ନ ଥାଉ ପଛେ ମୋର ବିହଙ୍ଗ ପକ୍ଷ

ପକ୍ଷୀଟିଏ ଭଳି ଆକାଶ ମାର୍ଗରେ ଉଡି ବୁଲିବାକୁ ସମସ୍ତଙ୍କର ଇଚ୍ଛା ଥାଏ, ଆଉ ସେହି ଇଚ୍ଛା ଯଦି ସରକାରୀ ତହବିଲରୁ ଖର୍ଚ୍ଚ ହୋଇ ପୂରଣ ହୋଇପାରେ, ତାହାହେଲେ ତାଠାରୁ ଭଲ ଆଉ କଣ l ନିକଟରେ ଓଡିଶାର ରାଜ୍ୟପାଳ ହେଲିକପ୍ଟର ଯୋଗେ ହରିଆଣାର ସୀର୍ସାକୁ ଯାଇ ଗସ୍ତ ଖର୍ଚ୍ଚ ୪୬ ଲକ୍ଷ ୧୮ ହଜାର ଟଙ୍କା ହେବା ଓ ତାପରେ ରାଜ୍ୟ ସରକାରଙ୍କ ଦ୍ଵାରା ସେ ନେଇ ପ୍ରଶ୍ନ ଉଠାଇ ରାଜ୍ୟପାଳଙ୍କ କାର୍ଯ୍ୟାଳୟ ସହ ପତ୍ରାଳାପ ହେବା ପରେ ଗଣମାଧ୍ୟମରେ ଚର୍ଚ୍ଚା ହେବାକୁ ଲାଗିଲା l ତେବେ ମୁଖ୍ୟ ଶାସନ ସଚିବଙ୍କ ଦୁଃଖ ପ୍ରକାଶ ପରେ ଚର୍ଚ୍ଚାରେ ବିରାମ ଲାଗିଲା l ସରକାର ଓ ରାଜ୍ୟପାଳଙ୍କ ସମ୍ପର୍କରେ ତିକ୍ତତା ବୃଦ୍ଧିକୁ ଏଡାଇବା ପାଇଁ ସରକାର ହୁଏତ ଚୁପ ରହିବା ସ୍ଵାଭାବିକ l କିନ୍ତୁ ରାଜକୋଷରୁ କରଦାତାଙ୍କ ଅର୍ଥର ଅପଚୟ ହୋଇଥିବାରୁ ଜନସାଧାରଣ ପ୍ରଶ୍ନ ଉଠାଇବା ଉଚିତ ନୁହେଁ କି ?

ଓଡିଶାର ନବନିଯୁକ୍ତ ରାଜ୍ୟପାଳ ଜୁନ ୧୦ ତାରିଖ ଦିନ ତାଙ୍କ ବାସସ୍ଥାନ ହରିଆଣାର ସୀର୍ସା ଗସ୍ତରେ ଯାଇଥିବା ବେଳେ ଦୁଇଟି ହେଲିକପ୍ଟର ବ୍ୟବହାର ହୋଇଥିଲା l ସେ ଦିଲ୍ଲୀ ପର୍ଯ୍ୟନ୍ତ ଲିଗେସୀ-୬୫୦ ଜେଟ ଏୟାରକ୍ରାଫ୍ଟରେ ଓ ସେଠାରୁ ସୀର୍ସା ଯାଏଁ ଅନ୍ୟ ଏକ ହେଲିକପ୍ଟରରେ ଯାଇଥିଲେ l ସେହିପରି ୧୩ ଜୁନରେ ସୀର୍ସାରୁ ଦିଲ୍ଲୀ ଯାଏଁ ହେଲିକପ୍ଟରରେ ଆସି ଦିଲ୍ଲୀରୁ ଭୁବନେଶ୍ଵର ପୂର୍ବୋକ୍ତ ଲିଗେସୀ-୬୫୦ ଜେଟରେ ଫେରିଥିଲେ l ଏହି ଯାତ୍ରା ପାଇଁ ଭୁବନେଶ୍ଵରରୁ ଦିଲ୍ଲୀ ଯିବା ଆସିବା ବାବଦ ୪୧ ଲକ୍ଷ ୧୮ହଜାର ଟଙ୍କା ଓ ଦିଲ୍ଲୀରୁ ସୀର୍ସା ଯିବା ଆସିବା ବାବଦ ୫ ଲକ୍ଷ ଟଙ୍କା, ଏହିପରି ରାଜକୋଷରୁ ସମୁଦାୟ ୪୬ ଲକ୍ଷ ୧୮ହଜାର ଟଙ୍କା ବ୍ୟୟ ହେଲା l ଭୁବନେଶ୍ଵରରୁ ଦିଲ୍ଲୀକୁ ପ୍ରତ୍ୟହ ୧୨ଟି ବିମାନ ଚଳାଚଳ କରିଥାଏ l ବିଜନେସ ଶ୍ରେଣୀରେ ଦିଲ୍ଲୀ ଟିକଟର ମୂଲ୍ୟ ସର୍ବୋଚ୍ଚ ୩୦ହଜାର ଟଙ୍କା ହୋଇଥିବାରୁ ସର୍ବୋଚ୍ଚ ଶ୍ରେଣୀରେ ଯିବା ଆସିବା ଖର୍ଚ୍ଚ ୬୦ହଜାର ଟଙ୍କା ହୋଇଥାନ୍ତା l ଦିଲ୍ଲୀରୁ ସୀର୍ସାର ଦୂରତା ୨୬୨ କିଲୋମିଟର ଓ ସଡକ ଯୋଗେ ସର୍ବାଧିକ ୫ ଘଣ୍ଟା ସମୟ ଲାଗିଥାଏ l ଗୋଟିଏ ସୌଖୀନ ଗାଡିରେ ସୀର୍ସାକୁ ସଡକ ଯୋଗେ ଯାଇଥିଲେ ଯିବା ଆସିବା ବାବଦକୁ ସର୍ବାଧିକ ହୁଏତ ୪୦ହଜାର ଟଙ୍କା, ଏହିପରି ଭୁବନେଶ୍ଵରରୁ ସୀର୍ସା ଯିବା ଆସିବା ଖର୍ଚ୍ଚ ଏକ ଲକ୍ଷ ଟଙ୍କା ହୋଇଥାନ୍ତା l ଅର୍ଥାତ୍, କରଦାତାଙ୍କ ୪୫ଲକ୍ଷ ୧୮ହଜାର ଟଙ୍କା ସଞ୍ଚୟ ହୋଇପାରିଥାନ୍ତା l ଅବଶ୍ୟ ମହାମହିମଙ୍କର ଆଠ ଘଣ୍ଟା ସମୟ ସଞ୍ଚୟ ହୋଇଥିବ l ଉଲ୍ଲେଖ କରିବା ହୁଏତ ଧୃଷ୍ଟତା ହେବନାହିଁ, ସେ ଯେଉଁ ସଂସ୍କାରରୁ ଆସିଛନ୍ତି ସେଥିରେ ଦେଶ ଓ ଲୋକଙ୍କ ସ୍ଵାର୍ଥ ବ୍ୟକ୍ତି ସ୍ଵାର୍ଥଠାରୁ ଆଗରେ ବୋଲି କୁହା ଯାଇଥାଏ l

ଏହିପରି ଏକ ଘଟଣା ଯୁକ୍ତରାଷ୍ଟ୍ର ଆମେରିକାର ନିୟୁ ଜର୍ସି ରାଜ୍ୟରେ ଘଟିଥିଲା l ମେ ୩୧, ୨୦୧୧ରେ ସେଠାକାର ଗଭର୍ଣ୍ଣର ରିପବ୍ଳିକାନ ଦଳର ଖ୍ରୀସ ଖ୍ରୀଷ୍ଟି ତାଙ୍କ ବଡପୁଅ ଭାଗ ନେଉଥିବା ଏକ ବେସବଲ ମ୍ୟାଚ ଦେଖିବାକୁ ରାଜ୍ୟ ପୋଲିସର ଏକ ହେଲିକପ୍ଟର ଯୋଗେ ୭୫ ମାଇଲ ଦୂରରେ ଥିବା ସ୍କୁଲକୁ ଯାଇଥିଲେ l ‘କରଦାତାଙ୍କ ଅର୍ଥରେ ଗଭର୍ଣ୍ଣର ଅଏସ କରୁଛନ୍ତି’ ବୋଲି ଜନସାଧାରଣଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଲା l ଜୁନ ୧ ତାରିଖ ଦିନ କାର୍ଯ୍ୟଟିକୁ ଉଚିତ ବୋଲି ଦର୍ଶାଇ ଗଭର୍ଣ୍ଣରଙ୍କ ମୁଖପାତ୍ର ବିବୃତି ଦେଲେ l ଫଳରେ ଗଭର୍ଣ୍ଣରଙ୍କ କାର୍ଯ୍ୟ ବିରୁଦ୍ଧରେ ଜନମତ ଏତେ ପ୍ରବଳ ହେଲା ଯେ ବ୍ୟକ୍ତିଗତ କାର୍ଯ୍ୟ ପାଇଁ ହେଲିକପ୍ଟରଟିକୁ ବ୍ୟବହାର କରିଥିବା ସ୍ଵୀକାର କରି ଗଭର୍ଣ୍ଣର ତା ପରଦିନ ରାଜ୍ୟ ରାଜକୋଷକୁ ସମ୍ପୂର୍ଣ୍ଣ ଦେୟ ଫେରସ୍ତ କରିଥିଲେ l ତାପରେ ମୁଖପାତ୍ର ଦେଇଥିବା ବିବୃତିଟି ପ୍ରଣିଧାନ ଯୋଗ୍ୟ l ‘ଏହି ଧରଣର କାର୍ଯ୍ୟ ସହ ସଂଶ୍ଳିଷ୍ଟ ସମ୍ଵେଦନଶୀଳ ପ୍ରସଙ୍ଗକୁ ଗଭର୍ଣ୍ଣର ବେଶ ଭଲ ଭାବେ ହୃଦୟଙ୍ଗମ କରନ୍ତି ଓ ଏହା ଯେପରି ସର୍ବସାଧାରଣଙ୍କ ଧ୍ୟାନ ବିକେନ୍ଦ୍ରିତ ନ କରେ ସେଥିପାଇଁ ସେ ତାଙ୍କ ନିକଟରେ କଟିବଦ୍ଧ’ l ଉଲ୍ଲେଖଯୋଗ୍ୟ, ଭାରତ ପରି ସେଠାକାର ଗଭର୍ଣ୍ଣର ମନୋନୀତ ନ ହୋଇ ନିର୍ବାଚିତ ହୋଇଥାନ୍ତି l

ଓଡିଶାର ମୁଖ୍ୟମନ୍ତ୍ରୀ ଓ ଅନ୍ୟ ମନ୍ତ୍ରୀଙ୍କ ଦ୍ଵାରା ହେଲିକପ୍ଟରର ବହୁଳ ବ୍ୟବହାର ହେଉଛି l ଗତ ଫେବୃଆରୀ ୩, ୨୦୧୬ରେ ମୁଖ୍ୟମନ୍ତ୍ରୀ ଭୁବନେଶ୍ଵରଠାରୁ ମାତ୍ର ୨୫ କିଲୋମିଟର ଦୂରରେ ଥିବା କଟକକୁ ହେଲିକପ୍ଟର ଯୋଗେ ଯିବା ଚର୍ଚ୍ଚାର ବିଷୟ ପାଲଟିଥିଲା l ସେହିପରି ଗତ ଜୁନ ୧୬, ୨୦୧୮ରେ ଜଣେ ଯୁବ ମନ୍ତ୍ରୀ ନବରଙ୍ଗପୁର ଜିଲ୍ଲାରେ ଗୋଟିଏ ବିଜୁ ସେତୁର ଭିତ୍ତି ପ୍ରସ୍ତର ସ୍ଥାପନ ପାଇଁ ହେଲିକପ୍ଟର ଯୋଗେ ଯିବା ଭଳି ଅନେକ ଉଦାହରଣ ରହିଛି l କେବଳ ଗତ ତିନି ବର୍ଷ (୨୦୧୫ରୁ ୨୦୧୭) ମଧ୍ୟରେ ରାଜ୍ୟରେ ମୁଖ୍ୟମନ୍ତ୍ରୀ ଓ ଅନ୍ୟମାନଙ୍କ ହେଲିକପ୍ଟର ଯାତ୍ରା ବାବଦକୁ ୨୬ କୋଟି ୫୫ ଲକ୍ଷ ଟଙ୍କା ଖର୍ଚ୍ଚ ହୋଇଛି l ଏପରିକି ମାଓବାଦୀ ଦମନ ପାଇଁ ଉଦ୍ଦିଷ୍ଟ ହେଲିକପ୍ଟରର ଅପବ୍ୟବହାର ହୋଇଥିବା କଥା ସିଏଜି ତାଙ୍କ ରିପୋର୍ଟରେ ଦର୍ଶାଇଛନ୍ତି l ଫେବୃଆରୀ ୨୦୧୩ରୁ ସେପ୍ଟେମ୍ଵର ୨୦୧୫ ମଧ୍ୟରେ ୩୪୧ ଥର ହେଲିକପ୍ଟରର ବ୍ୟବହାର ହୋଇଥିଲେ ମଧ୍ୟ ମାତ୍ର ୫୩ ଥର ମାଓବାଦୀ ଗତିବିଧି ନିୟନ୍ତ୍ରଣ ପାଇଁ ହୋଇଛି l

୨୦୧୪ ଜୁଲାଇ ମାସ ଖଣି ଦୁର୍ନୀତିରେ ନିନ୍ଦିତ ତ୍ରିବେଣୀ ଆର୍ଥ ମୁଭର୍ସ କମ୍ପାନୀର ଏକ ହେଲିକପ୍ଟର ଯୋଗେ ପାଞ୍ଚ ଜଣ ସାଂସଦ ଦିଲ୍ଲୀ ଯାଇଥିବାର ଅଭିଯୋଗ ଉଠିଥିଲା l ସେହିପରି ଏ ବର୍ଷ ଫେବୃଆରୀ ମାସ ନବରଙ୍ଗପୁର ସାଂସଦ ଓ ମାଲକାନଗିରିର ବିଧାୟକ ହେଲିକପ୍ଟର ଯୋଗେ ମାଲକାନଗିରିର ଏକ ଗାଁକୁ ମନ୍ଦିର ପ୍ରତିଷ୍ଠା ଉତ୍ସବରେ ଯୋଗଦେବାକୁ ଯାଇ ବିବାଦରେ ପଡିଥିଲେ, କାରଣ ଉଡାଣର ସମସ୍ତ ଖର୍ଚ୍ଚ ସ୍ଥାନୀୟ ଜଣେ କଣ୍ଟ୍ରାକ୍ଟର ବହନ କରିଥିଲେ l କେହି କେହି ମତ ରଖିଥାଆନ୍ତି ଯେ ଜରୁରୀ ସମୟରେ ରାଜନେତାମାନେ ବ୍ୟବସାୟ ଓ ଶିଳ୍ପସଂସ୍ଥାମାନଙ୍କଠାରୁ ସାହାଯ୍ୟ ମାଗିଥାନ୍ତି, ଆଉ ସେଥିରେ କିଛି ଭୁଲ ନାହିଁ l କିନ୍ତୁ, ନିର୍ବାଚିତ ପ୍ରତିନିଧିମାନେ ବ୍ୟକ୍ତିବିଶେଷ, ବ୍ୟବସାୟ ବା ଶିଳ୍ପ ସଂସ୍ଥାଙ୍କ ସହଯୋଗ ଓ ଆତିଥ୍ୟ ଗ୍ରହଣ କରିବା ନୈତିକ ଦୃଷ୍ଟିରୁ ସମୀଚୀନ କି ? ଏହାଦ୍ଵାରା ସେମାନେ ସେହି ବ୍ୟକ୍ତି ବା ସଂସ୍ଥା ନିକଟରେ ପରୋକ୍ଷରେ ଋଣୀ ହୋଇଥାନ୍ତି ଓ ସମ୍ପୃକ୍ତ ବ୍ୟକ୍ତି ବା ସଂସ୍ଥାର ‘ପ୍ରତିଦାନ-ଆଶା’ (କୁଇଡ ପ୍ରୋ କୁଓ) ରହିବା ସ୍ଵାଭାବିକ l

ଏବର ମୁଖ୍ୟମନ୍ତ୍ରୀ ଦାୟିତ୍ଵ ଗ୍ରହଣ କଲା ପରେ ଓଡିଶା ସରକାରଙ୍କର ନିଜସ୍ଵ ହେଲିକପ୍ଟରଟିକୁ ହଟାଇ ଦିଆଗଲା l ହୁଏତ ସେ ସେତେବେଳେ ଏତେ ଅଧିକ ସଂଖ୍ୟାରେ ହେଲିକପ୍ଟର ଯାତ୍ରା ହେବ ବୋଲି ଭାବି ନଥିବେ l ଏବେ ରାଜ୍ୟ ସରକାର ବାଙ୍ଗାଲୋରସ୍ଥିତ ଡେକାନ ଚାର୍ଟରସ କମ୍ପାନୀଠାରୁ ଏକ ହେଲିକପ୍ଟର ଲିଜ ସୂତ୍ରରେ ଆଣି ବ୍ୟବହାର କରୁଛନ୍ତି l ସେଥିପାଇଁ ଚାଲୁ ନଚାଲୁ କମ୍ପାନୀକୁ ମାସିକ ୫୨ ଲକ୍ଷ ଟଙ୍କା ଭଡା ଦେବାକୁ ହେଉଛି l ଚାଲିଲେ ତେଲ ଖର୍ଚ୍ଚ ସ୍ଵତନ୍ତ୍ର l ଏମିତି ମାସିକ ହାରାହାରି ୭୦ ଲକ୍ଷ ଟଙ୍କା ଓ ବାର୍ଷିକ ପ୍ରାୟ ୮ କୋଟି ଟଙ୍କା ରାଜକୋଷରୁ ଯାଉଛି l ମୁଖ୍ୟମନ୍ତ୍ରୀ କୌଣସି ପାଖ ସ୍ଥାନକୁ ହେଲିକପ୍ଟରରେ ଗଲେ ଆଲୋଚନା ହୋଇଥାଏ l ଆରେ ବାବୁ, ଯଦି ନ ଚାଲିଲେ ବି କମ୍ପାନୀକୁ ପ୍ରତିଦିନ ପ୍ରାୟ ଦୁଇ ଲକ୍ଷ ଟଙ୍କା ଗଣିବାକୁ ହେଉଛି, ତେଲ ପକାଇ ଭେଡାଏ ବୁଲି ଆସିଲେ କ୍ଷତି କଣ ! ହେଲିକପ୍ଟର ବାବଦ ଖର୍ଚ୍ଚ ବଢୁଥିବା ଦେଖି ବିଧାନସଭାର ଏକ ଗୃହ କମିଟି ମାର୍ଚ୍ଚ ୨୦୧୫ରେ ରାଜ୍ୟ ସରକାର ଏକ ହେଲିକପ୍ଟର କିଣିବା ସପକ୍ଷରେ ସୁପାରିଶ କରିଥିଲେ ମଧ୍ୟ ଏ ପର୍ଯ୍ୟନ୍ତ ତାହା କାର୍ଯ୍ୟକାରୀ ହୋଇନାହିଁ l ଏଠାରେ ଉଲ୍ଲେଖଯୋଗ୍ୟ, ମହାରାଷ୍ଟ୍ର, ଛତିଶଗଡ ଭଳି କିଛି ରାଜ୍ୟଙ୍କର ନିଜସ୍ଵ ହେଲିକପ୍ଟର ଥିବା ବେଳେ ଅନ୍ୟ କିଛି ରାଜ୍ୟ ଓଡିଶା ଭଳି ଲିଜ୍ ସୂତ୍ରରେ ଘରୋଇ କମ୍ପାନୀଙ୍କଠାରୁ ହେଲିକପ୍ଟର ନେଉଛନ୍ତି l

‘ଥାଆନ୍ତା ଯଦି ମୋର ବିହଙ୍ଗ ପକ୍ଷ, ଲଂଘି ଭୀଷଣ ଗିରି ସାଗର ବକ୍ଷ’, ପଦକ ଲେଖିଲା ବେଳେ କବି ହୁଏତ କଳ୍ପନା କରି ନଥିବେ ଯେ ଦିନେ ନେତାଙ୍କର ଉଡିବା ପାଇଁ ଆଉ ଡେଣା ଦରକାର ହେବନାହିଁ l ବରଂ କରଦାତାଙ୍କ ଅର୍ଥରେ ସେମାନଙ୍କ ଦେହରେ ଏମିତି ଯନ୍ତ୍ରଚାଳିତ ଡେଣା ଲାଗିଯିବ ଯେ ସେମାନେ ଅନାୟାସରେ ଆକାଶ ମାର୍ଗରେ ବିଚରଣ କରିବାକୁ କୁଣ୍ଠାବୋଧ କରିବେ ନାହିଁ l ଅବଶ୍ୟ ଜରୁରୀ ସମୟରେ ଦୁର୍ଗମ ଅଞ୍ଚଳରେ ପହଞ୍ଚିବା ଲାଗି ହେଲିକପ୍ଟରର ଉପଯୋଗ ହେବା ଦରକାର l ଜନସାଧାରଣଙ୍କ ଗୋଚରାର୍ଥେ ତିନି ମାସରେ ଅନ୍ତତଃ ଥରେ ହେଲିକପ୍ଟର ଯାତ୍ରାର ବିବରଣୀ ସହ କାରଣ ସରକାରୀ ଓ୍ଵେବସାଇଟରେ ପ୍ରକାଶ ପାଇଲେ ଅବିଚାରିତ ହେଲିକପ୍ଟର ଯାତ୍ରା ଉପରେ ନିୟନ୍ତ୍ରଣ ଲାଗିପାରନ୍ତା ? ଉଚ୍ଚ ପଦବୀରେ ଅଧିଷ୍ଠିତ ଶାସକ ପ୍ରଶାସକମାନେ ହେଲିକପ୍ଟର ଯାତ୍ରାକୁ ସେମାନଙ୍କ ପାତ୍ରତା (ଏନଟାଇଟଲମେଣ୍ଟ) ବୋଲି ଧରିନେବା ହୁଏତ ବିଧିସମ୍ମତ ହୋଇପାରେ, କିନ୍ତୁ ନିରୀକ୍ଷଣ କଲେ କେତେକ କ୍ଷେତ୍ରରେ ତାହା ଅନୈତିକ ମନେହେବ l କୌଣସି କାର୍ଯ୍ୟ ବିଧିସମ୍ମତ ହେବା ଯେତିକି ଜରୁରୀ, ତାଠାରୁ ଅଧିକ ଜରୁରୀ ଅନୈତିକ ନହେବା l ତଦ୍ଦ୍ଵାରା ଅନ୍ୟମାନଙ୍କ ଉପରେ ତାର ଭଲ ପ୍ରଭାବ ପଡିଥାଏ ଓ ସେମାନେ ମଧ୍ୟ ମିତବ୍ୟୟୀ ହୋଇଥାନ୍ତି l ହେଲିକପ୍ଟରରେ ଯାତ୍ରା ହେଉ ବା ହେଲିକପ୍ଟର କିଣିବା, ସରକାରଙ୍କ ନିଷ୍ପତ୍ତି ରାଜ୍ୟସ୍ଵାର୍ଥ କୈନ୍ଦ୍ରିକ ହେବ ବୋଲି ଆଶା କରାଯାଏ l

Published in Swadhikar(17.09.18), Matrubhasa (18.09.18), Krantidhara (18.09.18), Manthan (19.09.18), Odisha Express (21.09.18), Samanya Kathan (01.10.18), Samadrushti (01 October 15 October 2018), Anubhab (October 2018)