Skip to main content

ବାଇଶରେ ଚାଷୀଙ୍କ ଆୟ ଦୁଇ ଗୁଣ ହେବ ?

ଫେବୃଆରି ୨୦୧୬ରେ ପ୍ରଧାନମନ୍ତ୍ରୀ ଚାଷୀର ଆୟ ୨୦୨୨ ସୁଦ୍ଧା ଡବଲ ହେବାର ଘୋଷଣା କରିବା ପରେ କେନ୍ଦ୍ରରୁ ରାଜ୍ୟ ପର୍ଯ୍ୟନ୍ତ କମିଟିମାନ ବସି ବିଶେଷଜ୍ଞଙ୍କୁ ନେଇ ରଣନୀତି ପ୍ରସ୍ତୁତ ହେବାକୁ ଲାଗିଲା । ସରକାରଙ୍କ ତରଫରୁ ବିଭିନ୍ନ ପଦକ୍ଷେପ ନିଆଗଲା । ଏ ସବୁରେ ଚାଷୀଙ୍କ ଆୟ କେତେ ବଢିଲା ତାହା ତ ଜଣା ନାହିଁ, ବରଂ କୃଷି ସଙ୍କଟ ଗମ୍ଭୀର ହୋଇ ସାରା ଦେଶରୁ ନିୟମିତ ଭାବେ ଚାଷୀ ଆତ୍ମହତ୍ୟାର ଖବରମାନ ଶୁଣିବାକୁ ମିଳୁଛି । ଇତି ମଧ୍ୟରେ ପୁଣି ଥରେ ବିଜେପିର ନିର୍ବାଚନୀ ଘୋଷଣା ପତ୍ରରେ ୨୦୨୨ ସୁଦ୍ଧା ଦେଶରେ ଚାଷୀଙ୍କ ଆୟ ଡବଲ କରାଯିବ ବୋଲି ଦୋହରାଯିବା ପରେ ଏହି ସମୟ ମଧ୍ୟରେ ଚାଷୀଙ୍କ ଆୟ ଡବଲ ହେବାର ସମ୍ଭାବନା କେତେ ଅଧିକ ବା କ୍ଷୀଣ ତାହା ତର୍ଜମା ହେବାର ଆବଶ୍ୟକତା ରହିଛି ।

ଚାଷୀଙ୍କ ଆୟ ଡବଲ ହେବା ଘୋଷଣା ପରେ ଏ ଯାଏଁ ସ୍ପଷ୍ଟ କରାଯାଇ ନାହିିଁଁ ଏହି ଆୟ ବୃଦ୍ଧି ନାମମାତ୍ର (ନୋମିନାଲ ଟର୍ମ) ଭାବେ ହେବ ନା ବାସ୍ତବ (ରିଅଲ ଟର୍ମ) ଭାବେ ହେବ । ଉଭୟଙ୍କ ମଧ୍ୟରେ ଫରକ ହେଲା ନାମମାତ୍ର ବୃଦ୍ଧିରେ ମୁଦ୍ରାସ୍ଫୀତିକୁ ବିଚାରକୁ ନିଆଯାଇ ନଥାଏ । ଫଳରେ ପରିମାଣ ଦୃଷ୍ଟିରୁ ଆୟ ବୃଦ୍ଧି ପାଇଲେ ମଧ୍ୟ ମୁଦ୍ରାସ୍ଫୀତି ଯୋଗୁ ସେହି ଟଙ୍କାର କ୍ରୟ ଶକ୍ତି କମ ହୋଇଥିବାରୁ ଚାଷୀ ପ୍ରକୃତରେ ସେତେଟା ଲାଭାନ୍ୱିତ ହୋଇ ପାରି ନଥାଏ । ବର୍ତ୍ତମାନ ୨୦୧୧-୧୨ର ସ୍ଥିର ମୂଲ୍ୟ ଆଧାରରେ ରିଅଲ ଟର୍ମରେ ଅଭିବୃଦ୍ଧିକୁ ଆକଳନ କରାଯାଉଥିବାରୁ ଏହି ପଦ୍ଧତିରେ ଚାଷୀର ଆୟ ଦୁଇଗୁଣ ହେବାକୁ ହେଲେ ଛଅ ବର୍ଷରୁ ଅଧିକ ସମୟ ଲାଗିବ । ତେଣୁ ସମ୍ଭବତଃ ସରକାର ପୂର୍ବୋକ୍ତ ନୋମିନାଲ ଟର୍ମରେ ଚାଷୀଙ୍କ ଆୟ ଡବଲ କରିବା କଥା ଚିନ୍ତା କରୁଥାଇ ପାରନ୍ତି । ଛଅ ବର୍ଷ ମଧ୍ୟରେ (୨୦୧୬ରୁ ୨୦୨୨) ଏହି ଲକ୍ଷ୍ୟ ହାସଲ କରିବା ପାଇଁ ଚାଷୀଙ୍କ ଆୟ ବାର୍ଷିକ ୧୨.୩ ପ୍ରତିଶତ ହାରରେ ବୃଦ୍ଧି ପାଇବା ଆବଶ୍ୟକ । ମାତ୍ର ବିଗତ ୭ଟି ତ୍ରିମାସରେ କୃଷିର ବିକାଶ ଦର ଦୁଇ ଅଙ୍କ ବିଶିଷ୍ଟ ହୋଇ ପାରିନାହିଁ । ଅପ୍ରେଲ ୨୦୧୪ରୁ ଏ ଯାଏଁ ହାରାହାରି କୃଷି ଅଭିବୃଦ୍ଧି ହାର ନାମମାତ୍ର ଭାବେ ୮ ପ୍ରତିଶତରୁ ସାମାନ୍ୟ ଅଧିକ ହେଉଥିବାରୁ ୨୦୨୨ ସୁଦ୍ଧା ଆୟ ଡବଲ ହେବାର କୌଣସି ସମ୍ଭାବନା ନାହିଁ । ଅନ୍ୟ ପକ୍ଷରେ ଅକ୍ଟୋବରରୁ ଡିସେମ୍ବର ୨୦୧୮ ତ୍ରିମାସରେ ବାସ୍ତବ କୃଷି ଅଭିବୃଦ୍ଧି ହାର ୨.୬୭ ପ୍ରତିଶତ ଥିଲା, ଯାହା ଗତ ୧୧ଟି ତ୍ରିମାସ ମଧ୍ୟରେ ସର୍ବନିମ୍ନ । ଏହା ହିଁ ଦେଶରେ କୃଷି ସଙ୍କଟର ଏକ ପ୍ରଧାନ ସୂଚକ । ଉଦବେଗର ବିଷୟ, ଉପରୋକ୍ତ ତ୍ରିମାସରେ ନାମମାତ୍ର କୃଷି ଅଭିବୃଦ୍ଧି ହାର ମାତ୍ର ୨.୦୪ ପ୍ରତିଶତ ଥିଲା, ଯାହା ବାସ୍ତବ ଅଭିବୃଦ୍ଧି ହାର ଅପେକ୍ଷା ମଧ୍ୟ କମ । ନାମମାତ୍ର ଅଭିବୃଦ୍ଧି ହାର ବାସ୍ତବ ହାରଠାରୁ କମ ହେବାର ଅର୍ଥ ମୁଦ୍ରାସ୍ଫୀତି ଦର ନ ବଢି କମି ଯାଇଛି, ଅର୍ଥାତ କୃଷିଜାତ ଦ୍ରବ୍ୟର ମୂଲ୍ୟ ହ୍ରାସ ପାଇଛି । ଫଳରେ ଚାଷୀ ତାର ଉତ୍ପାଦିତ କୃଷିଜାତ ଦ୍ରବ୍ୟର କମ ମୂଲ୍ୟ ପାଉଛି । ଏହା ଉଭୟ ଚାଷୀ ଓ ସରକାରଙ୍କ ପାଇଁ ନିଶ୍ଚିତ ଭାବେ ସୁସମାଚାର ନୁହେଁ, କାରଣ ଏ ପରିସ୍ଥିତିରେ ଆୟ ନ ବଢି କମି ଯିବାର ସମ୍ଭାବନା ଅଧିକ । କୁହାଯାଏ, କୃଷି କ୍ଷେତ୍ରରେ ଦେଖା ଦେଇଥିବା ଏହି ସଙ୍କଟଜନକ ସ୍ଥିତିର ଗମ୍ଭୀରତାକୁ ଉପଲବ୍ଧି କରି ତାକୁ ମୁକାବିଲା କରିବା ପାଇଁ, ସାଧାରଣତଃ ଲୋକଙ୍କୁ ମାଗଣା କିଛି ବାଣ୍ଟିବା ସପକ୍ଷରେ ନଥିବା ମୋଦି, ପିଏମ-କିସାନ ସମ୍ମାନନିଧି ଯୋଜନା ମାଧ୍ୟମରେ ଚାଷୀଙ୍କୁ ବାର୍ଷିକ ତିନୋଟି କିସ୍ତିରେ ଛଅ ହଜାର ଟଙ୍କା ଦେବା କଥା ଘୋଷଣା କରିିବାକୁ ବାଧ୍ୟ ହେଲେ ।
  
ଏନଏସଏସଓ ପ୍ରସ୍ତୁତ ନମୁନା ସର୍ଭେକ୍ଷଣ ଅନୁଯାୟୀ ୨୦୦୨-୦୩ ଓ ୨୦୧୨-୧୩ ମଧ୍ୟରେ ଭାରତରେ କୃଷି ଅଭିବୃଦ୍ଧି ହାର ନାମମାତ୍ର (ନୋମିନାଲ)ଭାବେ ୧୧.୭୬ ପ୍ରତିଶତ ହୋଇଥିବା ବେଳେ ବାସ୍ତବ ପକ୍ଷେ (ରିଅଲ ଟର୍ମ) ୫.୨୦ ପ୍ରତିଶତ ଥିଲା । ଏହି ହାରରେ ଅଭିବୃଦ୍ଧି ଜାରି ରହିଲେ ଚାଷୀ ପରିବାରର ଆୟ ନାମମାତ୍ର ଭାବେ ଦୁଇଗୁଣ ହେବାକୁ ୬.୨୪ ବର୍ଷ ଓ ବାସ୍ତବ ପକ୍ଷେ ୧୩.୫୬ ବର୍ଷ ଲାଗିବା କଥା । ଉଲ୍ଲେଖଯୋଗ୍ୟ, ଅନ୍ୟ ରାଜ୍ୟଙ୍କ ତୁଳନାରେ ମଧ୍ୟପ୍ରଦେଶ, ରାଜସ୍ଥାନ ଓ ଓଡିଶାର କୃଷି ଅଭିବୃଦ୍ଧି ହାର ଦୁଇ ଅଙ୍କରୁ ଅଧିକ ହୋଇଥିବାରୁ ଏହି ରାଜ୍ୟଗୁଡିକରେ ଛଅ ବର୍ଷ ପୂର୍ବରୁ ମଧ୍ୟ ନାମମାତ୍ର ଭାବେ ଚାଷୀଙ୍କ ଆୟ ଡବଲ ହେବା କିଛି ବିଚିତ୍ର ନୁହେଁ । ତେବେ ଓଡିଶା ଚାଷୀଙ୍କ ଆୟ ସର୍ବ ଭାରତୀୟ ସ୍ତରରେ ଚାଷୀଙ୍କ ଆୟ ତୁଳନାରେ ଏତେ କମ ଯେ ଏଠାରେ ଆୟ କେବଳ ଡବଲ ହେବା ଯଥେଷ୍ଟ ନୁହେଁ । ଉଦାହରଣ ସ୍ୱରୂପ, ୨୦୧୫-୧୬ର ଆୟକୁ ଆଧାର କରି ଦେଶରେ ଚାଷୀଙ୍କ ହାରାହାରି ବାର୍ଷିକ ଆୟ ୯୬,୭୦୩ ଟଙ୍କା ଥିବା ବେଳେ ୨୦୨୨ ସୁଦ୍ଧା ତାକୁ ବଢାଇ ୨,୧୯,୭୨୪ ଟଙ୍କା କରିବାର ଲକ୍ଷ୍ୟ ରଖାଯାଇଛି । ଅନ୍ୟ ପକ୍ଷରେ ଓଡିଶାର ଚାଷୀଙ୍କ ଆୟ ୨୦୧୫-୧୬ରେ ପ୍ରାୟ ୭୫,୦୦୦ ଟଙ୍କା ଥିବାରୁ ୨୦୨୨ରେ ତାହା ଦୁଇଗୁଣ ହେଲେ ୧,୫୦,୦୦୦ ଟଙ୍କାରେ ପହଞ୍ଚିବ, ଯାହା ସର୍ବ ଭାରତୀୟ ଚାଷୀଙ୍କ ହାରାହାରି ଆୟ ତୁଳନାରେ ପ୍ରାୟ ସତୁରୀ ହଜାର ଟଙ୍କା କମ ହେବ । ତେଣୁ ଓଡିଶାର ଚାଷୀଙ୍କ ଆୟକୁ ସର୍ବ ଭାରତୀୟ ସ୍ତରରେ ଚାଷୀଙ୍କ ଆୟ ସହ ସମାନ କରିବାକୁ ହେଲେ ଅଧିକ କିଛି ପଦକ୍ଷେପ ନେବାକୁୁୁ ହେବ ।
   
ଏନଏସଏସଓର ୨୦୧୨-୧୩ର ସର୍ଭେ ଅନୁଯାୟୀ ଓଡିଶାରେ ଚାଷୀ ପରିବାରର ଆୟର ହାରାହାରି ୨୮ ପ୍ରତିଶତ କୃଷି ଓ ୨୬ ପ୍ରତିଶତ ପଶୁପାଳନରୁ ହୋଇଥିବା ବେଳେ ୧୧ ପ୍ରତିଶତ ଅଣ କୃଷି କ୍ଷେତ୍ରରୁ ଓ ୩୫ ପ୍ରତିଶତ ମଜୁରୀ ଓ ଦରମାରୁ ହୋଇଥିଲା । ପ୍ରତି ରାଜ୍ୟରେ ଚାଷୀ ପରିବାରର ଆୟ ଡବଲ କରିବା ପାଇଁ ପ୍ରସ୍ତୁତ ରଣନୀତି (ଷ୍ଟ୍ରାଟେଜି)ରେ ପ୍ରାୟତଃ ଚାଷରୁ ଆୟ ଡବଲ କରିବା ଉପରେ ଗୁରୁତ୍ୱ ଦିଆଯାଇଛି ହେଲେ ଚାଷୀର ଆୟ ଡବଲ ହେବା ଉପରେ ଗୁରୁତ୍ୱ ଦିଆଯାଇଥିଲା ପରି ମନେ ହେଉନାହିଁ । ଚାଷରୁ ଆୟ ଡବଲ ହେବା ଓ ଚାଷୀର ଆୟ ଡବଲ ହେବା ଏକା କଥା ନୁହେଁ । ଚାଷରୁ ଆୟ ଡବଲ ହେଲେ ବି ଚାଷୀର ଆୟ ଡବଲ ହୋଇ ନ ପାରେ । ଅର୍ଥାତ, ରଣନୀତିରେ ଅଣ-କୃଷି କ୍ଷେତ୍ର, ମଜୁରୀ, ଦରମା ଓ ଅନ୍ୟ ଅଣ ପାରମ୍ପରିକ ରୋଜଗାର ମାଧ୍ୟମରେ ଚାଷୀ ପରିବାରର ଆୟ ବଢାଇବା ଦିଗରେ କୌଣସି ଚିନ୍ତାଧାରା ବା ପଦକ୍ଷେପ ବାବଦରେ ବିଶେଷ ଉଲ୍ଲେଖ ନାହିଁ । ଏ ସଂକ୍ରାନ୍ତରେ ଓଡିଶାର ରଣନୀତି ପୁସ୍ତିକାଟିକୁ ଅନୁଧ୍ୟାନ କଲେ ତାହା ଭଲ ଭାବେ ବୁଝି ହେବ । ଏହାର ଅନ୍ୟତମ କାରଣ ହେଉଛି, ରଣନୀତି ପ୍ରସ୍ତୁତିରେ କେବଳ କୃଷି ଓ ଆନୁଷଙ୍ଗିକ କ୍ଷେତ୍ରର ବିଶେଷଜ୍ଞମାନଙ୍କୁ ସାମିଲ କରାଯାଇଥିବା ବେଳେ ଚାଷୀଙ୍କ ଆୟ ବଢାଇବା ପାଇଁ ଅଣକୃଷି ଓ ଅନ୍ୟ କ୍ଷେତ୍ରର ବିଶେଷଜ୍ଞଙ୍କଠାରୁ ପରାମର୍ଶ ନିଆ ଯାଇନାହିଁ ।
  
ଚାଷରୁ ଚାଷୀଙ୍କ ଆୟ ଆଶାନୁରୂପ ନ ବଢିବାର କାରଣଗୁଡିକ ମଧ୍ୟରୁ ପ୍ରମୁଖ କେତେ ଗୋଟି ହେଉଛି, ଚାଷୀଙ୍କୁ ବଜାରରୁ ତାଙ୍କ ଉତ୍ପାଦିତ ଦ୍ରବ୍ୟର ଉଚିତ ମୂଲ୍ୟ ନ ମିଳିବା, ଏପରିକି ଘୋଷିତ ଏମଏସପିରେ ମଧ୍ୟ ଚାଷୀଙ୍କ ଦ୍ରବ୍ୟ ସଂଗୃହୀତ ହୋଇ ନ ପାରିବା, ସାର, ଔଷଧ, ବିହନ ଆଦିର ଅତ୍ୟଧିକ ଦର, କୃଷିବୀମାର ଅପେକ୍ଷିତ ପ୍ରସାର ହୋଇ ନ ପାରିବା, କୃଷିଜାତ ଦ୍ରବ୍ୟର ବିକ୍ରିବଟା ପାଇଁ ଆବଶ୍ୟକୀୟ ଭିତ୍ତିଭୂମିର ଅଭାବ । ଅତୀତରେ କୃଷିର ଅଭିବୃଦ୍ଧି ହାର ଏତେ କମ ହୋଇ ଆସିଛି ଯେ ତାକୁ ବାର୍ଷିକ ୧୨ ପ୍ରତିଶତ ସ୍ତରକୁ ବଢାଇବା ବାସ୍ତବିକ ଏକ ବଡ ଆହ୍ୱାନ । ଚାଷୀଙ୍କ ଆୟ ଡବଲ କରିବାକୁ ଏକ ସଙ୍ଗେ ଗୁଡିଏ ପଦକ୍ଷେପ ନେବାକୁ ହେବ । ସେମାନଙ୍କ ଉତ୍ପାଦନ, ଉତ୍ପାଦିକା ବୃଦ୍ଧି ଓ ଅଧିକ ଜମିକୁ ଚାଷ ଅନ୍ତର୍ଭୁକ୍ତ କରିବା ସହ ସେମାନେ ଯେପରି ଉତ୍ପାଦିତ ସାମଗ୍ରୀର ଭଲ ଦାମ ପାଇ ପାରିବେ, ତାହା ସୁନିଶ୍ଚିତ କରିବାକୁ ହେବ । ବିଭିନ୍ନ ଅଞ୍ଚଳରେ ଉପଲବ୍ଧ ସଂଯୁକ୍ତି ବ୍ୟବସ୍ଥାକୁ ଆଧାର କରି କେଉଁ ଚାଷ ପଦ୍ଧତି ସେମାନଙ୍କ ଆୟ ବୃଦ୍ଧି ଓ ଆୟରେ ସ୍ଥିରତା ଆଣିବାରେ ସହାୟକ ହେବ, ତାହା ସେମାନଙ୍କୁ ବାଛିବାକୁ ହେବ । କେଉଁ ବାଟରେ ସାର, ଔଷଧ, ବିହନ ଆଦିରେ ହେଉଥିବା ଖର୍ଚ୍ଚକୁ କମ କରି ଚାଷର ଖର୍ଚ୍ଚ କମାଇ ହେବ ସେ ନେଇ ଚିନ୍ତା କରିବାକୁ ହେବ । ଦରକାର ହେଲେ ଜୈବିକ କୃଷି କଥା ମଧ୍ୟ ବିଚାର କରାଯାଇପାରେ । ସେହିପରି ଚାଷୀଙ୍କ ଆୟରେ ସ୍ଥିରତା ଆଣିବା ଓ ଚାଷ ପ୍ରତି ଥିବା ବିପଦକୁ କମ କରିବା ପାଇଁ ପାରମ୍ପରିକ ଉପାୟଗୁଡିକୁ କାମରେ ଲଗାଇବା ସହିତ ଜଳବାୟୁ ପରିବର୍ତ୍ତନର କୁପ୍ରଭାବକୁ ସାମନା କରିବା ପାଇଁ ପୂର୍ବ ପ୍ରସ୍ତୁତି ଓ କୃଷିବୀମାକୁ ବ୍ୟାପକ କରିବାର ଆବଶ୍ୟକତା ରହିଛି ।

ଇତି ମଧ୍ୟରେ ଚାଷୀଙ୍କ ଆୟ ଡବଲ କରିବା ପାଇଁ କେନ୍ଦ୍ର ସରକାରଙ୍କ ଦ୍ୱାରା ଗଠିତ କମିଟି ପ୍ରଦାନ କରିଥିବା ଏକ ‘ବ୍ୟାପକ ନୀତି ସୁପାରିଶ’ ପ୍ରକାଶିତ ହୋଇଛି । ଅବଶ୍ୟ ବିଭିନ୍ନ ରାଜ୍ୟ ନିଜ ସ୍ଥିତି ଅନୁଯାୟୀ ରଣନୀତିମାନ ପ୍ରସ୍ତୁତ କରିଛନ୍ତି, ଯେଉଁଥିରେ ଅଧିକ ଅଞ୍ଚଳକୁ ଜଳସେଚନ ଯୋଗାଇ ଦେବା, ଧାନ ଭଳି କମ ଲାଭଜନକ ଚାଷକୁ କମାଇ ଅଧିକରୁ ଅଧିକ ଅର୍ଥକରୀ ଫସଲ କରିବା ପାଇଁ ଚାଷୀଙ୍କୁ ପ୍ରୋତ୍ସାହିତ କରିବା, ଚାଷୀମାନେ କିପରି ଉଚିତ ମୂଲ୍ୟ ପାଇପାରିବେ ସେଥିପାଇଁ ପଦକ୍ଷେପ ନେବା, ବୈଷୟିକ ଜ୍ଞାନକୌଶଳର ବିକାଶ କରିବା, ମତ୍ସ୍ୟ ଓ ପଶୁପାଳନକୁ ଗୁରୁତ୍ୱ ଦେବା, ଅଣକୃଷି କ୍ଷେତ୍ରରୁ ରୋଜଗାରର ସମ୍ଭାବନାକୁ ଖୋଜିବା ଆଦି ସାମିଲ । ଏହି ପ୍ରସଙ୍ଗରେ କୃଷି କ୍ଷେତ୍ରରେ ଏକ ଉନ୍ନତ ରାଜ୍ୟ ବୋଲି ବିବେଚିତ ମଧ୍ୟ ପ୍ରଦେଶ ପ୍ରସ୍ତୁତ କରିଥିବା ରଣନୀତିକୁ ଅନୁଧ୍ୟାନ କରାଯାଇପାରେ । ତାଙ୍କ ପ୍ରସ୍ତୁୁତ ରଣନୀତି ଅନୁଯାୟୀ, କୃଷିକାର୍ଯ୍ୟରେ ବ୍ୟବହୃତ ସାର, ବିହନ, ଔଷଧ ଭଳି ଇନପୁଟ ଖର୍ଚ୍ଚକୁ କମାଇ ଚାଷୀର ଆୟ ୧୫ ପ୍ରତିଶତ ବଢାଯିବ । ସେହିପରି ଉତ୍ପାଦନ ବୃଦ୍ଧି ମାଧ୍ୟମରେ ୩୦ ପ୍ରତିଶତ, କୃଷି କ୍ଷେତ୍ର ବୃଦ୍ଧି ମାଧ୍ୟମରେ ୧୪ ପ୍ରତିଶତ, ଅର୍ଥକରୀ ଫସଲ ଚାଷ (ଡାଇଭର୍ସିଫିକେସନ) ମାଧ୍ୟମରେ ୨୦ ପ୍ରତିଶତ, ଅମଳ ପରେ ହେଉଥିବା କ୍ଷତିକୁ କମାଇ ୬ ପ୍ରତିଶତ ଓ ଚାଷୀଙ୍କୁ ଉତ୍ପାଦିତ ଦ୍ରବ୍ୟର ଉଚିତ ମୂଲ୍ୟ ସୁନିଶ୍ଚିତ କରିବା ମାଧ୍ୟମରେ ୧୫ ପ୍ରତିଶତ, ଏହିପରି ଭାବେ ଚାଷୀର ଆୟକୁ ଡବଲ କରିବାର ଲକ୍ଷ୍ୟ ଧାର୍ଯ୍ୟ ହୋଇଛି ।

ଅପ୍ରେଲ ୨୦୧୪ ରୁ ମାର୍ଚ୍ଚ ୨୦୧୯ ପର୍ଯ୍ୟନ୍ତ କୃଷିର ବାସ୍ତବ (ରିଅଲ ଟର୍ମ) ହାରାହାରି ଅଭିବୃଦ୍ଧି ହାର ବାର୍ଷିକ ୨.୯ ପ୍ରତିଶତରେ ସୀମିତ ରହିଛି । ଯଦି ଏହି ହାରରେ କୃଷି ଅଭିବୃଦ୍ଧି ଜାରି ରହେ ତେବେ ଚାଷୀର ଆୟ ବାସ୍ତବ ଭାବେ ଡବଲ ହେବାକୁ ୨୦୨୨ ନୁହେଁ ବରଂ ୨୦୪୦ ଯାଏଁ ଅପେକ୍ଷା କରିବାକୁ ପଡିପାରେ । ତେଣୁ ଚାଷୀ ପରିବାରର ଆୟ ଡବଲ କରିବାକୁ ହେଲେ କେବଳ ଚାଷ ଉପରେ ଗୁରୁତ୍ୱ ନ ଦେଇ ପରିବାରର କିଛି ସଦସ୍ୟଙ୍କୁ କିପରି ଅଣକୃଷି କାର୍ଯ୍ୟ, ମଜୁରୀ, ଚାକିରୀ ତଥା ଅନ୍ୟ ଅଣପାରମ୍ପରିକ ଆୟ ଉତ୍ସ ମାଧ୍ୟମରେ ରୋଜଗାର ସୁଯୋଗ ଯୋଗାଇ ପରିବାରର ଆୟକୁ ବଢାଇ ହେବ, ସେଥିପ୍ରତି ଧ୍ୟାନ ଦେବାକୁ ହେବ ।

ଚାଷୀଙ୍କ ଆୟ ଡବଲ କରିବା ପାଇଁ ଯେଉଁ ଛଅ ବର୍ଷର ସମୟ ସୀମା ଧାର୍ଯ୍ୟ କରାଯାଇଥିଲା, ସେଥିରୁ ତିନି ବର୍ଷ, ଅର୍ଥାତ ଅଧା ସମୟ ଅତିକ୍ରାନ୍ତ । ଘୋଷିତ ଲକ୍ଷ୍ୟ ହାସଲର ଏକ ମଧ୍ୟବର୍ତ୍ତୀକାଳୀନ ସମୀକ୍ଷା ହୋଇ ନୀତି ବା କ୍ରିୟାନ୍ୱୟନରେ କଣ ଭୁଲ ଭଟକା ରହିଗଲା ତାହା ଚିହ୍ନଟ କରି ପ୍ରତିକାରାତ୍ମକ ପଦକ୍ଷେପ ନେବା ଉଚିତ । ଏହି ସମୟ ମଧ୍ୟରେ ଚାଷୀଙ୍କ ଆୟ କେତେ ବୃଦ୍ଧି ପାଇଛି ତାହା ସର୍ବ ସାଧାରଣରେ ଉପସ୍ଥାପିତ ହେଲେ ନିର୍ଦ୍ଧାରିତ ଲକ୍ଷ୍ୟ ହାସଲର ଆମେ କେତେ ନିକଟତର ହୋଇଛନ୍ତି, ତାହା ଜଣା ପଡନ୍ତା । ତେବେ ୨୦୨୨ ସୁଦ୍ଧା ଚାଷୀଙ୍କ ଆୟ ଡବଲ ହେବା ଘୋଷଣା ପରେ ଏଥିପାଇଁ ନୀତି ସୁପାରିଶ କରିବାକୁ ପ୍ରାୟ ତିନି ବର୍ଷ ଲାଗିଗଲା । ଏଥିପାଇଁ ପ୍ରସ୍ତୁତ ରଣନୀତିରେ ଉଭୟ ସରକାର ଏବଂ ଚାଷୀଙ୍କ ପାଇଁ କାର୍ଯ୍ୟ ଥିଲେ ମଧ୍ୟ ରଣନୀତି ପ୍ରସ୍ତୁତିରେ ସାମିଲ ହୋଇଥିବା ମୁଷ୍ଟିମେୟ ସରକାରୀ କର୍ମଚାରୀ, କୃଷି ବିଜ୍ଞାନୀ, ଅନୁଷ୍ଠାନ ଓ ଏନଜିଓଙ୍କୁୁ ବାଦ ଦେଲେ ସାଧାରଣ ଚାଷୀମାନେ ରଣନୀତି ସମ୍ପର୍କରେ ସମ୍ପୂର୍ଣ୍ଣ ଅଜ୍ଞ । ଯାହାଙ୍କ ଆୟ ଡବଲ ହେବା କଥା କୁହାଯାଉଛି, ସେମାନେ ଏ ପର୍ଯ୍ୟନ୍ତ ଜାଣନ୍ତି ନାହିଁ ଯେ ତାହା କିପରି ହେବ ଓ ସେଥିରେ ସେମାନଙ୍କ ଭୂମିକା କଣ । ଅର୍ଥାତ୍, ଏ ସଂକ୍ରାନ୍ତରେ ଚାଷୀଙ୍କ ସଚେତନତା ବଢାଇ ଏହାକୁ ଏକ ଜନ ଆନ୍ଦୋଳନରେ ପରିଣତ କରିବାକୁ ହେବ । ଅନ୍ୟଥା, ବାଇଶ ଆସି ପଳାଇଯିବ, ହେଲେ ଚାଷୀ ତାର ଆୟ ଡବଲ ହେବାକୁ ଅନାଇ ରହିଥିବ ।

Published in Odia Daily Sambad on May 08, 2019

Comments

  1. Sir, very well written. Please send the English version to times of India. It would give you natinal level prominence . Use Google translators for conversion to different language for access by wide range of readers.

    ReplyDelete
  2. Really a well researched and nicely structured article.
    Kudos to you and all the best for your 'Pen'.

    ReplyDelete
  3. Odisha is well placed in the national map. We can follow the practices of MP to boost our farm income. The procurement practices of MP is too good. Mobile App is widely used by farmers of MP to ensure better prices for their produce.

    ReplyDelete

Post a Comment

Popular posts from this blog

‘ଦାଦନ’ ନୁହେଁ କି ‘ପ୍ରବାସୀ’ ନୁହେଁ

“ମୁଁ ଜଣେ ଓଏଏସ ଅଫିସର । ତୋ’ ଭଳି କେଉଁଠିକୁ ଯାଇ ଦାଦନ ଖଟୁ ନାହିଁ ।” କିଛି ବାହାର ରାଜ୍ୟରେ କାମ କରି ଓଡିଶାକୁ ଫେରିଥିବା ଶ୍ରମିକଙ୍କ ପ୍ରତି ଜଣେ ଉତକ୍ଷିପ୍ତ ବିଡିଓଙ୍କର ଏ ଭଳି ଆପ ତ୍ତି ଜନକ କଟୂ ମନ୍ତବ୍ୟ ଭାଇରାଲ ହେବା ପରେ ବିଭିନ୍ନ କାରଣରୁ ତାହା ରାଜ୍ୟବାସୀଙ୍କୁ ବ୍ୟଥିତ ଓ ସ୍ତମ୍ଭୀଭୂତ କଲା । ଏଭଳି ଶ୍ରମିକଙ୍କ ଘରବାହୁଡାର ପ୍ରାରମ୍ଭିକ ପର୍ଯ୍ୟାୟରେ କିଛି ସରକାରୀ ଅଧିକାରୀଙ୍କଠାରୁ ଆରମ୍ଭ କରି ସାଧାରଣ ଲୋକଙ୍କ ପର୍ଯ୍ୟନ୍ତ ସେମାନଙ୍କୁ ଦାଦନ ଶ୍ରମିକ ଭାବେ ସମ୍ବୋ ଧନ  କରି ତା ଚ୍ଛ ଲ୍ୟ କରିବା ସହିତ ‘ଦାଦନ’ ଶବ୍ଦଟିକୁ ଏକ ଗାଳି ରୂପେ ବ୍ୟବହାର କରିଥିବାର ଅନେକ ଘଟଣା ଦେଖିବାକୁ ମିଳିଥିଲା । ଏମାନେ ଫେରିବା ପରେ ଓଡିଶାରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ଯୋଗୁ ସ୍ଥାନୀୟ ଲୋକେ ସଂକ୍ରମିତ ହେବାର ଭୟ ଏହାର ମୁଖ୍ୟ କାରଣ ହୋଇଥିଲା ବେଳେ ସ୍ଥଳ ବିଶେଷରେ ଫେରିଥିବା କେତେକଙ୍କ ଆଚରଣ ମଧ୍ୟ ସେଥିପାଇଁ ଖୋରାକ ଯୋଗାଇଥିଲା । “ଓଡିଶାକୁ ଫେରିବା ପାଇଁ ସରକାରଙ୍କୁ କାକୁତି ମିନତି ହୋଇ ହାତ ଯୋଡି ଭିଡିଓ ପଠାଉଥିଲେ । ଏଠି ପହ ଞ୍ଚି ଲା ପରେ ଉତ୍ପାତ ହେଉଛନ୍ତି । ଦାଦନ ଖଟିବାକୁ ଗଲା ବେଳେ କ’ଣ ସରକାରଙ୍କୁ ଜଣାଇ ଯାଇଥିଲେ? ଏମାନଙ୍କୁ ଓଡିଶା ଭିତରେ ପୂରାଇ ଦେବା କଥା ନୁହେଁ ।”, ବୋଲି କେହି କେହି ଖୋଲାଖୋଲି କହୁଥିବା ବେଳେ ସେମାନଙ୍କ ପ୍ରତି ଥିବା ଘୃଣା ଭାବ ସେଥିରୁ ସ୍ପଷ୍ଟ ରୂପେ ଜଣା ପଡୁଛି । ଏହି ଶ୍

‘ଭିକରେ ମିଳିଥିବା ସ୍ୱାଧୀନତା’ ଓ ‘ପଦ୍ମଶ୍ରୀ’ ପ୍ରତ୍ୟାହାର

ଦେଶକୁ ୧୯୪୭ରେ ମିଳିଥିବା ‘ସ୍ୱାଧୀନତା’, ସ୍ୱାଧୀନତା ନୁହେଁ ବରଂ ‘ଭିକ’ ଥିଲା ଓ ୨୦୧୪ରେ ମୋଦୀ କ୍ଷମତା ହାସଲ କରିବା ପରେ ହିଁ ଭାରତକୁ ପ୍ରକୃତ ଅର୍ଥରେ ସ୍ୱାଧୀନତା ମିଳିଥିଲା ବୋଲି କହି ବଲିଉଡ ଅଭିନେତ୍ରୀ ତଥା ‘ପଦ୍ମଶ୍ରୀ’ ପ୍ରାପ୍ତ କଙ୍ଗନା ରଣାୱତ ଏବେ ବିବାଦରେ । ଦେଶବ୍ୟାପୀ ତାଙ୍କ ଏହି ଉକ୍ତିର ବିରୋଧ ହୋଇ ତାଙ୍କଠାରୁ ‘ପଦ୍ମଶ୍ରୀ’ ପ୍ରତ୍ୟାହାର ଦାବି ହେଉଛି । କେହି କେହି ଏହା ତାଙ୍କ ଅଭିବ୍ୟକ୍ତିର ସ୍ୱାଧୀନତା ବୋଲି ଯୁକ୍ତି ବାଢୁଥିବା ବେଳେ ରାଷ୍ଟ୍ରପ୍ରଦତ୍ତ ସମ୍ମାନର ଅଧିକାରୀମାନଙ୍କ ଉପରେ ଆତ୍ମନିୟନ୍ତ୍ରିତ ଅଙ୍କୁଶ ଲାଗିବା ଉଚିତ କି ନୁହେଁ ସେ ନେଇ ମଧ୍ୟ ବିମର୍ଶ ହେବାକୁ ଲାଗିଲାଣି । ‘ପଦ୍ମଶ୍ରୀ’ ଭଳି ଏକ ସମ୍ମାନରେ ଭୂଷିତ ଜଣେ ବ୍ୟକ୍ତି ଦେଶର ସ୍ୱାଧୀନତା ଉପରେ ପ୍ରଶ୍ନ ଉଠାଇବା ଦ୍ୱାରା ଅନେକେ ‘ପଦ୍ମଶ୍ରୀ’ ସମ୍ମାନର ମର୍ଯ୍ୟାଦାକୁ ଅକ୍ଷୁଣ୍ଣ ରଖିବାରେ ସେ ଅସମର୍ଥ ବୋଲି ମଣୁଛନ୍ତି । ତେବେ ଏ ଭଳି ଭାବେ ସମ୍ମାନିତ ବ୍ୟକ୍ତିଙ୍କ ଆପତ୍ତିଜନକ ଓ ବିବାଦିତ ଉଚ୍ଚାରଣ ଓ ଆଚରଣ ପାଇଁ ସେମାନଙ୍କ ନିକଟରୁ ସମ୍ମାନ ପ୍ରତ୍ୟାହାର କରାଯାଇପାରିବ କି ଓ ସେଥିପାଇଁ ବିଧି ବ୍ୟବସ୍ଥା କ’ଣ, ତାହା ଆଲୋଚନାଯୋଗ୍ୟ । ଅତୀତରେ ପଦ୍ମ ସମ୍ମାନ ଘୋଷଣା ହେଲା ପରେ ମୌଲାନା ଅବୁଲ କଲାମ ଆଜାଦ, ସୁନ୍ଦରଲାଲ ବହୁଗୁଣା, ବାବା ଆମତେ, ବିଲାୟତ ଖାଁ, ବାଦଲ ସରକାର, କାଳୀଚରଣ ପଟ୍ଟନାୟକଙ୍କ ପରି କିଛି ସମ୍ମାନିତ ବ୍ୟକ୍ତି ବିଭିନ୍ନ କା

ଭଲଗପ - 2021

2021ରେ  ପ୍ରକାଶିତ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ 2021ରେ ପ୍ରକାଶ ପାଇଥିବା 1600ରୁ ବେଶି ଲେଖକଙ୍କର 6100ରୁ ଊର୍ଦ୍ଧ୍ୱ ଓଡିଆ ଗପ ମଧ୍ୟରୁ ପାଠକ ଓ ଲେଖକଙ୍କ ପସନ୍ଦର କିଛି ଭଲ ଗପ ବାଛିବାର ଏକ ପ୍ରୟାସ ଚାଲିଛି । ତଦନୁଯାୟୀ ପାଠକ ଓ ଲେଖକଙ୍କ ଦ୍ୱାରା  ପ୍ରସ୍ତାବ ଦାଖଲର ଶେଷ ତାରିଖ ମେ 31, 2022 ସୁଦ୍ଧା 260 ଜଣ ଲେଖକଙ୍କର 368ଟି ଭଲ ଗପର ସୂଚନା ଉପଲବ୍ଧ ହୋଇଛି ଯାହା ନିମ୍ନ ପ୍ରଦତ୍ତ ତାଲିକାରେ ସ୍ଥାନିତ । ଏହି ଗପଗୁଡିକ ମଧ୍ୟରୁ 42ଟି ଗପର ପିଡିଏଫ ମିଳି ନାହିଁ । ପିଡିଏଫ ବା ସ୍ପ୍କାନ କପି ଉପଲବ୍ଦାଧ କରାଇବା ପାଇଁ ଆଉ 7 ଦିନ ସମୟ ଦିଆଯାଉଛି । ପ୍ରତିଟି ଗପ ପଢା ହେବାକୁ ଥିବାରୁ ତାପରେ ପିଡିଏଫ ଉପଲବ୍ଧ ହୋଇ ପାରି ନଥିବା ଗପଗୁଡିକୁ ଚୟନ ପ୍ରକ୍ରିୟାରୁ ବାଦ ଦିଆଯିବ । (ସରଳ କୁମାର ଦାସ) 9437038015 saral_das@yahoo.co.in ତାଲିକାରେ ସ୍ଥାନିତ କୌଣସି ଗପ 2021 ପୂର୍ବରୁ ପ୍ରକାଶ ପାଇଥିଲେ ଲେଖକ ଓ ପାଠକମାନେ ତାହା ଜଣାଇବାକୁ ଅନୁରୋଧ । ଜଣାପଡିଲେ ସେଇଟିକୁ ତାଲିକାରୁ ବାଦ ଦିଆଯିବ । ପ୍ରତିଟି ମନୋନୀତ ଗପ ପଢା ହେବାକୁ ଥିବାରୁ ସେଗୁଡିକର ପିଡିଏଫ ପଠାଇବାକୁ ସମ୍ପୃକ୍ତ ଲେଖକମାନଙ୍କୁ ଅନୁରୋଧ । ଏକାଧିକ ଗପ ଥିବା ଲେଖକଙ୍କ ଶ୍ରେଷ୍ଠ ଗପଟିକୁ ଚୟନ କରିବା ପ୍ରକ୍ରିୟା ଆରମ୍ଭ ହୋଇଯାଇଛି । କ୍ରମିକ ସଂଖ୍ୟା ଲେଖକ ଗଳ୍ପର ନାମ କେଉଁଠି(ପତ୍ରିକା ଇତ୍ୟାଦି) ପ୍ରକାଶନ ସଂଖ୍ୟା/ ତାରିଖ 1 ଅଜୟ ମହାପାତ୍ର

ପେଗାସସ୍ ମାମଲା ସରକାରଙ୍କ ତଣ୍ଟିରେ କଣ୍ଟା ହେବ ?

ପେଗାସସ୍ ମାମଲାରେ ଏକାଧିକ ପିଟିସନର ବିଚାର କରି ସୁପ୍ରିମକୋର୍ଟର ପ୍ରଧାନ ବିଚାରପତି ଏନ ଭି ରମଣାଙ୍କ ସମେତ ଏକ ତିନି ଜଣିଆ ଖଣ୍ଡପୀଠ ଅକ୍ଟୋବର ୨୭, ୨୦୨୧ରେ ଦେଇଥିବା ଆଦେଶକୁ ଅନେକେ ‘ଐତିହାସିକ’ କହୁଥିବା ବେଳେ ଏହା ମାଧ୍ୟମରେ କେନ୍ଦ୍ର ସରକାର ଭର୍ତ୍ସିତ ହୋଇଛନ୍ତି ବୋଲି ମଧ୍ୟ କୁହାଯାଉଛି । ନାଗରିକଙ୍କ ମୌଳିକ ଅଧିକାରକୁ ଅକ୍ଷୁଣ୍ଣ ରଖିବା ପାଇଁ ଏହି ୪୬ ପୃଷ୍ଠା ବିଶିଷ୍ଟ ଆଦେଶଟି ଆଗାମୀ ଦିନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ଯାଉଥିବାରୁ ଏ ସମ୍ପର୍କରେ ବିମର୍ଶର ଆବଶ୍ୟକତା ରହିଛି । କାନାଡାର ଟରୋଣ୍ଟୋ ବିଶ୍ୱବିଦ୍ୟାଳୟ ଅଧୀନସ୍ଥ ‘ସିଟିଜେନ ଲ୍ୟାବ’ ସେପ୍ଟେମ୍ୱର ୨୦୧୮ରେ ଇସ୍ରାଏଲି ଟେକ୍ନୋଲୋଜି କମ୍ପାନୀ ଏନଏସଓ ଦ୍ୱାରା ପ୍ରସ୍ତୁତ ପେଗାସସ୍ ନାମକ ସ୍ପାଏୱେୟାର ସମ୍ପର୍କରେ ଏକ ବିସ୍ତୃତ ରିପୋର୍ଟ ପ୍ରକାଶ କରିଥିଲେ । ଏହି ସ୍ପାଏୱେୟାରକୁ ବ୍ୟବହାର କରି ଯେ କୌଣସି ବ୍ୟକ୍ତିର ଫୋନ, କମ୍ପ୍ୟୁଟର ଭଳି ଡିଜିଟାଲ ଉପକରଣଗୁଡିକୁ ସ୍ପର୍ଶ ନ କରି ମଧ୍ୟ ସେଗୁଡିକୁ ନିୟନ୍ତ୍ରଣ କରି ହେବ । ଥରେ ଏହି ସ୍ପାଏୱେୟାର ଲକ୍ଷ୍ୟରେ ଥିବା ଉପକରଣରେ ଅବସ୍ଥାପିତ ହୋଇଗଲେ ସେଥିରେ ଥିବା ସମସ୍ତ ତଥ୍ୟ (ଡାଟା) ସହ ଉପକରଣର ଇ-ମେଲ, ଟେକ୍ସଟ, ଫୋନ, କ୍ୟାମେରା, ରେକର୍ଡିଙ୍ଗ କରିବା କ୍ଷମତାଗୁଡିକ ମଧ୍ୟ ସ୍ପାଏୱେୟାର ବ୍ୟବହାରୀଙ୍କ ନିୟନ୍ତ୍ରଣକୁ ଚାଲିଯାଇଥାଏ ଓ ସମ୍ପୃକ୍ତ ବ୍ୟକ୍ତିଙ୍କ ଅଜାଣତରେ ଅନ୍ୟ ତଥ୍ୟ ମଧ୍ୟ ଉପକରଣର

ଓଡିଆ କ୍ଷୁଦ୍ରଗଳ୍ପ 2021 - ପ୍ରଥମ ପର୍ଯ୍ୟାୟରେ 252ଟି ଗପ

ଓଡିଆ କ୍ଷୁଦ୍ରଗଳ୍ପ 2021 – ପ୍ରଥମ ପ୍ରର୍ଯ୍ୟାୟରେ 252ଟି ଗପ  ପାଠକ, ଲେଖକଙ୍କ ସହଯୋଗରେ 2021ରେ ପ୍ରକାଶିତ କିଛି ଭଲ ଗପ ବାଛିବାର ପ୍ରୟାସ ଆରମ୍ଭ ହୋଇ 260 ଜଣ ଲେଖକଙ୍କର 368ଟି ଭଲ ଗପର ସୂଚନା ହସ୍ତଗତ ହୋଇଥିଲା । ଇତିମଧ୍ୟରେ ତନ୍ମଧ୍ୟରୁ ଏକାଧିକ ଗପ ଆସିଥିବା ଲେଖକମାନଙ୍କର ଗପଗୁଡିକୁ ପଢାଯାଇ ସେଥିରୁ ସମ୍ପୃକ୍ତ ଲେଖକଙ୍କ ଗୋଟିଏ ଲେଖାଏଁ ଗପକୁ ଗ୍ରହଣ କରାଯାଇଛି । କିଛି ଲେଖକଙ୍କର ଗପ ପୂର୍ବରୁ ପ୍ରକାଶିତ ହୋଇଥିବା ଓ / ବା ଧାର୍ଯ୍ୟ ଶେଷ ତାରିଖ ସୁଦ୍ଧା ପଢିବା ଲାଗି ପିଡିଏଫ ଉପଲବ୍ଧ ହୋଇ ନ ପାରିବା କାରଣରୁ ପ୍ରକ୍ରିୟା ଅନ୍ତର୍ଗତ କରାଯାଇ ପାରିଲାନାହିଁ । ଅର୍ଥାତ୍ ପ୍ରଥମ ପର୍ଯ୍ୟାୟକୁ ନିମ୍ନଲିଖିତ 252 ଜଣ ଲେଖକଙ୍କର 252ଟି ଗପ ଯାଇଛି । ଏହି ପର୍ଯ୍ୟାୟରେ ଗପଗୁଡିକୁ ପାଠକଙ୍କ ନିକଟକୁ ପଠାଇଲା ବେଳେ ଗପର ନାମ ଓ ଲେଖକଙ୍କ ନାମକୁ ଲିଭାଯାଇ ତା ସ୍ଥାନରେ କେବଳ ଗୋଟିଏ କୋଡ ନମ୍ୱର ପ୍ରଦାନ କରାଯାଉଛି । ଏହି ସମସ୍ତ ଗପକୁ 25ଟି ସେଟରେ ଭାଗ କରାଯାଇ ପ୍ରତି ସେଟରେ ହାରାହାରି 10ଟି ଲେଖାଏଁ ଗପ ରଖାଯାଇଛି । ପ୍ରତିଟି ସେଟ ଗପ ଦୁଇ ଜଣ ଲେଖାଏଁ ପାଠକଙ୍କ ନିକଟକୁ ପୃଥକ୍ ଭାବେ ପଠାଯାଉଛି । ସେମାନଙ୍କ ନିକଟରୁ ମତାମତ ମିଳିଲା ପରେ ସେଥିମଧ୍ୟରୁ ପ୍ରାୟ 50 ପ୍ରତିଶତ ଗପ ଦ୍ୱିତୀୟ ପର୍ଯ୍ୟାୟକୁ ଉନ୍ନୀତ ହେବ । ଗପଗୁଡିକ ଲେଖକମାନଙ୍କର ମୌଳିକ ରଚନା ଓ 2021ରେ ପ୍ରଥମ କରି ପ୍ରକାଶ ପାଇଛି ବୋଲି ଆଶା କରାଯାଏ । ଯଦି ଅନ୍