ମୋ’ ସୌନ୍ଦର୍ଯ୍ୟ ତୁମ ବୁଦ୍ଧିମତ୍ତା

କୁହାଯାଏ ତିନି ତୁଣ୍ଡରେ ଛେଳି କୁକୁର l ଅର୍ଥାତ୍ ବହୁ ଲୋକଙ୍କ ମୁହଁରୁ ସତ କଥାଟିକୁ ମିଛ ଭଳି ବାରମ୍ଵାର ପରିବେଷଣ କରାଗଲେ କ୍ରମଶଃ ପ୍ରଚାରିତ ମିଛଟି ସତ ଭଳି ଜଣା ପଡିଥାଏ l ସତଟି ମିଛ ହୋଇଯାଏ ଓ ଭଲଟି ଖରାପ ପାଲଟିଯାଏ l ଏହିଭଳି କିଛି ନ୍ୟସ୍ତ ସ୍ଵାର୍ଥ ଗୋଷ୍ଠୀ ଜଣକର ସମ୍ମାନ ହାନି ବା ଭାବମୂର୍ତ୍ତିକୁ କ୍ଷୁଣ୍ଣ କରିବାରେ ସକ୍ଷମ ହୋଇଥାନ୍ତି l ଛେଳିକୁ ଭଲ ଓ ସତର ପ୍ରତୀକ ଓ କୁକୁରକୁ ଖରାପ ଓ ମିଛର ପ୍ରତୀକ ଭାବେ ଗ୍ରହଣ କରାଯାଇଥାଏ l ସେହି ଏକା ଯୁକ୍ତିରେ ତିନି ତୁଣ୍ଡରେ କୁକୁର ମଧ୍ୟ ଛେଳି ପାଲଟି ଯାଇପାରେ, ଅର୍ଥାତ୍ ମିଛଟିଏ ସତ ହୋଇ ଯାଉଥିବା ବେଳେ ଖରାପଟି ଭଲ ପାଲଟିଯାଏ l ଘଟି ନଥିବା ଘଟଣା ବା ସେଭଳି ଭାବେ ଘଟି ନଥିବା ଘଟଣାଟିଏକୁ ଲୋକଙ୍କ ମୁହଁରେ ବାରମ୍ଵାର ପ୍ରଚାର କରାଗଲେ ତାହାର ସତ୍ୟାସତ୍ୟ ପରଖିବାର କୌଣସି ଅବକାଶ ନଥିଲେ, ତାହା ହିଁ ସତ ବୋଲି କାଳକ୍ରମେ ସାଧାରଣ ଲୋକଙ୍କ ମନରେ ଧାରଣା ବସା ବାନ୍ଧିଥାଏ ଓ କ୍ରମଶଃ ତାହା ଉପାଖ୍ୟାନ ପର୍ଯ୍ୟାୟବାଚୀ ହୋଇଯାଇଥାଏ l ଏହିପରି ସାଧାରଣ ଲୋକଙ୍କୁ ବ୍ୟବହାର କରି ଜଣେ ବ୍ୟକ୍ତିକୁ ମହିମାମଣ୍ଡିତ କରିବା ସଙ୍ଗେସଙ୍ଗେ ଜନ ସାଧାରଣଙ୍କ ସମ୍ମୁଖରେ ତାର ଏକ ଭିନ୍ନ ଛବି ପ୍ରସ୍ତୁତ କରିହୁଏ l ଅନେକ ପ୍ରବାଦ ପୁରୁଷ ଓ କିମ୍ଵଦନ୍ତୀ ପୁରୁଷଙ୍କ ସହ ଉପାଖ୍ୟାନମାନ ଯୋଡା ହେବା କେବଳ ସଂଯୋଗ ନୁହେଁ l ସ୍ଥଳ ବିଶେଷରେ ଉପାଖ୍ୟାନ ସହ ଜଡିତ ଘଟଣାଟି ସମ୍ପୂର୍ଣ୍ଣ ମିଛ ହୋଇଥିବା ବେଳେ ଅଧିକାଂଶ କ୍ଷେତ୍ରରେ ଘଟଣାଟି ବର୍ଣ୍ଣିତ ଢଙ୍ଗରେ ଘଟି ନଥାଏ l ସେଥିରେ ମସଲା ଦେଇ ତାକୁ ସାମାଜିକ ଓ ରାଜନୈତିକ ଭାବେ ସଠିକ ମାତ୍ରାରେ ପରିପୁଷ୍ଟ କରାଯାଇ ସମ୍ପୃକ୍ତ ବ୍ୟକ୍ତିବିଶେଷଙ୍କ ଜୀବଦ୍ଦଶାରେ ତାଙ୍କ ଛବିକୁ ଜୀବନଠାରୁ ବଡ (ଲାର୍ଜର ଦ୍ୟାନ ଲାଇଫ) ଭାବେ ଉପସ୍ଥାପିତ କରାଯାଇଥାଏ l ମଜାର କଥା, ଅନେକ ସମୟରେ ସମ୍ପୃକ୍ତ ବ୍ୟକ୍ତିବିଶେଷ ଉପାଖ୍ୟାନର ବର୍ଣ୍ଣନାରେ ଆମୋଦିତ ହୋଇଥାନ୍ତି ଓ ଏହାକୁ ଉପଭୋଗ କରିଥାନ୍ତି, ହେଲେ ତାର ପ୍ରତିବାଦ କରିବାକୁ ଚାହିଁ ନଥାନ୍ତି ବା କରି ପାରି ନଥାନ୍ତି l ସେଥିପାଇଁ ଏଭଳି ପ୍ରବାଦ ପୁରୁଷଙ୍କ ମଧ୍ୟରୁ କେହି କେହି ନିଜ ଆତ୍ମଜୀବନୀ ଲେଖିବା ପାଇଁ କୁଣ୍ଠାବୋଧ କରିଥାନ୍ତି, କାରଣ ସେହି ମିଛଟିକୁ ଆଉ ଥରେ ସମର୍ଥନ କରି ବର୍ଣ୍ଣନା କରିବାକୁ ତାଙ୍କ ବିବେକ ଅନୁମୋଦନ କରିନଥାଏ l ଫଳରେ ଉପାଖ୍ୟାନର ପ୍ରକୃତ ସତଟି ଜାଣିବା କଷ୍ଟକର ହୋଇଥାଏ l ପ୍ରଖ୍ୟାତ ଲେଖକ ଜର୍ଜ ବର୍ଣ୍ଣାଡ ସ’ଙ୍କୁ କେନ୍ଦ୍ର କରି ଗଢି ଉଠିଥିବା ସେ ଭଳି ଏକ ବହୁ ଚର୍ଚ୍ଚିତ ଉପାଖ୍ୟାନ ହେଉଛି 'ମୋ ସୌନ୍ଦର୍ଯ୍ୟ ଓ ତୁମ ବୁଦ୍ଧିମତ୍ତା’, ଯାହାର ସତ୍ୟତା ଉଦଘାଟନ କରିବାକୁ ଭିନ୍ନ ଭିନ୍ନ ଭାବେ ପ୍ରଚେଷ୍ଟା ହୋଇଛି l

ବହୁଳ ଭାବେ ପ୍ରଚାରିତ ଉପାଖ୍ୟାନଟି ଏହିପରି l ‘’ଥରେ ଜଣେ ସମ୍ମୋହକ ସୁଶ୍ରୀ ଅଭିନେତ୍ରୀ ପ୍ରଖ୍ୟାତ ନାଟ୍ୟକାର ବର୍ଣ୍ଣାଡ ସ’ଙ୍କୁ ପ୍ରସ୍ତାବ ଦେଲେ, ‘କେତେ ଭଲ ହୁଅନ୍ତା ଯଦି ଆମେ ଦୁହେଁ ବିବାହ ବନ୍ଧନରେ ଆବଦ୍ଧ ହୋଇ ଏମିତି ଏକ ସନ୍ତାନକୁ ଜନ୍ମ ଦିଅନ୍ତେ ଯିଏ ମୋ’ ସୌନ୍ଦର୍ଯ୍ୟ ଓ ତୁମ ବୁଦ୍ଧିମତ୍ତାର ଅଧିକାରୀ ହୁଅନ୍ତା l’ ସେତେଟା ସୁଦର୍ଶନ ନଥିବା ପ୍ରତ୍ୟୁତ୍ପନ୍ନମତି ସମ୍ପନ୍ନ ବର୍ଣ୍ଣାଡ ସ’ ଉତ୍ତର ଦେଲେ, ‘ସତରେ ତାହା ବିସ୍ମୟକର ହୁଅନ୍ତା l ହେଲେ ଯଦି ଆମ ସନ୍ତାନଟି ମୋ’ ସୌନ୍ଦର୍ଯ୍ୟ ଓ ତୁମ ବୁଦ୍ଧିମତ୍ତାର ଅଧିକାରୀ ହୁଏ ତେବେ ?’’

ଯୁବତୀ ଜଣକ ଅଭିନେତ୍ରୀ ନ ହୋଇ ସେ ସମୟର ପ୍ରସିଦ୍ଧ ନୃତ୍ୟାଙ୍ଗନା ଇସାଡୋରା ଡଙ୍କାନ ଥିଲେ ବୋଲି ବିଶ୍ଵାସ କରାଯାଏ l ଆମେରିକାରେ ଜନ୍ମିତ ଇସାଡୋରା ପଶ୍ଚିମ ଇଉରୋପ ଓ ରୁଷିଆକୁ ତାଙ୍କ କର୍ମକ୍ଷେତ୍ରରେ ପରିଣତ କରିଥିଲେ l ଗତ ଶତାବ୍ଦୀର ପ୍ରଥମ ତିନି ଦଶକରେ ସେ ତାଙ୍କ ନୃତ୍ୟ ଓ ନୃତ୍ୟଶୈଳୀ ଯୋଗୁ ସମଗ୍ର ଇଉରୋପରେ ଚହଳ ପକାଇଥିଲେ l ତାଙ୍କ ସୌନ୍ଦର୍ଯ୍ୟ କେବଳ ପତ୍ରପତ୍ରିକାର ଚର୍ଚ୍ଚା ଭିତରେ ସୀମିତ ନରହି ସେ ସମୟର ସମ୍ଭ୍ରାନ୍ତ ସମାଜରେ ଚର୍ଚ୍ଚିତ ହେବା ସହିତ କିଛି ସ୍ଥପତି, ଚିତ୍ରକର ଓ ଚିତ୍ରୋତ୍ତଳକଙ୍କ ପାଇଁ ପ୍ରେରଣାର ଉତ୍ସ ହୋଇଥିଲା l ଦୁଇ ଦୁଇ ଥର ବିବାହ କରି ଦୁଇଟି କନ୍ୟା ସନ୍ତାନର ଜନନୀ ହୋଇଥିବା ଇସାଡୋରା ବ୍ୟକ୍ତିଗତ ଜୀବନରେ ତାଙ୍କ ଉନ୍ମୁକ୍ତ ଜୀବନଶୈଳୀ ପାଇଁ ଚର୍ଚ୍ଚିତ ଥିଲେ l କେତେକଙ୍କ ମତରେ ଇସାଡୋରା ବର୍ଣ୍ଣାଡ ସ’ଙ୍କୁ ପ୍ରସ୍ତାବଟିକୁ ସିଧାସଳଖ ନ ଦେଇ ପତ୍ର ମାଧ୍ୟମରେ ଦେଇଥିଲେ l ସେ ଯାହା ହେଉ ନା କାହିଁକି, ଇସାଡୋରା ଓ ବର୍ଣ୍ଣାଡ ସ’ଙ୍କ ଉପାଖ୍ୟାନଟି ସେତେବେଳକୁ ସର୍ବତ୍ର ପ୍ରସାରିତ ହୋଇ ସାରିଥାଏ l ଠିକ୍ ଏତିକି ବେଳେ ମାକ୍ସ ହାୟେକ ନାମକ ଜଣେ ଲେଖକଙ୍କର ଏପରି ଏକ ଗଳ୍ପ ପ୍ରକାଶିତ ହେଲା ଯେଉଁଥିରେ ପୂର୍ବୋକ୍ତ ଉପାଖ୍ୟାନର ସାମଞ୍ଜସ୍ୟ ଥିଲା l ହାୟେକ ଏହାକୁ ବର୍ଣ୍ଣାଡ ସ’ଙ୍କ ଜୀବନରେ ଘଟିତ ଘଟଣାରୁ ଚୋରି କରିଛନ୍ତି ବୋଲି ଏକ ଇଟାଲୀୟ ପତ୍ରିକାରେ ଅଭିଯୋଗ ପ୍ରକାଶ ପାଇବା ପରେ ବିବାଦ ଆହୁରି ଘନେଇଲା l ଉପାଖ୍ୟାନର ସତ୍ୟତା ସମ୍ପର୍କରେ ଏକ ଜର୍ମାନ ପତ୍ରିକାର ସମ୍ପାଦକ ବର୍ଣ୍ଣାଡ ସ’ଙ୍କୁ ସିଧାସଳଖ ପଚାରିଲେ l ବାଧ୍ୟ ହୋଇ ବର୍ଣ୍ଣାଡ ସ’ ଏକ ପତ୍ର ମାଧ୍ୟମରେ (୧୯୨୬ରେ) ତାଙ୍କର ଇସାଡୋରାଙ୍କ ସହ ସମ୍ପର୍କ ଥିବା କଥାକୁ ଅସ୍ଵୀକାର କରିବା ସହିତ ଉଭୟଙ୍କ ମଧ୍ୟରେ ସେଭଳି କୌଣସି ବାର୍ତ୍ତାଳାପ ହୋଇ ନଥିଲା ବୋଲି କହିଥିଲେ l ସେ ଲେଖିଥିଲେ, ‘ଇଟାଲୀୟ ସାମ୍ଵାଦିକ ଜଣକ ନର୍ତ୍ତକୀ ଓ ତାଙ୍କ ପ୍ରସ୍ତାବକୁ ଉଦ୍ଭାବନ କଲେ l ମାକ୍ସ ହାୟେକଙ୍କ ଚତୁର ଉତ୍ତରକୁ ଚୋରି କଲେ, ଆଉ ମୋତେ ସେହି ଗପର ନାୟକ କରିଦେଲେ, କାରଣ ସମ୍ଵାଦପତ୍ରମାନେ ମୋ ବାବଦରେ ଏହିଭଳି ଅନେକ ଗପ ଛାପିଥାନ୍ତି l ସେଥିରୁ ଶତକଡା ଅନେଶତ ଭାଗ ସମ୍ପୂର୍ଣ୍ଣ ମିଛ ହୋଇଥିବା ବେଳେ, ଅଧା ପ୍ରତିଶତ ଅର୍ଦ୍ଧସତ୍ୟ l ବାକି ଅଧା ପ୍ରତିଶତ ସତ ହେଲେ ମଧ୍ୟ ତାର ଉପସ୍ଥାପନା ବେଳେ ତାକୁ କଦର୍ଯ୍ୟ କରି ଦେଇଥାନ୍ତି l’ ଅବଶ୍ୟ ସେ ୧୯୩୧ରେ ନାଟ୍ୟକାର ସିଓ୍ଵେଲ ଷ୍ଟୋକସଙ୍କ ସହ ଏକ ସାକ୍ଷାତକାରରେ ସ୍ଵୀକାର କରିଥିଲେ ଯେ ସେ ସେହି ଚତୁର ଉତ୍ତରଟି ଦେଇଥିଲେ ମଧ୍ୟ ତାହା ଅନ୍ୟ ଜଣେ ବିଦେଶୀ ଅଭିନେତ୍ରୀଙ୍କ ପ୍ରତି ଅଭିପ୍ରେତ ଥିଲା, ଇସାଡୋରାଙ୍କ ପ୍ରତି ନୁହେଁ l

କେବଳ ବର୍ଣ୍ଣାଡ ସ’ ନୁହନ୍ତି, ବରଂ ବିଭିନ୍ନ ସମୟରେ ‘ମୋ ସୌନ୍ଦର୍ଯ୍ୟ ଓ ତୁମ ବୁଦ୍ଧିମତ୍ତା’ ଉପାଖ୍ୟାନ ସହ ଆହୁରି ଅନେକ ଚର୍ଚ୍ଚିତ ବ୍ୟକ୍ତିତ୍ଵଙ୍କ ନାମ ଶୁଣିବାକୁ ମିଳିଛି l ସେମାନଙ୍କ ମଧ୍ୟରେ ଥିଲେ ୧୯୨୧ର ନୋବେଲ ପୁରସ୍କାର ପ୍ରାପ୍ତ ଫରାସୀ ସାହିତ୍ୟିକ ଆନାଟୋଲି ଫ୍ରାନ୍ସଙ୍କ ସହ ଇସାଡୋରା ଡଙ୍କାନ, ଅଲବର୍ଟ ଆଇନଷ୍ଟାଇନଙ୍କ ସହ ଜଣେ କୋରସ ଗାୟିକା, ନାଟ୍ୟକାର ଆର୍ଥର ମିଲରଙ୍କ ସହ ଅଭିନେତ୍ରୀ ମେରିଲିନ ମନରୋ l ତେବେ ବର୍ଣ୍ଣାଡ ସ’ ଅସ୍ଵୀକାର କରିଥିବା ସତ୍ତ୍ଵେ ଆଜିଯାଏଁ ଏ ଉପାଖ୍ୟାନ କଥା ଚର୍ଚ୍ଚା ହେଲେ ତାଙ୍କ ନାମ ଆପଣା ଛାଏଁ ମନକୁ ଆସିଯାଏ, କାରଣ ଉପାଖ୍ୟାନରେ ଥିବା ଚତୁର ଉକ୍ତି ଓ ସ’ଙ୍କ ପ୍ରତ୍ୟୁତ୍ପନ୍ନ ମତି ମଧ୍ୟରେ ଅନେକଟା ସାମଞ୍ଜସ୍ୟ ଥିବାରୁ ଏ ଉକ୍ତି ତାଙ୍କ ଭିନ୍ନ ଆଉ କାହା ମୁହଁରୁ ବାହାରି ନଥିବ ବୋଲି ପ୍ରତ୍ୟୟ ସୃଷ୍ଟି ହେବା ସ୍ଵାଭାବିକ l ଏଥିରୁ ସ୍ପଷ୍ଟ ଯେ ଗୋଟିଏ ଉପାଖ୍ୟାନ ବିଶ୍ଵାସଯୋଗ୍ୟ ଓ ଗ୍ରହଣୀୟ ହେବା କ୍ଷେତ୍ରରେ ଉପାଖ୍ୟାନ ସହ ସଂଶ୍ଳିଷ୍ଟ ବ୍ୟକ୍ତିଙ୍କର ବ୍ୟକ୍ତିତ୍ଵ ଏକ ଗୁରୁତ୍ଵପୂର୍ଣ୍ଣ ଭୂମିକା ନିର୍ବାହ କରିଥାଏ l

ଏଣିକି ଆଜିକାଲିକାର ବ୍ୟକ୍ତି ବିଶେଷଙ୍କୁ ନେଇ ବେଶି ଉପାଖ୍ୟାନ ଶୁଣିବାକୁ ମିଳୁନାହିଁ l ଏକଥା ନୁହେଁ ଯେ ଆଜିକାଲି ବିଶାଳ ବ୍ୟକ୍ତିତ୍ଵଙ୍କ ଅଭାବ ଅଛି ବା ସେମାନଙ୍କୁ ମହିମାମଣ୍ଡିତ କରିବା ପ୍ରଚେଷ୍ଟାରେ ଲୋକେ ଅସତ୍ୟର ଆଶ୍ରୟ ନେଉ ନାହାନ୍ତି l ତେବେ ଇଣ୍ଟରନେଟ, ଦୃଶ୍ୟ-ଶ୍ରାବ୍ୟ ଆଦି ମାଧ୍ୟମର ବହୁଳ ପ୍ରସାର ଫଳରେ ମିଥ୍ୟା ପ୍ରସାର କରିବା ପାଇଁ କିଛି ଲୋକ ଯେପରି ବ୍ୟଗ୍ର, ସତ୍ୟ ଉଦଘାଟନ କରିବାକୁ ଆଉ କିଛି ଲୋକ ସେହିପରି ତତ୍ପର ଥିବା ଯୋଗୁ ମିଛ ଆଉ ଦୀର୍ଘ ସମୟ ତିଷ୍ଠି ନପାରି ଧରାଶାୟୀ ହେଉଛି ଓ ଏଭଳି ଅପଚେଷ୍ଟା କରୁଥିବା ଲୋକେ ନିନ୍ଦିତ ହେଉଛନ୍ତି l ତେଣୁ ସେହି ମିଥ୍ୟା ଆଉ ଉପାଖ୍ୟାନ ପର୍ଯ୍ୟାୟକୁ ଉନ୍ନୀତ ହୋଇପାରୁନାହିଁ l ଅବଶ୍ୟ କେତେକ କ୍ଷେତ୍ରରେ ଉପାଖ୍ୟାନରେ ବର୍ଣ୍ଣିତ ବ୍ୟକ୍ତି ବା ଘଟଣାର ସତ୍ୟତା ଅପେକ୍ଷା ସେଥିରେ ସନ୍ନିବେଶିତ ମର୍ମଟି ଏତେ ଅର୍ଥପୂର୍ଣ୍ଣ ହୋଇଥାଏ ଯେ ତାହା କାଳଜୟୀ ହୋଇଯାଏ, ଯାହା ହୋଇଛି ଚର୍ଚ୍ଚିତ ଉପାଖ୍ୟାନ ‘ମୋ ସୌନ୍ଦର୍ଯ୍ୟ ଓ ତୁମ ବୁଦ୍ଧିମତ୍ତା’ କ୍ଷେତ୍ରରେ l

Published in Dharitri on October 03, 2018