ଭଲ ଛୁଆଁ, ଖରାପ ଛୁଆଁ

ନିକଟରେ ଜଣେ ସିନେମା ପ୍ରଯୋଜକ ସର୍ବସମକ୍ଷରେ ଜଣେ କାର୍ଯ୍ୟରତ ସାମ୍ୱାଦିକାଙ୍କୁ ପିଠି ଓ ଗାଲରେ ଆଘାତ ଦେଇଥିବା ଅଭିଯୋଗ ପରେ ସାମ୍ୱାଦିକାଙ୍କ ଏତଲା କ୍ରମେ ତାଙ୍କୁ ହାଜତ ଯିବାକୁ ପଡ଼ିଥିଲା । ତେବେ ଉପଲବ୍ଧ ସିସିଟିଭି ଫୁଟେଜ ଆଧାରରେ କେହି କେହି ଯୁକ୍ତି ବାଢ଼ିଲେ ଯେ ସେ ସାମ୍ୱାଦିକାଙ୍କୁ ଆକ୍ରମଣ କରି ନଥିଲେ ବରଂ ଉଭୟ ପୂର୍ବରୁ ପରିଚିତ ହୋଇଥିବାରୁ ସେ ସ୍ନେହରେ ତାଙ୍କ ପିଠି ଓ ଗାଲକୁ ଥାପୁଡ଼ାଇ ଦେଇଥିଲେ, ଯାହା ଜେଲ୍ ଗଲା ଭଳି ଏକ ଅପରାଧ ନୁହେଁ କି ସେ ଜଣେ ଅପରାଧୀ ନୁହନ୍ତି । ଅନ୍ୟ ପକ୍ଷରେ ଏହି ଘଟଣାକୁ ନିନ୍ଦା କରୁଥିବା କିଛି ବ୍ୟକ୍ତିଙ୍କର ଯୁକ୍ତି ଥିଲା, କର୍ମଜୀବୀ ମହିଳାମାନଙ୍କ ପ୍ରତି ସର୍ବସମକ୍ଷରେ ଏ ଭଳି ଅପରାଧ ସଂଘଟିତ ହେଲେ ସେମାନେ କାର୍ଯ୍ୟ ସମ୍ପାଦନ କରିବା ପାଇଁ ନିଜକୁ ସୁରକ୍ଷିତ ମଣିବେ କିପରି ? ଏଥିରୁ ଜଣାପଡ଼ୁଛି ଯେ ମହିଳାଙ୍କୁ ଛୁଇଁବା ଗ୍ରହଣୀୟ କି ନୁହେଁ ଓ ଛୁଇଁବାର ଲକ୍ଷ୍ମଣରେଖା କ'ଣ ସେ ନେଇ ଲୋକଙ୍କ ମଧ୍ୟରେ ଭ୍ରାନ୍ତ ଧାରଣା ରହିଛି । ମହିଳା ଜଣଙ୍କୁ ଚାପୁଡ଼ା ମରାଯାଇଥାଉ କି ଗେହ୍ଲାରେ ଥାପୁଡ଼ାଇ ଦିଆଯାଇଥାଉ, ସେ କର୍ମଜୀବୀ ମହିଳା ହୋଇଥାଆନ୍ତୁ କି ଜଣେ ସାଧାରଣ ଗୃହିଣୀ, ପ୍ରତ୍ୟେକ ମହିଳାଙ୍କର ନିଜ ଶରୀର ଉପରେ ସମ୍ପୂର୍ଣ୍ଣ ଅଧିକାର ରହିଛି ଓ ତାଙ୍କ ସମ୍ମତି ବିନା ଅନ୍ୟ କେହି ତାଙ୍କ ଶରୀରକୁ ସ୍ପର୍ଶ କରିବା ତାଙ୍କର ସେହି ଅଧିକାରର ଉଲ୍ଲଂଘନ ଭାବେ ଗ୍ରହଣ କରାଯାଇପାରେ । ତେବେ ସବୁ ଛୁଆଁ ଖରାପ ଶ୍ରେଣୀର ହୋଇ ନଥିଲା ବେଳେ ଭଲ ଛୁଆଁ ଓ ଖରାପ ଛୁଆଁ ମଧ୍ୟରେ ଥିବା ସୂକ୍ଷ୍ମ ପାର୍ଥକ୍ୟଟିକୁ ବୁଝିବା ଓ ବୁଝାଇବା ଯେତିକି ଆବଶ୍ୟକ, ଏକ ପୁରୁଷତାନ୍ତ୍ରିକ ସମାଜ ବ୍ୟବସ୍ଥାରେ ଏ ପ୍ରସଙ୍ଗକୁ ଏଡ଼ାଇ ନଯାଇ ଆଲୋଚନା ମାଧ୍ୟମରେ ସେ ସମ୍ପର୍କରେ ସଚେତନତା ସୃଷ୍ଟି କରାଯିବାର ଆବଶ୍ୟକତା ତତୋଧିକ ।

ମଣିଷ ଏକ ସାମାଜିକ ପ୍ରାଣୀ ହୋଇଥିବାରୁ ମାନବୀୟ ସ୍ପର୍ଶ ତା’ ପାଇଁ ଅତ୍ୟାବଶ୍ୟକ । ଏହା ବିଜ୍ଞାନସମ୍ମତ ମଧ୍ୟ । ନିଜ ଲୋକଙ୍କ ସ୍ପର୍ଶ ତାକୁ ଆନନ୍ଦ ଦେଇଥାଏ, ତାଠାରେ ସକାରାତ୍ମକ ଶକ୍ତି ଜାଗ୍ରତ କରିଥାଏ । କେତେକ ଅଣ-ଯୌନ ସ୍ପର୍ଶରେ ତ ମସ୍ତିଷ୍କରୁ ଅକ୍ସିଟୋସିନ କ୍ଷରଣ ହୋଇଥାଏ, ଯାହାକୁ ବନ୍ଧନ (ବଣ୍ଡିଙ୍ଗ) ହର୍ମୋନ ବୋଲି ମଧ୍ୟ କୁହାଯାଏ । ଏହା ଶରୀରରେ ଡୋପାମିନ, ସେରୋଟୋନିନ ଭଳି ଭଲ ହର୍ମୋନ କ୍ଷରଣ ହେବାରେ ସହାୟକ ହୁଏ, ଯଦ୍ଦ୍ୱାରା ଶରୀରରେ ଉଦବେଗ ବଢ଼ାଉଥିବା କର୍ଟିସୋଲ, ନୋରପ୍ରିନଫ୍ରାଇନ ଭଳି ହର୍ମୋନଗୁଡ଼ିକର କ୍ଷରଣ କମ ହୋଇଥାଏ । ଫଳରେ ଚିନ୍ତା ହ୍ରାସ ହୋଇ ସେ ଆନନ୍ଦ ଅନୁଭବ କରିଥାଏ ଓ ଉଭୟ ଶାରୀରିକ ଓ ମାନସିକ ସୁସ୍ଥତା ବଜାଏ ରଖିବାରେ ତାହା ସହାୟକ ହୋଇଥାଏ । କିନ୍ତୁ ସବୁ ଛୁଆଁ ମଣିଷକୁ ଆନନ୍ଦ ଦେଇ ନଥାଏ । ଖରାପ ଛୁଆଁ ଜଣକୁ ଅସହଜ, ବିବ୍ରତ ଓ ଭୟାତୁର କରିଥାଏ । ମାଡ଼ ମାରିବା, ଆଘାତ ଦେବା, ପେଲି ଦେବା, ନାତ ମାରିବା, ଗୁପ୍ତାଙ୍ଗରେ ହାତ ମାରିବା, ପୋଷାକ ଭିତରେ ହାତ ପୂରାଇବା, କୁଣ୍ଢାଇବା, ଯୌନୋଦ୍ଦେଶ୍ୟରେ ଛୁଇଁବା,  ଛୁଇଁବା ପାଇଁ ବାଧ୍ୟ କରିବା, ଏ ବିଷୟରେ କାହାକୁ ନ କହିବା ଓ କହିଲେ ଫଳ ଭଲ ହେବନାହିଁ ବୋଲି ଧମକାଇବା ଆଦି ଖରାପ ଛୁଆଁର କେତୋଟି ଉଦାହରଣ ମାତ୍ର । ଏଥିରେ ଉଦବେଗ ବୃଦ୍ଧିକାରୀ ହର୍ମୋନର କ୍ଷରଣ ଅଧିକ ହୋଇଥାଏ, ଯାହା ଶାରୀରିକ ଓ ମାନସିକ ସ୍ୱାସ୍ଥ୍ୟ ପ୍ରତି କ୍ଷତିକାରକ । ମାତ୍ର ପରିତାପର ବିଷୟ ହେଉଛି ଆମ ଦେଶରେ ଭଲ ଛୁଆଁ ଓ ଖରାପ ଛୁଆଁ ମଧ୍ୟରେ ଥିବା ସୂକ୍ଷ୍ମ ପାର୍ଥକ୍ୟଟିକୁ ପିଲାଦିନରୁ ବୁଝାଇବା ତ ଦୂରର କଥା ସେ ନେଇ ଆଲୋଚନା କରିବା ମଧ୍ୟ ଗର୍ହିତ ହୋଇଥାଏ । ଫଳରେ କେତେକ କ୍ଷେତ୍ରରେ ଅଜ୍ଞତାବଶତଃ ପୀଡ଼ିତାଟିଏ ପ୍ରାରମ୍ଭିକ ଅବସ୍ଥାରେ ତା'ର ଯୌନ ଶୋଷଣ ହୋଇଛି କି ନାହିଁ ତାହା ମଧ୍ୟ ଜାଣି ନଥାଏ । ତେଣୁ ଖରାପ ଛୁଆଁ ବା ଅସଙ୍ଗତ ଛୁଆଁକୁ ବୁଝିବା ଓ ଚିହ୍ନଟ କରିବା ପ୍ରଥମ ଆବଶ୍ୟକତା । ଅନେକ ସମୟରେ ଯାତ୍ରୀବାହୀ ବସ ବା ରେଳରେ ଯାତ୍ରା କରିବା ବେଳେ କିଛି ସହଯାତ୍ରୀ ମହିଳାଙ୍କୁ ଛୁଇଁବାର ଘୃଣିତ ଚେଷ୍ଟା କରିଥାନ୍ତି । ଏପରିକି କର୍ମକ୍ଷେତ୍ରଠାରୁ ଆରମ୍ଭ କରି ସର୍ବସାଧାରଣ ସ୍ଥାନମାନଙ୍କରେ ମହିଳାମାନେ ଖରାପ ଛୁଆଁର ଶିକାର ହେବାର ଖବରମାନ ଶୁଣିବାକୁ ମିଳିଥାଏ । ସେଇ ଏକା ଛୁଆଁ ମାଆ ଛୁଇଁଲେ ‘ଭଲ ଛୁଆଁ’ ହେଉଥିଲା ବେଳେ ଜଣେ ଅପରିଚିତ ଛୁଇଁଲେ ‘ଖରାପ ଛୁଆଁ’ ହୋଇଥାଏ । ମିଳିତ ଭାବେ ଅକ୍ସଫୋର୍ଡ, ଆଲଟୋ ଓ ଟୁର୍କୁ ବିଶ୍ୱବିଦ୍ୟାଳୟର କିଛି ଗବେଷକ ଶରୀରର କେଉଁ ଅଙ୍ଗ ପ୍ରତ୍ୟଙ୍ଗକୁ ପରିବାରର ବିଭିନ୍ନ ସଦସ୍ୟ, ସାଙ୍ଗ, ପରିଚିତ ବ୍ୟକ୍ତି ଓ ଅଜଣା ବ୍ୟକ୍ତି ଛୁଇଁଲେ ଜଣେ ସହଜ ବା ଅସହଜ ଅନୁଭବ କରେ ତାହା ଜାଣିବା ପାଇଁ ୧୩୦୦ ଲୋକଙ୍କୁ ନେଇ କରିଥିବା ଗବେଷଣାରୁ ଜଣା ପଡ଼ିଥିଲା ଯେ ଅପରିଚିତ ଲୋକଙ୍କ କଥା ତ ଛାଡ଼ ଏପରିକି ପରିବାରର ବିଭିନ୍ନ ସଦସ୍ୟଙ୍କ ଛୁଆଁ ବି ଜଣକୁ ସହଜ ବା ଅସହଜ ମନେ ହୋଇପାରେ ।     

ଖରାପ ଛୁଆଁ ଯୋଗୁଁ ଶିଶୁଙ୍କ ଯୌନ ଶୋଷଣ ପ୍ରଶ୍ରୟ ପାଇବାର ଯଥେଷ୍ଟ ଆଶଙ୍କା ଥାଏ । ଏହାର ଶିକାର କେବଳ ଯେ ଝିଅମାନେ ବା ବସ୍ତି ଅଞ୍ଚଳର ପିଲାମାନେ ହୋଇଥାଆନ୍ତି ତାହା ନୁହେଁ, ପୁଅମାନେ ଓ ସମ୍ଭ୍ରାନ୍ତ ଅଞ୍ଚଳରେ ରହୁଥିବା ପିଲାମାନେ ମଧ୍ୟ ଏହାର ଶରବ୍ୟ ହୋଇଥାଆନ୍ତି । ଅନେକଙ୍କ ଭ୍ରାନ୍ତ ଧାରଣା ଯେ ପିଲାଟିଏର ତିକ୍ତ ଅନୁଭୂତି କାଳକ୍ରମେ ଭୁଲି ହୋଇଯାଇଥାଏ । ଅନ୍ୟ ପକ୍ଷରେ ପିଲାଟି ଉପରେ ଏହାର ଗଭୀର କୁପ୍ରଭାବ ପଡ଼ିଥାଏ, ଯଦ୍ଦ୍ୱାରା ସେ ତା'ର ସରଳତା, ବିଶ୍ୱାସ, ସ୍ୱାଭିମାନ, ଆତ୍ମ-ମର୍ଯ୍ୟାଦା ଆଦି ହରାଇ ବସିବାର ଆଶଙ୍କା ଦେଖା ଦେଇଥାଏ ଓ ତା'ର ଉପଯୁକ୍ତ ବ୍ୟକ୍ତିତ୍ୱ ଗଠନରେ ବାଧା ଉତ୍ପନ୍ନ ହୋଇଥାଏ ।  

କେତେକ ନିର୍ଦ୍ଦିଷ୍ଟ ପ୍ରକାର ଛୁଆଁରେ ଜଣକୁ ତା'ର ବ୍ୟକ୍ତିସତ୍ତାକୁ ଆକ୍ରମଣ ହେଲା ପରି ଅନୁଭବ ହୋଇ ସେ ଆଘାତପ୍ରାପ୍ତ ହୋଇଥାଏ । ତେବେ ସବୁ କ୍ଷେତ୍ରରେ ତଦ୍ଦ୍ୱାରା ଅପରାଧଟିଏ ସଂଘଟିତ ହେଲା ବୋଲି ଧରି ନେବା ମଧ୍ୟ ଠିକ୍ ନୁହେଁ । ହେଲେ ସ୍ଥଳ ବିଶେଷରେ ସେଥିପାଇଁ ଅଭିଯୁକ୍ତକୁ ଯୌନ ଅପରାଧ ଅଭିଯୋଗର ମଧ୍ୟ ସାମନା କରିବାକୁ ପଡ଼ିଥାଏ ।  ଭାରତୀୟ ପିଙ୍ଗଳ କୋଡର ଧାରା ୩୫୪ ଅନୁଯାୟୀ ଜଣେ ମହିଳାଙ୍କ ଶାଳୀନତାକୁ କ୍ଷୁଣ୍ଣ କରିବାର ପ୍ରୟାସ ଏକ ଦଣ୍ଡନୀୟ ଅପରାଧ ଯେଉଁଥିରେ ଉଭୟ ଜେଲ ଦଣ୍ଡ ଓ ଜୋରିମାନାର ପ୍ରାବଧାନ ରହିଛି । ସେହିପରି ପକସୋ ଆଇନର ଧାରା ୭ ଅନୁଯାୟୀ ଯୌନ ଶୋଷଣର ଉଦ୍ଦେଶ୍ୟ ରଖି ଶିଶୁଙ୍କ ଗୁପ୍ତାଙ୍ଗକୁ ଛୁଇଁବା, ଏକ ଦଣ୍ଡନୀୟ ଅପରାଧ ।  ସେହି ଛୁଆଁଟି ଅସଙ୍ଗତ କି ନୁହେଁ ଓ ହୋଇଥିଲେ କେଉଁ ଧରଣର ଅସଙ୍ଗତ ଛୁଆଁ ତାହା ଶେଷରେ ଅଦାଲତ ହିଁ ନିର୍ଦ୍ଧାରଣ କରିଥାଆନ୍ତି । ତେବେ ଅସଙ୍ଗତ ଛୁଆଁ ସାଧାରଣତଃ ଦୁଇ ଶ୍ରେଣୀର । ପ୍ରଥମଟି ଯୌନ ଉଦ୍ଦେଶ୍ୟ ରଖି ବିନା ସମ୍ମତିରେ ଜଣକର ଗୁପ୍ତାଙ୍ଗକୁ ଛୁଇଁବା ହୋଇଥିବା ବେଳେ ଦ୍ୱିତୀୟଟିରେ ପୀଡ଼ିତା ଶାରୀରିକ ଆକ୍ରମଣର ଶିକାର ହୋଇ କଟା, ଫଟା, ଆଞ୍ଚୁଡ଼ା ଭଳି ଆଘାତରେ ଆକ୍ରାନ୍ତ ହୋଇଥାଆନ୍ତି ।

ପ୍ରତିବର୍ଷ ଓଡ଼ିଶାରେ ଯୌନ ଶୋଷଣ ଶିକାର ହେଉଥିବା ନାବାଳିକାଙ୍କ ସଂଖ୍ୟା ଉଦବେଗଜନକ ଭାବେ ବୃଦ୍ଧି ପାଇଚାଲିଛି । ତଥ୍ୟ ଅନୁଯାୟୀ ୨୦୧୯ରେ ୧୬୩୫ ଜଣ ନାବାଳିକା ଯୌନ ଶୋଷଣର ଶିକାର ହୋଇଥିଲେ ଯାହା ୨୦୨୦ ଓ ୨୦୨୧ରେ ଯଥାକ୍ରମେ ୧୬୬୪ ଓ ୧୮୭୧କୁ ବୃଦ୍ଧି ପାଇଥିଲା । ଅପରାଧୀଙ୍କ ଘୃଣ୍ୟ ତଥା ରୁଗ୍ଣ ମାନସିକତା, ପିଲାଙ୍କ ଉପରେ ଉପଯୁକ୍ତ ନଜର ରଖିବାରେ ପିତାମାତାଙ୍କ ଅବହେଳା ଓ ସ୍ଥଳ ବିଶେଷରେ କାର୍ଯ୍ୟାନୁଷ୍ଠାନ ଗ୍ରହଣରେ ପୋଲିସ କର୍ତ୍ତୃପକ୍ଷଙ୍କ ତତ୍ପରତାର ଅଭାବ ସଂଖ୍ୟା ବୃଦ୍ଧିର ପ୍ରମୁଖ କାରଣ ବୋଲି କୁହାଯାଇଥାଏ । ଅଧିକାଂଶ କ୍ଷେତ୍ରରେ ଅପରାଧୀ ପୀଡ଼ିତାଙ୍କ ସମ୍ପର୍କୀୟ, ଚିହ୍ନାପରିଚିତ ବା ପଡ଼ୋଶୀ ହୋଇଥିବାରୁ ପିତାମାତାମାନେ ପିଲାଙ୍କ ଚାଲିଚଳନ ଓ ଗତିବିଧି ଉପରେ ଉପଯୁକ୍ତ ଧ୍ୟାନ ଦେବା ସହ ପିଲାଙ୍କୁ ଭଲ ଛୁଆଁ, ଖରାପ ଛୁଆଁ, ସଙ୍ଗତ ଓ ଅସଙ୍ଗତ ଆଚରଣ ସମ୍ପର୍କରେ ଶିକ୍ଷା ଦେବାର ଆବଶ୍ୟକତା ରହିଛି । ଏଥିପାଇଁ ସେମାନେ ‘ସନ୍ତରଣ ପୋଷାକ’ (ସ୍ୱିମ ସୁଟ) ନିୟମକୁ ଆଧାର ଭାବେ ଗ୍ରହଣ କରି ପିଲାମାନଙ୍କୁ ‘ଖରାପ ଛୁଆଁ’ ସମ୍ପର୍କରେ ବୁଝାଇ ପାରିବେ । ଅର୍ଥାତ୍, ଶରୀରର ଯେଉଁ ସମ୍ୱେଦନଶୀଳ ଅଙ୍ଗଗୁଡ଼ିକ ସନ୍ତରଣ ପୋଷାକ ଘୋଡ଼ାଇ ରଖିଥାଏ ଅନ୍ୟ କେହି ସେଗୁଡ଼ିକୁ ଛୁଇଁବା ‘ଖରାପ ଛୁଆଁ’ ଅନ୍ତର୍ଭୁକ୍ତ । ସେଭଳି ଖରାପ ଛୁଆଁକୁ ତତକ୍ଷଣାତ୍ ବିରୋଧ କରି ଦୃଢ଼ କଣ୍ଠରେ ‘ନା’ ବୋଲି ପ୍ରତିବାଦ କରିବାକୁ ପିଲାଦିନରୁ ଶିଖାଯିବା ଆବଶ୍ୟକ । ତଦ୍ଦ୍ୱାରା ଅପରାଧୀ ମାନସିକତାର ଲୋକମାନେ ଆଉ ଅଗ୍ରସର ହେବାକୁ ଦୁଃସାହସ କରନ୍ତେ ନାହିଁ ଓ ମହିଳାଙ୍କ ପ୍ରତି ହେଉଥିବା ଯୌନ ଶୋଷଣର ସଂଖ୍ୟା ହ୍ରାସ ପାଆନ୍ତା ।   

କିଛି ବୟସ୍କ ଓ ପ୍ରତିଷ୍ଠିତ ବ୍ୟକ୍ତି ସର୍ବସମକ୍ଷରେ ମହିଳାଙ୍କ ପ୍ରତି ସ୍ନେହ ପ୍ରଦର୍ଶନ କରିବାକୁ କୁଣ୍ଠିତ ହୁଅନ୍ତି ନାହିଁ । ବିଭିନ୍ନ ସଭାସମିତିରେ ମହିଳାମାନଙ୍କୁ ପୁରସ୍କାର ବା ସମ୍ମାନ ପ୍ରଦାନ କଲାବେଳେ ସେମାନଙ୍କୁ ମହିଳାଙ୍କ ପିଠି ଓ ଗାଲ ଥାପୁଡ଼ାଇବାର ଦେଖାଯାଏ । ଏ ଭଳି ସ୍ପର୍ଶ ‘ଅସଙ୍ଗତ ଛୁଆଁ’ ଶ୍ରେଣୀର ହୋଇପାରେ ବୋଲି ତାଙ୍କ ଦୃଷ୍ଟି ଆକର୍ଷଣ କରାଗଲେ କେହି କେହି ‘ସିଏ ତ ମୋ ଝିଅ ବୟସର କି ନାତୁଣୀ ବୟସର’ କହି କଥାଟିକୁ ହାଲୁକା କରିବାକୁ ଚେଷ୍ଟା କରିଥାଆନ୍ତି । ଧ୍ୟାନ ଦେବା ଉଚିତ ଯେ ମନରେ କୌଣସି ଆବିଳତା ନ ଥିଲେ କି ମହିଳାଜଣକ ପୂର୍ବ ପରିଚିତ ହୋଇଥିଲେ ମଧ୍ୟ ସର୍ବସମକ୍ଷରେ ତାଙ୍କ ପ୍ରତି ସ୍ନେହ ପ୍ରଦର୍ଶନରୁ ବୟସ୍କ ଓ ପ୍ରତିଷ୍ଠିତ ବ୍ୟକ୍ତିମାନେ କ୍ଷାନ୍ତ ରହିବା ଆବଶ୍ୟକ, କାରଣ ବେଳ ପଡ଼ିଲେ ଏଭଳି ଆଚରଣ ପାଇଁ ଜଣକୁ ନିନ୍ଦିତ ଓ ଚରମ ଅସୁବିଧାର ସମ୍ମୁଖୀନ ହେବାକୁ ପଡ଼ିପାରେ ।

ମୁଖ୍ୟତଃ ଝିଅମାନେ ଖରାପ ଛୁଆଁର ଶରବ୍ୟ ହେଉଥିଲେ ବି ସ୍ଥଳ ବିଶେଷରେ ଅଳ୍ପ ବୟସର ପୁଅମାନେ ବି ତାର ଶିକାର ହୋଇଥାଆନ୍ତି । ତେଣୁ ୫ ବର୍ଷ ବୟସରୁ ପିଲାମାନଙ୍କୁ ଭଲ ଛୁଆଁ ଓ ଖରାପ ଛୁଆଁ ମଧ୍ୟରେ ଥିବା ପାର୍ଥକ୍ୟ ସମ୍ପର୍କରେ ସ୍ପଷ୍ଟ ରୂପେ ଶିକ୍ଷା ଦିଆଯିବା ଆବଶ୍ୟକ । ଖରାପ ଛୁଆଁକୁ ବରଦାସ୍ତ ନ କରି ପ୍ରତିବାଦ ଓ ପ୍ରତିରୋଧ କରିବା  ଦରକାର ବୋଲି ସେମାନଙ୍କୁ ଶିଖାଯିବା ଆବଶ୍ୟକ । ଏହି ଦାୟିତ୍ୱଟି ମାଆ ଓ ଅନ୍ୟ ବୟସ୍କ ମହିଳାମାନେ ନିର୍ବାହ କରିପାରିଲେ ସବୁଠାରୁ ଭଲ । ହେଲେ ପ୍ରତିବାଦ ତ ଦୂରର କଥା ଲୋକଲଜ୍ଜା ଯୋଗୁଁ ପାଟି ନଖୋଲି ସହିଯିବା ଲାଗି ଝିଅମାନଙ୍କୁ ଉପଦେଶ ଦିଆଯାଇଥାଏ । ଆଉ କେଉଁ ଝିଅ ପାଟି ଖୋଲିଲେ ସେ ଶିଷ୍ଟାଚାର ଶିଖିନାହିଁ କହି ତା ଚରିତ୍ର ପ୍ରତି ଆକ୍ଷେପ କରାଯାଇଥାଏ । ଏପରି ସ୍ଥିତିରେ ପରିବାର ସ୍ତରରେ ସେଭଳି ଶିକ୍ଷା ଆହରଣ କରିବା ସମ୍ଭବ ହେଉ ନଥିବାରୁ ସ୍କୁଲ ସ୍ତରରେ ଏହି ଶିକ୍ଷା ପ୍ରଦାନ କରାଯାଇପାରିବ । ନିକଟରେ ପୁଣେ ସହରର ଏକ ସ୍କୁଲରେ ଜଣେ ଶିକ୍ଷୟିତ୍ରୀ ଝିଅମାନଙ୍କୁ ଖେଳ ମାଧ୍ୟମରେ ଭଲ ଛୁଆଁ ଓ ଖରାପ ଛୁଆଁ ମଧ୍ୟରେ ଥିବା ପାର୍ଥକ୍ୟକୁ ବୁଝାଉଥିବା ଓ ଖରାପ ଛୁଆଁ କ୍ଷେତ୍ରରେ କିପରି ବିରୋଧ କରିବାକୁ ହୁଏ ତାହା ଶିଖାଉଥିବାର ଏକ ଭିଡିଓ ଭାଇରାଲ ହେବା ପରେ ଶିକ୍ଷୟିତ୍ରୀଙ୍କ ଏହି ଅଭିନବ ଉଦ୍ୟମ ବେଶ୍ ପ୍ରଶଂସିତ ହୋଇଥିଲା । ଓଡ଼ିଶାର ସ୍କୁଲଗୁଡ଼ିକରେ ଏ ସମ୍ପର୍କରେ ଶିକ୍ଷାଦାନ କରିବା ଲାଗି ତୁରନ୍ତ ବିଧିବଦ୍ଧ ବ୍ୟବସ୍ଥା କରାଯିବା ଆବଶ୍ୟକ । କାରଣ ସଚେତନତା ଅଭାବରେ ପିଲାମାନେ ଅହରହ ଖରାପ ଛୁଆଁର ଶିକାର ହେଉଥିଲେ ବି ମୁହଁ ଖୋଲିବାକୁ ସାହସ କରିନଥାଆନ୍ତି । ସ୍ଥଳ ବିଶେଷରେ ସେମାନଙ୍କ ପ୍ରତିବାଦହୀନତା ଅପରାଧୀକୁ ଏପରି ସାହସ ପ୍ରଦାନ କରିଥାଏ ଯେ ସେ ଦୁଷ୍କର୍ମ ଭଳି ଅପରାଧ କରିବାକୁ ବି ପଛାଇନଥାଏ । ଆଦିବାସୀ ଅଧ୍ୟୁଷିତ ଅଞ୍ଚଳଗୁଡ଼ିକରେ ଥିବା ଅନେକ କନ୍ୟାଶ୍ରମରେ ଦୁଷ୍କର୍ମର ଶିକାର ଛାତ୍ରୀମାନେ କୁଆଁରୀ ମାଆ ହେଉଥିବାର ଖବରମାନ ଶୁଣିବାକୁ ମିଳିବା ସେହି ସମସ୍ୟାର ଗମ୍ଭୀରତାକୁ ପୁଷ୍ଟି କରିଥାଏ । ତେଣୁ ଖରାପ ଛୁଆଁକୁ ଗ୍ରହଣୀୟ ବୋଲି ଧରି ନ ନେଇ ସରକାରୀ ସ୍ତରରେ ତାକୁ ପ୍ରତିହତ କରିବା ଲାଗି ତତ୍ପରତା ପ୍ରକାଶ ପାଇବା ସହ ସାମାଜିକ ସ୍ତରରେ ତା' ବିରୋଧରେ ସ୍ୱର ତୀବ୍ର ହେଲେ ମହିଳା ଓ ଶିଶୁମାନଙ୍କ ପ୍ରତି ହେଉଥିବା ବିଭିନ୍ନ ପ୍ରକାର ଅପରାଧର ସଂଖ୍ୟା କ୍ରମଶଃ ହ୍ରାସ ପାଇପାରନ୍ତା । ପୀଡ଼ିତା ମହିଳାମାନେ ନୀରବତା ଅବଲମ୍ୱନ ନକରି ସାହସର ସହିତ ଅପରାଧୀଙ୍କ ଦୁଷ୍କୃତି ବିରୋଧରେ ମୁଖର ହେବାକୁ ପ୍ରୋତ୍ସାହିତ କରାଯିବାର ମଧ୍ୟ ଆବଶ୍ୟକତା ରହିଛି । 

Published in Sambad on November 18, 2023