର ଏଥରର ପ୍ରୟାସ ଅଧିକ ବ୍ୟବସ୍ଥିତ ଓ ସୁପରିକଳ୍ପିତ ପରି ମନେ ହେଉଛି । ତେବେ ମେଣ୍ଟର ବୃହତ୍ତର ସ୍ୱାର୍ଥ ସଫଳତା ନିର୍ଭର କରିବ ମେଣ୍ଟର ବୃହତ୍ତର ସ୍ୱାର୍ଥକୁ ଦୃଷ୍ଟିରେ ରଖି ଅଂଶୀଦାର ଦଳଗୁଡ଼ିକ ଯଦି କାର୍ଯ୍ୟ କରନ୍ତି ତେବେ ‘ଇଣ୍ଡିଆ’ର ପ୍ରଦର୍ଶନ ଭଲ ହେବ ବୋଲି ଆଶା କରାଯାଇପାରେ ।
Comments
Post a Comment